Isaías 40:28 - Kashibo-Kakataibo Biblia

²⁸ ¿Mitsun kaina ꞌunaniman? ¿Mitsun kaina a kuakëma ꞌain? Nukën ꞌIbu Dios ax ka uínsaranbi këñutima oi tsókë a ꞌikën, an ka kamabi me uniokin anu ꞌikë ñukamaribi uniokëxa, usa ꞌaish ka ax atsanx kana ꞌakasmati kiax kima; ꞌianan ka ax sinánñuira ꞌikë ax nëtë́tima ꞌikën.

Isaías 40:28 ပူးပေါင်းရင်းမြစ်များ

Génesis 21:33

Usa ꞌain, ka Abrahamnën Beerseba kakë me anu achúshi i tamarisco ꞌapákëxa, anuxun ka unin Nukën ꞌIbun Diosan anë rabiakëxa, axa bamatima oí tsókë a.

Job 38:18

¿Min sinánkëx kara uiti naxbaira me ꞌikë kixun kaina sinanin? ¡Min asérabi kamabi ꞌunánkë ꞌixun kamina ꞌë kati ꞌain!

Salmos 139:6

Usa ꞌain ka min ꞌakë ñukama ax ꞌën ꞌunántibëtan sënë́nmaira ꞌikën; ¡usa ꞌikë kana ax ꞌëbëtan sënë́maira ꞌikë ꞌunánkasmain!

Salmos 145:3

Nun ꞌIbu Dios an ka chaiira ꞌixun nukaman rabiti kuëënia; usa ꞌain ka an ꞌakë ñukamax uisaira kara kixun nun ꞌunántisamaira ꞌikën.

Salmos 90:2

Anun bashikama ꞌimainun me ꞌianan ënë, nëtëkama unitisama ꞌaínbi ꞌiá ꞌaish, kamina ënë nëtëkamanbi bëríbi mix Dios aira ꞌain.

Isaías 40:21

¿Mitsun kaina a küama ꞌain? ¿Ax kiabi kaina aín bana kuakama ꞌain? ¿Mitsu kara ꞌitabati ka usai ñu ꞌiakëxa kixun ñuixuama ꞌik? ¿Mitsun kaina mekama uniokëma ꞌaínbi kara uisa ñu ꞌiakëxa kixun ꞌunaniman?

Isaías 42:4

Usai ꞌika tantimabi ꞌianan kana ꞌaima kixunbi sinántima ꞌikën, kamabi menu ꞌikë unikamaxa ax kikësabiokin ꞌai sënë́ntamainun Axa parúmpapa nasíkamanu ꞌikë unikama atun ka an ꞌunánmikësabi okin ꞌati ꞌikën.”

Isaías 45:22

Usa ꞌain kamina ꞌën mitsu ië́minun ꞌënu ukanti ꞌain, uinu kara me kuainakëakëxa anu ꞌikë unikamaxi ka ꞌuti ꞌikën, ꞌëx Dios ꞌain ka bëtsi ꞌësaribi ꞌaíma ꞌiti ꞌikën.

Marcos 16:14

Usai ꞌitancëx ca Jesús aín ꞌunánmicë unicama mëcën rabë́ ꞌimainun achúshi ami atúxa mesanu bucubuan chiquiracëacëxa. Atumi chiquiracëquin ca Jesusan atu cacëxa: —An ꞌë baísquicë iscëcaman, asérabi ꞌëx baísquicë isun cacëxunbi camina, asérabi ca baísquiaxa quixun ꞌë sinántisama tan.

Marcos 9:19

Quia cuaquin ca Jesusan anu ꞌicë unicama cacëxa: —Mitsun camina Nucën Papa Dios ax ca asérabi cushi ꞌicë quixun sinaniman. ¿Mitsúxmi ꞌëmi catamënun carana uiti nëtën mitsu ꞌunánmiti ꞌain? ¿Uitishi oi carana ꞌëx mitsu cupí masá nuituti ꞌain? ꞌË ca a tuá bëxun.

Lucas 24:25

Usaquian cacëxun ca Jesusan cacëxa: —Upí oquin camina sinaniman. An Nucën Papa Dios quicë bana uni ñuixuncë unin cuënëo banax ca asérabi ꞌicë quixun camina sináncëma ꞌain.

Juan 14:9

Cacëxunbi ca Jesusan cacëxa: —¿Camabi nëtën mitsubë ꞌiabi caramina uisa uni carana ꞌai quixun ꞌë ꞌunaniman? An ꞌë iscë uni, an ca Nucën Papa Diosribi isia. ¿Usa ꞌaínbi caramina uisa cupí, nu ca Nucën Papa Dios ismit quin?

Juan 5:17

ꞌËsënaniabi ca Jesusan atu cacëxa: —ꞌËn Papan ꞌacësaribi oquin cana ꞌën ꞌain.

Hechos 13:47

Usaquinu ꞌati ca Nucën ꞌIbu Dios cuëënia quixun cananuna ꞌunanin, Jesucristo ñuiquian ësoquin aín bana cuënëo isquin: Israel unicamaishima bëtsi unicamaribi aín sinan upí ꞌinun ꞌiminun cana mi ꞌimian. ꞌImianan cana aín ꞌuchacama tërë́ncë ꞌaísha ꞌënan ꞌinunmi camabi menu ꞌicë unicama ië́minun mi ꞌimian.

Romanos 16:26

Nucën Papa Diosan sinánmicëxun ca aín unicaman, Cristo ca uti ꞌicë quixun cuënëocëxa. Usai ca ꞌiti ꞌicë quixun ca Nucën Papa Dios, axa bamatimoi tsócë, an mëníocëxa. A bana cuënëo ꞌicëbi ca uisai quicë cara ax ꞌicë quixun unin ꞌunánma ꞌicën. ꞌUnánma ꞌaínbi ca bërí camabi nëtënu ꞌicë unicaman Cristomi catamëquin aín cuëëncësabi oquin ꞌanuxun ꞌunánti ꞌicën.

1 Corintios 2:16

Aín bana cuënëo ca quia: “¿Uin cara Nucën Papa Diosan sinan ꞌunanx? ¿Uin cara a ꞌunánmiti ꞌic? An usaquin ꞌunánti uni ca ꞌaíma ꞌicën”. Usa ꞌaínbi cananuna nun Nucën Papa Diosan Bëru Ñunshin Upitan sinánmicëxun Cristonën sináncësaribi oquin sinanin.

1 Corintios 6:16

¿Axa xanu ꞌatimabë ꞌicë uni ax ca abë achúshisa ꞌicë quixun caramina ꞌunaniman? Nucën Papa Diosan bana cuënëo quicësabi oi ca uni xanubë rabë́ ꞌaíshbi achúshisa ꞌicën.

1 Corintios 6:19

¿Aín Bëru Ñunshin Upí a Nucën Papa Diosan mitsu ꞌináncë, ax ca minu ꞌicë quixun caramina ꞌunaniman? Mitsux camina anu ax ꞌicë, a ꞌain. Usa ꞌain camina miishima ꞌain, ax ca min ꞌIbu ꞌicën.

1 Corintios 6:9

¿Aín nëtënu abë ꞌiisa ꞌaíshbi ca an ñu ꞌaisama ꞌacë uni aín nëtënu Nucën Papa Diosbë ꞌitima ꞌicë quixun caramina ꞌunaniman? Camina ꞌunánti ꞌain, ainanmabi xanu cuëëncë unicama ꞌimainun an Nucën Papa Diosmi sinánquinma unin ꞌacë ñu rabicë unicama ꞌimainun aín xanuma ꞌaínbi bëtsi unin xanubë ꞌicë uni ꞌimainun xanúxmabi uni itsibë ꞌicë uni,

Deuteronomio 33:27

Nukën ꞌIbu Dios axa këñutima oi tsókë an ka mitsu ꞌakinti ꞌikën; an ka ax kushiira ꞌixun ënkinma nu ꞌakinia, usa ꞌixun ka an numi nishkë uni abámitankëxun, këñukin ꞌanun nu ꞌamiakëxa.

Filipenses 1:6

Cana ꞌunanin, an mitsu Jesucristomi catamënun sinánmicë ꞌixun ca axa utëcë́nti nëtë ꞌitámainun Nucën Papa Diosan Jesucristosaribi ꞌaish upí ꞌinun mitsu ꞌimia.

1 Timoteo 1:17

Usa ꞌain cananuna Nucën Papa Dios, axa usabi ꞌApuira ꞌiá ꞌaish cëñútimoi usabi ꞌiti, a unin aín bërúnbi iscëma, ꞌianan an camabi ñu ꞌunáncë, axëshia Dios, a xënibua ꞌaínbi rabiti ꞌain. Usai ca ꞌiti ꞌicën.

Hebreos 9:14

Ñuina rëcë aín imi cupí uni ꞌicësamaira oi cananuna Cristo bama cupí nun ꞌucha tërë́ncë ꞌaish upí ꞌiti ꞌain. Nucën Papa Diosan Bëru Ñunshin Upí, axa usabi ꞌiá ꞌaish usabi ꞌicë, ax abë ꞌain ca Cristo, ax ꞌuchañuma ꞌaíshbi bamatsianxmabi, nun ꞌuchacama tërë́ncë ꞌinun bamacëxa. Xënibua ꞌaínbi abë ꞌitimoinu bamati ꞌicëbi ca nun ꞌuchacama tërë́nquin, ax aín imi ꞌapati bama cupí, Nucën Papa Dios, axa bamatimoi tsócë, a rabinu ax cuëëncësabi oi ꞌinun nu ꞌimia.

1 Samuel 2:10

Nukën ꞌIbun ka axa ami nishkë unikama këñunun ꞌimiti ꞌikën, ꞌimikin ka naíkamë ꞌëonuax kanákamë ꞌëo banarui ꞌikin atunu ꞌibúkin këñunun ꞌimiti ꞌikën. Usakin ka Nukën ꞌIbun kamabi menu ꞌikë unikama ꞌati ꞌikën; ꞌanan ka anbia ꞌapu ꞌinun kaiskë ꞌapu a kamabi nëtëan kushiñu ꞌinun ꞌimiti ꞌikën.