Hechos 2:39 - Kashibo-Kakataibo Biblia

³⁹ Ënë banacamax ca mitsu ꞌimainun mitsun bëchicëcama ꞌimainun bëtsi unicamanribi cuati oquin Nucën Papa Diosan mënío ꞌicën. Amia sinánmisa tancë unicamanribi cuati oquin ca usoquin mëníocëxa.

Nukën 'Ibu Diosan ain unikama 'inan ain bana

³⁹ Ënë banacamax ca mitsu 'imainun mitsun bëchicëcama 'imainun bëtsi unicamanribi cuati oquin Nucën Papa Diosan mënío 'icën. Amia sinánmisa tancë unicamanribi cuati oquin ca usoquin mëníocëxa.

Hechos 2:39 ပူးပေါင်းရင်းမြစ်များ

Isaías 44:3

ꞌën kana anu uni ꞌikëma menua ꞌumpax ꞌinun ꞌimiti ꞌain, ꞌimianan kana me ëskikë anuribia xëxákama rakanu ꞌimiti ꞌain. ꞌËn kana min rëbúnkikama amiribishi upiti tsókanun ꞌimianan, upíokin sinánxunkin ꞌakinti ꞌain.

Isaías 54:13

ꞌËn kana min bakë bëchikëkama ñu ꞌunánmiti ꞌain, usokëx ka akamax upiti tsóti bukuti ꞌikën.

Isaías 65:23

Usa ꞌain ka ꞌën unikaman ñu mëëkë ax ñankabi ꞌakëma ꞌiti ꞌikën, ꞌianan ka atun bëchikëkamax anun bamati nëtë ꞌikëma ꞌaínbi bamatima ꞌikën, atux ka ꞌën kaískë unikaman rëbúnki ꞌikën. Atux ka Nukën ꞌIbu ꞌupiokin sinánxuan unikama aín bëchikëkama ꞌikën, usa ꞌaish ka aín rëbúnkikama atúxribi usaribi ꞌiti ꞌikën.

Ezequiel 37:25

Usokin ꞌai ka ꞌën uni Jacob ꞌinan me anua aín chaitiokëkamaxribi anu tsóa me anuribi tsókanti ꞌikën. A menu ka xënibua ꞌaínbi atu ꞌimainun atun bakë bëchikëkamaribi ꞌimainun atun rëbúnkikamaribi tsóti ꞌikën; usai ꞌimainun ka ꞌën uni David aín rëbúnkinëx xënibua ꞌaínbi atun ꞌapu ꞌiti ꞌikën.

Joel 2:28

Usakin ënë ñukama pain ꞌatankëxun kana ꞌën Bëru Ñunshin kamabi uninu xuti ꞌain: Usa ꞌain ka mitsun bakë bëchikë bëbukama ꞌimainun ini bëchikë xanukama atun ꞌën bana ñuiti ꞌikën, ꞌamainun ka uni xënikaman namákin isti ꞌikën, ꞌimainun ka uni bënábu atúnribi namákësa okin isti ꞌikën.

Joel 2:32

ꞌAínbi ka kamabi unikama an Nukën ꞌIbun anë rabikë atun bamatinuax ië́ti tanti ꞌikën, usa ꞌain ka aín bashi Sión kakë Jerusalénnu ꞌikë anu ka anua atux ië́ti ꞌiti ꞌikën. Nukën ꞌIbu usai ka ꞌiti ꞌikë kiax kiásabi oi. Usa ꞌain ka an kaískë unikamax bamanuxbi tsókëpan ꞌiti ꞌikën.

Hechos 10:45

Usa ꞌain ca aín Bëru Ñunshin Upitan ꞌimicëxun unin cuacëma banan banaquin Nucën Papa Dios rabicancëxa. Nucën Papa Dios rabicania cuati ca Pedrobëa ucë Jesúsmi sináncë unicama ax judíosma unicamaxribia Nucën Papa Diosan Bëru Ñunshin Upíñu ꞌicë isi ratuti sináncasmacëxa.

Hechos 14:27

Usa ꞌain ca bëbaxun axa Jesucristomi catamëcë unicama timëacëxa. Timëxun ca Nucën Papa Diosan ꞌamicëxuan ꞌacë ñucama ñuixuanan —judíos unicamaxëshima, judíosma unicamaxribi ca Nucën ꞌIbu Diosan sinánmicëx Jesucristomi catamëtia —quixun ñuixuancëxa.

Hechos 15:14

Simón Pedronën ca nu ñuixuanxa, Nucën Papa Diosan cara uisaira oquin judíos unicamaishima, judíosma unicamaribi nuibaquin ainan ꞌinun ꞌimiaxa quixun.

Hechos 15:3

Xuquian Antioquíanu ꞌicë unicaman —bërúanx ca cuantan —quixun cacëx cuani Fenicia me ꞌabiani cuanan Samaria me ꞌabiani cuanquin ca —judíosma unicamaxribi ca sinanati Jesucristomi catamëaxa —quixun ñuixuancëxa. Usaquian ñuia cuati ca Fenicia ꞌimainun Samarianu ꞌicë axa Jesucristomi catamëcë unicamax cuëë́inra cuëë́ancëxa.

Hechos 15:8

An camabi unían sináncë ñu ꞌunáncë ꞌixun ca Nucën Papa Diosan, a unicamax ca judíosma ꞌaíshbi Jesucristomi asérabi sinánxa quixun ꞌunánquin, nu ꞌimicësaribi oquin aturibi aín Bëru Ñunshin Upíñu ꞌinun ꞌimiaxa.

Romanos 11:29

Bëráma judíos unibu —ꞌënan ca mitsu ꞌimainun mitsun rëbúnqui ꞌiti ꞌicë —quixun Nucën Papa Diosan cá ꞌain ca a banacama usabi ꞌiti ꞌicën. Nucën Papa Diosan ca —mitsux camina ꞌënan ꞌiti ꞌai —quitancëxun bëtsioquin sinántëcënima.

Romanos 8:30

Uicamax cara usai ainan ꞌiti ꞌicë quixun ꞌunánquin ca Nucën Papa Diosan acama an sinánmicëxa ami catamëtia atun ꞌuchacama tërë́nquin ainan ꞌimiaxa. ꞌImiquin ca atux aín nëtënu abë ꞌiti ꞌimiaxa.

Romanos 9:24

Raírinëxa judíos uni ꞌimainun raírinëxribi judíosma uni ꞌicëbi ca Nucën Papa Diosan ainan ꞌinun nu ꞌimiaxa.

Romanos 9:4

ꞌËn aintsicama judíos unibu atux ca ꞌësaribi Israelnën rëbúnqui ꞌicën. Israelnën rëbúnqui, judíos unicama, ca Nucën Papa Diosan aín uni ꞌinun caísacëxa. Caístancëxun ca, asérabi ca ax Dios ꞌicë quixun ꞌunánun, Israel unicama aín cushi ismianan aín pëcacë aribi ismiacëxa. An ca atu ainan ꞌimiquin atúan uisai cara ainan ꞌaish ꞌiti ꞌicë quixun ꞌunánun aín banacama Moisés cuënëomiacëxa. Cuënëomiquin ca anuxun a rabiti xubu ꞌatancëxun cara uisoquin a rabiti ꞌicë quixun canan uisaira oquin cara an atu bërúanti ꞌicë quixun cacëxa.

1 Corintios 7:14

Usa ꞌain ca aín xanu Jesúsmi catamëcë ꞌixun aín bënëribi Jesúsmi sinánun sinánmiti ꞌicën. Sinánmianan ca aín tuácamaribi Jesucristomi sinánun sinánmiti ꞌicën. Usaribi oquin ca aín bënën Jesúsmi catamëcë ꞌixun aín xanuribi Jesúsmi sinánun sinánmianan aín bëchicë Nucën Papa Diosan bana ꞌunánmiti ꞌicën. Usaquinmi ꞌaquincëx ca mitsun bëchicëcama ax an Nucën Papa Diosan bana cuacëma unin bëchicësa ꞌitima ꞌicën.

Efesios 1:18

ꞌImainun cana mitsu ñucáxunin, an ꞌimicëx caramina uisairai ënë nëtënuax Jesucristosaribi ꞌaish upí sinánñu ꞌiti ꞌai quixunmi mitsun ꞌunánun. Ñucánan cana uisairai caramina aín nëtënu abë ꞌaish, axa ami catamëcë unicamabë ꞌiti ꞌai quixunmi ꞌunánun mitsu ñucáxunin.

Efesios 2:12

Judíos unima ꞌaish camina Cristo ñui quicë bana cuacëma ꞌiacën. Judíos unicaman ꞌunan ꞌaínbi camina mitsun Nucën Papa Diosan bana ꞌunáncëma ꞌianan an Cristo ñuiquin Abraham cá bana a ꞌunáncëma ꞌiacën. Usa ꞌixun camina Nucën Papa Diosan ca nuibaquin uni ꞌaquianan ainan ꞌimiti ꞌicë quixun ꞌunáncëma ꞌaish mitsux cuëëncësa oíshi tsóti sináncën.

Efesios 4:4

Jesucristonan ꞌaish ca aín unicama achúshisaishi ꞌicën. An atu ꞌaquincë Nucën Papa Diosan Bëru Ñunshin Upí ax ca achúshishi ꞌicën. Usa áin ca bëtsin ꞌunáncësaribi oquin aín unicaman ꞌunania, Nucën Papa Diosan ca aín nëtënu abë ꞌinun nu caísacëxa quixun.

2 Tesalonicenses 1:11

Usai ꞌiti cupía ainan ꞌinun caíscë ꞌixun usai ca aín uni ꞌiti ꞌicë quixun an sináncësabi oi ꞌinun mitsu ꞌiminun cananuna Nucën Papa Dios mitsu nëtë camabi ñucáxunin. Ñucáxuanan cananuna ax cuëëncësabi oquinmi mitsun upí ñu ꞌaisa tancë acama ꞌanan ami catamëtia an mitsu sinánmicëxunmi upí oquin ꞌanun aín cushínbi mitsu cushionun quixun a ñucatin.

2 Timoteo 1:9

Nucën Papa Diosan ca nu ië́miquin ainan ꞌimiacëxa, nuxnu ax cuëëncësabi oíshi upí ꞌinun. Nun ñu upí ꞌacë cupíma, axbi nuxnu ainan ꞌiti cuëënquinshi, ca nu nuibaquin Jesucristo cupí nu ainan ꞌimiacëxa. Camabi ñu uniocëma pain ꞌixun ca Nucën Papa Diosan nuibaquin, Cristo Jesusan nu ië́minun mëníocëxa.

Hebreos 3:1

ꞌËn xucë́antu, mitsux ainanshi ꞌinun Nucën Papa Diosan ꞌimicë ꞌixun camina, Nucën Papa Diosan a ñuiquin unicama ñuixunun ënë nëtënu xuá ꞌixuan an aín unicama Nucën Papa Dios ñucáxuncë, Cristo Jesús, a uisa uni cara ꞌiacëxa quixun upí oquinra ꞌunánti ꞌain.

Hebreos 9:15

Usa ꞌain ca Nucën Papa Dios quiásabi oi, an Cristomi catamënun sinánmicë unicama xënibua ꞌaínbi abë ꞌinun Cristo bamacëxa. An Moisésnën cuënëo bana cua nucën raracaman ꞌucharibi ca Cristo bama cupí, tërë́ncë ꞌicën. Usa ꞌain ca Moisésnën cuënëo bana ꞌiásama Cristo ñui quicë bana ꞌicën.

1 Pedro 5:10

Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.

2 Pedro 1:10

ꞌËn xucë́antu, usa ꞌain Nucën Papa Diosan ainan ꞌiti caíscë ꞌaish camina an cacësabi oi ꞌinux bërúanracati ꞌain. Usa ꞌiquin camina Nucën Papa Diosmi sinánti ënquin ñu ꞌatima ꞌatima ꞌain.

2 Pedro 1:3

Nucën Papa Dios cushiira ꞌianan aín nuitu upíira ꞌixuan an nu ainan ꞌaish asaribi ꞌinun caíscë, an ca uisaira cara aín cushi ꞌicë quixun nu ꞌunánmiquin anúnu upitax ꞌiti ꞌimainun anúnu ax cuëëncësa oi ꞌiti a nu ꞌinánxa.

Apocalipsis 17:14

Acamax ca Carnero ꞌicësaribitia unin ꞌucha cupí bama abë ꞌacananti ꞌicën. ꞌAcananquin ca Carnero ꞌicësaribitia unin ꞌucha cupí bama, ax cushiira ꞌaish, ꞌibucaman ꞌIbu ꞌianan ꞌapucaman ꞌApu ꞌixun axa abë ꞌacanancëcama ñusmoti ꞌicën. Axa abë ꞌicëcaman ca a amia catamënun caísquin Nucën Papa Diosan sinánmicë ꞌixun uisai cara ñu ꞌicëbëtanbi a ëncëma ꞌicën. Usa ꞌixun ca Carnero ꞌicësaribitia unin ꞌucha cupí bama abë ꞌicëcaman axa abë ꞌacanancëcama ñusmoti ꞌicën.

Apocalipsis 19:9

Usai quicëbëtan ca ángelnën ꞌë caxa: —Ësaquinribi ca cuënëot: “Uicamax cara Carnero ꞌicësaribitia unin ꞌucha cupí bama, anúan aín unicama abë ꞌiti nëtë́an abë ꞌinun camicë ꞌicë, acamax ca cuëëinra cuëënti ꞌicën, unían xanu biquin abëtan pi unun camicë unicamax cuëëncësamaira oi”. Ësaquinribi ca ꞌë caxa: —Ënë bana a ꞌën mi cacë ax ca Nucën Papa Diosaxa quicë ꞌicën. Ca asérabi ꞌicën.