Hebreos 4:2 - Kashibo-Kakataibo Biblia

² A me anu chuámarua ꞌiti ñui quicë bana a ca nucën raracaman cuacëxa. Cuaquinbi ca —asérabi ca a menunu ꞌinun nu buánti ꞌicë —quixun sinánma ꞌicën. Usa ꞌaish ca a ñuixuan menu bëbama ꞌicën. Anu nucën raracama bëbama ꞌaínbi ca Nucën Papa Diosan nucën rara cásaribi oquin nux Jesucristomi catamëti aín nëtënu abë ꞌinux ië́ti bana ñuiquin nuribi caxa.

Nukën 'Ibu Diosan ain unikama 'inan ain bana

² A me anu chuámarua 'iti ñui quicë bana a ca nucën raracaman cuacëxa. Cuaquinbi ca —asérabi ca a menunu 'inun nu buánti 'icë —quixun sinánma 'icën. Usa 'aish ca a ñuixuan menu bëbama 'icën. Anu nucën raracama bëbama 'aínbi ca Nucën Papa Diosan nucën rara cásaribi oquin nux Jesucristomi catamëti aín nëtënu abë 'inux ië́ti bana ñuiquin nuribi caxa.

Hebreos 4:2 ပူးပေါင်းရင်းမြစ်များ

Hechos 13:46

Usa ꞌain ca Pablobëtan Bernabénën racuë́quinma atu cacëxa: —Nun nu judíos uni ꞌicë mitsu pain Nucën Papa Diosan bana ñuixuncëxbi camina ꞌiti ꞌaíshbi ainan ꞌiisama tanquin aín bana cuaisama tancanin. Usa ꞌain cananuna judíosma unicama Jesús ñuiquin bana ñuixuni cuanti ꞌain.

Hechos 3:26

Nucën Papa Diosan ca aín Bëchicë bamacëbi baísquimitancëxun judíos unicama mitsunu pain xuaxa, mitsúnmi a isi ami sinanaquin ñu ꞌatima ꞌati ënun quixun.

Romanos 2:25

Mitsun Nucën Papa Diosan bana Moisésnën cuënëo quicësabi oquin asérabi ꞌacë ꞌain ca mitsúxmi ꞌunántioraca ax asábi ꞌicën. Usa ꞌaínbi ca a bana quicësabi oquinmi ꞌacëma ꞌain, mitsúxmi ꞌunántioraca ax ñancáishi ꞌicën.

Romanos 3:3

¿Bëtsi bëtsi judíos unicaman Nucën Papa Diosmi sináncë ꞌixunbi ñu ꞌaisama ꞌacë ax cara Nucën Papa Diosan ꞌucha ꞌic?

1 Corintios 13:3

ꞌËn ñucama ñuñuma uni ꞌinánan upí ñu ꞌacë cupí bëtsi unin nëëncëx bamaiabi ca uni nuibati ꞌicëma ꞌicë, Nucën Papa Diosan ꞌë upí isima.

Gálatas 3:2

Camina ꞌë cati ꞌain, ¿Moisésnëan usai ca judíos unicama ꞌiti ꞌicë quixun cuënëo banami cuacë cupí cara Nucën Papa Diosan aín Bëru Ñunshin Upí mitsubëa ꞌinun mitsu ꞌináncëx? Usama ca. Jesucristo ñui quicë bana cuatími ami catamëcëxuinshi ca aín Bëru Ñunshin Upí mibëa ꞌinun mitsu ꞌináncëxa. ¿Usa ꞌixunbi caramina mitsun Nucën Papa Diosan Bëru Ñunshin Upitan mitsu upí ꞌimiti sinántancëxunbi —ꞌën ñu upí ꞌacë cupíshi ca Nucën Papa Diosan ꞌë upí isia —quixun sinanin? Usaquin sinani camina sinánñuma unicamasa ꞌain.

Gálatas 3:8

—Judíos unicamaishima camabi uni cana axa Jesucristomi catamëtia nuibaquin aín nuitu upí isti ꞌai —quixun ꞌunánquin ca Nucën Papa Diosan an Abraham ësaquin cacë bana aín uni cuënëomiacëxa: “Mi cupí ca camabi menu ꞌicë unicama ꞌën ꞌimicëx aín nuitu upí ꞌaish chuámarua tani cuëënti ꞌicën”.

Gálatas 4:13

Camina ꞌunanin, ꞌën nami ꞌaisama ꞌixun cana bëtsi menu cuanti sinánquinbi anuxuinshi Jesucristo ñuiquin mitsu bana ñuixuntabaquin ñuixuancën.

1 Tesalonicenses 1:5

Jesucristomi catamëti ca uni Nucën Papa Diosnan ꞌiti ꞌicë quixun bana ñuixunquin cananuna nun cuëbitainshi banaquinma, aín Bëru Ñunshin Upitan nu sinánmicëx Nucën Papa Diosmi cushicë ꞌixun aín bana mitsu ñuixuan. Nun ñuicë banax ca cëmëma ꞌaish asérabi ꞌicë quixun ꞌunáncë ꞌixun cananuna upí oquin a bana mitsu ñuixuan. Mitsúxmi upí ꞌiti cupí cananuna mitsubë ꞌaish usai ꞌia quixun camina ꞌunáncanin.

1 Tesalonicenses 2:13

Nun Nucën Papa Dios cuëëncësabi oquin aín bana ñuixuncëxun cuaquin camina —a banax ca unínbi sináncëma ꞌicën, asérabi Nucën Papa Diosan sinánmicëxun ca nu ñuixuncania —quixun sinan. A banax asérabi ainan ꞌain camina mitsux a cuati Nucën Papa Diosnan ꞌain. Mitsux usai ꞌia ꞌunánquin cananuna nëtë́quinma a —asábi ca —quixun caquin rabin. Mitsúnmi —a banax ca asérabi ꞌicë —quixun cuatia ca Nucën Papa Diosan ainan ꞌinun mitsu ꞌimiaxa.

1 Timoteo 4:8

Ënëx ca ësa ꞌicën. Camabi nëtën cuai aín nami bachura ꞌianan cushi ꞌaish ca uni upiti cuai cuëënia. Usai cuëëncësamaira oi ca camabi nëtën upíira oquin sinánquin Nucën Papa Dios cuëëncësabi oquin ꞌai, uni ënë menuax upitax bucui cuëëanan usai ꞌitancëx Nucën Papa Diosan nëtënuaxribi abë ꞌaish cuëënti ꞌicën.

Hebreos 11:6

Uicamax cara Nucën Papa Diosbë banatisa tania, uicamax cara ainan ꞌiisa tania, an ca —Nucën Papa Dios ca asérabi anu ꞌicë —quixun sinánti ꞌicën. Sinánan ca —an ca ꞌën ñucácëxun cuati ꞌicë —quixun sinánti ꞌicën. Usaía ax asérabi ami catamëcë uni anun cuni ca Nucën Papa Dios cuëënia. Axa ami catamëcëma unin ca Nucën Papa Dios cuëënmima.

Hebreos 3:12

ꞌËn xucë́antu, mitsúxribimi usai ꞌitima cupí camina bërúancati ꞌain, ꞌatimaquin sinánquin Nucën Papa Dios, axa bamatimoi tsócë, a ami catamëquinma ëntin rabanan.

Hebreos 4:6

Usa ꞌain ca ënë nëtënu ꞌicë unicama Nucën Papa Diosmi catamëti abë upí ꞌaish chuámarua ꞌiti, ꞌaíshbi raírinëx ami sináncëma pain ꞌicën. Usaribiti ca atun pain cuaquinbi a bana quicësabi oquin ꞌacëma ꞌaish a Nucën Papa Diosan ñuixuncë menu bëbama ꞌicën.

Santiago 1:21

Usa ꞌain camina ñu ꞌatima ꞌaisamaira oquinmi mitsun ꞌacë a ëanan uisa ñucama cara ꞌaisama ꞌicë ënti ꞌain. A ënquin camina ami cuacë Nucën Papa Diosan bana a mitsun nuitu mëu racanaquin upí oquin sinánti ꞌain. Mitsúnmi cuacë bana ënë́xa quicësabi oquin, Jesucristomi catamëcë ꞌixun, ꞌacë ꞌaish camina Nucën Papa Diosnan ꞌinux ië́canti ꞌain.

1 Pedro 1:12

Usai Cristo ꞌitia Nucën Papa Diosan ꞌunánmicëxun ca atun isquinmabi, atun rëbúnqui ꞌixun cananuna nun a ñucama isnuxun ꞌai quixun ꞌunáncëxa. A bana Cristo ñui quicë, a ca a Nucën Papa Diosan naínua xucë aín Bëru Ñunshin Upitan ꞌamicëxun aín unicaman mitsu ñuixunia. A bana ca ángelcamanribi uisai quicë cara quixun cuaisa tania.