Génesis 46:1 - Kashibo-Kakataibo Biblia

¹ Usai ꞌitankëx ka Jacob kamabi aín ñu ꞌimainun aín ñuina ꞌarakakëkama buani bain kuankëxa. Kuani Beerseba kakë menu bëbaxun ka ñuina rëtankëxun usakin ꞌati sinánxun aín papa Isaacnën Dios xaroxuankëxa.

Nukën 'Ibu Diosan ain unikama 'inan ain bana

¹ Usai 'itankëx ka Jacob kamabi aín ñu 'imainun aín ñuina 'arakakëkama buani bain kuankëxa. Kuani Beerseba kakë menu bëbaxun ka ñuina rëtankëxun usakin 'ati sinánxun aín papa Isaacnën Dios xaroxuankëxa.

Génesis 46:1 ပူးပေါင်းရင်းမြစ်များ

Génesis 12:8

Usai ꞌitankëx ka anuax chikíkiani kuanxun amiaxa bari urukë Betel kakë ëma au ꞌikë niñu me anu xubusa okin aín chupa këxtú pëniankëxa. Betel kakë ëma ax ka amia bari kuabúkë au ꞌikë ꞌiakëxa, ꞌimainun ka achúshi ëma. Ai kakë axribi amiaxa bari urukë au ꞌikë ꞌiakëxa. A menuxunribi ka Abramnën anuxun Nukën ꞌIbu rabiti ꞌatankëxun rabiakëxa.

Génesis 21:14

Usokin konkë a pëkarakëma ꞌaínshi ka Abrahamnën an ñu ꞌaxunkë xanu Agar aín xubunuax kuantanun xukin pán ꞌimainun aín piti ꞌinánan achúshi ñu xaká burasa okin ꞌakë ami aín ꞌumpax ꞌinánkëxa; ꞌinánkin ka aín kaxunu kañumiakëxa, usakin ꞌinántankëxun ka aín bëchikë Ismael kuantanun kixun aín titakëñun xuakëxa. Xukëx ka uimi kara kuanti ꞌikë kixun ꞌunánimabi anu uni ꞌikëma me aukikiani kuantankëx Beerseba au kuankëxa.

Génesis 21:31

Usokin anuxun a rabë́xunbi ꞌakë kupín ka Beerseba kakin anëakëxa, anuax ka sinanati ꞌitëkëntima oi mëniónankëxa.

Génesis 21:33

Usa ꞌain, ka Abrahamnën Beerseba kakë me anu achúshi i tamarisco ꞌapákëxa, anuxun ka unin Nukën ꞌIbun Diosan anë rabiakëxa, axa bamatima oí tsókë a.

Génesis 22:13

Kakëx kaxú bësukin isi kuainakëkinbi ka Abrahamnën carnero achúshi i pëñanakëmi aín mancha utëanx a tanain nikë mërakëxa; usai ꞌikë mërakin ka Abrahamnën carnero bixun, aín bëchikë nëakë a tubuana rëtankëxun Nukën ꞌIbu Dios rabikin xaroxuankëxa.

Génesis 28:10

Usa ꞌain ka Jacob ax Beerseba kakë anuax kuani Aramnu kuanti bai a bibiani anun kuankëxa.

Génesis 28:13

Usakin namákin isanan ka Nukën ꞌIbu a rapasu nixun ësokin kakëxun kuakëxa: ꞌËx kana min ꞌIbu ꞌain, ꞌianan kana min xuta Abraham aín Dios ꞌianan min papa Isaac ainanribi ꞌain. Usa ꞌixun kana mi ꞌimainun min rëbúnkikama anumi ꞌuxi rakákë me ënë ꞌinánti ꞌain.

Génesis 31:42

ꞌËn kana ꞌunan min kamina min xubunua añu ñubi ꞌinanxumabi ꞌë xukë ꞌitsían, usakinmi ꞌati ꞌikëbi ka ꞌën xuta Abraham aín Dios ꞌimainun, ꞌën papa Isaacnën a rabikë Dios axribi ꞌëbë ꞌixun mi ñu mëëxuni tëmërai masánuitutia iskin ꞌë ꞌakianxa, usa ꞌixun ka mi ënë imë́ namámikin ax ꞌëbëribi ꞌixun ꞌë kaxa.

Génesis 31:53

Usokin kakëx ka min xuta Abraham ꞌimainun ꞌën xutókë Nahor aín Dios an nu uisakara nu rabë́ oti ꞌikën kiti ꞌikën. Usokin kakëxun ka Jacobnën Nukën ꞌIbu Dios aín papa Isaacnën rabia an ismainun sinanatëkëntima oi kikin rabiakëxa.

Génesis 33:20

Usa ꞌain ka anu ꞌixun basikëbëtan anuxun Dios rabiti achúshi ñu ꞌakëxa, ꞌatankëxun ka El-elohé-Israel kakin anëakëxa, (ax ka Israelnën a rabikë Dios ki kikë ꞌikën).

Génesis 35:3

Ësokin katankëxun ka kakëxa bëríbi kananuna Betel menu kuanti ꞌain, kuantankëxun kananuna achúshi maxá maburukin ꞌatankëxun anuxun Nukën ꞌIbu Dios rabiti ꞌati ꞌain, an ka ꞌë ꞌatimakin sinaniabi ꞌakiankëxa, ꞌimainun ka ꞌë ꞌakinia uinu karana kuani anuabi.

Génesis 35:7

Anu bëbatankëxun ka maxá bukurukin, ꞌatankëxun a me El-Betel kakin anëakëxa (Betel kikë ax ka Diosan xubu ki kikë ꞌikën) ax ka anuaxa aín xukënan ꞌakatsikiax ami sinánkëbë abákëbëa anuax Jacobmi Nukën ꞌIbu Dios mërá a me ꞌiakëxa.

Génesis 4:4

Usakian ꞌaia iskin ka Abelnënribi aín ꞌarakakë ñuina aín rëkuën tuá upíira kaístankëxun ꞌën ꞌIbu kana ꞌinánti ꞌain kixun sinánxun buánxuankëxa. Usakin ꞌaia ka Nukën ꞌIbun Abelnën ꞌinánkë ñuina upíira ꞌikë isakëxa,

Génesis 45:28

Sinani ka kiakëxa: “¡ꞌËn kana kuan ꞌën bëchikë José kaisa Egipto menu tsótaxa! Usa ꞌain kana bamaxumaishi isikuanti ꞌain.”

Génesis 8:20

Usai chikítankëxun ka Noénën anuxun Nukën ꞌIbu, rabikin asábi ka kakin kati maxáx maburukin ꞌatankëxun anuxun ñuina upíbushi ꞌimainun ñuina pëchiñu upíira, akama achúshi achúshi bitankëxun Nukën ꞌIbu asábi ka kakin ꞌaímai këñutanun xaroxuankëxa.

Job 1:5

Usakin ꞌakian anun timë́xun piti nëtë inuti sënëni sënë́nkëbëtan ka Jobnën aín bakë bëchikë bëbukama kuënxun, uinuxun kara ꞌati ꞌikë anu kuëënxun pë́karakëma ꞌaínshi nirutankëxun ñuina xarokin aín bëchikë achúshi achúshinëxa aín ꞌucha mëníokanun ꞌaxuankëxa. Ësokin ka Jobnën ꞌakëxa, ꞌën bëchikë bëbukamax sapika, ꞌatimakin Diosmi sinani ꞌuchaxa kixun sinánkin ꞌakëxa.

Job 42:8

Usa ꞌain kamina bërí ꞌëx mitsumi nishkë a nëtë́tanun, mapai achúshi ꞌimainun rabë́ vaca bërí kanikë këñun mapai achúshi ꞌimainun rabë́ carnero bibiani uinu kara ꞌën uni Job ꞌia anu a buani kuanti ꞌain, anuxun kamina a ñuinakama rëxun ꞌaímai këñutanun xaroti ꞌain. Usakin ꞌakëbëtan ka ꞌën uni Jobnën mitsu ꞌë ñukáxunti ꞌikën, ñukákëxun kana an ꞌë kakësabiokin, mitsu uisabi otima ꞌain, mitsun kamina asérabi ꞌë ñui upiti banaiman, ꞌën uni Job ax kikësai.

Amós 7:9

Usokin ꞌanan kana anuxun Israelnën rëbúnkikaman ñu tankin ꞌaxun rabiakama masókin rurupanan, anuxua Israel unikama ñu tankin unioxun rabia xubukama axribi ka rurupakë ꞌiti ꞌikën: ¡Usakin ꞌanan kana axa ami nishkë unikama Jeroboamnën aintsikama manë xëtokën anun ꞌamiti ꞌain!

Hechos 7:15

Usaquian Josénën cacësabi oi ca Jacob aín aintsi ꞌibucamabë Egiptonu ꞌi cuancëxa. Cuanx anu tsotaxbia Jacobnëx pain ꞌiá ꞌain ca aín bëchicë nucën raracamaxribi bamacëxa.

Josué 24:4

ꞌamikëxun ka aín bakë bëchikë Isaacnën Jacob ꞌimainun Esaú a rabë́ pain bakë bëchiakëxa. Usoxun kana Esaú Seír kakë me anu tsónun ꞌinánkën, ꞌinámainun ka Jacobnëx aín bakë bëchikëkamabë Egipto kakë menu tsóti kuankëxa.

1 Samuel 3:20

ꞌImainun ka kamabi Israelkaman ꞌunánmainun Dan kakë ëma anuxun ꞌunánmainun, Beerseba anuxunribi Samuelnën ka këmëkinma asérabi Dios kikë bana uni ñuixunia kixun ꞌunánkankëxa.

1 Samuel 8:2

Aín rëkuë́n bakë bëchikë, Joel kakin anëkë ꞌimainun ka aín bëchikë itsi Abías ax Beerseba anu ꞌapu ꞌiakëxa.