Génesis 18:14 - Kashibo-Kakataibo Biblia

¹⁴ ¿Nukën ꞌIbun ꞌakasmati ñu kara ꞌaíma ꞌik? bëtsi bari ꞌirukëbë kana ꞌëx mi istëkëni uti ꞌain, ꞌimainun ka Sara achúshi tuáñu ꞌiti ꞌikën kixun ka kakëxa.

Nukën 'Ibu Diosan ain unikama 'inan ain bana

¹⁴ ¿Nukën 'Ibun 'akasmati ñu kara 'aíma 'ik? bëtsi bari 'irukëbë kana 'ëx mi istëkëni uti 'ain, 'imainun ka Sara achúshi tuáñu 'iti 'ikën kixun ka kakëxa.

Génesis 18:14 ပူးပေါင်းရင်းမြစ်များ

Génesis 17:16

ꞌËn kana upíokin sinánxunin, usa ꞌain kana achúshi tuá mi ꞌaxúnun ꞌimiti ꞌain. ꞌËn upíokin sinánxunkëx ka kamabi menu ꞌikë unikama aín rëbúnki ꞌiti ꞌikën. ꞌImainun ka aín rëbúnkinëx kamabi menu ꞌikë unikaman ꞌapu ꞌinuxun ꞌaia, kixun ka Nukën ꞌIbu Diosan kakëxa.

Génesis 17:21

ꞌAínbi ka ꞌën achúshi ñu mibëtan ꞌakë ax min bëchikë Isaac min xanu Sara ënuax achúshi baritia ꞌikëbë anun ꞌiti nëtë ꞌikëbë bakënkëbë ꞌën ꞌakë ñu ax anubi ꞌiti ꞌikën.

Génesis 18:10

Usakian kakëxun ka a isia ukë uni achúshinën kakëxa: —Mi istëkëni kana bëtsi bari ꞌikëbë utëkënti ꞌain ꞌimainun ka min xanu Sara ax achúshi tuáñu ꞌiti ꞌikën. Usakian kaia ka Saran kamabi banakama kuakëxa, ax anu ꞌikë aín xubu xëkuë ꞌurama anuaxa banaia.

Génesis 18:13

Usai ꞌia ꞌunánkin ka Nukën ꞌIbun Abraham kakëxa: —¿Uisa kupín kara Sara kuain? ¿an kara xënira ꞌaish kana tuáñu ꞌiti ꞌain kixun sinanimin?

Génesis 18:15

Ësai kia kuati ka Sara rakuë́ti ꞌëx kana kuaikëma ꞌain kiax kisatankëxa: Usa ꞌain ka ësai kiakëxa: —ꞌËx kana kuaikëma ꞌain. ꞌAínbi ka Nukën ꞌIbun kakëxa: —ꞌËn kana mix kuaia isan.

Génesis 21:1

Usa ꞌain ka ax kikësabi oia ꞌinun Sara Nukën ꞌIbun bërúankëxa, usokëx ka ax kikësabi oi ꞌiakëxa,

Génesis 21:2

usa ꞌain ka ax tutankëxun achúshi tuá, Abraham ꞌaxuankëxa, usa ꞌain ka kaniakëkë ꞌixunbi Abraham tuaxuankëxa, a tuakëx ka Nukën ꞌIbu Diosan anun bakënti nëtë nankë sënënkëbë bakë́ankëxa.

2 Reyes 4:16

Usai ꞌia ka Eliseonën kakëxa: —Bari itsi ukë anun kamina ënë ꞌuxë ꞌikëbë achúshi tuáñu ꞌinuxun ꞌain. Ësakian kakëxunbi ka xanuxun kakëxa: —Usama ka mix Diosan uni ꞌixun kamina an mi ñu ꞌaxúnti ënë parántima ꞌain.

Salmos 90:13

¡Nun ꞌIbu, nukamanu kamina utëkënti ꞌain! ¿Uínsaran ira kaina nu ꞌakintëkënti ꞌain? ¡Minmi kaisa min unikama ënë kamina nuibakin ꞌakinti ꞌain!

Salmos 93:1

¡Nukën ꞌIbu Dios ax ka ꞌapuira ꞌikën! ¡Usa ꞌixun ka aín kushínbi chaiirabu ñukama ꞌá ꞌixun a ꞌunánun nu ismiaxa! Usa ꞌain ka me uniotankëxun anuaxa shaíkitëkëntima okin nankëxa.

Salmos 95:3

Ax ka Dios chaiira ꞌikën, usa ꞌaish ka bëtsi bëtsi dioskama atun ꞌapuira ꞌikën.

Isaías 50:2

¿Uisa kupín karana ukin ꞌën uibi mërama ꞌain? ¿Uisa kupín kara kuënkëxunbi uínbi ꞌë káma ꞌik? ¿ꞌËx isana mitsu ꞌakinsama ꞌai kixun kaina sinánkankën? ¿ꞌËn isana mitsu chikintima ꞌai kixun kaina sinánkankën? ꞌËx usai ka ꞌiti ꞌikë kiax kikëbëshi ka parúmpapa ëskiti ꞌikën, ꞌimainun ka bakakamaxribi anu uni ꞌikëma mesa ꞌitánun aín ꞌumpax ꞌaíma ꞌiti ꞌikën; usai ꞌikëbë ka anu ꞌikë tsatsakama ꞌumpaxñuma ꞌain xanan bamai chë́kia.

Daniel 6:20

Bëbakin ka ꞌurama okin ꞌapun Daniel masá nuitukëishi aín bana ꞌixun ësokin kakëxa: —Daniel Dios këñutima oi tsókë aín uni, ¿ami ax kikësabiokin min ꞌaxunkë an kara paru ꞌinúan kamanua mi ëñëmiax?

Miqueas 7:18

Misaribi bëtsi Dios ka ꞌaíma ꞌikën, min kamina nux kuëënkësa oí ꞌikë a mëníokin, nuxnu ꞌuchakëkama a manuin, nukamax kananuna min unikama ꞌitsamashi tikikë a ꞌain. Min kamina nukama nuibatin usa ꞌain kamina mix xënibua ꞌaish nishkëma a ꞌain.

Números 11:23

Ësai kiabi ka Nukën ꞌIbun kakëxa: —¿Min sinánkëx kara ꞌën kushi chamaratsu ꞌik? Bërí kamina asérabi kara ꞌëx kikësabi oi ꞌia kara ꞌima kixun isti ꞌain.

Mateo 14:31

Cuëncë́nquia cacëxun biquin ca Jesusan cacëxa: —¿Uisacatsi caramina ꞌën mi parúmpapa camánanën nicuatsinimi ꞌënu unun ꞌimicëxbi ꞌëmi catamëtiman? Camina ꞌëmi sináncëmasa ꞌain.

Mateo 19:26

Usai quia isquin ca Jesusan cacëxa: —ꞌAisamaira ñuñu uníxa ië́tisama ꞌaínbi ca an ꞌacasmati ñu ꞌaíma ꞌain Nucën Papa Diosan ñuñu uniribi ainan ꞌinun ië́miti ꞌicën.

Mateo 3:9

—Nux Abrahamnën rëbúnqui ꞌaish cananuna Nucën Papa Diosan iscëx upí ꞌai —quixun sinánxunma ca ꞌacan. Asérabi cana mitsu cain, ꞌaisa tanquin ca Nucën Papa Diosan ënë maxáxbi bëtsi oquin Abrahamnën rëbúnqui ꞌimiti ꞌicën.

Marcos 10:27

Usai quia isquin ca Jesusan cacëxa: —ꞌAisamaira ñuñu uníxa ië́tisama ꞌaínbi ca Nucën Papa Diosan ꞌacasmati ñu ꞌaíma ꞌicën. Usa ꞌixun ca ainshi ñuñu uniribi ainan ꞌinun ië́miti ꞌicën.

Lucas 1:13

Usai ami racuëtiabi ca ángelnën cacëxa: —Racuë́axma ca ꞌit, Zacarías. Nucën Papa Diosan ca minmi a cacë banacama cuaxa. Usa ꞌain ca min xanu Elisabet an tuáñu ꞌiti ꞌicën. A tuá camina Juan caquin anëti ꞌain.

Lucas 1:18

Angelnën cacëxun ca Zacaríasnën cacëxa: —ꞌËx cana xëniira ꞌain, ꞌën xanuribi ca xëniira ꞌicën. ¿Usa ꞌain carana uisaxun ꞌunánti ꞌain, min ꞌë cacësabi oi ca asérabi ꞌiti ꞌicë quixun?

Lucas 1:37

ꞌAíma ca Nucën Papa Diosan ꞌacasmati ñu ꞌicën.

Lucas 8:50

Caia cuaquin ca Jesusan cacëxa: —Racuë́axma ca ꞌit. ꞌËn cana mi ꞌaquinti ꞌai quixun ca sinan. Usaquinmi sináncëbë ca pëxcúti ꞌicën.

Romanos 4:21

Rabiquin ca, an ca asérabi cushi ꞌixun ax quicësabi oquin ñu ꞌati ꞌicë quixun sináncëxa.

Efesios 3:20

Ax cushiira ꞌaish nubë ꞌixun ca Nucën Papa Diosan nun ñucácësamaira oquin nu ꞌaxúanan nun sináncësamaira oquinribi sinánxunquin nu ꞌaquinti ꞌicën.

Deuteronomio 30:3

usokinmi ꞌaia ka Diosan mitsu ꞌatima oxunbi mëníokin nuibati ꞌikën. Nuibakin ka amiribishi anua bëtsi menu ꞌikë unikaman bëa me anubi mitsu buántëkënti ꞌikën,

Deuteronomio 7:21

Usa ꞌain kamina atumi rakuë́tima ꞌain, nukaman ꞌIbu Dios kushiira ax, mitsubë ꞌain ka atux mimi rakuë́ti ꞌikën.

Filipenses 3:21

Nux bamai chëquiti ꞌicëbi ca ax uquin nu axa bamax baísquiasaribi oquin, asaribi ꞌinun, nu bëtsi oti ꞌicën. Usonan ca aín cushi anun ax camabi ñun ꞌibu ꞌiti anúnribi nu bëtsi oti ꞌicën.

Filipenses 4:13

Usa ꞌixun cana uisa ñu cara ꞌicëbëtanbi tënëquin Cristo cuëëncësabi oquin ꞌati ꞌain, usai ꞌinun an cushiocë ꞌixun.

Hebreos 11:19

Buánquin ca sináncëxa: —ꞌËn bëchicë achúshi, Isaac, aín rëbúnqui ca asérabi ꞌitsaira ꞌiti ꞌicën, Nucën Papa Diosan ꞌë cacësabi oi. Usaía ꞌinun ca bamacëbi baísquimiti ꞌicë —quixun. Usaquin sinánquian Nucën Papa Diosan cacësabi oquin Abrahamnën ꞌati ꞌaíshbi ca Nucën Papa Diosan xucëxun ángelnën Abraham cacëbë Isaac bamati ꞌaíshbi ië́acëxa.

Jueces 13:3

ꞌAínbi ka achúshi nëtën Nukën ꞌIbun ángelnën ami mërakin kakëxa: Mix kamina uínsaranbi tuakëma xanu ꞌain, usa ꞌaínbi kamina bërí tutankëx achúshi bëbu tuá bakënti ꞌain.

1 Samuel 14:6

Anuxun ka Jonatánnën abëa kuankë aín uni kakëxa: —ꞌUkëmanan kananuna kuanti ꞌain, uinua karanuna uni ꞌaisama kamanuaxa ukë suntárukama a mërai anuishi kananuna bërúti ꞌain. Nux anun ꞌakamati ñu ka ꞌaíma ꞌikën, usa ꞌain ka Nukën ꞌIbun ꞌitsa unibëtanmabi, ꞌitsamara ꞌixunbi ꞌanun nu ꞌamiti ꞌikën.