Isaías 1:23 - Kashibo-Kakataibo Biblia23 Mitsun ꞌapukamax ka bana kuakëma ꞌianan, an unin ñu bainu bëaraxun mëkamakë unikamabë ꞌunánankë ꞌikën. Usa ꞌixun ka akaman kuríkinën kupíokëxun an ñu ꞌupima ꞌakëma unibi ꞌatima ñu isa ꞌaxa kixun kanan ñu ꞌinainshiti akamaribi baria. ꞌIanan ka papañuma ꞌimainun titañuma tuákamaribi uisakin kara ꞌakinti ꞌikë usakin ꞌakinima ꞌianan, xanu kasunamëkë akamaribi tëmërai tsótiabi ꞌakinima. အခန်းကိုကြည့်ပါ။ |
Isaías 1:23
47 ပူးပေါင်းရင်းမြစ်များ
Ësai ka Dios kiaxa: “Bërí kamina uisai kaina ꞌikanti ꞌai kiax ënë bana mëníonanti timë́ti ꞌuti ꞌain: Mitsun ꞌuchakamaxa uvas baka chininkë chëxëira iskësa ꞌikëbi kana, axa matsi irukë uxuira uxu iskësa ꞌitánun mitsu mëníoxunti ꞌain; atun ꞌuchakamaxa chupa bëtsi bëtsi ñun pukukë iskësaribi ꞌikëbi kana, ꞌën xapu uxuira uxu iskësa ꞌitánun mëníokin tërënxunti ꞌain.
Ësai ka Nukën ꞌIbu asérabi kiakëxa: “¡Uisai kara mitsun bakë bëchikë bëbu ꞌimainun ꞌini xanukama atun kakëxun ꞌën bana kuaisama tania, usa ꞌixun atun ꞌëbë banaxunmabi ñu ꞌakatsi kixun atúnbi sinania, sinánkin ka usakin kananuna ñu ꞌati ꞌai kixun ꞌën sinánmikëxunmabi atúnbi sinánxun ꞌaia, usakin ꞌai ka atúxbi amiribi amiribi ꞌuchakania!
An upí ñuishi ꞌai asérabi këmëima banakë uni ꞌianan, an bëtsi uni aín ñu kuëëniamabi bikuantankëx anun ñuñukëma ꞌianan, bëtsi ꞌatima oxunun kixun bëtsin ꞌinainshikë kuríki bikëma a ꞌianan, an bëtsi uni usakin kananuna uni rëtëti ꞌai kixun kakëxunbi kuëënxunkëma ꞌianan, an uisaxunbi usakin kana ñu ꞌatima ꞌati ꞌai kixun sinánkëma uni,
ꞌËn kana bëtsi bëtsi ñu ꞌaia ꞌitsaira nëtë́tisamaira ꞌinun atux ꞌuchakëkama a ꞌunan: Usa ꞌixun ka uni upíbu a ꞌatima okin anuxun bana mëníokë anuxun ꞌapukaman kuríki bitsia uni ꞌatimakama anun rabanan në́kin, ka uni upíkama ꞌatima oia, usa ꞌain ka ñuñu unikaman bana mëníokin uni ñuñuma a ñuumasara ꞌikë kanania.
Axa Jerusalén ëmanu ꞌikë an bana mëníokë unikama an ka uin kara kupíoia a ëanan an kupíokë a ꞌatima oti sinania, ꞌimainun ka sacerdotekaman kupíokëxunshi uni ꞌunánmiti kuëënia, ꞌianan ka an Dios kikë bana ñuikë unikamanribi kuríki kupíshi abi sinántankëx ësai kia: Nukën ꞌIbu ka nubë ꞌikën usa ꞌixun ka ñu ꞌatima inútima rabanan Nukën ꞌIbun nu bërúaia.
Ësai ka Dios kamabi kushiñuira ax kia: ꞌËx kana uisa ñukama kaina mitsun ꞌa kixun isi uti ꞌain. Isanan kana anuxuinshi an ñunshinan ꞌamikëxun ñu ꞌati sinánkë, an aín xanumabi bëtsi unin xanu aín nami ꞌakë, axa këmëi usai ka ñu ꞌiti ꞌikë kiax kikë ꞌimainun tëmixunbi an ñu mëëmikë unikama kupíokëma ꞌimainun, raëmëkë xanukamakëñun ꞌibuñumakë tuákama ꞌianan an bëtsi menu tsókë unikama ꞌatima okë ꞌimainun, an ꞌëmi rakuënkin ꞌëx kikësabiokin ꞌakëma akamaribi kana ꞌatima oti ꞌain.
An Nucën Papa Dios cuëëncësabi oquin ꞌacë unin ca ësaquin ꞌati ꞌicën: Papañuma titañuma tuácama ꞌimainun casunamëcë xanucamaribi ꞌaquinsa ꞌianan masá nuitutia isquin ca ꞌaquinti ꞌicën. ꞌAquianan ca an Nucën Papa Diosmi sinánquinma ënë menu ꞌicë ñuishi sináncë unin ꞌacësaribi oquin ñu ꞌaisama ꞌatima ꞌicën.
ကြော်ငြာတွေ