Isaías 2:2 - Kashibo-Kakataibo Biblia

² Nëtë xënibukëbë ka anúan ꞌiti nëtë ꞌikëbë anua Diosan xubu ꞌikë bashi ax bëtsi bashikamasamaira ꞌinuxun ꞌaia. Usa ꞌain ka a bashixa bëtsi bashikamasama ꞌain bëtsi menu ꞌikë kamabi unikamax anu uti ꞌikën;

Isaías 2:2 ပူးပေါင်းရင်းမြစ်များ

Génesis 49:1

Usa ꞌain ka Jacobnën kamabi aín bëchikëkama anua unun kixun kamiakëxa: “Kamikëxa anu rikuatsinkë ka ꞌë ꞌurama kamina ukanti ꞌain kixun kakëxa, bërí kana usaími ꞌëx ñukëbë ꞌikanti bana mitsu ñuixunti ꞌain:

Salmos 2:8

ꞌË kamina bëtsi bëtsi mekama minan ꞌinun ñukáti ꞌain, ñukákëxun kana uinu kara me kuainakëtia abi ꞌën mi ꞌinánti ꞌain.

Salmos 22:27

Kamabi ñakánu ꞌikë Israel unibu ꞌimainun, bëtsi nëtënu tsókë unikamanribi ka ami sinánkin Dios rabiti ꞌikën; ¡usakin ꞌai ka an ismainunbi rantinpuruni tsóbukanti ꞌikën!

Salmos 22:28

Dios ax ka ꞌapuira ꞌikë usa ꞌain, usa ꞌixun ka kamabi me kuainakë anu ꞌikë ëmakamanu ꞌikë unikama ax kikësabiokin ꞌanun ꞌamia.

Salmos 72:8

¡ꞌAnan ka parúmpapa itsi parúmpapa itsi anuabi ꞌanan, Éufrates kakë baka anuabi uinu kara me kuainakëakëxa ax ꞌapu ꞌixun ainan ꞌinun ꞌimiti ꞌikën!

Salmos 87:1

A mi ëma biruti Diosan ëma kakë, ax ka upí kakë bashi anubia ꞌamia ꞌikën.

Salmos 87:2

Diosan ka Jerusalénnu ꞌikë ëma xëkuëkama bëtsi ëmakama Israelnu ꞌikë ꞌakësamaira okin upíokin bërúaia, Israelnën anu ꞌinuxun xubukama ꞌasamaira okin.

Isaías 49:6

ax ka ësai kia: ꞌËn uni ꞌixunmi min Jacobnën rëbúnki, Israel unikama axa ñuima ꞌiakama a aín ñakánubi utëkënun ꞌakinkë ax ka ꞌën iskëx sënë́nmara ꞌikën, ꞌën kana ꞌën tirísa ꞌixunmi bëtsi menu ꞌikë unikama bana ñuixuanan, uinu kara me kuainakëakëxa anubi kuankin bana ñuinun mi ꞌimiti ꞌain.

Isaías 60:3

Usai ꞌikëbë ka bëtsi bëtsi ëmanu ꞌikë unikama Dios kuëënkësabi oí tsóti tirínu ꞌikësa ꞌiti ꞌikën, ꞌimainun ka bëtsi bëtsi ëmanu ꞌikë ꞌapukama atúxribi ichu ichukikë an pë́kakësanu ꞌiti ꞌikën.

Jeremías 23:20

Nukën ꞌIbu nishkë ax ka uisakin kara ñu ꞌaisatania usakin ꞌaxma tantitima ꞌikën. Usa ꞌain ka anun mitsun ax ka asérabi ꞌikë kixun sinanan, ënë ñukama upíira okin kuati nëtë ꞌiti ꞌikën.

Jeremías 26:18

“Anua Ezequías Judá menu ꞌapu ꞌikë a barikaman ka Miqueas Moréset kakë ëmanu ꞌikë an, kamabi uni Nukën ꞌIbun anën Judá menu ꞌikë unikama ësokin kakëxa: Nukën ꞌIbu kamabi kushiñu ax ka ësai kiaxa. Sión ëma ax ka unin anu ñu ꞌapáti me buinakë usaribi bërúti ꞌikën, Jerusalén ëmax ka anu uni ꞌikëma me ꞌi ñankáishi ꞌiti ꞌikën, usa ꞌain ka aín bashi anuxun a rabiti xubu ꞌikë anu chuku ꞌatimashi kóti ꞌikën.

Jeremías 31:12

Usakian chikinkëx utankëx ka kuëëni kantai Jerusalénnu ꞌikë matákamanuax kuëënti ꞌikën, usai ꞌia Nukën ꞌIbun ꞌakinkin ñu ꞌinánkëx ka: ꞌitsaira kuëënkanti ꞌikën kuëënika, trigo ꞌimainun uvas baka ꞌakë vino ꞌimainun xëni ꞌianan, ovejakama ꞌimainun vacakamañu ꞌiti ꞌikën. Usa ꞌain ka a unikamax an ië́mikëx amiribishi ꞌain ꞌIbu Diosmi katamëti aín menu tsókë ꞌaish unin aín xubu rapasu ꞌapáxun ꞌupiokin ñu bërúankësa usaribi ꞌaish, amiribishi ñusmatëkënima kushi ꞌikanti ꞌikën.

Daniel 2:28

Usa ꞌaínbi ka naínu achúshi Dios an ꞌunántisama ꞌikëbi ñu ꞌunánkëira anu ꞌikën, an ka mi ꞌapu ꞌikë uisai karamina ꞌinuxun ꞌain mi ꞌunánmiaxa. Usa ꞌain kana ꞌën ꞌapu ꞌixunmi ꞌuxun namákë akama mi ñuixunti ꞌain:

Daniel 2:35

Usakian ꞌakëx ka bënëtishi, manë tunan, me tëi, manë panshian, manë uxua a ꞌimainun kuri akamaxi baritiañu me kupúkë iskësaribiti ꞌiaxa, ꞌianan ka baritiañu barionkin tákaia trigonën chua aín bëru a bërutamainun suñun aín chua chamarabi bërutanuma buánkë usaribiti ꞌiaxa. ꞌAínbi ka an ñu nitsínkë chakakë maxá chaiira ax aín bashi chaiira ꞌinun unikin mekama tsitsiruaxa.

Daniel 2:45

Usa ka minmi namákin aín bashinuaxa uínbi tarankëmaxi ukian me putusa ꞌitánun manë tunan, ꞌianan manë uxua, manë panshian, me tëi, ꞌimainun kuri, akama chakabëtsini aín bashinuax ꞌia iskë ax ꞌikën. Dios chaiira ꞌaish kushiira an ka usaía ꞌiti ñukama mi ismiaxa. Usa ꞌain ka minmi namákë ax asérabi ꞌimainun ꞌën mi ñuixunkë axribi asérabi ꞌikën.

Oseas 3:5

Usai pain ënë ñukama ꞌikë ꞌain ka Israelkaman ami sinanatëkënkin, Nukën ꞌIbu Dios rabiti sinántëkënti ꞌikën, ꞌimainun ka atun ꞌapu ꞌia David aín rëbúnki achúshi atun ꞌapu ꞌiti ꞌikën. Anuan ënë nëtëkama këñuti a nëtë ꞌikëbëtan ka ami rakuë́kin Dios upíokin a ꞌakinun kixun ñukáti ꞌikën.

Malaquías 3:12

Kamabi menu ꞌikë unikaman ka a unikama ka upí tsotia kixun mitsu kati ꞌikën, mitsux kamina achúshi me unin kuëën irakë a bitankëx anu ꞌiti ꞌain. ꞌËx Dios kamabi kushiñu ꞌaish kana ësai kian.”

Números 24:14

Asabi ka usa ꞌain kana ꞌën menubi kuanti ꞌain; ꞌaínbi kana kuanuxun pain ësokin mi kain, uisai kara a unikamabë min rëbúnkikama ꞌinuxun ꞌaia.

Hechos 2:17

Nucën ꞌIbu Diosan ca caia: Mecama cëñúcëma pain ꞌain cana unicamanu ꞌën Bëru Ñumshin Upí atubë ꞌinun xuti ꞌain. Xucëxun ca Israel unicama, xanu ꞌimainun bëbu, anbi ꞌëx quia bana uni ñuixunuxun ꞌaia. ꞌImainun ca bënábu unicamanribi ꞌën ismicëxun ñu isnuxun ꞌaia. Caniacëcë unicamanribi ca ꞌën ꞌamicëxun namánuxun ꞌaia.

2 Timoteo 3:1

Ësaquinribi camina ꞌunánti ꞌain, anúan Jesucristo utëcënti nëtëa ꞌurama ꞌain ca aín unicamax ꞌaisamaira tëmëranuxun ꞌaia.

Hebreos 1:2

Bëráma usaquin nucën raracama ꞌunánmia ꞌaínbi ca an xucëxun aín Bëchicë anbi aín Papan bana unicama ñuixuancëxa. Nucën Papa Diosan ca aín Bëchicë camabi ñu uniomiacëxa. Usa ꞌain ca an camabi ñu, naíu ꞌicë ángelcama ꞌimainun, ënë menu ꞌicë unicama ꞌimainun, camabi ñu unio ꞌicë aín Papan a ꞌibuamiacëxa.

2 Pedro 3:3

Ësoquin camina ꞌunánti ꞌain, anúan Jesucristo utëcënti nëtëa ꞌurama ꞌain ca ꞌitsa uni aín cuëëncë ñuishi ꞌai, anun Jesucristonan ꞌiti bana ꞌatimaquin ñui, ami cuaiti ꞌicën.

Apocalipsis 11:15

Usa ꞌain ca a ángelnënbi aín manë banañu banoxa. Banocëbëtan cana naínuax sharati munuma banaia ësai quia cuan: Bërí ca Nucën ꞌIbu Dios ꞌimainun Cristo, Nucën Papa Dios an uni ië́minun caísa, axëshi ꞌApu ꞌia. Nëtë́timoi usabi ꞌinux ca ꞌia.

Apocalipsis 20:4

Acama istancëxun cana anu tsóti cha bëtsi bëtsi isan. Anu ca an uni raíri ñu upí cara ꞌaxa, ñu upíma cara ꞌaxa quixun isti, acama tsócë ꞌiaxa. Acama isanan cana axa —ꞌëx cana Jesúsnan ꞌai —quiquin bana ñuixuncë cupí tëbíscacë unicama, ꞌimainun axa Nucën Papa Diosan bana cuacë cupí tëbíscacë unicama, acaman ñunshínribi isan. Acamax ca ꞌitsa maxcáñu ꞌianan ꞌitsa matúxca ñuinacanꞌëo a rabima, ꞌianan a tanquin unin ꞌacë ñu a rabima, ꞌianan ainan ꞌinun ꞌunántioquin aín bëmánan ꞌimainun aín mëcën cuënëocëma ꞌiaxa. ꞌËn iscëx ca acamax bama aíshbi baísquiaxa. Baísquitancëx ca Cristobë mil baritia ꞌapu ꞌiaxa.