Hechos 9:13 - Kashibo-Kakataibo Biblia

¹³ Usaquian cacëxun cuaquin ca Ananíasnën cacëxa: —Itsaira unin ca ꞌë caxa, a unin ca ꞌaisama ñu ꞌaquin, axa Jerusalénuax mimi catamëcë unicama bëtsi bëtsi oia quixun.

Nukën 'Ibu Diosan ain unikama 'inan ain bana

¹³ Usaquian cacëxun cuaquin ca Ananíasnën cacëxa: —Itsaira unin ca 'ë caxa, a unin ca 'aisama ñu 'aquin, axa Jerusalénuax mimi catamëcë unicama bëtsi bëtsi oia quixun.

Hechos 9:13 ပူးပေါင်းရင်းမြစ်များ

Ezequiel 3:14

Usa ꞌain ka Diosan kushi anua ꞌë chikíanxa, chikinkëx kana anuax masá nuitukë ꞌianan nishkë kuan, kuankinbi kana Diosan aín mëkënanbi kushiokin tuinkësa tan.

Mateo 10:16

ꞌËn cana carnero ꞌinúan nëëcë nëbë́tsinu ꞌicësaribi ꞌinun mitsu xutin. Nëëquin ca ꞌinúanën carnero binuxun bëarati ꞌicën. Usaribi oquin ca axa mitsumi nishcë unin mitsu ꞌatimocatsi quixun sinánti ꞌicën. Usaquian sináncëbë camina bërúancati ꞌain, runu ꞌicësaribiti. Bërúancanan camina axa mitsumi nishcë uni ami nishi abë ꞌatimonantima ꞌain, numacuru ꞌicësaribiti.

Hechos 22:4

Usa ꞌixun cana axa Jesucristomi sináncë unicama bëtsi bëtsi ocën. Bëtsi bëtsi oquin ꞌanan cana bëbu ꞌimainun xanuribi nëaxun tëmëramianan sipuanuxun buáncën.

Hechos 8:3

Usa ꞌain ca Saulonën Jesucristomi catamëcë unicama cëñutisa tanquin xubucama oi atsínquin bëbu ꞌimainun xanuribi nirínbianquin sipuanuxun buáncëxa.

Hechos 9:1

Usa ꞌain ca Saulo, axa Nucën ꞌIbu Jesúsmi catamëcë unicama cëñucatsi quiax, atumi xuamati nishacëxa. Nishquin ca sacerdotenën cushicaman ꞌapu anu cuanxun cacëxa:

Hechos 9:21

Usoquian Saulonën bana ñuixunia cuati ca unicama ratuti a ñui quiacëxa: —Ënë unix ca an Jerusalénuxun ami catamëquin a ië́minun Jesús ñucácë unicama tëmëramicë, a ꞌicën. Ax ca sacerdotenën cushicamanu buánuxun ënu ꞌicë unicamaribi bitsi uaxa. ¿Usa cat?

Hechos 9:32

Usaía ꞌimainun ca Pedro bëtsi bëtsi ëmanu cuani Lida ëmanuribi axa Jesucristomi catamëcë unicama isi cuancëxa.

Hechos 9:41

Usariashi ca Pedronën mëínquin biruacëxa. Birutancëxun ca axa Jesucristomi catamëcë unicamacëñunbi casunamëcë xanucamaribi cuënxun axa baísquicë xanu atu ismiacëxa.

Romanos 1:7

Ënë quirica cana cuënëoxunin, Roma ëmanuaxmi Nucën Papa Diosan nuibaquin ainan ꞌinun caíscë ꞌaish ax cuëëncësabi oi ꞌicë, micamaishi. Nucën Papa Dios ꞌimainun Nucën ꞌIbu Jesucristonën nuibaquin ꞌaquincëxmi chuámarua bucucanti cana cuëënin.

Romanos 15:31

Uisabi ꞌë oxunma ꞌanuan Judea nëtënu ꞌicë axa Jesucristomi catamëcëma unicama sinánminun camina Nucën Papa Dios ñucáti ꞌain. Ñucánan camina ꞌën Jerusalénu ꞌicë axa Jesucristomi catamëcë unicama ꞌinánti buáncë curíquia atun cuëënquin binuan sinánminun Nucën Papa Dios ñucáti ꞌain.

Romanos 16:15

ꞌImainun camina Filólogo, Julia, Nereo ꞌimainun aín chirabacë, ꞌimainun Olimpas, ꞌimainun acamabë ꞌicëcama axa Jesucristomi catamëcë, acama bërúanxa ꞌinun ꞌë caxunti ꞌain.

Romanos 16:2

Usa ꞌicë camina mitsúxmi Nucën ꞌIbu Jesucristonan ꞌaish bëtsibë bëtsibë ꞌaquianancësabi oquin Feberibi upí oquin bixun ax cuëëncësabi oquin ꞌaquinti ꞌain, an ꞌitsa xanu ꞌaquianan ꞌëribi ꞌaquincë cupí.

1 Corintios 1:2

Mitsúxmi Corinto ëmanuax Jesucristomi catamëcë ꞌicë, cana cuënëoxun ënë quirica mitsu buánmin. Mitsux Cristo Jesúsmi catamëcë ꞌaish camina Nucën Papa Diosnan ꞌain. An ca ax cuëëncësabi oíshi ꞌinun mitsu caísacëxa. Camabi menu ꞌicë unicama, an Nucën ꞌIbu Jesucristo aín ꞌuchacama tërë́nxunun quixun ñucácë, a unicama usai ꞌinun caíscësaribi oquin ca Nucën Papa Diosan mitsu caísacëxa. Jesucristo ax ca a unicaman ꞌIbu ꞌianan nun ꞌIburibi ꞌicën.

1 Corintios 16:1

Axa Jesucristomi catamëcë unicama curíqui ꞌinánti ñuiquinmi ꞌë ñucácëxun cana mitsu cain, ꞌën Galacia menu ꞌicë unicama cacësabi oquin camina mitsúnribi curíqui ꞌinánti ꞌain.

1 Corintios 6:5

Usai ꞌitimimi rabínun quixun cana usaquin mitsu cain. ¿Mitsúxbi caramina usa ñu mëníonantima ꞌain?

Efesios 1:1

ꞌËx cana Pablo, Nucën Papa Dios cuëëncësabi oquin aín bana ñuixunun Jesucristonën caísa ꞌain. Usa ꞌixun cana Efeso ëmanuaxmi Cristo Jesúsmi sinani ami catamëti Nucën Papa Diosnan ꞌicë ënë quirica mitsu buánmin.

Filipenses 1:1

ꞌËx Pablo ꞌixun cana Timoteobëtan mitsu quirica buánmin. Jesucristonën casabi oquin aín bana uni ñuixuncë cananuna nux ꞌain. Micamaxmi Filipos ëmanu ꞌaish Jesucristomi sinania cana mitsun cushicama ꞌimainun an axa Jesucristomi catamëcë unicama ꞌaquincë unicamaribi ënë quirica buánmin.

Filipenses 4:22

Axa Jesucristomi catamëcë ënu ꞌicë unicamabëtan ca atúxribi Jesucristonan ꞌixun Romanu ꞌicë ꞌapu Césarnën xubunu ꞌicëcamanribi bërúanxmi ꞌicanun mitsu canun ꞌë caxa.

Colosenses 1:2

Colosas ëmanuaxmi Cristomi sinani ami catamëti Nucën Papa Diosnan ꞌicë, cana ënë quirica mitsu buánmin. Nucën Papa Diosan mitsu nuibaquin upí oquin sinánxuncëxmi chuámarua bucucanti cana cuëënin.

Hebreos 13:24

Anu ꞌicë Jesucristomi catamëcë unicama ꞌimainun mitsun cushicama a camina bërúanxa ꞌinun ꞌë caxunti ꞌain. Italianuax ucë unicamanribi ca mitsu bërúanxmi ꞌinun mitsu camia.

Judas 1:3

ꞌËn nuibacë xucë́antu, Jesucristomi catamëtia ca mitsun ꞌuchacama tërë́nquin ainan ꞌinun Nucën Papa Diosan mitsu ië́miaxa, ꞌë ꞌacësaribi oquin. Usami ꞌicë cana anun nux ië́ti banacama ñuiquin mitsu cuënëoxunti sinan. Usaquin sinánxunbi cana bëtsi bana pain mitsu buánmin, uni raírinëan Nucën Papa Diosan banamabi ñuicë bana a cuaxunma ꞌanun cananmi, Jesucristo ñui quicë bana, a Nucën Papa Diosan unicaman cuacë, ax ca asérabi ꞌicë quixuan camabi unin ꞌunánun, atu canun cana mitsu ënë quirica buánmin.

1 Samuel 16:2

—¿Uisokin karana anu kuanuxun ꞌati ꞌain? —kixun ka Samuelnën kakëxa—. ¡Saúlnën usakin ꞌakë ꞌunánkin ka ꞌë ꞌati ꞌikën! Kakëxunbi ka Nukën ꞌIbun kakëxa: —Vaca bërí kanikë ain xanu bibiania iskin uínbi kara mi ñukákëxun kamina ꞌë kamina ñuina xaroxuni kuani kixun kati ꞌain.