Hechos 13:1 - Kashibo-Kakataibo Biblia

¹ Antioquíanu ꞌicë axa Jesucristomi catamëcë unicama raírinëx ca an Nucën Papa Diosan sinánmicëxun bana uni ñuixuncë uni ꞌiacëxa, raírinëx ca an aín bana unicama ꞌunánmicë ꞌiacëxa. Usa ꞌain ca Bernabé ꞌimainun Simeón ꞌicëbi Tunan Uni caquinribi anëcë, a ꞌimainun Cirene menu ꞌicë uni, Lucio, a ꞌimainun Manaén, axa Galilea menu ꞌicë ꞌapu Herodes, abë canicë, a ꞌimainun Saulo, acamax Antioquíanu ꞌiacëxa.

Nukën 'Ibu Diosan ain unikama 'inan ain bana

¹ Antioquíanu 'icë axa Jesucristomi catamëcë unicama raírinëx ca an Nucën Papa Diosan sinánmicëxun bana uni ñuixuncë uni 'iacëxa, raírinëx ca an aín bana unicama 'unánmicë 'iacëxa. Usa 'ain ca Bernabé 'imainun Simeón 'icëbi Tunan Uni caquinribi anëcë, a 'imainun Cirene menu 'icë uni, Lucio, a 'imainun Manaén, axa Galilea menu 'icë 'apu Herodes, abë canicë, a 'imainun Saulo, acamax Antioquíanu 'iacëxa.

Hechos 13:1 ပူးပေါင်းရင်းမြစ်များ

Mateo 27:32

Jesús buani cuanquinbi ca suntárunën Cirene cacë ëmanu ꞌicë uni, Simón cacë, a mëraquin cacëxa: —Min camina anu Jesús matásti i curúsocë ënë ꞌiábianti ꞌain. Cacëxun ca a unin buánxuancëxa.

Lucas 3:1

Tiberio anun Romanuxun ꞌapu ꞌimicancë nëtëa quince baritia ꞌicëbë ca Poncio Pilato Judea menu ꞌicë unicaman ꞌapu ꞌiacëxa. Usai ꞌimainun ca Herodes Galilea menu ꞌicë ꞌapu ꞌiacëxa. ꞌImainun ca Herodesnën xucën, Filipo, ax Iturea me ꞌimainun Traconíte menu ꞌicë ꞌapu ꞌiacëxa. ꞌImainun ca Lisanias cacë uni, ax Abilinia cacë menu ꞌicë ꞌapu ꞌiacëxa.

Hechos 11:30

Sinánxun achúshi achúshinën ꞌitsaira curíquiñu an ꞌitsa nanmainun ꞌitsamashi curíquiñu anribi ꞌitsamashi nantancëxun a curíquicama Saulocëñun Bernabé ꞌinánquin cacáncëxa: —Ënë curíquicama camina Judeanuxuan an Jesucristomi catamëcë unicama bana ñuixuncë unicama a ꞌinánti ꞌai —quixun.

Hechos 12:25

Usaía ꞌimainun ca Saulobë Bernabé Jerusalénuxun a buáncë curíqui unicama ꞌinántancëx, Juan ꞌicëbi Marcosribi cacë a buani, Antioquíanu cuantëcëancëxa.

Hechos 13:9

Usa ꞌaínbi ca Saulo ꞌicëbi Pablo caquinribi anëcë, an Nucën Papa Diosan Bëru Ñunshin Upitan sinánmicëxun Barjesús ñachacëxa.

Hechos 15:32

Usa ꞌain ca an Nucën Papa Diosan sinánmicëxun bana uni ñuixuncë uni ꞌixun Judas ꞌimainun Silasnën ꞌitsa oquin bana ñuixunquin anu ꞌicë unicama ꞌësëacëxa. ꞌËsëcëxun upí oquin Jesús sinani chuámarua tani ca unicama cuëëancëxa.

Hechos 15:35

Usaquin sinántancëx bërúxun ca anuxun Pablobëtan Bernabénën an Jesucristomi catamëcë ꞌixun aín bana ñuixuncë unicamabëtan —Nucën ꞌIbu Jesúsmi catamëti ca uni Nucën Papa Diosnan ꞌiti ꞌicë —quixun bana ñuixunquin Antioquíanu ꞌicë unicama ꞌunánmiacëxa.

Hechos 19:6

Usa ꞌain ca a unicama Pablonën aín mëcënan ramë́cëbë atunu Nucën Papa Diosan Bëru Ñunshin Upí uacëxa. Usaría ꞌicëbë unin ꞌunáncëma banan bananan ca a unicaman, usaquian Nucën Papa Diosan sinánmicë bana unicama ñuixuancëxa.

Hechos 21:9

Aín bëchicë ca rabë́ ꞌimainun rabë́ xanu bënëñuma ꞌiacëxa. A xanucaman ca Nucën Papa Diosan sinánmicëxun bana uni ñuixuancëxa.

Hechos 4:36

Axa usai ꞌaquianancë unicama achúshi ca Levitan rëbúnqui, José cacë, Chipre nasínu ꞌicë, ꞌiacëxa. Ax ca Jesusan caíscë unicaman Bernabé caquinribi anëcë ꞌiacëxa. A banax ca an masá nuitutiabi cuëënmicë qui quicë ꞌicën.

Hechos 9:1

Usa ꞌain ca Saulo, axa Nucën ꞌIbu Jesúsmi catamëcë unicama cëñucatsi quiax, atumi xuamati nishacëxa. Nishquin ca sacerdotenën cushicaman ꞌapu anu cuanxun cacëxa:

Romanos 16:21

Timoteo, an ꞌëbëtan Cristo ñuiquin bana ñuixuncë, abëtan ca Lucio, Jasón, Sosípater, acamax ꞌën aintsi ꞌixun bërúanxmi ꞌinun mitsu canun quixun ꞌë caxa.

1 Corintios 11:4

Axa Jesucristomi catamëcë unicama timë́cëbëtan ca nucë bënë unin Nucën Papa Diosbë banaquin aín mañuti mañutima ꞌicën. Usaribi oquin ca Nucën Papa Diosan sinánmicë bana uni ñuixunquin aín mañuti mañutima ꞌicën. Usoquian unin aín mañuti mañucëx ca ꞌaisama ꞌiti ꞌicën.

1 Corintios 13:2

ꞌËn Nucën Papa Diosan a sinánmicë ñu ñuiquin unicama ñuixuanan, camabi ñu ꞌunánquin uni itsin ꞌunáncëma ñuribi ꞌunánan, —Nucën Papa Diosan ca ꞌë ꞌaquinti ꞌicë —quixun sinánquin aín cushin aín bashibi amanu tacuiabi, ca uni itsi nuibaquin ꞌacëma ꞌicë Nucën Papa Diosan ꞌë upí isima.

1 Corintios 13:8

Ënë nëtëcama cëñúcëbëtan camaxunbi a ꞌunáncë cupí ca uinu ꞌicë unínbi Nucën Papa Dios quicë bana unicama ñuixuntëcëntima ꞌicën, uinu ꞌicë uníxbi ca Nucën Papa Dios rabi unin cuatima banan banatima ꞌicën, unían bëtsi uni ꞌunánmiti ca ꞌaíma ꞌiti ꞌicën. Usai ꞌiti a ꞌaíma ꞌaínbi ca nux nuibananti ax cëñutima, bamatancëxribi cananuna Nucën Papa Diosan nëtënu ꞌaish anuaxribi bëtsibë nuibananti ꞌain.

1 Corintios 14:29

Usaribi oquin camina Nucën Papa Diosan sinánmicëxun aín bana ñuixuinsa tanquin rabë́xuinshi unicama ñuixunti ꞌain. Ñuixuanan camina rabë́ ꞌimainun achúshixuinshi ñuixunti ꞌain. Ñuixunia camina raírinën —a unin banax cara asérabi Nucën Papa Diosan sinánmicëxa quicë ꞌicë —quixun cuati ꞌain.

1 Corintios 14:32

Nucën Papa Diosax ca aín unicamaxa timë́ax an bana ñuixuncë unían ñuixuncëxun bana cuatima raíri sharárui banati cuëënima. Usa ꞌain ca raíri unin bana ñuixuinsa tanquinbi tënëpaínti ꞌicën. Uinu cara timëtia, anuax ca axa Jesucristomi catamëcë unicamax ësai ꞌia. Usa ꞌain camina usaribiti mitsux ꞌiti ꞌain.

1 Corintios 9:6

¿Axa mitsubë ꞌicë uni raírinën ꞌacësaribi oquin ꞌënribi Bernabébëtan ꞌën mëcënan ñu mëëquinma, Nucën Papa Diosan banaishi ñuixunti cara asábima ꞌitsíanx? Ca asábi ꞌitsíanxa.

Gálatas 2:13

Pedronëan usaquin ꞌaia isquin ca axa Jesucristomi catamëcë judíos unicama raírinënribi, judíosma unicama axribi Jesucristomi sináncë ꞌicëbi, atubëtan piquinbi ëancëxa. A unicamaxa usai ꞌia isi ca Bernabénëxribi usaribiti ꞌiacëxa.

Gálatas 2:9

Nucën Papa Diosan usaquin ꞌë ꞌimicë ꞌicë ꞌunánquin ca Jacobo, Pedro, Juan, acaman atux Jesucristomi catamëcë unicaman cushi ꞌixun Bernabécëñun ꞌë aín mëcën ꞌinánquin, —asérabi camina nu ꞌacësaribi oquin Cristo ñuiquin aín bana ñuixunun Nucën Papa Diosan caíscë ꞌai —quixun canan —nun nu judíos unicama bana ñuixunmainun camina mitsun judíosma unicama bana ñuixuni cuanti ꞌai —quixun nu cacëxa.

Efesios 4:11

An ca ax cuëëncësa oquían bëtsi bëtsi ñu ꞌanun aín unicama ꞌimia. Bëtsi bëtsi unix ca aín bana ñuixunuan ꞌimicë ꞌicën. Raírinën ca Nucën Papa Dios quicë bana unicama ñuixunia. Raírinën ca axa Jesucristomi catamëcëma unicama amia catamënun upí oquin ꞌaquinia. Raírinën ca axa ami catamëcë unicama upiti Jesucristo cuëëncësabi oi ínun áquinia. Raírinën ca uisai cara Nucën Papa Diosan bana cuënëocama quia quixun uni ꞌunánmia.

Filipenses 4:22

Axa Jesucristomi catamëcë ënu ꞌicë unicamabëtan ca atúxribi Jesucristonan ꞌixun Romanu ꞌicë ꞌapu Césarnën xubunu ꞌicëcamanribi bërúanxmi ꞌicanun mitsu canun ꞌë caxa.

1 Tesalonicenses 5:20

Nucën Papa Diosan sinánmicëxuan unin ñuixuncëxun camina a bana cuaisama tantima ꞌain.