Hechos 20:2 - Kashibo-Kakataibo Biblia

² Cuanquin ca a menua ꞌicë ëmacamanua ꞌicë axa Jesucristomi catamëcë unicama, ëníma Jesúsmi catamënun quixun caquin sinánmiacëxa. Sinánmibiani ca Grecia ꞌicëbi Acayaribi cacë menu cuancëxa.

Nukën 'Ibu Diosan ain unikama 'inan ain bana

² Cuanquin ca a menua 'icë ëmacamanua 'icë axa Jesucristomi catamëcë unicama, ëníma Jesúsmi catamënun quixun caquin sinánmiacëxa. Sinánmibiani ca Grecia 'icëbi Acayaribi cacë menu cuancëxa.

Hechos 20:2 ပူးပေါင်းရင်းမြစ်များ

Zacarías 9:13

ꞌËn kana Judánu ꞌikë Israelkama anun ꞌakanankë ꞌën kantisa ꞌinun ꞌimian, ꞌimianan kana Efraín Israel, unikama aturibi ꞌën piasa ꞌinun ꞌimian. ꞌAnan kana Siónnu ꞌikë, Israel suntárukama an ꞌën manë xëtókësa ꞌixun Grecianu ꞌikë suntárukama ꞌanun ꞌamiti ꞌain.

Lucas 3:18

Usaquin bana ñuixuanan unicama ꞌësëquin ca Juanën Jesús ñuiquin a cuatia cuëënun bana ñuixuancëxa.

Hechos 14:22

A ëmacamanu ꞌiquiani cuanquin ca axa Jesucristomi catamëcë unicama cushioquin Jesucristomi catamëti ënxunma ꞌanun ꞌësëanan nux Nucën Papa Diosnan ꞌaish cananuna uni itsían bëtsi bëtsi ocë ꞌiti ꞌai quixun cacëxa.

Hechos 15:41

Xucëx cuanquin ca Pablobëtan Silasnën Siria menu cuanan Cilicia menuribi cuanquin a mecamanuaxa Jesucristomi catamëcë unicama bana ñuixunquin Jesucristonan ꞌaísha cuëënun sinánmiacëxa.

Hechos 16:12

Anuax cuanx cananuna Filipos ëmanu bëbacën. Filipos ax ca Macedonia menu ꞌicë ëma cha anuribia Romanu ꞌicë unicama ꞌicë ꞌiacëxa. Anu cananuna ꞌitsamashi nëtë ꞌiacën.

Hechos 17:1

Usaquiani cuani Anfípolis ëma ꞌimainun Apolonia ëma anun cuanx ca Tesalónica ëmanu bëbacëxa. Tesalónicanu ca anua judíos unicama timë́ti xubu achúshi ꞌiacëxa.

Hechos 17:10

Usai ꞌicëbëtan ca axa Jesucristomi catamëcë unicaman bënë́nquinshi imë́ Pablocëñun Silas Berea cacë ëmanu cuantánun quixun xuacëxa. Xucëx cuanx bëbatancëx ca anua judíos unicama timë́ti xubunu atsíancëxa.

Hechos 2:40

Usoquin canan ca bana raíriribi ñuixunquin Pedronën ꞌësëquin cacëxa: —Ënë nëtënu ꞌicë unían a ꞌunáncëma ꞌaínbi camina mitsux Jesucristomi sinanati Nucën Papa Diosnan ꞌinux ië́ti ꞌain.

Hechos 20:1

Usaquin cacë́xa cuancëbëtan ca Pablonën axa Jesucristomi catamëcë unicama camicëx aia ꞌësë́anan bana ñuixuntancëxun —cuanmainun ca ꞌican —quixun atu cabiani Macedonia menu cuancëxa.

Hechos 20:11

Catancëx manan ꞌirutëcënxun, pán tucapaxun pianan pëcaratamainun bana ñuixunëti, ca Pablo atu ëbiani cuancëxa.

Hechos 20:3

Cuanx bëbax ca anu rabë́ ꞌimainun achúshi ꞌuxë ꞌiacëxa. Anu ꞌaish ca manë nuntin Siria menu cuanti sinánquinbi, judíos unicamaxa ami ꞌësë́nania ñuia cuati sinanacëxa. Sinanabiani ca Macedonia anu pain bain cuancëxa.

1 Corintios 4:19

Usaquin sináncëbëbi cana Nucën ꞌIbu Jesucristo cuëëncëbë ꞌitsama nëtë ꞌicëbë mitsu isi cuanti ꞌain. Cuanxun cana a unicaman cara aín cuëbitainshi banaquinma asérabi ax quicësabi oquin ꞌaia quixun isti ꞌain.

Colosenses 1:28

Nun cananuna Cristo ashi ñuiquin aín unicama ñuixunin. Ñuixunquin cananuna aín unicaman upí oquin cuanan, Cristonan ꞌaish ax cuëëncësabi oíshi ꞌinun quixun upí oquin ꞌësëquin, aín unicama ꞌunánmin.

1 Tesalonicenses 2:11

Usaribi oquin camina ꞌunanin, unían aín bëchicë ꞌacësaribi oquin cananuna mitsu achúshi achúshi upí oquin sinánmiquin ꞌësëa quixun.

1 Tesalonicenses 2:3

Nun cananuna Jesucristo ñuiquin bëtsi oquin uni bana ñuixuncëma ꞌain. ꞌImainun cananuna ꞌatimaquin sinanx banaquin uni paráncëma ꞌain.

1 Tesalonicenses 4:1

Nucën xucë́antu, Nucën ꞌIbu Jesús cuëëncësabi oquin ꞌësëquin cananuna ësaquinribi mitsu cain, uisai ꞌianan caramina uisaira oquinribi Nucën Papa Dios cuëëntanun ꞌati ꞌai quixunu mitsu ꞌunánmicësabi oquin ꞌaquinbi camina mitsun ꞌacësamaira oquin camabi nëtën ꞌati ꞌain.