Génesis 3:15 - Kashibo-Kakataibo Biblia

¹⁵ ꞌËn kana mixmi xanubë nishananun ꞌimiti ꞌain, ꞌën ꞌimikëx ka min rëbúnki ꞌimainun xanun rëbúnki nishananti ꞌikën. Aín rëbúnkinën ka min maxkánu mi amánuxun ꞌaia, ꞌakëxun kamina aín taë tsipútunu ꞌanuxun ꞌain.

Nukën 'Ibu Diosan ain unikama 'inan ain bana

¹⁵ 'Ën kana mixmi xanubë nishananun 'imiti 'ain, 'ën 'imikëx ka min rëbúnki 'imainun xanun rëbúnki nishananti 'ikën. Aín rëbúnkinën ka min maxkánu mi amánuxun 'aia, 'akëxun kamina aín taë tsipútunu 'anuxun 'ain.

Génesis 3:15 ပူးပေါင်းရင်းမြစ်များ

Génesis 49:17

Dannën rëbúnkinëx ka achúshi runu bai rapasu tsókësa ꞌiti ꞌikën, usa ꞌain ka aín taë tsiputunua aín caballo natëxkëbë anu ꞌikë uni pakëti ꞌikën, ësaribi okin kamina axa mitsumi nishkë unikaman ꞌakëxunbi mikaman ꞌamitima ꞌain, kixun ka Jacobnën aín bakë bëchikëkama kakëxa.

Isaías 53:12

Usa ꞌikë ka Diosan ñunuxa abi ꞌinamëa ꞌikë, anua uni chabu ꞌikë anu ꞌimia ꞌixun, anua uni kushiirabu kanantankëx ꞌikë anua atubë ꞌinun ꞌimiti ꞌikën, a ka unin axribi ka uni ꞌatima ꞌikë kixun unin sinánkëxa, usa ꞌixun ka kamabi unin ꞌucha ainansa ꞌikë papianan kamabi uni atun ꞌucha kupín ñukáxuankëxa.

Isaías 7:14

Diosan ka unibë ꞌikintankëma xanu: Xuntaku achúshi tuuñu ꞌinun ꞌimiti ꞌikën, ꞌimikëx bakëntankëxun ka Emanuel kakin anëti ꞌikën. Emanuel kikë ax ka, ‘Dios ka nubë ꞌikë ki kikë ꞌikën’.

Jeremías 31:22

¿Uínsaran kaina ꞌën kakësabiokin ꞌaíma amami amami kuani, xanu tuá aín papan bana kuatima nikësaimi ꞌikankë a ënkanti ꞌain? ꞌËx mitsun ꞌIbu ꞌixun kana achúshi ñu ió okin ënë menu ꞌakën, xanúan ꞌain bënë ënxun bitëkënkë usaribi okin ka Israel unikaman ꞌëx kikësabiokin ꞌanuxun ꞌë mërati ꞌikën. Kiax ka kiakëxa.”

Daniel 9:26

Usai sesenta ꞌimainun rabë́ semana ax ꞌinúkë ꞌain ka Diosanbia kaískë ꞌapu ax ꞌakë ꞌiti ꞌikën. Usa ꞌain ka Jerusalén ꞌimainun anuxun Dios rabikë xubu ax masókë ꞌiti ꞌikën. Achúshi ꞌapun ka aín suntárukamabë uxun ꞌatima okin masóti ꞌikën. Usakin ꞌakëx ka bakan ꞌishi kuatsinkin ñu mapurukë usaribi ꞌiti ꞌikën. Usa ꞌain ka uni ꞌakanankin ñu ꞌatima okin masókë ax usai ka ꞌiti ꞌikë kixun Diosan nankësabi oi ꞌiti ꞌikën.

Amós 9:3

ꞌIanan kana aín bashi Carmelo kakë aín rëbu anu unë́ti sinánkëbi, ꞌënbi anua bari kuanti ꞌain; ꞌianan kana ꞌëmi unë́ti sinanx parúmpapa ꞌukëmëu kuankë ꞌikëbia, anu ꞌikë ñuinakan ꞌëo an masókin këñuanan ꞌatima oti xuti ꞌain;

Miqueas 5:3

Usa ꞌain ka bërí Diosan aín unikama ënia, ꞌaínbi ka xanun aín tuá achúshi bakënuxun kainkë usa ꞌiti ꞌikën. Usa ꞌain ka a tuá aín aintsi Israelkama ñatanbiankin buánkama abë birananti ꞌikën.

Mateo 1:23

Xanu achúshi unibë ꞌicëma pain ꞌaish ca tuñu ꞌitancëx bacë́nti ꞌicën. Aín tuá ax ca Emanuel caquin anëcë ꞌiti ꞌicën. Emanuel quicë ax ca “Nucën Papa Dios ca nubë ꞌicë” qui quicë ꞌicen.

Mateo 1:25

Biaxbi ca abë ꞌiáma pan ꞌicën, aín rëcuën tuá bacꞌëncë cuni ca Josénën aín xanu ꞌinun María biacëxa. A bacꞌëncë tuá a ca Josénën Jesús caquin anëacëxa.

Mateo 12:34

Mitsux ꞌatima ꞌixun uni paráncë ꞌaish camina mitsun raracama ꞌiásaribiti an uni picë runusaribi ꞌain. Unix ca aín nuitu mëúa sináncësaribi oi aín cuëbitan banaia. Mitsun nuitu ꞌaisama ꞌain camina ꞌatimati banain.

Mateo 13:38

Anu ñu bëru ꞌapácë naë asaribi ca camabi ënë me ꞌicën. Ñu bëru upí asaribi ca Nucën Papa Diosan unicama ꞌicën. Chucusaribi ca a ñunshin ꞌatimanën ꞌapun sinánmicë unicama ꞌicën.

Mateo 23:33

ꞌAtima ꞌixun uni paráncë ꞌaish camina mitsux runu an uni picë asa ꞌain, mitsun raracama ꞌiásaribiti camina ꞌin. Mitsúxmi usai ꞌicë cupí ca Nucën Papa Diosan asérabi mitsux bamaia anuaxmi tëmërati manë tsinu mitsu ꞌimiti ꞌicën.

Mateo 3:7

Juanën bana ñuixunia cuati ꞌitsa uni ricuatsinmainun ca ꞌitsa fariseo uni ꞌimainun ꞌitsa saduceo uniribi an nashiminun quiax anu uacëxa. Aia isquin ca Juanën cacëxa: —Mitsux ꞌatima ꞌixun uni paráncë ꞌaish camina mitsun rara ꞌiásaribiti runu, an uni picë, asa ꞌain. ¿Usa ꞌicë cara anúan Nucën Papa Diosan ꞌaisama unicama atumi nishquin masóti nëtën masócë ꞌitin rabananmi sinananun quixun uin mitsu cax?

Marcos 16:18

Usai ꞌianan aín mëcënan bicëxunbi ca runun ꞌatima ꞌicën. ꞌImainun ca muca ñua xëacëxunbi uisabi otima ꞌicën. ꞌImainun ca aín mëcënan ramëcëx uni ñucë pëxcúti ꞌicën.

Lucas 1:76

Usa ꞌain cana mixmi ꞌën bëchicëratsu ꞌicë, mi cain, mi ñui ca unicamax, Nucën Papa Dios manámi ꞌicë an aín bana unicama ñuixunun xucë camina mix ꞌai quiax quiti ꞌicën. Min camina, a Nucën ꞌIbu Diosan xuti ax ucëma pan ꞌain, mix pain rëcuë́ncuatsincë ꞌixun, aín bana cuanun quixun Israel unicama sinánmiti ꞌain.

Lucas 10:19

Camina ꞌunánti ꞌain, ꞌën cushi cana mitsu ꞌinan. ꞌËn mitsu ꞌináncë ꞌain camina runu ꞌimainun nibanta amatibi asábi ꞌiti ꞌain, uisoquin cara mitsu ꞌaisa tania, tanquinbi ca ñunshin ꞌatimanën mitsu ꞌatima ꞌicën, uisa ñunbi ca mitsu uisabi oima.

Lucas 22:53

Camabi nëtën anuxun Nucën Papa Dios rabiti xubunu mitsubë ꞌiabi camina uisa ꞌixunbi ësoquin ꞌë bicáncëma ꞌain. Bërími mitsun ësoquin ꞌanun ca Nucën Papa Diosan mitsu ëanxa, ñunshin ꞌatimanën ꞌapun cushínbi camina ësoquin ꞌë ꞌain.

Lucas 24:27

Caxun ca Moisésnëan cuënëo bana ꞌimainun an Nucën Papa Dios quicë bana uni ñuixuncë unicamanribia cuënëo bana, uisa banacama cara a ñui quicë ꞌicë, a banaxa quicësabi oi ca ꞌiaxa quixun a uni rabë́ ñuixuancëxa.

Juan 8:44

Mitsun papax ca ñunshin ꞌatimanën ꞌapu ꞌicën. Ainan ꞌixun camina axa cuëëncësa oquinshi ꞌaisa tanin. An ca nëtë ióñubi uni ꞌati sináncëxa. Ax ca cëmë ꞌaish axa ꞌiásabi cëmëia. Cëmëi ca an sináncësa oquinshi sinani banaia. Ainra ca cëmë́ntapun ꞌixun unían uni itsi cëmëquin paránun ꞌimia.

Hechos 13:10

Ñachaquin ca cacëxa: —Cëmë camina mix ꞌain. ꞌIanan camina ꞌatima uni ꞌaish ñunshin ꞌatimanën sinánmicë ꞌain. Usa ꞌixun camina min ñu upí cuëëniman. Nucën ꞌIbu Diosan banaxa cuaisa ꞌaish upí ꞌaínbi ¿caramina min uisa cupí a cuaxunma ꞌanun quixun uni paranin?

Romanos 16:20

Usoquin mitsun ꞌacëbëtan ca Nucën Papa Dios, an aín unicama chuámarua ꞌimiti, an ñunshin ꞌatimanën ꞌapu mitsu ubíotëcënxunma ꞌanun bënë́nquinshi ñusmamiti ꞌicën. Nucën ꞌIbu Jesucristonën mitsu nuibaquin ꞌaquincëx mitsux upí ꞌiti cana cuëënin.

Romanos 3:13

Anu uni bamacë racáncë quini mapucëma ꞌain ca anuax aín anëcë chiquitia. Usaribiti ca ꞌatima uni aín cuëbínuax bana ꞌatima ꞌimainun cëmëi quicë bana chiquitia. Aín banan ca uni itsi ñui cëmëia. Usaquin ca amia cëmëcë uni masá nuitumia. Aín banax ca runun cuëbínu ꞌicë muca, an uni paëocë, usaribi ꞌicën.

Gálatas 4:4

Usa ꞌaínbi ca aín uti nëtë sënë́ncëbëtan Nucën Papa Diosan aín Bëchicë ënë nëtënu xuacëxa. Achúshi xanúxa bacë́ncëx canitancëx ca judíos unicama ꞌicësaribiti Moisésnën cuënëo bana, usaía judíos unicama ꞌiti, a ꞌunáncë ꞌiacëxa.

Efesios 4:8

Usai ca ꞌiti ꞌicë quiax ca Nucën Papa Diosan bana cuënëo ësai quia: Capitanëan abë ꞌacánanquin axa ami nishcë unicama ñusmoxun cuëënquin aín unicama an bicë ñu ꞌináncësabi oquin ca Cristonën bamax baísquitancëx naínu cuantëcëntancëxun cuëënquin aín unicama an ꞌati ñu ꞌinánquin bëtsi bëtsi ñu ꞌanun ꞌimiaxa.

Colosenses 2:15

Usonan ca Cristonën i curúsocënu bamaquin uisa ñunshinax cara uisaira cushiñu ꞌicë, abi camabi unían ꞌunánun ñusmoquin cushiñuma ꞌimiacëxa.

Hebreos 2:18

Ax tëmëranan ñunshin ꞌatimanën ꞌapun tancëxunbi ñu ꞌatima ꞌaíma ꞌixun ca an, a ñunshin ꞌatimanën ꞌapun ñu ꞌatima ꞌanun quixun sinánmicë aín unicamaribi usoquin ꞌaxunma ꞌanun cushioti ꞌicën.

Hebreos 5:7

Jesusan ca ënë menu ꞌaish abë banaquin aín Papa ñu ñucácëxa. Ñucáquin ca axa bamatimoquin a ië́miti cushiñu ꞌicë ꞌunánquin, munuma banaquin cacëxa. Usaquian ax cuëëncësabi oquin ꞌaquinun quixun ñucácë cupí ca Nucën Papa Diosan Jesucristo ꞌaquiancëxa.

1 Juan 3:10

Ënëx ca ësa ꞌicën. Ui unin cara ñu upí ꞌaima ax ca Nucën Papa Diosnanma ꞌicën, ui unin cara uni itsiribi nuibatima axribi ca Nucën Papa Diosnanma ꞌicën. Usa ꞌain cananuna uinu ꞌicë unix cara Nucën Papa Diosan bëchicë ꞌicë quixun ꞌunánan uinu ꞌicë unix cara ñunshin ꞌatimanën ꞌapunan ꞌicë quixun ꞌunánti ꞌain.

1 Juan 3:8

Usa ꞌaínbi ca an ñu ꞌatima ꞌacë unicama ax ñunshin ꞌatimanën ꞌapun uni ꞌicën, ñunshin ꞌatimanën ꞌapu ax ca nëtë ióñubi ꞌucha ꞌaish usabii bërí nëtë́nbi ꞌuchaia, usa ꞌain. Usa ꞌaínbi ca ñunshin ꞌatimanën ꞌapúan ñu ꞌatima ꞌacëcama cëñui Nucën Papa Diosan Bëchicë uacëxa.

1 Juan 5:5

Axa —Jesús ca asérabi Nucën Papa Diosan Bëchicë ꞌicë —quixun ꞌunani ami catamëcë uni an cuni ca ënë menuxuan ñu ꞌatima ꞌacëcama ënquin ꞌatëcënima.

Apocalipsis 12:17

Usai ꞌia isi ca ñuina chaira capë́sa ax ꞌaisamairai xuamati xanumi nishaxa. Nishi ca a xanun rëbúnqui raíri, an Nucën Papa Diosan bana quicësabi oquin ꞌacë ꞌianan an Jesucristomi sinánti ëncëma, a unicamabë ꞌacanani cuanxa.

Apocalipsis 13:7

Usaquian ëncëxun ca camabi menu ꞌicë unicama, axa Nucën Papa Diosmi catamëcë, abë ꞌacananquin ñusmoxa. Ñusmoxun ca camabi menu ꞌicë unicama, bëtsi bëtsi unibu, bëtsi bëtsi banan banacëcama, aín bana cuanun ꞌimiaxa.

Apocalipsis 2:10

Unían bëtsi bëtsi oquin ꞌatimocëxbi camina racuë́tima ꞌain. Ñunshin ꞌatimanën ꞌamicëxun ca raíri unin mitsu sipuati ꞌicën, caramina ꞌëmi sinánti ënti ꞌai quixun isnuxun. Mëcën rabë́ nëtën camina paë tani tëmërati ꞌain. Uisai cara ñu ꞌicëbëtanbi camina anúnmi mitsux bamati nëtë utámainun ꞌëmi sinánti ëntima ꞌain. Usaími ꞌia cana mitsu ꞌën nëtënuaxmi nëtë́timoi ꞌëbë cuëënun ꞌimiti ꞌain.

Apocalipsis 20:10

Usoquin cëñuanan ca ñunshin ꞌatimanën ꞌapu, an unicama paráncë, a ꞌianëmëꞌëosa manë tsi, anuaxa azufreribi rëquirucë, anu ꞌinun niaxa. Anua ꞌitsa maxcáñu ꞌianan ꞌitsa matúxcañu ñuinacanꞌëo a ꞌimainun bëtsi ñuinacanꞌëo an Nucën Papa Dios rabiquinma ñuinacanꞌëo rabinun quixun unicama paráncë, anu atux ꞌicë ca ñunshin ꞌatimanën ꞌapuribi anu niaxa. Anuxun ca acaman nëtë́nbi imë́bi xënibua ꞌaínbi nëtë́timoquin paë tanquin tëmërati ꞌicën.