Hechos 24:16 - Kashibo-Kakataibo Biblia

¹⁶ Usaquin sináncë ꞌaish cana Nucën Papa Diosmi ꞌuchaima ꞌianan uisa unimibi ꞌuchaima ꞌiisa tanin. Usai ꞌinuxun cana camabi nëtën ñu ꞌatima ꞌaquinma ñu upíshi ꞌain.

Nukën 'Ibu Diosan ain unikama 'inan ain bana

¹⁶ Usaquin sináncë 'aish cana Nucën Papa Diosmi 'uchaima 'ianan uisa unimibi 'uchaima 'iisa tanin. Usai 'inuxun cana camabi nëtën ñu 'atima 'aquinma ñu upíshi 'ain.

Hechos 24:16 ပူးပေါင်းရင်းမြစ်များ

Hechos 23:1

Usa ꞌain ca suntárucaman bëcëxun isquin Pablonën judíos unibunën ꞌapucama cacëxa: —Mitsux judíos uni ꞌaish camina ꞌën xucë́antu ꞌain. ꞌIcë cana mitsu cain, ꞌën cana ñu ꞌatima ꞌacëma ꞌai quixun ca Nucën Papa Diosan ꞌë isia.

Romanos 2:15

Usoquin upí ñu ꞌaia isquin ca uni itsin ꞌunánti ꞌicën, a unicaman ca asérabi aín nuitu mëu ꞌunania, uisa ñu ꞌati cara asábi ꞌicë ꞌunánan uisa ñu ꞌati cara ꞌaisama ꞌicë quixun. Anúan Nucën Papa Diosan camabi uni isti nëtën ca a unicaman aín nuitu mëúbi ꞌunánti ꞌicën, Nucën Papa Diosan cara ꞌë upí isti ꞌicë, cara ꞌë upíma isti ꞌicë quixun. A nëtën ca Nucën Papa Diosan camabi uni uisa ñu cara ꞌaxa quixun ꞌunánan uisa ñu cara unë́xun aín nuitu mëúbi sinánxa, a camabi ꞌunánquin, uisa cara oti ꞌicë usoquin ꞌanun Jesucristo ꞌamiti ꞌicën, ꞌën unicama ñuixuncësabi oquin.

Romanos 9:1

Cristonan ꞌixun cana cëmëquinma ënë banaribi mitsu cain. Nucën Papa Diosan Bëru Ñunshin Upitan ꞌë ꞌunánmicëxun cana ꞌën nuitu mëu ꞌunanin, ꞌën mitsu bërí caisa tancë bana ënëx ca asérabi ꞌicë quixun.

1 Corintios 10:32

Usoquin camina uinu ꞌicë unibi, judíos uni ꞌimainun judíosma uniribi, ꞌimainun axa Jesucristomi catamëcë unicamaribi, Nucën Papa Diosmi ꞌuchati sinánmitima ꞌain.

1 Corintios 4:4

ꞌËn ñu ꞌatima ꞌacë ꞌën chiquinacëma ca ꞌaíma ꞌicë quixun ꞌën sinaniabi ca Nucën ꞌIbu Jesucristonën cuni carana asérabi ñu ꞌaisama ꞌacëma ꞌai quixun ꞌunania.

2 Corintios 1:12

Cananuna asérabi ꞌunanin, Nucën Papa Diosan ꞌimicëx nun nuitu upí ꞌixun cananuna unicama paránquinma ñu upíshi ꞌa quixun. Unicaman ca usaínu ꞌia nu isaxa. Uni itsían nu iscësamaira oquin camina usaínu ꞌia mitsun nu isacën. Usaquin sinani cananuna cuëëinra cuëënin. Nunbi unin sináncësa oquin sinani cananuna usai ꞌicëma ꞌain. Nucën Papa Diosan nu nuibaquin ꞌaquincëxëshi cananuna usai ꞌian.

2 Corintios 4:2

Uni itsimi unë́xunu ꞌacë ñucama ënquin cananuna a ꞌaínu rabínti ñu ꞌatimaribi ꞌaiman. Uni paránti sinánquinma cananuna Nucën Papa Diosan banaribi bëtsi oquinma ax asérabi quicë banaishi uni ñuixunin. Usaquin ñuixunia cuaquin ca camabi unin ꞌunánti ꞌicën, Nucën Papa Diosan iscëxun cananuna ax quicësabi oquin aín bana ñuixuni quixun.

1 Tesalonicenses 2:10

Mitsun camina ꞌunanin, Nucën Papa Diosanribi ca ꞌunania, nux cananuna mitsúxmi Jesucristomi catamëcë ꞌain mitsubë ꞌixun uisa ñu ꞌatimabi ꞌaima upí ꞌia quixun. Usai ꞌia ca uinu ꞌicë unínbi nu ꞌuchocëma ꞌicën.

1 Timoteo 1:19

Usa ꞌaínbi ca —ësa ñu ꞌati ca ꞌaisama ꞌicë —quixun ꞌunánquinbi usaquin ꞌacë ꞌaish uni raíri Jesucristobë upiti nitsima.

1 Timoteo 1:5

Nucën Papa Dios ca cuëënia aín unicamaxa ësai ꞌinúnu ꞌunánmiti: aín nuitu upí ꞌianan aín ꞌuchacama tërë́ncë ꞌixun ꞌatëcënti sináncëma ꞌianan Jesucristomi asérabi catamëcë ꞌixun unicama nuibati.

1 Timoteo 3:9

Usa ꞌixun ca Jesucristomi catamëquin Nucën Papa Diosan Bëru Ñunshin Upitan ꞌunánmicë ñucama upí oquin ꞌunani an ꞌimicësabi oi ꞌiti ꞌicën. Usai ꞌi ca —ꞌën cana Nucën Papa Dios cuëëncëma ñu ꞌaima —quixun ꞌunáncë ꞌiti ꞌicën.

2 Timoteo 1:3

Nucën raracaman ꞌasaribi oquin ꞌënribi asérabi a ꞌinamëcë ꞌixun rabicë, Nucën Papa Dios, a cana imë́bi nëtë́nbi abë banaquin mi ñucáxunquin —asábi ca —quixun cain.

Tito 1:15

Ënëx ca ësa ꞌicën. Ui unix cara aín sinan upí ꞌicë an ca ñu upíma isquinbi upí oquinshi sinania. Usa ꞌaínbi ca ui unix cara Nucën Papa Diosmi sináncëma ꞌianan aín sinan upíma ꞌicë, an upí ñu isquinbi ꞌatima ñuishi sinania. Aín nuitu ꞌaisama ꞌixun ca usa unin ꞌatimaquin sinania.

Hebreos 10:22

A cupí nun ꞌuchacama tërë́ncë ꞌaish cananuna uisa ñu cara ꞌaisama ꞌicë quixunu ꞌunánquin mëníocë ꞌaish asérabi ax cuëëncësabi oi ꞌiisa tani Nucën Papa Diosbë banati ꞌain, an ca cuati ꞌicë quixun ꞌunani. Ax Nucën Papa Diosbë banai tabernáculo xubunu atsínux ca sacerdote aín ꞌucha tërë́ncë ꞌianan upiti nashi mëníocacëxa. Usaribiti cananuna Jesucristo cupí chucacësa ꞌaísha nun nuitu, nun sinan upí ꞌain Nucën Papa Diosbë banain.

Hebreos 13:18

Cananuna ꞌunanin, ñu ꞌatima ꞌaquinma upí ñuishi ꞌaisa tania ca Nucën Papa Diosan nu upí isia quixun. Usa ꞌicë camina nu Nucën Papa Dios ñucáxunti ꞌain.

Hebreos 9:14

Ñuina rëcë aín imi cupí uni ꞌicësamaira oi cananuna Cristo bama cupí nun ꞌucha tërë́ncë ꞌaish upí ꞌiti ꞌain. Nucën Papa Diosan Bëru Ñunshin Upí, axa usabi ꞌiá ꞌaish usabi ꞌicë, ax abë ꞌain ca Cristo, ax ꞌuchañuma ꞌaíshbi bamatsianxmabi, nun ꞌuchacama tërë́ncë ꞌinun bamacëxa. Xënibua ꞌaínbi abë ꞌitimoinu bamati ꞌicëbi ca nun ꞌuchacama tërë́nquin, ax aín imi ꞌapati bama cupí, Nucën Papa Dios, axa bamatimoi tsócë, a rabinu ax cuëëncësabi oi ꞌinun nu ꞌimia.

1 Pedro 2:19

An ñu mëëxuncë unían upí oquin ñu mëëxuncëxunbia an ñu mëëmicë unin ꞌatimoquin tëmëramicëxunbi ca an uni ñu mëëxuncë unin —ꞌëx cana Nucën Papa Diosnan ꞌai —quixun sinánquin tanshiti ꞌicën. Usai ꞌiti ca Nucën Papa Diosan iscëx upí ꞌicën.

1 Pedro 3:16

A sinani masá nuitunuxun ñu ꞌatima ꞌaíma camina chuámashi ꞌiti ꞌain. Usaími mitsux Cristonën ꞌimicëx upitax ꞌia isi ca an mitsu ꞌatimaquin ñuicë unicama —nuxnu quicë bana ax ca cëmë ꞌicë —quixun sinani rabínti ꞌicën.

1 Pedro 3:21

Nucën Papa Diosan sinánmicëxa Noé manë nuntinu ꞌiruax ië́asa, usaribiti cananuna nuxribi Nucën Papa Diosmi catamëti ꞌunpaxan nashimicë ꞌaish iëtin. Nun namia chuañuma ꞌinun cananuna nashimicë ꞌitima ꞌain. Usai ꞌíma cananuna —Jesucristo baísquia cupía Nucën Papa Diosan nu upí ꞌimicë ꞌaish cananuna nun ꞌuchacama tërë́nce ꞌaish an iscëx upí ꞌai —quixun sinani nashimicë ꞌain.