Hechos 15:32 - Kashibo-Kakataibo Biblia

³² Usa ꞌain ca an Nucën Papa Diosan sinánmicëxun bana uni ñuixuncë uni ꞌixun Judas ꞌimainun Silasnën ꞌitsa oquin bana ñuixunquin anu ꞌicë unicama ꞌësëacëxa. ꞌËsëcëxun upí oquin Jesús sinani chuámarua tani ca unicama cuëëancëxa.

Nukën 'Ibu Diosan ain unikama 'inan ain bana

³² Usa 'ain ca an Nucën Papa Diosan sinánmicëxun bana uni ñuixuncë uni 'ixun Judas 'imainun Silasnën 'itsa oquin bana ñuixunquin anu 'icë unicama 'ësëacëxa. 'Ësëcëxun upí oquin Jesús sinani chuámarua tani ca unicama cuëëancëxa.

Hechos 15:32 ပူးပေါင်းရင်းမြစ်များ

Mateo 23:34

ꞌËn cana unicama ꞌën bana ꞌunánquian a uni ñuixunun ꞌimianan raíriribi ꞌën bana unicama ꞌunánminun ꞌimicëbi camina raíri ꞌanan raíri i curúsocënu matásun bamaminuxun ꞌain. Raíri camina anu timë́ti xubu anuxun rishquinuxun ꞌain. Raírinëan ꞌachushi ëmanuxun bana ñuixuniami mitsun bëtsi bëtsi ocëbëa bëtsi ëmanu cuancëbë anu mitsúxribi cuanxun camina usaribi oquin ꞌatëcënuxun ꞌain.

Lucas 11:49

Nucën Papa Dios an camabi ñu ꞌunáncë ꞌaish ca usaía ꞌicëma pan ꞌain, ësai quiacëxa: “ꞌËn unicama raíri ꞌën bana ꞌunánquian a uni ñuixunun ꞌimianan raíriribi ꞌën bana unicama ꞌunánminun ꞌimiabi ca unin raíri ꞌanan raíri bëtsi bëtsi oti ꞌicën”.

Hechos 11:23

Xucëx cuanx bëbaquin, Nucën Papa Diosanbia atu judíos uni ꞌicëmabi chuámarua ꞌaísha upí nuituñu ꞌinun ainan ꞌimicë isi ca Bernabé cuëëancëxa. Cuëënquin ca ꞌësëquin cacëxa: —Mitsúnmi bëráma ꞌacë ñu ꞌatëcëníma camina Nucën ꞌIbu Jesús ami ëníma catamëti ꞌain.

Hechos 11:27

Saulobëa Bernabé Antioquíanu ꞌain ca an Nucën Papa Diosan sinánmicëxun unicama ñuixuncë uni raírinëx Jerusalénuax Antioquíanu uacëxa.

Hechos 13:1

Antioquíanu ꞌicë axa Jesucristomi catamëcë unicama raírinëx ca an Nucën Papa Diosan sinánmicëxun bana uni ñuixuncë uni ꞌiacëxa, raírinëx ca an aín bana unicama ꞌunánmicë ꞌiacëxa. Usa ꞌain ca Bernabé ꞌimainun Simeón ꞌicëbi Tunan Uni caquinribi anëcë, a ꞌimainun Cirene menu ꞌicë uni, Lucio, a ꞌimainun Manaén, axa Galilea menu ꞌicë ꞌapu Herodes, abë canicë, a ꞌimainun Saulo, acamax Antioquíanu ꞌiacëxa.

Hechos 14:22

A ëmacamanu ꞌiquiani cuanquin ca axa Jesucristomi catamëcë unicama cushioquin Jesucristomi catamëti ënxunma ꞌanun ꞌësëanan nux Nucën Papa Diosnan ꞌaish cananuna uni itsían bëtsi bëtsi ocë ꞌiti ꞌai quixun cacëxa.

Hechos 15:1

Usa ꞌain ca judíos uni raíri Judea menuax Antioquíanu cuanxun, axa Jesucristomi catamëcë unicama ësaquin cacëxa: Mitsux asérabi Nucën Papa Diosnan ꞌinux ië́tisa tani camina Moisés quiásabi oi ꞌunánti oracacë ꞌiti ꞌain.

Hechos 15:22

Usaía Jacobo quia cuaquin ca Jesusan aín bana ñuixunun caíscë unicama ꞌimainun axa Jesucristomi catamëcë unicaman aín cushicamabëtan sináncëxa, Antioquíanua Bernabé ꞌimainun Pablobë cuantánun cananuna rabë́ uni caísti ꞌai quixun. Usaquin sinánxun ca axa Jesucristomi catamëcë uni rabë́, Judas ꞌicëbi Barsabásribi cacë, acëñun Silas caísacëxa.

Hechos 15:27

Usa ꞌain cananuna Judascëñun Silas xutin, Bernabé ꞌimainun Pablobëa cuanun. Xucëxun ca atun ënë quirica quicësabi oquin mitsu ñuixunti ꞌicën.

Hechos 15:3

Xuquian Antioquíanu ꞌicë unicaman —bërúanx ca cuantan —quixun cacëx cuani Fenicia me ꞌabiani cuanan Samaria me ꞌabiani cuanquin ca —judíosma unicamaxribi ca sinanati Jesucristomi catamëaxa —quixun ñuixuancëxa. Usaquian ñuia cuati ca Fenicia ꞌimainun Samarianu ꞌicë axa Jesucristomi catamëcë unicamax cuëë́inra cuëë́ancëxa.

Hechos 15:31

ꞌInáncëxun a quirica uisai cara quia quixun istancëx ca cuëëni chuámashirua ꞌicancëxa.

Hechos 15:41

Xucëx cuanquin ca Pablobëtan Silasnën Siria menu cuanan Cilicia menuribi cuanquin a mecamanuaxa Jesucristomi catamëcë unicama bana ñuixunquin Jesucristonan ꞌaísha cuëënun sinánmiacëxa.

Hechos 18:23

Antioquíanu ꞌëora pain ꞌitancëx ca Galacia menu ꞌicë ëma ꞌimainun Frigia menu ꞌicë ëmacama oi cuanquin Pablonën axa Jesucristomi catamëcë unicama upiti Jesucristomi sinani ax cuëëncësabi oi ꞌinun quixun caquin atu ꞌësëacëxa.

Hechos 2:40

Usoquin canan ca bana raíriribi ñuixunquin Pedronën ꞌësëquin cacëxa: —Ënë nëtënu ꞌicë unían a ꞌunáncëma ꞌaínbi camina mitsux Jesucristomi sinanati Nucën Papa Diosnan ꞌinux ië́ti ꞌain.

Hechos 20:2

Cuanquin ca a menua ꞌicë ëmacamanua ꞌicë axa Jesucristomi catamëcë unicama, ëníma Jesúsmi catamënun quixun caquin sinánmiacëxa. Sinánmibiani ca Grecia ꞌicëbi Acayaribi cacë menu cuancëxa.

Romanos 12:6

Nucën Papa Diosan nu bëtsi bëtsi ñu ꞌanun caíscë ꞌixun cananuna an ꞌimicësabi oquin upí oquin ꞌati ꞌain, usoquin nun ꞌati ca Nucën Papa Dios cuëënia quixun ꞌunánquin. An aín bana ñuixunun caíscë ꞌixun cananuna an sinánmicësabi oquin aín bana unicama upí oquin ñuixunti ꞌain.

Romanos 12:8

Axa upí ꞌinun uni raíri ꞌësënun quixun Nucën Papa Diosan ꞌimicë ꞌixun cananuna upí oquin ꞌësëti ꞌain. Nun uni raíri ñu ꞌinánun quixun ꞌimicë ꞌixun cananuna unin nu rabinun quixun sinánquinma cuëënquinshi ꞌinánti ꞌain. Nux unin cushi ꞌinun ꞌimicë ꞌixun cananuna nun unicama upí ꞌinun upí oquin bërúanti ꞌain. Usoquin ꞌanun Nucën Papa Diosan ꞌimicë ꞌixun cananuna uni ꞌaquinsa ꞌicë cuëënquin upí oquin ꞌaquinti ꞌain.

1 Corintios 1:8

Nucën ꞌIbu Jesucristo utëcëncëbëtan uinu ꞌicë unínbi mitsu ñuiquin —a unix ca ꞌatima ñu ꞌacë ꞌicë —quixun canúnma ca Nucën Papa Diosan mitsúnmi ami catamëquin ꞌatima ñu ꞌaxunma ꞌanun ënquinma mitsu bërúanti ꞌicën.

1 Corintios 14:29

Usaribi oquin camina Nucën Papa Diosan sinánmicëxun aín bana ñuixuinsa tanquin rabë́xuinshi unicama ñuixunti ꞌain. Ñuixuanan camina rabë́ ꞌimainun achúshixuinshi ñuixunti ꞌain. Ñuixunia camina raírinën —a unin banax cara asérabi Nucën Papa Diosan sinánmicëxa quicë ꞌicë —quixun cuati ꞌain.

1 Corintios 14:3

Usa ꞌaínbi ca an Nucën Papa Diosan sinánmicëxun aín bana unicama ñuixuncë uni an axa Jesucristomi catamëcë unicaman ami catamëquin an cacësabi oquin ꞌanun ꞌunánmia. ꞌUnánmianan ca ñu upíshia ꞌanun cushioquin ꞌësëia. ꞌËsë́anan ca masá nuitutiabi sinanamiquin upí oquin sinánmia.

1 Corintios 14:32

Nucën Papa Diosax ca aín unicamaxa timë́ax an bana ñuixuncë unían ñuixuncëxun bana cuatima raíri sharárui banati cuëënima. Usa ꞌain ca raíri unin bana ñuixuinsa tanquinbi tënëpaínti ꞌicën. Uinu cara timëtia, anuax ca axa Jesucristomi catamëcë unicamax ësai ꞌia. Usa ꞌain camina usaribiti mitsux ꞌiti ꞌain.

Efesios 3:5

A bana ca bëráma Jesucristo ucëma pain ꞌain, uisai cara quia quixun uni Nucën Papa Diosan ꞌunánmiama ꞌicën. Usa ꞌaínbi ca bërí aín Bëru Ñunshin Upitan an aín bana ñuixunun caíscë unicama uisai cara a bana quia quixun ꞌunánmiaxa.

1 Tesalonicenses 2:11

Usaribi oquin camina ꞌunanin, unían aín bëchicë ꞌacësaribi oquin cananuna mitsu achúshi achúshi upí oquin sinánmiquin ꞌësëa quixun.

1 Tesalonicenses 3:2

nucën xucën Timoteo mitsu istánun quixun xuti cananuna sinan. Anribi ca ami sináncë ꞌixun —Jesucristomi catamëti ca uni ainan ꞌiti ꞌicë —quixun Nucën Papa Diosan bana nubëtan camabi uni ñuixuanxa. Usa ꞌixun ca cuantancëxun an mitsúxmi Jesucristonan ꞌaish tëmëraíbi ami manuaxma ꞌinun upí oquin ꞌësëquin mitsu cushioti ꞌicën. Mitsúnbi camina ꞌunanin, Nucën Papa Diosan unicamax ca bëtsi unían bëtsi bëtsi ocë ꞌiti ꞌicë quixun.

1 Tesalonicenses 4:1

Nucën xucë́antu, Nucën ꞌIbu Jesús cuëëncësabi oquin ꞌësëquin cananuna ësaquinribi mitsu cain, uisai ꞌianan caramina uisaira oquinribi Nucën Papa Dios cuëëntanun ꞌati ꞌai quixunu mitsu ꞌunánmicësabi oquin ꞌaquinbi camina mitsun ꞌacësamaira oquin camabi nëtën ꞌati ꞌain.

1 Tesalonicenses 5:14

Nucën xucë́antu, ënë ñucamaribi ꞌanun cananuna mitsu cain, an ñu mëëtisama tanquin uni itsi ubíocë unicama, a camina sinananun ꞌësëti ꞌain. Jesucristonan ꞌaíshbi upiti ami catamëcëma unicama a Jesucristomi upiti catamënun sinánmianan camina an Jesucristonan ꞌixunbi an ñu ꞌatima ꞌati sináncë unicama aribi upí ꞌinun ꞌaquinti ꞌain. ꞌAquianan camina camabi uni ami nishquinma nuibaquin upí ꞌinun ꞌaquinti ꞌain.

1 Tesalonicenses 5:20

Nucën Papa Diosan sinánmicëxuan unin ñuixuncëxun camina a bana cuaisama tantima ꞌain.

2 Tesalonicenses 3:12

Usa unicama cananuna Nucën ꞌIbu Jesucristonën nu sinánmicësabi oquin ꞌësëquin cain, atun cuëëncë ñu binuxun ca uni itsi ubíoquinma atúnbi ñu mëëti ꞌicë quixun.

1 Timoteo 2:1

Ënë ñucama pain ñuiquin cana mi cain: Timoteo, min camina axa Jesucristomi catamëcë unicaman, uni raíri upiti bucunun ꞌimianan aín cuëëncë ñuribi bianan ami catamëanuan sinánminun, Nucën Papa Dios ñucáxunun ꞌë caxunti ꞌain. Canan camina atúan Nucën Papa Dios —asábi ca —quixun canun cati ꞌain.

2 Timoteo 4:2

minmi ñuixuncëxuan min bana cuanan, cuatiamabi camina uni bana ñuixunti ꞌain. Ñuixunquin camina Jesucristo ñuicë banax ca asérabi ꞌicë quixun ꞌunánmiquin amia sinánun ꞌaquinti ꞌain. ꞌAquianan camina an ñu ꞌaisama ꞌacë unicamaribi ꞌësëanan camabi uni Jesúsmi catamëcë ꞌaísha upí ꞌinun ꞌësëti ꞌain. Min cacëxun cuacëbëma bënë́quinma camina minmi upí oquin ꞌunáncë bana ñuixunquin uni ꞌësëti ꞌain.

1 Pedro 5:1

Axa Jesucristomi catamëcë unin cushicamasaribi cana ꞌëx ꞌain. Usa ꞌixun cana atúan ꞌacësaribi oquin Cristo camabi unin ꞌucha cupía tëmëra, a ñuiquin bana ñuixunin. ꞌAnan cana atúxa ꞌicësaribiti Cristo utëcëncëbë aín nëtënu abë ꞌiti sinanin. Usa ꞌixun cana axa Jesucristomi catamëcë unin cushicama mitsu ësaquin cain:

1 Pedro 5:10

Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.

1 Pedro 5:12

Nucën xucën Silvano, ax ca ꞌën iscëx upiti Jesucristomi sináncë ꞌicën. Usa ꞌain cana an mitsu buánxunun ënë quirica mitsu ꞌaxuan. Ënë quiricanu ꞌësë́anan cana mitsu cain, an mitsu upí oquin cushionan ꞌaquincë cupí camina asérabi ꞌunánti ꞌain, uisaira oquin cara Nucën Papa Diosan mitsu nuibatia quixun. A ënima camina mixmi ꞌicësabi oi ami upiti catamëti ꞌain.