Hechos 26:18 - Kashibo-Kakataibo Biblia

¹⁸ Minmi ꞌë ñuixuncëxa atux ñu ꞌatima ꞌatishi sinani bëánquibucënu nicësa ꞌaíshbi sinanaquin ñu upíshi ꞌati sinánun cana mi xutin, ñunshin ꞌatimanën ꞌapu Satanásnën ꞌibuacë ꞌaíshbi sinanatía Nucën Papa Diosnan ꞌinun. Usai ꞌëmi catamëcë ꞌaísha aín ꞌuchacama tërë́ncë ꞌinun cana atunu mi xutin. Usa ꞌain ca an mëníosabi oi atux aín unicamabë Nucën Papa Diosan nëtënu ꞌiti ꞌicën”.

Nukën 'Ibu Diosan ain unikama 'inan ain bana

¹⁸ Minmi 'ë ñuixuncëxa atux ñu 'atima 'atishi sinani bëánquibucënu nicësa 'aíshbi sinanaquin ñu upíshi 'ati sinánun cana mi xutin, ñunshin 'atimanën 'apu Satanásnën 'ibuacë 'aíshbi sinanatía Nucën Papa Diosnan 'inun. Usai 'ëmi catamëcë 'aísha aín 'uchacama tërë́ncë 'inun cana atunu mi xutin. Usa 'ain ca an mëníosabi oi atux aín unicamabë Nucën Papa Diosan nëtënu 'iti 'icën”.

Hechos 26:18 ပူးပေါင်းရင်းမြစ်များ

Isaías 32:3

An ka uisakin kara ñu ꞌati ꞌikë, kixun pain ꞌunánkë ꞌiti ꞌikën, ꞌianan ka aín unikaman banaia bëmë́kin kuati ꞌikën,

Isaías 35:5

Usa ꞌain ka bëxuñu unikama an ꞌupiokin ismainun, pabë unikama anribi paxabarakakin bana kuati ꞌikën;

Isaías 42:16

Usakin ꞌanan kana bëxuñu unikama aribi atun ꞌunánkëma bain, buánkin anua niama bain buánti ꞌain. Uankin kana bëánbëankibukë aribi atun ismainubia xabá ꞌinun ꞌimiti ꞌain, ꞌimianan kana me nankë́kë axribia mëníokati upiti rakanun ꞌimiti ꞌain. Ënë ñukama kana, kana ꞌaíma kikínma asérabi ꞌati ꞌain.

Isaías 42:7

ꞌIanan kana ꞌën kuëënin bëxuñu unikama ain bëru bëpë́xkuti ñunshin ꞌatimanën ñu ꞌatima ꞌamikëx sipunu ꞌikësa ꞌikëbi chikíanan, ñatanxuan bë́anbëankibukënu xëpúkësa ꞌikë akama chikínti kana kuëënin.

Isaías 43:8

ꞌËn kana ꞌën unikama bëtëkënti ꞌain, atux ka bëruñu ꞌikë ꞌaínbi ka bëxuñusa ꞌikën, ꞌianan ka kuatia, ꞌaínbi ka pabësa ꞌixun bana kuakëmasa oia.

Isaías 49:6

ax ka ësai kia: ꞌËn uni ꞌixunmi min Jacobnën rëbúnki, Israel unikama axa ñuima ꞌiakama a aín ñakánubi utëkënun ꞌakinkë ax ka ꞌën iskëx sënë́nmara ꞌikën, ꞌën kana ꞌën tirísa ꞌixunmi bëtsi menu ꞌikë unikama bana ñuixuanan, uinu kara me kuainakëakëxa anubi kuankin bana ñuinun mi ꞌimiti ꞌain.

Isaías 9:2

Axa ami nishkë unikaman ꞌatimokëxa bëánkibukënu ꞌikësa ꞌia unikama an ka achúshi tirí chaiira isakëxa, iskin ka ñu upí ꞌati ꞌunánkëxa; achúshi tirí pëkikësa ꞌaish upiti tsókë uni an ka axa ꞌatimati tsókë unikama ñu upí ꞌai upiti tsóti ꞌunánmiakëxa.

Malaquías 4:2

ꞌAínbi ka an ꞌëx kikësabiokin ꞌakë unikama mitsunan, ꞌën ꞌakë ñu upíkama ax. Barin urukin pë́kabëtsinkësa usaribi ꞌiti ꞌikën, an ka mitsu ië́miti ꞌikën. Usakin ꞌakëx kamina kuëëni vaca bakëkama anuxun pimikë xubunuax chikiti chirinkë usairibi ꞌikanti ꞌain.

Mateo 4:10

Usaquian cacëxun ca Jesusan cacëxa: —Ñunshin ꞌatimanën ꞌapu, ënuax ca cuantan. Nucën Papa Diosan bana cuënëo ca ësai quia: “Min ꞌIbu Diosëshi camina rabiti ꞌain. Rabiquin camina ashi ax cuëëncësabi oquin ñu ꞌaxunti ꞌain”.

Mateo 4:16

Anu ꞌicë unicamax ainanma ꞌixun Nucën Papa Dios cuëëncësabi oquin ꞌati ꞌunáncëma ꞌaíshbi ca Cristo ucëbë an ꞌunánmicë ꞌiaxa. Ainanma ꞌaish bamati ꞌaíshbi ca Cristo ucëbë an ꞌunánmicëx xabánu ꞌicësa ꞌiaxa.

Lucas 1:77

Min sinánmicëxun ca ꞌunánti ꞌicën, a cupí ca atun ꞌuchacama tërë́ncë ꞌaish Nucën Papa Diosnan ꞌinun ië́micë ꞌiti ꞌicë quixun.

Lucas 1:79

Xucëxun uquin ca axa aín ꞌucha cupí Nucën Papa Diosbë upíma ꞌianan —ꞌën bamati ca ꞌurama ꞌicë —quixun sinani racuëti masá nuituti bëánquibucënu ꞌicësa unicama atun ꞌuchacama tërë́nquin Nucën Papa Diosnan ꞌinun ꞌimianan nuxnu Nucën Papa Diosbë upí ꞌaish ax cuëëncësabi oi ꞌinun nu ꞌimiti ꞌicën. Usai ca Zacarías Nucën Papa Diosan Bëru Ñunshin Upitan sinánmicëx quiacëxa.

Lucas 2:32

An ca Israel unibushima judíosma unicamaribi aín sinan upí ꞌinun ꞌimiti ꞌicën. Minan ꞌinúnmi caísa, Israel unibu, acama achúshi ꞌaish, a cupí ca camabi unin Israel unibu rabiti ꞌicën.

Lucas 24:45

Usaquin caxun ca a ñuiquian cuënëo banacama upí oquian cuanun ñuixunquin anu timë́cë unicama ꞌunánmiacëxa.

Lucas 24:47

Usa ꞌain ca aín unicaman Jerusalénuxun pain aín bana ñuitancëxun camabi menu cuanquin ësoquin caquin unicama ñuixunti ꞌicën, Nucën Papa Diosan atun ꞌatima ñu ꞌacëcama tërë́ncë ꞌinuxun ca sinanaquin bëtsi oquin sinánti ꞌicë quixun. Ësaía a ñui cuënëo bana quicë a ñuixuntancëxun ca Jesusan atu cacëxa:

Lucas 4:18

Nucën ꞌIbu Diosan xucëx ꞌënu uax ca aín Bëru Ñunshin Upí ꞌëbë ꞌicën. An ca aín Bëru Ñunshin Upí ꞌinánquin cushioquin ñuñuma unicama upí bana anúan atux Nucën Papa Diosnan ꞌi cuëënun ñuixuanan, axa masá nuitucë unicama upí oquin sinánminun ꞌë caxa. ꞌImainun ca sipuacë ꞌaíshbia upitax chiquíncë ꞌinun ꞌimianan bëxuñu unicama bëxuñuma ꞌinun ꞌimianan bëtsi bëtsi ocë unicama bëtsi bëtsi ocëma ꞌiminun ꞌë caxa.

Juan 17:17

Usa ꞌain camina min sináncësaribi oquin sinánan min bana quicësabiira oíshi ꞌinun atu ꞌimiti ꞌain.

Juan 3:19

Axa ami sináncëma unicamax ca aín ꞌucha cupí Nucën Papa Diosan castícantishi ꞌicën, atúan an aín sinan upíira ꞌixun uni upí ꞌimiti ax uánbi ami catamëisama tanquin ꞌatima ñu ꞌatishi cuëëncë cupí.

Juan 4:10

Cacëxun ca Jesusan cacëxa: —Ën mi ꞌunpax ñucácë ꞌaínbi camina ui carana ꞌai quixun ꞌë ꞌunaniman. ꞌË ꞌunánan añu cara Nucën Papa Diosan mi ꞌinánti ꞌicë quixun ꞌunáncë ꞌixun camina ꞌë ñucátsian. Ñucácëxun cana anúnmi nëtë́timoi Nucën Papa Diosnan ꞌiti ꞌunpax mi ꞌinántsian.

Juan 4:14

Usa ꞌaínbi ca an ꞌën ꞌináncëxun ꞌunpax ꞌacë uni, ax amiribishi shimatëcëntima ꞌicën. Me ꞌucë mëúcüaxa chiquitia ꞌunpax xobucësaribiti ca ꞌën ꞌináncë ꞌunpax nëtëtima uninu ꞌiti ꞌicën. Usaía ꞌicëbë ca uni nëtë́timoi Nucën Papa Diosnan ꞌiti ꞌicën.

Juan 8:12

Usa ꞌain ca amiribishi Jesusan unicama cacëxa: —An aín sinan upíira ꞌixun uni upí ꞌimiti a cana ꞌëx ꞌain. Axa ꞌëmi catamëti ꞌëx cuëëncësabi oi ꞌicë uni ax ca ñu ꞌatima ꞌacëma ꞌianan aín sinan upí ꞌaish upiti tsotia.

Juan 9:39

Rabicëxun isquin ca Jesusan cacëxa: —ꞌËn a uni ꞌunánmiti ñu ꞌunáncëma pain ꞌaish bëxuñusa ꞌixunbi ca ꞌëmi catamëquin bëxuñumasa ꞌixun unin ꞌunánti ꞌicën. Usa ꞌaínbi ca an —ꞌën cana ñu ꞌunani —quixun sináncë uni ax ꞌëmi catamëtiama ꞌën ꞌunánmicëma ꞌaish usabi bëxuñusa ꞌiti ꞌicën. Usaía ꞌinun cana uacën.

Juan 9:5

Ënë nëtënu ꞌaish cana ꞌëx upí oquin sinánuan, an unicama ꞌimicë a ꞌain, bëánquibucënu ꞌicësa ꞌima xabánu ꞌicësa ꞌinun.

Hechos 10:43

An Nucën Papa Dios quicë bana uni ñuixuncë unicamaxribi ca Jesús ñui ësai quiacëxa, camabi uni axa aín bana cuati ami catamëcë, a ca aín ꞌuchacama Jesusan tërë́nxunia quixun.

Hechos 13:47

Usaquinu ꞌati ca Nucën ꞌIbu Dios cuëënia quixun cananuna ꞌunanin, Jesucristo ñuiquian ësoquin aín bana cuënëo isquin: Israel unicamaishima bëtsi unicamaribi aín sinan upí ꞌinun ꞌiminun cana mi ꞌimian. ꞌImianan cana aín ꞌuchacama tërë́ncë ꞌaísha ꞌënan ꞌinunmi camabi menu ꞌicë unicama ië́minun mi ꞌimian.

Hechos 15:9

Nuxnu judíos ꞌicëa nu ꞌimicësaribi oquin ca Nucën Papa Diosan judíosma unicama Jesucristomi catamëcë cupí aín ꞌuchacama tërë́nquin aín sinan upí ꞌimiaxa.

Hechos 2:38

Cacëxun ca Pedronën atu cacëxa: —ꞌAtimoquin sinánxunbi camina sinanaquin, upí oquin Nucën Papa Diosmi sinánti ꞌain. Usai ꞌitancëx camina mitsun ꞌuchacama tërë́ncë ꞌinun Jesucristomi catamëti nashimicë ꞌicanti ꞌain. Usai ꞌicëbëtan ca Nucën Papa Diosan aín Bëru Ñumshin Upí abëmi ꞌinun mitsu ꞌinánti ꞌicën.

Hechos 20:21

Ñuixunquin cana judíos unicama ꞌimainun judíosma unicamaribi Nucën Papa Dios cuëëncësa oi ꞌinux sinanatía Nucën ꞌIbu Jesucristomi catamënun quixun can.

Hechos 20:32

Bërí cana an bërúanun Nucën Papa Dios mitsu ñucáxunin. An ca nuibaquin mitsu ami cushinun ꞌimianan axa ami sináncë unicama ꞌimicësaribi oquin asérabi ainan ꞌaíshmi ax cuëëncësa oíshi ꞌinun mitsu ꞌimiti ꞌicën.

Hechos 26:19

Pablonën ca ësaquinribi Agripa cacëxa: ꞌApu Agripa, cana mi cain, usaquian Jesusan naínuxun ꞌë cacëxun cana aín bana parë́quinma an cacësabi oquin ꞌacën.

Hechos 26:23

A banax ca ësai quia: Tëmëratancëx ca Cristo bamati ꞌicën. Bamatancëxa baísquia ꞌain ca usaribiti camabi uni bama ꞌaíshbi Cristo utëcëncëbë baísquiti ꞌicën. Usai baísquia ꞌixun ca Jesusan judíos unicamaishima judíosma unicamaribi sinanati ami catamëtía aín sinan upí ꞌinun ꞌimiti ꞌicën.

Hechos 3:19

Usa ꞌain camina ꞌatimaquin sinánxunbi sinanaquin mitsun ꞌuchacama tërë́ncë ꞌinun Nucën Papa Diosmi sinánti ꞌain. Ami sináncëxun ca Nucën ꞌIbu Diosan mitsun ꞌuchacama tërë́anan chuámarua ꞌinun mitsu cuëënmiti ꞌicën.

Hechos 5:31

Usotancëxun ca abëa aín mëqueu ꞌApu ꞌinun ꞌimiaxa. ꞌImianan ca axa atun ꞌApu ꞌaían a cupíshi sinanati Israel unicama atun ꞌucha tërë́ncë ꞌaish ië́cë ꞌinun ꞌimiaxa.

Romanos 8:17

Aín bëchicë ꞌicë ca Nucën Papa Diosan ax quicësabi oquin nu ꞌaquianan aín nëtënu abë ꞌinun nu ꞌimiti ꞌicën. Ainan ꞌicë ca Nucën Papa Diosan Cristosaribi nu ꞌimiti ꞌicën. Cristonan ꞌixúnu tëmëraquinbi ax cuëëncësabi oquin ꞌati ëncëma ꞌicë ca Nucën Papa Diosan nuribi aín quicësabi oquin aín nëtënu Cristobë ꞌinun nu ꞌimiti ꞌicën.

1 Corintios 1:2

Mitsúxmi Corinto ëmanuax Jesucristomi catamëcë ꞌicë, cana cuënëoxun ënë quirica mitsu buánmin. Mitsux Cristo Jesúsmi catamëcë ꞌaish camina Nucën Papa Diosnan ꞌain. An ca ax cuëëncësabi oíshi ꞌinun mitsu caísacëxa. Camabi menu ꞌicë unicama, an Nucën ꞌIbu Jesucristo aín ꞌuchacama tërë́nxunun quixun ñucácë, a unicama usai ꞌinun caíscësaribi oquin ca Nucën Papa Diosan mitsu caísacëxa. Jesucristo ax ca a unicaman ꞌIbu ꞌianan nun ꞌIburibi ꞌicën.

1 Corintios 1:30

Nucën Papa Diosan ꞌimicëx camina ami catamëti Cristo Jesúsbë ꞌianan an sinánmicë ꞌain. Usa ꞌaish camina Cristo Jesús cupía, ax cuëëncësabi oquinshimi ꞌanun Nucën Papa Diosan ië́micë ꞌain.

2 Corintios 4:4

Usaquin sináncë unicaman ca ñunshin ꞌatimanën ꞌapúan sinánmicëxun, uisairai cara aín ꞌucha tërë́ncë ꞌaish Nucën Papa Diossaribi, Cristo, ainan ꞌiti ꞌicë quixun ꞌunanima.

2 Corintios 4:6

Nucën Papa Dios axa bëráma, “Bëánquibucë ca pëquiti ꞌicë” quiá, anbi ca Cristonëan nun nuitu mëúxun nu chuámashi tani cuëënquinu uisaira upí cara Nucën Papa Dios ꞌicë quixun ꞌunánun ꞌimiaxa.

2 Corintios 6:14

An ñu upíshi ꞌacë unin sináncësaribi oquin ca an ñu ꞌaisama ꞌacë unicaman sinaníma. Usa ꞌain camina mitsux Jesucristomi catamëcë ꞌixun axa Jesucristomi catamëcëma unicamabëtan atun cuëëncësa oquin ñu ꞌatima ꞌain. Nëtëx ca imë́bë mëscutíma. Usaribiti ca Cristonën unicamax Cristonanma unicamabë nuianantima ꞌicën.

Gálatas 2:20

ꞌUchatëcënuxunma ashiquin ꞌën ꞌuchacama ëni cana Cristobë bamacësa ꞌain. Usa ꞌaish cana ꞌëshima, Cristo ax ꞌëbë ꞌain, aín cushínbi ax cuëëncësa oíshi ꞌin. Nucën Papa Diosan Bëchicë, axa ꞌë nuibati bamatsianxmabi ꞌën ꞌucha cupí bama, ami catamëti cana ax ꞌëbë ꞌain, ax cuëëncësabi oi ꞌin.

Gálatas 3:14

Nucën Papa Diosan Abraham cásabi oía judíosma unicamaxribi Nucën Papa Diosnan ꞌinun ca Cristo Jesús ꞌuchañuira uni ꞌicësari bamacëxa. Ax usai bama cupí ca axa ami catamëcë unicama Nucën Papa Diosan aín Bëru Ñunshin Upí ꞌinania, ax quiásabi oquin.

Gálatas 3:2

Camina ꞌë cati ꞌain, ¿Moisésnëan usai ca judíos unicama ꞌiti ꞌicë quixun cuënëo banami cuacë cupí cara Nucën Papa Diosan aín Bëru Ñunshin Upí mitsubëa ꞌinun mitsu ꞌináncëx? Usama ca. Jesucristo ñui quicë bana cuatími ami catamëcëxuinshi ca aín Bëru Ñunshin Upí mibëa ꞌinun mitsu ꞌináncëxa. ¿Usa ꞌixunbi caramina mitsun Nucën Papa Diosan Bëru Ñunshin Upitan mitsu upí ꞌimiti sinántancëxunbi —ꞌën ñu upí ꞌacë cupíshi ca Nucën Papa Diosan ꞌë upí isia —quixun sinanin? Usaquin sinani camina sinánñuma unicamasa ꞌain.

Efesios 1:11

Nux Cristonan cupí aín uni raíri ꞌacësaribi oquin nu axa cuëëncësabi oi ꞌianan aín nëtënu abë ꞌiti nu ꞌiminuxun ca Nucën Papa Diosan ainan ꞌinun nu caísacëxa. Usai nux ꞌinun ca Nucën Papa Diosan camabi ñu ax cuëëncësabi oquin ꞌaquin mëníocëxa.

Efesios 1:14

Aín Bëru Ñunshin Upí axa nubë ꞌain cananuna ꞌunanin, anúan Nucën Papa Diosan an caíscë aín unicama biti nëtë sënë́ncëbë cananuna aín nëtënu abë ꞌiti ꞌain, ax quiásabi oi. Ax cushiira ꞌixuan nuibaquin ꞌimicëxunu a rabinun ca usai ꞌiti ꞌicën.

Efesios 1:18

ꞌImainun cana mitsu ñucáxunin, an ꞌimicëx caramina uisairai ënë nëtënuax Jesucristosaribi ꞌaish upí sinánñu ꞌiti ꞌai quixunmi mitsun ꞌunánun. Ñucánan cana uisairai caramina aín nëtënu abë ꞌaish, axa ami catamëcë unicamabë ꞌiti ꞌai quixunmi ꞌunánun mitsu ñucáxunin.

Efesios 1:7

An ca nun ꞌucha cupínu ainanma ꞌicëbi Cristo bama ꞌain, nun ñu ꞌaisama ꞌacëcama tërë́nquin ainan ꞌinun nu ië́miaxa, an nu nuibaquin.

Efesios 2:8

Nuibaquin ca asérabi cuëënquin mitsúxmi Cristomi catamëti cupíshi mitsu ainan ꞌinun ië́miaxa. Mitsúnmi ñu upí ꞌacë cupíma ca Jesucristo bama cupíshi Nucën Papa Diosan ax cuëënquinshi mitsu ainan ꞌinun ië́miaxa.

Efesios 4:18

Usa ꞌaish ca bëánquibucë ꞌain mancasmatia uni bënë́cësaribi oi ꞌia. Cristo ñui quicë bana cuaisama tancë ꞌixun ca ainan ꞌiti ꞌunáncëma ꞌaish Nucën Papa Diosnan ꞌitsianxbi ainanma ꞌicën.

Efesios 5:11

Ax bëánquibucënu nicësa uni an ca axa cuëëncësa oquinshi ñu ꞌaquin, Nucën Papa Diosmi sinánquinma uni itsiribi ami sinánun ꞌaquinti sinanima. Usaía ax ꞌicë unicama camina atun ꞌacësaribi oquin ꞌaquinma, —usaquin ñu ꞌati ca ꞌaisama ꞌicë —quixun upí oquin ꞌunánmiquin ꞌësëti ꞌain.

Efesios 5:14

Usa ꞌain ca ësai Nucën Papa Diosan bana cuënëo quia: ꞌUxcësa ꞌaíshbi bësucësa ꞌinux ca Cristomi catamët. Ainanma ꞌaish min ꞌucha cupí bamacësa ꞌaíshbi ca Cristomi catamëti ië́t. Usa ꞌicë ca min ñu ꞌaisama ꞌacëcama ëmianan mix asaribi upí ꞌinun ꞌimiti ꞌicën.

Efesios 5:8

Bëráma Nucën Papa Diosan bana ꞌunáncëma ꞌaish unían bëánquibucënuxun ñu ꞌatima ꞌacësa ꞌiá ꞌixúnbi camina bërí Nucën ꞌIbu Jesucristonan ꞌixun ax cuëëncësabi oquin ñu upíshi ꞌain. Usa ꞌaish camina bërí xabánu nicësa ꞌiti ꞌain.

Efesios 6:12

Nux cananuna suntárunëxa ꞌacanancësaribiti ꞌin. Usai ꞌibi cananuna unibë ꞌacananiman. Nun nuitu mëúishi cananuna ꞌacanáncësa ꞌain, ñunshin ꞌatimanën nu ꞌibuati rabanan. Aín ꞌapubë cushiquin ca ñunshin ꞌatimacaman nu ñu ꞌatima ꞌanun nu ꞌamitisa tania. Atun an ënë menuxun ñu atima ꞌacë unicama ꞌibuacë ꞌixun ca nuribi ñu ꞌatima ꞌamitisa tania.

2 Timoteo 2:26

Usaquian ꞌaquincëxa sinanacëbëtan ca ñunshin ꞌatimanën ꞌapun ax cuëëncësabi oquian ñu ꞌatima ꞌanun ꞌimicë ꞌixunbi a uni ënti ꞌicën.

Hebreos 10:10

Jesucristo aín Papa Dios cuëëncësabi oi, bamatsianxmabi achúshitishi bama ꞌain cananuna nux Cristo bama cupí Nucën Papa Diosan iscëx nun ꞌucha tërë́ncë ꞌaish asérabi ainan ꞌain.

Hebreos 10:14

Usa ꞌain ca achúshitishi bama ꞌixun axa ami catamëcë unicama aín ꞌucha tërë́anan nëtë́timoia abë upí ꞌinun ꞌimia.

Hebreos 11:6

Uicamax cara Nucën Papa Diosbë banatisa tania, uicamax cara ainan ꞌiisa tania, an ca —Nucën Papa Dios ca asérabi anu ꞌicë —quixun sinánti ꞌicën. Sinánan ca —an ca ꞌën ñucácëxun cuati ꞌicë —quixun sinánti ꞌicën. Usaía ax asérabi ami catamëcë uni anun cuni ca Nucën Papa Dios cuëënia. Axa ami catamëcëma unin ca Nucën Papa Dios cuëënmima.

Hebreos 9:15

Usa ꞌain ca Nucën Papa Dios quiásabi oi, an Cristomi catamënun sinánmicë unicama xënibua ꞌaínbi abë ꞌinun Cristo bamacëxa. An Moisésnën cuënëo bana cua nucën raracaman ꞌucharibi ca Cristo bama cupí, tërë́ncë ꞌicën. Usa ꞌain ca Moisésnën cuënëo bana ꞌiásama Cristo ñui quicë bana ꞌicën.

Santiago 2:5

ꞌËn nuibacë xucë́antu, ꞌën mitsu camainun ca cuat. Nucën Papa Diosan ca axa ënë menuax ñuñuirama unicama a caísia, atúxa ami upiti catamëcë ꞌianan aín nëtënu abë ꞌinun, an nuibacë unicamax ca usai ꞌiti ꞌicë quiáxa aín bana quicësabi oquin.

1 Pedro 1:4

Nucën Papa Diosan ca mitsúxmi aín nëtënu abë ꞌitioquin mëníocëxa. A nëtënuax ca uisa ñubi, ënë nëtënuax ꞌicësari chëquianan cëñútima ꞌicën, anu ca uisa ꞌuchabi ꞌaíma ꞌicën. Usabi ca xënibua ꞌaínbi ꞌiti ꞌicën.

1 Pedro 2:25

Carneronëxa ꞌibuñuma ꞌaish ꞌicësari camina mitsux ꞌiacën. Usa ꞌiá ꞌaíshbi camina sinanati Cristomi catamëan. Amia catamëcëxuan aín ꞌibun carnero bëruancësa oquin ca an upími ꞌinun mitsu bërúanquin ꞌaquinia.

1 Pedro 2:9

A unicama usa ꞌaínbi camina mitsux Nucën Papa Diosan ainan ꞌinun caísa ꞌain. Usa ꞌixun camina ax cuëëncësabi oquin ꞌanan aín unicama a ñucáxunin. Camina an ꞌimicëx upí ꞌaish aín uni ꞌain. Usa ꞌixunmi a rabiquin an ꞌacë ñucama camabi uni ñuixunun ca Nucën Papa Diosan mitsu ainan ꞌinun caísacëxa. Mitsux bëráma bëánquibucënu nicësa ꞌiá ꞌaíshbi camina bërí an ꞌimicëx xabánu nicësa ꞌain, axa mitsubë ꞌain.

1 Juan 1:9

Usa ꞌaínbi cananuna ꞌunánti ꞌain, nun nu nun ꞌuchacama chiquinaxuncëxun ca Nucën Papa Diosan, ax upí ꞌixun ax quicësabi oquin ꞌaquin, nun ꞌuchacama nu tërë́nxunquin upí ꞌinun nu ꞌimiti ꞌicën.

1 Juan 2:12

ꞌËn bëchicësa ꞌicë, cana Jesucristo cupía Nucën Papa Diosan mitsun ꞌuchacama tërë́ncë cupí mitsu quirica cuënëoxunin.

1 Juan 3:8

Usa ꞌaínbi ca an ñu ꞌatima ꞌacë unicama ax ñunshin ꞌatimanën ꞌapun uni ꞌicën, ñunshin ꞌatimanën ꞌapu ax ca nëtë ióñubi ꞌucha ꞌaish usabii bërí nëtë́nbi ꞌuchaia, usa ꞌain. Usa ꞌaínbi ca ñunshin ꞌatimanën ꞌapúan ñu ꞌatima ꞌacëcama cëñui Nucën Papa Diosan Bëchicë uacëxa.

1 Juan 5:19

Cananuna ꞌunanin, nuxnu Nucën Papa Diosnan ꞌaínbi ca camabi menu ꞌicë unicamax ainanma ꞌaish ñunshin ꞌatimanën ꞌapunan ꞌicë quixun.

Judas 1:1

ꞌËx cana Judas, an Jesucristonën cacësabi oquin ñu ꞌacë ꞌianan Jacobonën xucën, a ꞌain. Mitsúxmi ainan ꞌinun caíscë ꞌicëa Nucën Papa Diosan Jesucristomi cushicë ꞌinun ꞌimicë ꞌicë, cana ënë quirica mitsu cuënëoxunin.

Apocalipsis 21:27

Usa ꞌain ca anu ñu ꞌaisama ꞌitima ꞌicën, ui unix cara ꞌaisama ñu ꞌacë ꞌicë ꞌimainun ui unix cara cëmëia, usa unix ca anu ꞌitima ꞌicën. Ui unicamax cara Nucën Papa Diosan nëtënu ꞌitioquin aín anë Carnero ꞌicësaribitia unin ꞌucha cupí bama, aín quiricanu cuënëo ꞌicë, acamax cuni ca anu ꞌiti ꞌicën.