Hechos 11:26 - Kashibo-Kakataibo Biblia

²⁶ Bëax achúshi baritian anu ꞌiquin ca Saulobëtan Bernabénën axa Jesucristomi catamëcë unicamabë timë́quin atu ꞌunánmiacëxa. Usa ꞌain ca Antioquíanuxun pain uni raírinën axa Jesucristomi catamëcë unicama Cristonën uni caquin anëacëxa.

Nukën 'Ibu Diosan ain unikama 'inan ain bana

²⁶ Bëax achúshi baritian anu 'iquin ca Saulobëtan Bernabénën axa Jesucristomi catamëcë unicamabë timë́quin atu 'unánmiacëxa. Usa 'ain ca Antioquíanuxun pain uni raírinën axa Jesucristomi catamëcë unicama Cristonën uni caquin anëacëxa.

Hechos 11:26 ပူးပေါင်းရင်းမြစ်များ

Mateo 28:19

Usa ꞌain camina mitsun camabi menu cuanquin anu ꞌicë unicama ꞌëmi catamënun sinánmiti ꞌain. Usoquin sinánmiquin camina, ëmi ca catamëtia quixun ꞌunántioquin ꞌën Papa Diosmi sinani, ꞌëmiribi sinánan aín Bëru Ñunshin Upími sinania, nashimiti ꞌain.

Juan 2:2

Usa ꞌain ca Jesúsribi aín ꞌunánmicë unicamabë aribia camicëx cuanx anu ꞌiacëxa.

Hechos 1:15

Usa ꞌaish ca anu timë́ax Jesucristomi sináncë unicama ax ciento veinte xucë́nsa ꞌiacëxa. Usa ꞌain ca Pedronën atu nëbë́tsi niruxun cacëxa:

Hechos 11:20

Ñuixunmainun ca Chipre ꞌimainun Cirene menuaxa Jesucristomi catamëcë uni raíri anribishi Antioquía ëmanu cuanx bëbaxun, Nucën ꞌIbu Jesúsmi catamëti ca uni Nucën Papa Diosnan ꞌiti ꞌicë quixun, judíosma uniribi bana ñuixuancëxa.

Hechos 11:22

Usaía ꞌicëa ñuia ca axa Jesucristomi catamëcë unicaman Jerusalénuxun cuacëxa. Cuaxun ca Bernabé Antioquíanu cuantánun quixun xuacëxa.

Hechos 11:27

Saulobëa Bernabé Antioquíanu ꞌain ca an Nucën Papa Diosan sinánmicëxun unicama ñuixuncë uni raírinëx Jerusalénuax Antioquíanu uacëxa.

Hechos 11:29

Usai ꞌicëbëa Judeanu ꞌicë axa Jesucristomi catamëcë unicamax atun piti ñuñuma ꞌicë ñuicania cuaxun ca Antioquíanu ꞌicë unicaman curíqui atu buánmiti sináncëxa, axa ꞌitsa curíquiñucaman uiti cara nainsa tania ꞌati nanmainun uicamax cara ꞌitsamashi curíquiñu ꞌicë acamanribi uiti cara nainsa tania ꞌati nantancëxun.

Hechos 14:20

Usoquin ꞌacëa bamacësa sinánquin axa Jesucristomi catamëcë unicaman nëbë́tsioracëxbi ca niruquiani a ëmanubi cuantëcëancëxa. Usai ꞌionx ca pëcaracëbë Pablobë Bernabé, Derbe ëmanu cuancëxa.

Hechos 14:22

A ëmacamanu ꞌiquiani cuanquin ca axa Jesucristomi catamëcë unicama cushioquin Jesucristomi catamëti ënxunma ꞌanun ꞌësëanan nux Nucën Papa Diosnan ꞌaish cananuna uni itsían bëtsi bëtsi ocë ꞌiti ꞌai quixun cacëxa.

Hechos 14:23

Usoquin canan anua ꞌicë ëmacamanuax axa Jesucristomi catamëcë unicamabë timë́quin ca atun cushi ꞌinun, axa asérabi Jesucristomi catamëcë unicamaishi anëacëxa. Anëtancëx píma abë banaquin ca —axa mimi catamëcë ënë unicama camina upí oquin ñu ꞌanun sinánmianan bërúanti ꞌai —quixun Nucën Papa Dios atu ñucáxuancëxa.

Hechos 14:27

Usa ꞌain ca bëbaxun axa Jesucristomi catamëcë unicama timëacëxa. Timëxun ca Nucën Papa Diosan ꞌamicëxuan ꞌacë ñucama ñuixuanan —judíos unicamaxëshima, judíosma unicamaxribi ca Nucën ꞌIbu Diosan sinánmicëx Jesucristomi catamëtia —quixun ñuixuancëxa.

Hechos 14:28

Ñuixuntancëx ca anu pain axa Jesucristomi catamëcë unicamabë Bernabé ꞌimainun Pablo ꞌitsa ꞌuxën pain Antioquíanu ꞌiacëxa.

Hechos 18:27

Usa ꞌain ca Acaya menua Apolos cuainsa tancëbëtan axa Jesucristomi catamëcë unicaman —asábi ca —catancëxun atuan upí oquin Apolo binun quixun caquin axa Acayanuax Jesucristomi catamëcë unicama quirica cuënëoxuancëxa. Cuënëoxunia quirica bibiani manë nuntin cuanx Acayanu bëbatancëxun ca Apolosnën anua ꞌicë a Nucën Papa Diosan nuibaquin Jesúsmi sinánmicë unicama upí oquin ꞌaquiancëxa.

Hechos 19:9

Ñuixuniabi ca raírinën masáquin sinánquin cuaisama tancëxa. Usaquin cuaisama tani ca anu timë́cë unicaman cuamainunbi —Jesúsmi sinánti ca ꞌaisama ꞌicë —quiax quiacëxa. Usai quicëbë, anuax chiquíquianquin ca Pablonën axa Jesucristomi catamëcë unicama buani, Tirano cacë unían anuxun uni ꞌunánmicë xubu, anu cuancëxa. Cuanxun ca anuxun camabi nëtën bana ñuixuancëxa.

Hechos 20:1

Usaquin cacë́xa cuancëbëtan ca Pablonën axa Jesucristomi catamëcë unicama camicëx aia ꞌësë́anan bana ñuixuntancëxun —cuanmainun ca ꞌican —quixun atu cabiani Macedonia menu cuancëxa.

Hechos 20:30

Ësaquinribi cana ꞌunanin, axa Jesucristomi catamëcë unicamabë timë́cë unicama bëtsi bëtsin ca Nucën Papa Dios cuëëncësabi oquin ñuixunquinma, cëmë bana ñuixunti ꞌicën, a bana quicësabi oi isa ꞌinun quixun.

Hechos 21:4

Usai Tironu bëbaxun, axa Jesucristomi catamëcë unicama mërax, cananuna mëcën achúshi ꞌimainun rabë́ nëtën atubë anu ꞌiacën. Nuxnu anu ꞌain ca Nucën Papa Diosan Bëru Ñunshin Upitan sinánmicëxun a unicaman uisai cara Pablo ꞌiti ꞌicë quixun ꞌunánquin Jerusalénu cuanxma ꞌinun quixun cacëxa.

Hechos 26:28

Cacëxun ca Agripanën Pablo cacëxa: —Bënë́nquinshi camina ꞌë Cristonën uni ꞌimitisa tanin.

Hechos 6:1

Usomainun ca amiribi amiribi an Nucën Papa Diosan bana cuati unicamax ꞌitsacëxa. Griego banan banacë unicama ꞌimainun hebreo banan banacë judíos unicamaribi ca Jesucristomi catamëacëxa. Usa ꞌaish ca axa hebreo banan banacë unicama ñui ësai griego banan banacë unicamax quiacëxa: —Camabi nëtën piti mëtícaquinbi ca nun aintsi xanu casunamëcë a piti ꞌinanima.

Hechos 6:5

Ësoquian cacëx ca camáxbi cuëëni —cananuna caísti ꞌai —quiax canancëxa. Canantancëxun ca Esteban, Nucën Papa Diosmi catamëcë ꞌicëa aín Bëru Ñumshin Upitan sinánmicë, acëñun Felipe, Prócoro, Nicanor, Timón, Parmenas, ꞌimainun Nicolás, Antioquíanu ꞌicë uni ꞌixunbia an judíos unicamabëtan Nucën Papa Diosan bana ꞌunáncë, acama caísacëxa.

Hechos 9:19

Nashimicë ꞌixun pitancëx amiribishi cushitëcëni ca axa Jesucristomi catamëcë unicamabë Damasconu pain ꞌiacëxa.

Hechos 9:38

Jopenuaxa Tabita bamacëbëtan ca anu ꞌicë axa Jesucristomi catamëcë unicaman, Pedro ca Lidanu ꞌicë quixuan ñuicania cuacëxa. Usa ꞌain ca Lida ëma axa Jope ꞌurama ꞌain bënëtishia unúan Pedro catánun rabë́ uni xuacëxa.

1 Corintios 12:12

Ënëx ca ësa ꞌicën. Aín taë, aín mëcën, aín xo, aín pucu, aín bëru, aín pabí acamaxa ꞌitsa ꞌaínbi ca uni achúshishi ꞌicën. Usaribiti ca Cristo achúshishi ꞌicën.

1 Corintios 14:23

Aín bana cuacë ꞌaíshmi mitsux timë́ax camáxbi Nucën Papa Dios rabi unin cuacëma banan banacëbë ca an mitsúxmi usai ꞌia ꞌunáncëma uni raíri ꞌimainun axa Jesúsmi sináncëma uni raírinëx atsínti ꞌicën. Atsínquin mitsúxmi usai banaia cuaquin ca —sapi ca ñunshíanxa —quixun sinánti ꞌicën.

1 Corintios 4:17

Mitsúxmi ꞌëx ꞌicësaribiti ꞌinun cana Timoteo mitsu istánun xuan. ꞌËn bana ñuia cuati axribi asérabi Nucën ꞌIbu Jesucristomi catamëcë ꞌaish ca ꞌën nuibacë bëchicësa ꞌicën. Mitsunu cuanxun ca uisai carana ꞌëx Jesucristomi catamëcë ꞌaish ꞌi, a mitsu ñuixunti ꞌicën. Camabi ëmanuaxa timë́cë axa Jesucristomi catamëcë unicama a cana usai cana ꞌëx Jesucristomi catamëti ꞌi quixun ꞌunánmin.

Efesios 3:15

Ax ca menu ꞌicë unicama ꞌimainun naínu ꞌicë ángelcamaribi an unio ꞌaish acaman ꞌIbu ꞌicën.

Santiago 2:7

Usaquin ꞌai ca Cristo, ax upí ꞌixuan an mitsu ainan ꞌimicë a ñui ꞌatimati banaia. ¿Atux cara usama ꞌic?

1 Pedro 4:14

Cristonan cupía unin mitsumi nishquin ꞌatimaquin ñuicëxbi camina Nucën Papa Diosan Bëru Ñunshin Upí cushiira, axa mitsubë ꞌain, cuëënti ꞌain. Unían ꞌatimaquin ñuiabi camina mitsun Cristo rabin.

1 Pedro 4:16

Usaquin ñu ꞌacëma ꞌaíshbi Cristonan ꞌicë cupía unin tëmëramicëxbi camina rabíntima ꞌain. Rabínquinma camina Nucën Papa Dios rabiti ꞌain, mitsúxmi asérabi ainan cupí.

1 Juan 2:27

Atúxa usa ꞌaínbi ca Jesucristonën aín Bëru Ñunshin Upí mitsubëa ꞌinun ꞌináncë, ax mitsubë ꞌixun uni itsían ꞌunánmiamabi an mitsu ꞌunánmia. An mitsu ꞌunánmicë ñux ca asérabi ꞌaish cëmëma ꞌicën. Usa ꞌain camina aín Bëru Ñunshin Upitan ꞌunánmiquin sinánmicësabi oi camabi nëtën Cristobë ꞌiti ꞌain.

Apocalipsis 3:18

Mitsúxmi usai ꞌinúnma cana mitsu ꞌësëquin ësaquin cain: Curi manë ax ca ꞌitsísirocëx aín chuacama nëtëtia. Nëtë́cëbë ca aín upíshi bërutia. Usaribi oquin asérabi mitsun nuitu upí ꞌinun ꞌën mitsu ꞌiminun camina ꞌë ñucáti ꞌain. Mitsun ꞌatima ñu ꞌacëcama tërë́ncë ꞌianan ꞌëmi sinánquin ñu upí ꞌacë ꞌaish chupa uxua pañucësa ꞌinun ꞌën mitsu ꞌiminun camina ꞌë ñucáti ꞌain. Mitsun uisa ñu ꞌati cara ꞌatima ꞌicë, uisa ñu ꞌati cara upí ꞌicë quixun upí oquin ꞌunáncëma ꞌaish bëxuñu unisa ꞌixunbi, acama mitsu ꞌunánminun camina ꞌë ñucáti ꞌain.