Isaías 40:11 - Kashibo-Kakataibo Biblia

¹¹ ꞌIanan ka an ñuina bërúankë unían aín ñuina bërúankin; aín ñuinakama nuibakin aín shikami okin ꞌikúkin bixun tuianan, axa bërí bakënkëkamaribi bëruinra okë usaribi okin ꞌaia.

Isaías 40:11 ပူးပေါင်းရင်းမြစ်များ

Génesis 33:13

Kakëxun ka Jacobnën ësokin kakëxa: —Mix kamina ꞌën nuibakë xukë́n ꞌain, minbi kamina ꞌunan uniakë xuratsu ax kuani ka bënëtishi atsania ꞌimainun kana sinanin ꞌën ovejakama ꞌimainun vaca tuáñu akamaxribi atsani ka achúshi nëtë́inshi kamáxëshi bamati ꞌikën; ꞌianan ka kamabi ovejanën tuakamaxribi bamati ꞌikën.

Génesis 49:24

ꞌaínbi ka Josénën rëbúnki kaman aín pëñan kushi uni ꞌixun ainra an ꞌakatsikixun ꞌakëxunbi aín pëñan bërëkinma ꞌati ꞌikën; usa ꞌain kana mi asabika kixun kain. ꞌËn ꞌIbu Dios a ꞌën rabikë kushiira kushi, ¡An ka an ñuina bërúankë unisa ꞌixun Israel unibu bërúanti ꞌikë!,

Salmos 100:3

Usai ꞌikin kamina upíokin Nukën ꞌIbu ax ka Dios ꞌikë kixun ꞌunánkanti ꞌain; an ka nu uniokëxa usa ꞌaish kananuna ainan ꞌain; nux kananuna ain unikama ꞌain, ¡usa ꞌikë ka unían ain ñuina ꞌarakakësa usaribi ꞌikë nu bërúaia!

Salmos 27:10

ꞌËn papabëtan ꞌën titan rakaniabi kamina, mix Nukën ꞌIbu ꞌixun ënkinma ꞌë isti ꞌain.

Salmos 37:3

Nukën ꞌIbumi katamëkin kamina upí ñuishi ꞌati ꞌain, usai ꞌi kamina ënë menu tsóti Dios kuëënkësabi oi ꞌiti ꞌain.

Salmos 80:1

An Israel unikama bërúankë; an ka Israelnën rëbúnkikama achúshi ñuina aín ꞌibun bërúankësa okin bërúanti ꞌikën, mix anu ꞌikë anu ka querubinkama ax ꞌikën, ¡usa ꞌain kamina bërí nukaman ñukákëxun kuati ꞌain!

Isaías 42:3

pëkú pëchi sitan ꞌakin pësínpakë aka xanun ꞌaisama ꞌikë putia. Usa ꞌaínbi ka ꞌën bakë bëchikënën uni ꞌaisama ꞌaísha ꞌuchañu ꞌainbi ainan ꞌisatania kuantanun katima ꞌikën. Tirí bënabuti kuínkësa ka axa ami sinanibi ami kushikëma uni ax ꞌikën. Usa unibi ka aina ꞌiaxma kuantanun katima ꞌikën. Anun kamabi ñu ꞌaisama këñuti nëtë utamainun ka aín kushinbi amia katamëkë unikama ꞌakinti ꞌikën.

Isaías 63:11

Usakian ꞌakëxun ka bërámaira ñu ꞌia kama a sinanan Moisésnën aín unikama ië́mia a sinánkëxa, sinani ka atúxbi ñukákanani kikankëxa: “¿Uinu kara Dios Nilo kakë bakanu nankëbi an Moisés ië́mia ꞌixuan, an ñuina bërúankë uni ꞌakësokian aín unikama bërúanun ꞌamia ax ꞌit? ¿Uinu kara an Moisés aín bëru ñunshin upí ꞌinan ax ꞌit?

Jeremías 31:10

Bëtsi me kamanu ꞌikë unikama, mitsun kamina ësai kana ꞌëx ki kuati ꞌain, ꞌianan kamina parúmpapa kuëbí ꞌura tsókë unikama aribi ñuixunti ꞌain: Nukën ꞌIbun ka Israel unibu ꞌikë nukama abístanun ꞌimiakëxa, ꞌaínbi ka amiribishi timëtëkënkin bërúanxun an ñuina bërúankë unían aín ovejakama bërúankë usaribi okin ꞌati ꞌikën.

Jeremías 31:8

Ka kuat, ꞌënbi kana aín tsipumia ꞌikë me anua bëanan, uinu kara me kuainakëakëxa anuabi timëbëtsinkin mitsu bëtëkënti ꞌain. Bëkëbë ka atubë bëxuñu uni, aín niti bëtsikë unikama, xanu ñuitsíkëkama ꞌimainun aín tuá bakënkëkama; ¡atux ka ꞌaisamaira uni ꞌaish amiribishi utëkënkanti ꞌikën!

Ezequiel 34:15

ꞌËnbi kana ꞌën unikama an ñuina bërúankë unin ꞌakësokin bërúanti ꞌain, ꞌimainun kana ꞌënbi tantinun ꞌimiti ꞌain. ꞌËx Dios ꞌaish kana ësai kin.

Ezequiel 34:16

ꞌËnbi kana ꞌën unikama ovejakama ꞌarakakë ꞌikësaia amami amami kuani nëtë́këkama a bëtëkënti ꞌain, bëkin kana axa ꞌinsínkë akamaribi ronkin chupa sanin aín taëmi ñukë tëkërëkaxuanan, axa ñusmakëkamaribi kushinun bërúanti aín, ꞌanan kana xuabu ꞌimainun aín kushibu akamaribi bërúankin. ꞌËn kamabi atu bërúanti ꞌain.

Ezequiel 34:2

“Mix uni ꞌixun kamina ꞌë ñuikin an, Israel unikama bërúankëkama kati ꞌain: Ësai ka Dios kiaxa: ¡An Israel unibu bërúankë unikama ax ka atuxi bërúankatia! Usa ꞌain ka an bërúankë unikaman aín ñuina bërúankë usaribi ꞌixun ꞌën uni bërúanti ꞌikën.

Ezequiel 34:23

ꞌËn kana ꞌën uni David axa utëkënun bëti ꞌain, a kana axëshi ꞌapu ꞌixuan ꞌën unikama bërúanun ꞌimiti ꞌain, ꞌimikëxun ka an ñuina bërúankë unisa ꞌixun ꞌën unikama bërúanti ꞌikën. Ax ka an atu bërúankë unisa ꞌiti ꞌikën.

Ezequiel 34:31

Mitsux kamina ꞌën ꞌarakakë ñuinakamasa ꞌain, usa ꞌaish kamina ꞌën ꞌarakakë ñuinakama ꞌën menu ꞌikësa ꞌain. ꞌËx Dios ꞌaish kana ësai kin. ꞌËx kana atun ꞌIbu ꞌain.”

Ezequiel 37:24

ꞌËn uni David aín rëbúnki achúshinëx ka ꞌapu ꞌianan, an atu bërúankë uni achúshishi ꞌiti ꞌikën, usa ꞌixun ka an Diosan bana kikësabiokin ꞌati ꞌikën.

Miqueas 5:4

Usa ꞌain ka a ꞌapu aín unikama bërúankin ꞌakinun aín kushi ꞌinánti ꞌikën, usakin ꞌakëx ka a unikama upiti tsóti ꞌikën, usakin ꞌakëbë ka Diosan ꞌakë ñu chaiira ax kamabi menuxun ꞌunánkë ꞌiti ꞌikën.

Hebreos 13:20

Nucën Papa Dios, an aín unicama abë upí ꞌinun ꞌimicë, an ca Nucën ꞌIbu Jesucristo, an aín unicama bërúainracë, a bamacëbi baísquimiacëxa. An Jesús aín imi ꞌapati bamacë cupí nun ꞌuchacama tërë́nquin nux xënibua ꞌaínbi ainan ꞌinun ꞌimicë,

1 Pedro 2:25

Carneronëxa ꞌibuñuma ꞌaish ꞌicësari camina mitsux ꞌiacën. Usa ꞌiá ꞌaíshbi camina sinanati Cristomi catamëan. Amia catamëcëxuan aín ꞌibun carnero bëruancësa oquin ca an upími ꞌinun mitsu bërúanquin ꞌaquinia.

1 Pedro 5:4

Usoquin ꞌaia ca Jesucristo, unin ꞌacësamaira oquian an aín unicama bërúancë, an utëcënquin mitsu —asábi ca —quixun catancëxun aín nëtënuaxmi xënibua ꞌaínbi abë cuëënun mitsu ꞌimiti ꞌicën. Ënë nëtënuax cuaiquin canania uisa ñu cara ꞌináncëxun bitsia uni cuëëncëbëbi ca an bicë ñu chëquia. Usaía uni ꞌicë ꞌaínbi camina mitsux xënibua ꞌaínbi Nucën Papa Diosbë ꞌaish cuëënti ꞌain.