Hechos 6:14 - Kashibo-Kakataibo Biblia

¹⁴ Nun cuacëx ca ësai Esteban quiaxa: Jesús Nazaretnu ꞌicë, an isa anuxun Nucën Papa Dios rabiti xubu rurupanan, Moisésnëan ax quicësabi oínu ꞌinun cuënëo bana aribi bëtsi oti ꞌicë quiax.

Nukën 'Ibu Diosan ain unikama 'inan ain bana

¹⁴ Nun cuacëx ca ësai Esteban quiaxa: Jesús Nazaretnu 'icë, an isa anuxun Nucën Papa Dios rabiti xubu rurupanan, Moisésnëan ax quicësabi oínu 'inun cuënëo bana aribi bëtsi oti 'icë quiax.

Hechos 6:14 ပူးပေါင်းရင်းမြစ်များ

Jeremías 26:12

Usai kitankëxa atux sënë́nkëbëtan ka Jeremíasnën aín kushikama ꞌimainun kamabi uni timë́kë a ësokin kakëxa: “Nukën ꞌIbunbi ka ꞌë xuaxa aín anë ñui rakuë́timaishi bananun, ꞌianan anuxun a rabiti xubu ñui kianan ënë ëma ñui kinun, mitsúnbi kamina ꞌëx kikë bana a kuakan.

Jeremías 26:18

“Anua Ezequías Judá menu ꞌapu ꞌikë a barikaman ka Miqueas Moréset kakë ëmanu ꞌikë an, kamabi uni Nukën ꞌIbun anën Judá menu ꞌikë unikama ësokin kakëxa: Nukën ꞌIbu kamabi kushiñu ax ka ësai kiaxa. Sión ëma ax ka unin anu ñu ꞌapáti me buinakë usaribi bërúti ꞌikën, Jerusalén ëmax ka anu uni ꞌikëma me ꞌi ñankáishi ꞌiti ꞌikën, usa ꞌain ka aín bashi anuxun a rabiti xubu ꞌikë anu chuku ꞌatimashi kóti ꞌikën.

Daniel 9:26

Usai sesenta ꞌimainun rabë́ semana ax ꞌinúkë ꞌain ka Diosanbia kaískë ꞌapu ax ꞌakë ꞌiti ꞌikën. Usa ꞌain ka Jerusalén ꞌimainun anuxun Dios rabikë xubu ax masókë ꞌiti ꞌikën. Achúshi ꞌapun ka aín suntárukamabë uxun ꞌatima okin masóti ꞌikën. Usakin ꞌakëx ka bakan ꞌishi kuatsinkin ñu mapurukë usaribi ꞌiti ꞌikën. Usa ꞌain ka uni ꞌakanankin ñu ꞌatima okin masókë ax usai ka ꞌiti ꞌikë kixun Diosan nankësabi oi ꞌiti ꞌikën.

Oseas 3:4

Usai akama ꞌikë ꞌain ka Israel unikamax ꞌitsa baritia ꞌapuñuma ꞌianan atun kushi kamañumabi ꞌiti ꞌikën, ꞌianan ka añu ñubi xaroima ꞌianan maxá upíibu akama ꞌianan, sacerdotekaman pañukë chupa abi pañuima: ꞌianan atun aintsia rabikë ñukama abi rabitima ꞌikën.

Miqueas 3:12

Usa ꞌain kana mitsun ꞌuchakë kupí Jerusalén ëma Sión kakë bashinua ꞌikë a ꞌën bërí ꞌakintima ꞌain, achúshi me anu ñu ꞌapátisama ꞌikë ꞌakësokin, usakin ꞌakëx ka maxax ꞌaisamaira bukunrukësa usaribi ꞌiti ꞌikën ꞌimainun ka anuxun Dios rabiti xubunua ꞌikë me anu ꞌaisamaira xubi muxañu uniti ꞌikën, mitsun mi ñunshinakëkin ꞌatima ñuira ꞌai ꞌuchakë ꞌain.

Mateo 26:61

—Ënë unix ca quiaxa: ꞌËn cana anuxun Nucën Papa Dios rabiti xubu rurupatancëxun rabë́ ꞌimainun achúshi nëtë́inshi amiribishi nitsínruquin ꞌatëcënti ꞌain.

Marcos 14:58

—Nun cananuna ësai quia ënë uni cuan: ꞌËn cana anuxun Nucën Papa Dios rabiti xubu unin ꞌa, ënë rurupatancëxun rabë́ ꞌimainun achúshi nëtë́inshi amiribishi bëtsi ꞌatëcënti ꞌain, unin ꞌacëma ꞌinun.

Lucas 21:24

Uni raíri ca unin abë ꞌacananquin ꞌanuxun ꞌaia, raírinëx ca bëtsi bëtsi menu buáncë ꞌiti ꞌicën. Usaquin ꞌaquin ca judíosma unicaman Jerusalén ꞌatimonan anu ꞌixun aín cuëëncësa oquin ꞌati ꞌicën, atúan usoquin ꞌati nëtëa sënë́ncëbëtan.

Lucas 21:6

—Ënë xubu mitsun iscëx upí ꞌaísh maxax cha ꞌacë ꞌaíshbi ca axa Nucën Papa Diosmi sináncëma unicaman ënë xubu camabi rurupacëbë aín maxáxcamaribi rurucubúti ꞌicën. Usaía anun ꞌiti nëtë ca uti ꞌicën.

Juan 2:19

Cacëxun ca Jesusan cacëxa: —Mitsúnmi tëncapatiabi cana ënë xubu ꞌën rabë́ ꞌimainun achúshi nëtë́inshi ꞌatëcënti ꞌain.

Juan 4:21

Cacëxun ca Jesusan cacëxa: —Asérabi cana mi cain, anúnmi ënë tucunuxunmabi, Jerusalénuxunmabi anumi mitsux ꞌicënuxunbi, Nucën Papa Dios rabiti nëtë ca aia.

Hechos 15:1

Usa ꞌain ca judíos uni raíri Judea menuax Antioquíanu cuanxun, axa Jesucristomi catamëcë unicama ësaquin cacëxa: Mitsux asérabi Nucën Papa Diosnan ꞌinux ië́tisa tani camina Moisés quiásabi oi ꞌunánti oracacë ꞌiti ꞌain.

Hechos 21:21

A unicamax ca quia, min isamina bëtsi bëtsi menua judíos unicama, Moisésnën usai judíos unicama ꞌiti cuënëo bana quicësabi oi ꞌiaxma ꞌinun quixun can. Canan isamina judíos unicaman ꞌacësaribi oquin bëbu tuá ꞌunántioxunma ꞌanun quixunribi can.

Hechos 25:8

Usa ꞌain ca Pablonën amia manáncancëxun ësaquin Festo cacëxa: —ꞌËn cana Moisésnëan usai judíos unicama ꞌiti cuënëo bana quicësabi oi ꞌiaxma ꞌinun judíos unicama cacëma ꞌain. Usa ꞌaish cana ꞌëxribi a bana quicësabi oi ꞌian. ꞌIanan cana anuxun Nucën Papa Dios rabiti xubunu judíosma uni atsínmicëma ꞌain, atsínmima ꞌianan cana Romanu ꞌicë ꞌapu, César, aín bana tanxunma ꞌanun uni cacëma ꞌain.

Hechos 26:3

Min camina judíos unicamaxa usabi ꞌicë ꞌaish, usai ꞌia ꞌunanin. ꞌImainun camina añu ñu ñui cara quia quixunribi ꞌunanin. Usa ꞌixun camina ꞌën mi camainun bënë́quinma cuati ꞌain.

Hechos 28:17

Romanu bëbax, rabë́ ꞌimainun achúshi nëtë ꞌitancëxun ca Pablonën judíos uni aín cushicamaxa a isi unun quixun camiacëxa. Camicëx aía timëtia ca Pablonën cacëxa: —ꞌËn aintsicama, cana mitsu cain, ꞌën cana judíos unicama uisa ocëma ꞌain, uisa oíma cana nun chaitiocëcama ꞌiásabi ꞌian. Usai ꞌiabi ca Jerusalénuxun judíos unicaman an sipuanun quixun romános unicama ꞌë ꞌinánxa.

Gálatas 3:19

¿An Abraham cá bana xënibua ꞌaínbi asérabi ꞌain cara uisacasquin Nucën Papa Diosan usai judíos unicama ꞌiti bana cuënëonun Moisés cacëx? Uisa ñu ꞌati cara ꞌaisama ꞌicë quixuan unin ꞌunánti cupí ca a bana judíos unicama ꞌináncëxa. Abrahamnën rëbúnqui, Cristo, axa utia Abraham ñuixuan, a utámainuan a bana quicësabi oquin pain ꞌanun ca Nucën Papa Diosan a bana Moisés cuënëomiacëxa. Nucën Papa Diosan cacëxuan ángelcaman a cacë bana ca Moisésnën cuënëo bana ꞌiacëxa.

Gálatas 3:23

Ami catamëtinu ië́ti Jesucristoa utámainun ca judíos unicaman Moisésnën cuënëo bana quicësabi oquin ꞌati ꞌiacëxa.