Hebreos 11:1 - Kashibo-Kakataibo Biblia

¹ Nun Nucën Papa Dios isquinmabi cananuna asérabi ca anu ꞌicë quixun ꞌunanin. Aín bana ca cëmëma asérabi ꞌicë quixun sinánquin cananuna ꞌunanin, an ca aín quicësabi oquin ꞌati ꞌicë quixun. Usaquin ca axa ami catamëcë unicaman ꞌunania.

Nukën 'Ibu Diosan ain unikama 'inan ain bana

¹ Nun Nucën Papa Dios isquinmabi cananuna asérabi ca anu 'icë quixun 'unanin. Aín bana ca cëmëma asérabi 'icë quixun sinánquin cananuna 'unanin, an ca aín quicësabi oquin 'ati 'icë quixun. Usaquin ca axa ami catamëcë unicaman 'unania.

Hebreos 11:1 ပူးပေါင်းရင်းမြစ်များ

Salmos 27:13

ꞌAínbi kana ꞌën asérabi kamina min ñu ꞌakën kixun ꞌunanin usa ꞌixun kana asérabi ka Diosan ꞌë nuibakin ñu ꞌaxa kixun isti ꞌain, anun ꞌëx tsókë nëtëkama anun.

Salmos 42:11

¿Uisa kupín karana sinanati kana ꞌaima kiax kiti ꞌain? ¿Uisa kupín karana ꞌitsaira sinánti ꞌain? ꞌËn ꞌIbu Dios ashi kana an ꞌë ꞌakinun rabiti ꞌain. ¡An ka ꞌën Dios ꞌixun ꞌë ië́mia!

Hechos 20:21

Ñuixunquin cana judíos unicama ꞌimainun judíosma unicamaribi Nucën Papa Dios cuëëncësa oi ꞌinux sinanatía Nucën ꞌIbu Jesucristomi catamënun quixun can.

1 Corintios 13:13

Bëtsi ñucama cëñúcëbëbi cananuna nux cëñútimoi abë ꞌaish Nucën Papa Diosmi catamëti ꞌain. —Cananuna ënë Nucën Papa Diosan nëtënuax cëñútimoi ꞌiti ꞌai —quixun ꞌunani cananuna cuëëinra cuëënti ꞌain. Anu ꞌaish cananuna camáxbi cëñútimoi bëtsibë nuibananti ꞌain. Nucën Papa Diosmi catamëti cuëëanan abë nëtë́timoi ꞌiti sinani cuëëníbi cananuna bëtsibë nuibanancë cupíira cuëëinra cuëënti ꞌain.

2 Corintios 11:17

Nucën ꞌIbu Jesucristonën ca rabiacanun ꞌë cacëma ꞌicën. Sinánñuma uni ꞌicësaishi cana rabiacatin.

2 Corintios 4:18

Usa ꞌixun cananuna nun bërúnbi iscë ñu ꞌaisamaira oquin sinánquinma unin iscëma ñu, uni nuibati, cëmëi banatima, upí sinánñu ꞌiti, acama sinanin. Nun bërun nu iscë ñucamax ca cëñúti ꞌicën. Usa ꞌaínbi ca unin aín bërun iscëma, nun nuitu mëúnu sináncë ñucamax, Nucën Papa Dios rabiti, uni ꞌaquinti, acamax cëñútima ꞌicën.

2 Corintios 5:17

Usa ꞌain ca uinu ꞌicë unix cara Cristomi catamëtia ax Cristobë ꞌaish bëtsi uni ꞌicën. Usa ꞌixun ca bëráma ꞌacësa oquin sinántëcënima. Bëtsi oquin ca sinania.

2 Corintios 5:7

A isímabi cananuna ënë nëtënuax ami catamëti ax cuëëncësoi ꞌin.

2 Corintios 9:4

Macedonianu ꞌicë unían ꞌëbë mitsunu cuanxun iscëxbi nun sináncësabi oquin mitsun ꞌacëma ꞌain cananuna rabínti ꞌain. A ñucama mitsun sináncësabi oquin ꞌacëma ꞌaish camina nux ꞌicësamairai rabíncanti ꞌain. Usaínu ꞌitima cupí cana ënë unicama mitsunu cuanun xutin.

Gálatas 5:6

Nux asérabi Jesucristonan ꞌaish cananuna ꞌunántioracacë unicama ꞌicësaribiti ꞌunántioracacëma ꞌaíshbi Nucën Papa Diosan iscëx upí ꞌain. Jesucristomi catamëcë ꞌixúan an uni nuibacë uni ax ca Nucën Papa Diosan iscëx upí ꞌicën.

Tito 1:1

ꞌËx cana Pablo, an Nucën Papa Dios cuëëncësabi oquin ꞌanan Jesucristonëan a ñuiquin aín bana ñuixunun caísa ꞌain. Usa ꞌaish cana ꞌëx, uisai cara a Nucën Papa Diosan ainan ꞌinun caísa unicama Jesucristomi catamëti upí ꞌiti ꞌicë quixun ꞌunánmicë uni ꞌain.

Hebreos 10:22

A cupí nun ꞌuchacama tërë́ncë ꞌaish cananuna uisa ñu cara ꞌaisama ꞌicë quixunu ꞌunánquin mëníocë ꞌaish asérabi ax cuëëncësabi oi ꞌiisa tani Nucën Papa Diosbë banati ꞌain, an ca cuati ꞌicë quixun ꞌunani. Ax Nucën Papa Diosbë banai tabernáculo xubunu atsínux ca sacerdote aín ꞌucha tërë́ncë ꞌianan upiti nashi mëníocacëxa. Usaribiti cananuna Jesucristo cupí chucacësa ꞌaísha nun nuitu, nun sinan upí ꞌain Nucën Papa Diosbë banain.

Hebreos 10:39

Usaía an aín bana ꞌaquinbi ëncë uni ax Nucën Papa Diosan nëtënu abë ꞌitima ꞌaínbi cananuna nun ami catamëquin ëncëma ꞌaish, asérabi Nucën Papa Diosnan ꞌaish aín nëtënu abë ꞌiti ꞌain.

Hebreos 11:13

Abraham, Sara, Isaac, Jacob, acamax ca Nucën Papa Diosan ñuiasa oi ꞌicëma pan ꞌain bamacëxa. Usa ꞌaínbi ca aín bamati nëtë sënë́ntamainun masá nuituquinma cuëënquin, Nucën Papa Diosan nu cacësabi oi ca nun rëbúnqui ꞌiti ꞌicë quixun ꞌunáncëxa. Usaquin ꞌunani ca ësai quicësa ꞌiacëxa: nux ënë menu ꞌicë ꞌaishbi cananuna uníxa aín menumabi bëtsi menu cuanúxbi tsócësa ꞌain.

Hebreos 11:27

—ꞌËn bërúnbi isquinmabi cana Nucën Papa Dios ca asérabi ꞌëbë ꞌicë quixun ꞌunani —quixun sinani ca Moisés ami catamëti Egipto menuax Madian cacë menu cuancëxa, racuëtima ax cuancëbëa ꞌapu nishtánunbi.

Hebreos 11:7

Ënë́nsaran nëtë́nmaribi ca Noénën ami catamëquin —Nucën Papa Dios quicësabi oi ca ꞌiti ꞌicë —quixun ꞌunáncëxa. ꞌUnáncë ꞌicë ca Nucën Papa Diosan Noé cacëxa, —camabi uníxa ꞌaisamairai ꞌuchacë cupí cana unían usai ñu ꞌiti sináncëbëtanmabi camabi me baca mapumiquin cëñuti ꞌai —quixun. Nucën Papa Diosan bana ca asérabi ꞌicë quixun ꞌunánquin ca Noénënshi, ꞌitsa ꞌuí ꞌibúcëma pain ꞌaínbi aín manë nunti chaira anua aín aintsi ꞌibucama atsínmiti ꞌacëxa, Nucën Papa Diosan a cacësabi oquin. An usoquin ꞌaia iscë unicama ca —ënë menu ꞌicë unicama ꞌaisamairai ꞌuchacë cupí ca Nucën Papa Diosan cëñuti ꞌicë —quixun Noénën ñuixuancëxa. Nucën Papa Dios quicësabi oi ca ꞌiti ꞌicë quixun sinánquian Noénën, an cacësabi oquin ꞌaia isi ca Nucën Papa Dios cuëëancëxa.

Hebreos 2:3

¿Asérabi usa ꞌain caranuna nux —Jesucristomi catamëtia uni Nucën Papa Diosnan ꞌinun ië́ti bana a cuatíbi, a bana quicësabi oi ꞌicëma ꞌaish uisa tancëx ië́ti ꞌain? A bana anun nun ꞌucha tërë́ncë ꞌaish Nucën Papa Diosnan ꞌinux ië́ti, a ca Nucën ꞌIbu Jesucristonën pain unicama ñuixuancëxa. Usa ꞌain ca an cuacë uni raírinën, a bana ca asérabi ꞌicë quixun ꞌunánquin, nuribi ꞌunánmiacëxa.

Hebreos 3:14

Anun nux aín nëtënu ꞌiti nëtë sënë́ntamainun cananuna ami catamëtabatínu ꞌiásabi ꞌi ami catamëti ꞌain. Usai ꞌi cananuna camabi nëtën Cristobë ꞌain.

Hebreos 3:6

Usa ꞌaínbi ca Nucën Papa Diosan unicaman cushi ax aín Bëchicë, Cristo, an aín Papa Dios cuëëncësabi oquin ꞌacë, a ꞌicën. Usa ꞌaish ca Cristo ax nun cushiribi ꞌicën, nun nu ami catamëti ënquinma cuëënquin abë aín nëtënu ꞌiti sináncë ꞌain.

Hebreos 6:12

Mitsúxmi chiquish ꞌiti cananuna cuëëniman. Cananuna cuëënin, Nucën Papa Diosan aín quicësabi oquin ꞌaquincë́xa aín uni raírinëx a ëníma ami catamëti upiti ꞌia isími usaribiti ꞌiti.

2 Pedro 1:1

ꞌËx cana Simón Pedro, ax cuëëncësabi oquin ꞌanan aín bana uni ñuixunuan Jesucristonën caísa ꞌain. An nu ië́micë Jesucristo, axbi Nucën Papa Diosribi ꞌaish upí ꞌixuan nu ꞌacësaribi oquin ainan ꞌinun ië́micë, mitsu cana ënë quirica buánmin.