Génesis 35:2 - Kashibo-Kakataibo Biblia

² Ësakian kakëxun ka Jacobnën aín aintsikama kanan an ñu mëëxunkë unikama ꞌimainun an ñu ꞌaxunkë xanukamaribi kakëxa: —Kamina mitsun bëtsi dioskama ami rabikëkama a ꞌë bëxunkanti ꞌain, bëanan kamina nashitankëxun mitsun chupa upíbu pañuti ꞌain.

Nukën 'Ibu Diosan ain unikama 'inan ain bana

² Ësakian kakëxun ka Jacobnën aín aintsikama kanan an ñu mëëxunkë unikama 'imainun an ñu 'axunkë xanukamaribi kakëxa: —Kamina mitsun bëtsi dioskama ami rabikëkama a 'ë bëxunkanti 'ain, bëanan kamina nashitankëxun mitsun chupa upíbu pañuti 'ain.

Génesis 35:2 ပူးပေါင်းရင်းမြစ်များ

Génesis 18:19

ꞌËn kana mi kaísan usa ꞌain kamina min bëchikëkama ꞌinánan, min rëbúnkikama mi ꞌunánmikë bana upíokin kuakin ꞌunánkin uinu ꞌikëx kara ꞌaisa ꞌimainun upí ꞌikë a ꞌati ꞌikën, usakin ꞌakëbëtan kana ꞌën usakin ꞌaxunuxun kakë usakinbi ꞌaxúnti ꞌain.”

Génesis 31:19

Usaia akamax ꞌimainun ka Labán ax aín ꞌarakakë ovejakama bërúanan anuxun aín rani chaxkë́ti kanikë kama tëai kuankëxa, axa anu kuantamainun ka aín ꞌini bëchikë Raquelnën aín papan aín aintsikamabëtan rabikë ñukama a mëkamakin biakëxa.

Génesis 31:30

ꞌËn kana ꞌunan mix kamina min papan xubunu kuantëkëinsairatan, usa ꞌaish kamina usai ꞌian, ¿uisa kupín kaina ꞌën rabikë ꞌën dioskama mëkamabëtsian?

Génesis 31:34

usaía anuribi aín papa atsínkëma ꞌaínshi ka an rabikë aín dioskama, a bitsishi anu tsotia camellonën kaxunu ꞌakë anu unëishi akamanan tsóbuakëxa. Usaia ꞌikëbëtan ka Labánën kamabi atun xubukamanua barikinbi mërama ꞌikën.

Génesis 34:2

ꞌaínbi ka anu kuanxunbi Siquem aín kuëëntisa uni ꞌikë isakëxa, ax ka Hamor heveos uni aín bëchikë ꞌiakëxa, usa ꞌaish ka Hamor ax a menu ꞌikë unikaman ꞌapu ꞌiakëxa, usai anun kuënkëxun ka Siquemnën ñatanxun abë uxkin nënën mëakëxa.

Génesis 35:22

Usai kuantankëx ka anu ꞌitsa baritia Israel tsóakëxa, usai anu tsókëbëbi ka achúshi nëtën Rubén anuax abë ꞌinuxun xanu bari kuankëxa kuanxunbi ka Bilhá mërax abë ꞌiakëxa, ax ka aín papa an ñu ꞌaxunkë xanu ꞌikëbi aín xanu ꞌiti raiokin bia ꞌiakëxa. Usai ꞌikë kuatankëx ka aín papa ꞌitsaira nishakëxa. Jacobnën bëchikëkama ka ꞌiakëxa mapai rabë́ ꞌimainun rabë́.

2 Samuel 7:23

Min uni Israel unibu ñuikin kana mi kain, ¡bëtsi menu ꞌikë ëmanu ꞌikë unikama atusaribi ka ꞌaíma ꞌikën, atux ka ënë menu ꞌikë bëtsi unikabëtan sënë́nma ꞌikën! ꞌËn ꞌIbu Dios min kamina min uni ꞌinun atu chikiankën. ꞌImainun kamina ꞌaisamaira ꞌixun bana sinankian upíokin ñu ꞌanun atu ꞌamian, min kamina min unikama Egipto menua chikínbëtsinkin atun ismainunbi bëtsi menu ꞌikë unikama ꞌimainun atun rabikë dioskama këñunbi këñuakën,

2 Reyes 5:10

Usai anu kuankë ꞌaínbi ka Eliseonën ax kai chikikima an kati uni achúshi xuakëxa: “Xukëx kuanxun istankëxun ka a unin mapai achúshi ꞌimainun rabë́ oi kamina Jordán kakë bakanu nashiti ꞌain, usaími ꞌikëbë ka an nami chëkimikë min naminu ꞌikë ꞌinsin ax pëxkúti ꞌikë kixun kakëxa.”

Job 1:5

Usakin ꞌakian anun timë́xun piti nëtë inuti sënëni sënë́nkëbëtan ka Jobnën aín bakë bëchikë bëbukama kuënxun, uinuxun kara ꞌati ꞌikë anu kuëënxun pë́karakëma ꞌaínshi nirutankëxun ñuina xarokin aín bëchikë achúshi achúshinëxa aín ꞌucha mëníokanun ꞌaxuankëxa. Ësokin ka Jobnën ꞌakëxa, ꞌën bëchikë bëbukamax sapika, ꞌatimakin Diosmi sinani ꞌuchaxa kixun sinánkin ꞌakëxa.

Salmos 51:2

¡ꞌËn ñu ꞌatima ꞌakë a kamina ꞌë mëníoxunti ꞌain! ¡ꞌAnan kamina ꞌëx ꞌuchakëkama a ꞌë tërënxunti ꞌain!

Salmos 51:7

ꞌËn ꞌuchakë ꞌë mënioxunkin hisopo kakë i pëñan anun ꞌakësa ꞌitánun ꞌë mëniokëx kana upíira bërúti ꞌain; usokin min ꞌë mëniokëx kana matsi uxua iskësamaira ꞌimainun xapu tunkikë usaribi ꞌinun ꞌën nuitu mëniokati upíira ꞌiti ꞌain.

Éxodo 19:10

kakëxun ka Nukën ꞌIbun Moisés kakëxa: —Anu kuanxun kamina Israel unikama ꞌë rabinuxa bërí ꞌianan imë́ishi mëníokanun kai kuanti ꞌain. Kanan kamina atun chupa upíokin chukanun kati ꞌain,

Éxodo 19:14

Ësakin Diosan kakëx aín bashinuax taramëbutankëxun ka Moisésnën usakian Diosan a rabinux usai ꞌiti banakama ñuixunkin kamabi Israel unibu kakëxa. Kakëxun ka kamabi unin aín chupa chukakëxa,

Isaías 1:16

¡Mitsúnmi ꞌuchakin ꞌakë ñukama a ëni kamina mëníokakanti ꞌain! ¡Mitsúnmi ꞌakë ꞌatima ñukama a kamina, ꞌën istisabi okin ënti ꞌain! ¡ꞌAisama ñumi ꞌakankë akamina ënkanti ꞌain!

Isaías 52:11

¡Babilonia menu tsókë unikama mitsux anuax chikíkin kamina anua ꞌikë ñu ꞌatimakama a mëëtima ꞌain! ¡Anuxun atun dios rabikë xubunua buánxun nankan Diosan ñukama an buánti akamax ka upiti mëníokakë ꞌiti ꞌikën!

Ezequiel 18:31

Usa ꞌain kamina kamabi ñu ꞌatima ꞌën kuëënkëma mi ꞌakë a ënkanti ꞌain, usakin ëni kamina upíokin sinani kuëëni tsókanti ꞌain. ¿Uisa kupín kara Israel unikama bamati ꞌikën,

Ezequiel 36:25

Bëxun kana ꞌumpax upitan chukakësa ꞌitánun ꞌakin mitsun ñu ꞌatima ꞌakëkama a mëníoxuanan, unínbia ꞌaxun rabikë ñukama rabikëxuan an mitsu tsaikë akamaribi mëníoxunti ꞌain,

Daniel 5:4

Usakin ꞌakin ka kamaxunbi unínbia a rabinuxun kuri, manë uxua, manë panshian manë tunan, i ꞌimainun maxax ꞌakë akama rabikankëxa.

Hechos 19:26

Usa ꞌaínbi camina mitsun Pablo isanan an ñuicë banaribi cuatin. An ca Efeso ëmanushima, Asia menu ꞌicë ëmacama oquin, unían a rabinuxun ꞌacë ñu ax ca asérabi diosma ꞌicë quixun caquin, a rabixunma ꞌanun caquin ꞌaisamaira uni sinánmiaxa.

1 Corintios 10:7

A unicama raírinëan ꞌásaribi oquin camina unin ꞌacë ñu rabitima ꞌain. Atu ñuiquin ca Moisésnën ësaquin cuënëocëxa: “Aín paë bata xëanan pi bucubutancëx cuëëni ca ransacëxa”.

2 Corintios 7:1

ꞌËn nuibacë xucë́antu, a banacama nun cuanun ca Nucën Papa Dios quiacëxa. A banacama ꞌunánquin cananuna nun sinanën upíira oquin sinánan nun nuituribi upí ꞌianan nun ꞌacë ñuribi upí ꞌinun camabi nëtën bërúancati ꞌain. Usai ꞌi cananuna aín bana cuati ainanshi ꞌaish ax cuëëncësabi oíshi ꞌiti ꞌain.

Gálatas 4:8

Bëráma camina —Nucën Papa Dios ca asérabi Dios ꞌicë —quixun ꞌunáncëma ꞌixun Diosma ñucama rabiquin bëtsi bëtsi ñu ꞌacën.

Deuteronomio 32:16

Usai ꞌikin ka Dios ꞌaisamaira nishmikin bëtsi ñukama rabikin ax kuëënkëma ñuira ꞌakankëxa;

Deuteronomio 6:14

ꞌAnan kamina mitsu rapasu ꞌikë unikaman dios isa kixun rabikë ñu rabitima ꞌain.

Deuteronomio 7:25

ꞌAnan kamina mitsúnbi atun diosmabi rabikë ñukamaribi në́nti ꞌain, ꞌaínbi kamina ami bikë kuri ꞌimainun manë panshian akama bisa tantima ꞌain; usakin ꞌaibi ꞌatima ñu ꞌati sinania ka Nukën ꞌIbun a upí istima ꞌikën.

Hebreos 10:22

A cupí nun ꞌuchacama tërë́ncë ꞌaish cananuna uisa ñu cara ꞌaisama ꞌicë quixunu ꞌunánquin mëníocë ꞌaish asérabi ax cuëëncësabi oi ꞌiisa tani Nucën Papa Diosbë banati ꞌain, an ca cuati ꞌicë quixun ꞌunani. Ax Nucën Papa Diosbë banai tabernáculo xubunu atsínux ca sacerdote aín ꞌucha tërë́ncë ꞌianan upiti nashi mëníocacëxa. Usaribiti cananuna Jesucristo cupí chucacësa ꞌaísha nun nuitu, nun sinan upí ꞌain Nucën Papa Diosbë banain.

Santiago 4:8

Asérabi upiti ami sinani Nucën Papa Diosbë banaquin camina an nuibaquin sinánmicëxun, ax ca mitsubë ꞌicë quixun mitsun nuitu mëu upí oquin ꞌunánti ꞌain. An ñu ꞌaisama ꞌacë unicama, cana mitsu cain: Unia aín mëcën chuañuma ꞌinun mëchucacësaribiquin ca min sinan upí ꞌinun min ñu ꞌatima ꞌacëcama ën. —Nucën Papa Diosnan cana ꞌai —quicë ꞌixunbi ainanma unicaman ꞌacësaribi oquin ënë menu ꞌicë ñuishi sináncë unicama, mitsúxribi ca sinanat, Nucën Papa Dios cuëëncësabi oíshimi ꞌinun.

Josué 24:14

—Ësokian kamabi ñu an a kupín kamina mitsun Nukën ꞌIbu asérabira ami sinánkin rabiti ꞌain. Rabikin kamina mitsun chaitiokëkaman Éufrates kakë baka kuëbí tsókin rabianan Egipto menuxun rabia dios a ënkin Nukën ꞌIbuira ashi rabiti ꞌain.

Josué 24:15

Usa ꞌain kamina mitsun Nukën ꞌIbu rabitisama tani, bëríbi uisa dios kaina mitsun rabitisatani kiax kiti ꞌain: Kaina mitsun chaitiokëkaman Éufrates kakë baka kuëbí pain tsókë ꞌixun rabia dios, a rabiti ꞌain ꞌakima karamina anumi bërí tsókë amorreo unibunën me anu ꞌikë dios akama rabiti ꞌai kiax kamina kiti ꞌain. ꞌAínbi kana ꞌën, xanu ꞌën bakë bëchikëkamabëbi Nukën ꞌIbu kuëënkësa oíshi ꞌiti ꞌain.

Josué 24:2

kamikëx rikuatsinkë ka Josuénën kamabi unikama kakëxa: —Ësokin ꞌën mitsu kanun ka Israel unibu nun Dios kiaxa: Bërámaira ka Térah ꞌimainun aín bakë bëchikë rabë́ Abraham kakë ꞌimainun Nahor mitsun chaitiokëkama, atux Éufrates kakë baka kuëbí tsókë ꞌixun bëtsi dioskama rabiakëxa.

Josué 24:20

An ka mitsunmi a ënkin bëtsi dioskama rabia, ka Nukën ꞌIbu upíokian mitsu ꞌakinkë a ënkin ꞌaisamaira okin tëmëramiti ꞌikën.

Josué 24:23

Kiabi ka Josuénën kakëxa: —Asabi ka, usa ꞌain kamina mitsun dios isa kixun, ꞌarakakë ñukama bitankëxun puti ꞌain, putankëxun kamina Israelkama mitsun nuitunënbi Dios amishi sinánkin rabiti ꞌain.

Judas 1:23

Uni raírinëxa aín ñu ꞌatima ꞌacë cupí Nucën Papa Diosnanma ꞌicëbi camina amia sinánun ꞌaquinti ꞌain, tsinuaxa xaráti ꞌicëbi uni bicësaribi oquin. Usaribi oquin camina uni raíriribi nuibaquin upí ꞌinun ꞌaquinquinbi axa ꞌatima ꞌicësaribi ꞌitin rabanan bërúinra oti ꞌain, ax ꞌaisama cupía, aín chupáxbi chuaíracësa ꞌicë timacësa oquin aín ꞌucha timaquin.

Rut 1:15

Bërútia ka Noemínën kakëxa: —Ka kuat, min tsabë ka ain me anua aín dioskama ꞌikë anubi kuantëkënia. Usa ꞌain kamina mixribi abë kuanti ꞌain.

1 Samuel 16:5

Kakëxun ka Samuelnën —usa ka —kixun kakëxa. —Dios ñuina xaroxuni kana aín. Mënioka kuatsini kamina ëbëtan Nukën ꞌIbu ñuina xaroxunkin rabianan pi kamina ukanti ꞌain. Usokin raíri katankëxun ka Jesé ꞌimainun ain bakë bëchikë bëbukama upiti mëníokanun ꞌimiakëxa, ꞌimixun ka anuxua ñuina xaroti anuribia ununkixun kakëxa.

1 Samuel 7:3

Usa ꞌain ka Samuelnën kamabi israel unikama kakëxa: “Mitsun asérabi mitsun nuitubëtanbi sinánkin a rabikin kamina bëtsi menu tsókë unikaman rabikë diosmi rabikankë a ënkin mitsun ꞌarakakë Astarté tankin ꞌakë a bixun nikanti ꞌain, usakin ꞌatankëxun kamina Nukën ꞌIbu rabikin ax kuëënkësabi okin ꞌakánti ꞌain. Usakin ꞌakëxun ka mitsu filisteo unikama ꞌatima oia chikínti ꞌikën.”