Gálatas 5:19 - Kashibo-Kakataibo Biblia

¹⁹ Camina ꞌunanin, unin ca ꞌaisa tanquinbi tënëquinma aín cuëëncësa oquin ësa ñucama ꞌaia quixun: aín xanuma ꞌaínbi xanubë ꞌiti, xanúxmabi uni itsibë ꞌiti, ꞌimainun ñunshínquin ñu ꞌatima ꞌati.

Nukën 'Ibu Diosan ain unikama 'inan ain bana

¹⁹ Camina 'unanin, unin ca 'aisa tanquinbi tënëquinma aín cuëëncësa oquin ësa ñucama 'aia quixun: aín xanuma 'aínbi xanubë 'iti, xanúxmabi uni itsibë 'iti, 'imainun ñunshínquin ñu 'atima 'ati.

Gálatas 5:19 ပူးပေါင်းရင်းမြစ်များ

Juan 3:6

Axa xanunuax bacë́ncë, ax ca unishi ꞌia; axa aín Bëru Ñunshin Upitan bacë́ncë uni, ax ca Nucën Papa Diosan Bëru Ñunshin Upíñu ꞌia.

Romanos 7:18

Ënëx ca ësa ꞌicën. Cananuna ꞌunanin, nun sinan upíma ꞌixun cananuna ñu upí ꞌatima ꞌain. Ñu upíshi ꞌaisa tanquinbi cananuna nun sinan upíma ꞌixun ꞌaiman.

Romanos 7:25

An nu ië́miti ax ca Nucën Papa Dios ꞌicën, Nucën ꞌIbu Jesucristo cupí. An ca nu ië́miti ꞌicë quixun ꞌunánquin cananuna —asábi ca —quixun cain. Usa ꞌain cananuna ꞌunanin, Nucën Papa Dios cuëëncësabi oquin ꞌati ꞌixunbi cananuna nun sinan upíma ꞌixun ñu ꞌatima ꞌain. Usaquin ꞌaxunma ꞌanun ca Nucën Papa Diosainshi nu ië́miti ꞌicën.

Romanos 7:5

Ainanma pain ꞌaish nux cuëëncësabi oi ꞌiquin cananuna, ñu ꞌatima ꞌati ca ꞌaisama ꞌicë quicë bana ꞌunánxunbi nun sinan upíma ꞌixun, usa ñu ꞌacën. Usa ñu ꞌacë ꞌaish cananuna Nucën Papa Diosbë ꞌitimoi bamati ꞌiacën.

Romanos 8:13

Axa ënë nëtënu ꞌicë ñuishi sinani aín cuëëncësa oíshi ꞌicë uni ax ca Nucën Papa Diosnanma ꞌaish abë ꞌitima ꞌicën. Usa ꞌaínbi ca an Nucën Papa Diosan Bëru Ñunshin Upitan sinánmicësabi oquin ñu ꞌatima ꞌati ëncë uni, ax cuni ainan ꞌaish Nucën Papa Diosbë ꞌiti ꞌicën.

Romanos 8:3

Uisa ñux cara ꞌati ꞌicë, uisa ñux cara ꞌatima ꞌicë quicë bana a ꞌunánquinbi ca aín sinan upíma ꞌixun unin a bana quicësabi oquin ꞌatima ꞌicën. Usa ꞌaínbi ca unían a bana quicësabi oquin ꞌanun quixun Nucën Papa Diosan aín Bëchicë, nusaribi uni ꞌinun, xuacëxa. Xutancëxun ca aín Bëchicë, ꞌuchañuma ꞌaíshbia camabi unin ꞌucha cupí bamanun ꞌimiquin uni, aín ꞌuchacama tërë́anan ꞌuchatëcëanxma ꞌinun mëníocëxa.

Romanos 8:5

An Jesucristomi sinánquinma aín cuëëncësa oquinshi ꞌati sináncë unin ca ënë nëtënu ꞌicë ñuishi ꞌati sinania. Usa ꞌaínbi ca axa Jesucristomi sináncë unin Nucën Papa Diosan Bëru Ñunshin Upitan sinánmicë ꞌixun an sinánmicësabi oíshi ꞌiti sinania.

Romanos 8:9

Usa ꞌaínbi camina mitsux usama ꞌain. Nucën Papa Diosan Bëru Ñunshin Upí mitsubë ꞌain camina an ënë nëtënu ꞌicë ñuishi sináncë unin sináncësa oquin sinánquinma, Nucën Papa Diosan Bëru Ñunshin Upitan sinánmicësabi oquinshi sinanin. Uicamax cara aín Bëru Ñunshin Upíñuma ꞌicë, acamax ca Cristonanma ꞌicën.

1 Corintios 3:3

Usai ꞌaish nutsi cuamianani nishananquin camina Cristonanma unin sináncësa oquinshi sinanin. Usa ꞌi camina an Nucën Papa Diosan bana cuacëma unicamaxa ꞌicësai ꞌin.

1 Corintios 6:18

Usa uni ꞌimainun usa xanumi camina ꞌunánti ꞌain. Aín xanu ꞌaímabi xanu itsibë ꞌicë uni ꞌimainun xanúxmabi uni itsibë ꞌicë uni an ca abi aín namibi ꞌuchoquin ꞌatimamia. Ñu raíri ꞌaisama ꞌaquinbi ca unin usoquin aín nami ꞌuchoima.

Gálatas 5:13

ꞌËn xucë́antu, mitsun ñu ꞌacë cupíma Cristomi catamëcë cupíshi an iscëx upí ꞌinun ca Nucën Papa Diosan mitsu caísaxa. Usa ꞌixun camina mitsux cuëëncësabi oquin ñu ꞌatima ꞌati sinántima ꞌain. Usaquin ꞌaíma camina bëtsibë nuibanani asérabi ꞌaquiananti ꞌain.

Gálatas 5:17

Nun sináncësa oquinshi ënë nëtënu ꞌicë ñu ꞌaquin cananuna Nucën Papa Diosan Bëru Ñunshin Upí cuëëncësama oquin ꞌain. Nucën Papa Diosan Bëru Ñunshin Upí ax ca nun sináncësa oquinu ñu ꞌati cuëënima. Usa ꞌixun camina mitsux an sinánmicë ꞌixun mitsun cuëëncë ñu ꞌatima ꞌain.

Gálatas 6:8

Usaribiti ca axa aín ꞌuchacama ënima aín cuëëncësa oíshi ꞌicë uni ax ainanma ꞌaish xënibua ꞌaínbi Nucën Papa Diosbë ꞌíma. Usa ꞌaínbi ca an aín Bëru Ñunshin Upitan sinánmicëxun sinánquin ñu upí ꞌacë uni ax Nucën Papa Diosnan ꞌaish xënibua ꞌaínbi abë ꞌia.

Tito 3:3

Nuxribi cananuna sinánñuma ꞌaish Nucën Papa Diosan bana quicësabi oi ꞌiáma ꞌain. Usa ꞌaish cananuna ñu ꞌatimaishi ꞌanúan bëtsi unin sinánmicëxun ꞌanan nunbi sinani nux cuëëncësabi oi ñunshini ꞌiacën. ꞌAisama ñuishi ꞌanan cananuna bëtsi unimi nutsianan numia uni nishcëx abë nishanancën.

Hebreos 13:4

Min xanuma ꞌain camina xanu itsibë ꞌitima ꞌain. Xanu minan ꞌiti bitancëxun camina abë nuibananquin upí oxun ꞌiquinti ꞌain. Aín xanuma ꞌain bënëñuma xanubë ꞌiti ꞌimainun uni itsin xanubë ꞌiti ca Nucën Papa Dios cuëënima. Cuëënquinma ca usa uni ꞌimainun usa xanuribi ꞌuchoquin uisa cara oti ꞌicë usoquin ꞌati ꞌicën.

Apocalipsis 21:8

Usa ꞌaínbi ca racuë́quian an ꞌëmi sinánti ëncë unicama, ꞌimainun an ꞌëmi catamëcëma unicama, ꞌimainun an ñu ꞌatima ꞌacë unicama, ꞌimainun an uni ꞌacëcama, ꞌimainun aín xanuma ꞌicëbi bëtsi xanu cuëëncë unicama ꞌimainun aín bënëma ꞌicëbi bëtsi uni cuëëncë xanucama ꞌimainun ñu xëacë ñubë́ unicama ꞌimainun an Nucën Papa Diosmabi bëtsi ñu rabicë unicama ꞌimainun cëmë unicama, acamax anuaxa ꞌianëmëꞌëosa manë tsi azufrebë rëquirucë anu ꞌiti ꞌicën, anu bamatëcëncë ꞌaish chiquítimoi ꞌinux.

Apocalipsis 22:15

Usa ꞌaínbi ca ꞌaisama unicamax a ëma ëmáinshi ꞌiti ꞌicën. An ñu ꞌaisama sináncë unicama, an ñu xëacë ñubë́ unicama, aín xanuma ꞌicëbi bëtsi xanu cuëëncë unicama, aín bënëma ꞌicëbi bëtsi uni cuëëncë xanucama, an uni ꞌacë unicama, an Nucën Papa Diosmabi bëtsi ñu rabicë unicama, axa uni paránti cuëëni cëmëcë unicama, acamax ca a ëmanu atsíntima ꞌicën. Ca ëmáinshi ꞌiti ꞌicën.