Gálatas 4:6 - Kashibo-Kakataibo Biblia

⁶ Mitsux camina asérabi aín bëchicë ꞌai quixunmi ꞌunánun ca Nucën Papa Diosan aín Bëchicënën Bëru Ñunshin Upí mitsubëa ꞌinun xuacëxa. Usa ꞌain camina aín bëchicë ꞌixun —ꞌën Papa Dios camina mix ꞌai —quixun Nucën Papa Dios cain.

Nukën 'Ibu Diosan ain unikama 'inan ain bana

⁶ Mitsux camina asérabi aín bëchicë 'ai quixunmi 'unánun ca Nucën Papa Diosan aín Bëchicënën Bëru Ñunshin Upí mitsubëa 'inun xuacëxa. Usa 'ain camina aín bëchicë 'ixun —'ën Papa Dios camina mix 'ai —quixun Nucën Papa Dios cain.

Gálatas 4:6 ပူးပေါင်းရင်းမြစ်များ

Marcos 14:36

—Papan, min ꞌaisama ñu ca ꞌaíma ꞌicën. ꞌËn usoquin paë tanun ꞌë ꞌimixunma ca ꞌat. Usa ꞌaínbi cana ꞌëx cuëëncësa oi ꞌitima ꞌain, mix cuëëncësa oishi cana ꞌiti ꞌain.

Lucas 11:13

Mitsux ꞌatima uni ꞌixunbi camina mitsun bëchicë upí ñu ꞌinanin. Mitsúnmi ꞌacësamaira oquin ca Nucën Papa Dios naínu ꞌicë, an a ñucácë uni aín Bëru Ñunshin Upí abëa ꞌinun ꞌinánti ꞌicën.

Lucas 11:2

Cacëxun ca Jesusan cacëxa: —Nucën Papa Diosbë banaquin camina ësoquin cati ꞌain: ꞌËn Papa Dios, naínu ꞌicë, mix camina asérabi min sinan upíira ꞌain. —Usa camina mix ꞌai —quiax ca camabi uni mi ñui upí banáinshi banati ꞌicën. Aín ꞌApu ꞌicëa camabi unin mi rabiti cana cuëënin. Usaquian mi ꞌanun camina ꞌimiti ꞌain. Min nëtënuxuan ángelcaman ꞌacësaribi oquian ënë nëtënuxun unicaman mix cuëëncësabi oquin ꞌati cana cuëënin. Usaquian ꞌanun camina ꞌimiti ꞌain.

Juan 14:16

Usaquinmi ꞌacëbëtan cana an mitsu ꞌaquinti a mitsubëa ꞌinun xunun Nucën Papa Dios ñucáti ꞌain, axa xënibua ꞌaínbi mitsubë ꞌinun.

Juan 15:26

Unicamax ꞌëmi nishcë ꞌaínbi ca aín Bëru Ñunshin Upí, an Nucën Papa Diosan sináncë ñucama ꞌunánan uni ꞌaquincë, an uisa carana ꞌëx ꞌai quixun mitsu ꞌunánmiti ꞌicën. Ax ca an Nucën Papa Diosan sináncë ñucama ꞌunáncë, a ꞌicën. A cana Nucën Papa Dios cuëëncësabi oquin mitsubëa ꞌinun xuti ꞌain.

Juan 16:7

Usai ꞌiabi cana asérabi mitsu cain, upitaxmi ꞌë cupí ꞌicanun cana ꞌëx cuanin. ꞌËx cuancëbëma ca an uni ꞌaquinti, Nucën Papa Diosan Bëru Ñunshin Upí, ax mitsubë ꞌi utima ꞌicën. Usa ꞌaínbi cana ꞌëx cuanquin a xuti ꞌain.

Juan 3:34

Usai ꞌinun ca Nucën Papa Diosan aín Bëru Ñunshin Upí ñonquinma aín Bëchicë ꞌinania. Usaquian ꞌináncëxun ca an xucë́xa ucë uni, Jesús, an aín Bëru Ñunshin Upitan sinánmicë ꞌixun Nucën Papa Dios cuëëncësabi oquin unicama bana ñuixunia.

Juan 7:39

Nucën Papa Diosan Bëru Ñunshin Upí ca axa ami catamëcë unicamanu uti ꞌicë quixuan ꞌunánun ca Jesusan usaquin unicama cacëxa. Ax bamatancëx baísquitancëx naínu cuancëma pain ꞌaían Nucën Papa Diosan aín Bëru Ñunshin Upí aín unicamabë ꞌinun xucëma pain ꞌain ca Jesusan usaquin unicama cacëxa.

Hechos 16:7

Cuanx anu bëbaquin Misia cacë me inubiani, Bitinia cacë menuribishi cuainsa taniabi ca Nucën ꞌIbu Jesusan Bëru Ñunshin Upitan anu cuanxma ꞌinun sinánmiacëxa.

Romanos 5:5

An ca —asérabi camina ꞌëbë ꞌiti ꞌai —quixun caquin nu paraníma. An ca aín Bëru Ñunshin Upí nubë ꞌinun nu ꞌinánxa. Nubë ꞌixun ca nu ꞌunánmia uisaira oquin cara Nucën Papa Diosan nu nuibatia quixun. An ca asérabi nu nuibatia quixun ꞌunánquin cananuna, nux cananuna asérabi aín nëtënu abë ꞌiti ꞌai quixun ꞌunanin.

Romanos 8:9

Usa ꞌaínbi camina mitsux usama ꞌain. Nucën Papa Diosan Bëru Ñunshin Upí mitsubë ꞌain camina an ënë nëtënu ꞌicë ñuishi sináncë unin sináncësa oquin sinánquinma, Nucën Papa Diosan Bëru Ñunshin Upitan sinánmicësabi oquinshi sinanin. Uicamax cara aín Bëru Ñunshin Upíñuma ꞌicë, acamax ca Cristonanma ꞌicën.

1 Corintios 15:45

Acama ñui ca Nucën Papa Diosan bana cuënëo ësai quia: “Nucën Papa Diosan a pain unio uni, Adán, ax ca sinánñu ꞌianan banañu ꞌianan an ñu ꞌati ꞌiacëxa”. Usa ꞌaínbi ca Cristo, Adánsaribi uni ꞌixunbi an Nucën Papa Diosnan ꞌinun uni ië́miquin abë chëquítimoi nëtë́timoia tsónun ꞌimiti, a ꞌicën.

2 Corintios 1:22

Nux ainan ꞌaish cananuna xënibua ꞌaínbi abë ꞌiti ꞌai quixunu ꞌunánun ca Nucën Papa Diosan aín Bëru Ñunshin Upí nubëa ꞌinun nu ꞌináncëxa.

2 Corintios 3:17

Nucën ꞌIbu Jesucristonën sináncësaribi oquin ca Nucën Papa Diosan Bëru Ñunshin Upitan sinania. Usa ꞌain ca axa Jesucristomi catamëcë unin Nucën Papa Diosan Bëru Ñunshin Upitan ꞌimicëxun, upí oquin uisashi oquin cara Nucën Papa Diosan aín unicama ꞌimiti ꞌicë quixun ꞌunánan, Nucën Papa Dios quicësabi oi ꞌi cuëënia.

Efesios 1:13

Mitsúxribi camina —Jesucristo cupí ca uni aín ꞌucha tërë́ncë ꞌaish Nucën Papa Diosnan ꞌiti ꞌicë —quixun ñuicë bana cuati Cristomi catamëacën. Cristomi catamëtia ca Nucën Papa Diosan ax quicësabi oquin aín Bëru Ñunshin Upí mibëa ꞌinun mitsu ꞌináncëxa, mitsúxmi asérabi ainan ꞌicë ꞌunánti oquin.

Efesios 2:18

Usai Cristomi catamëti Nucën Papa Diosan Bëru Ñunshin Upíñu ꞌaish cananuna camáxbi, judíos uni ucën Papa Diosnan ꞌiti mëníocëxa. Usoquin ca nux judíos unꞌimainun judíosma uníxribi, Nucën Papa Diosbë banati ꞌain.

Efesios 4:30

ꞌAtimati banaquin camina Nucën Papa Diosan Bëru Ñunshin Upí masá nuitumiquin rabínmitima ꞌain. Axa mibë ꞌinun ꞌinánquin ca Nucën Papa Diosan mitsu ainan ꞌinun ꞌunántioxa, Jesucristo utëcëncëbëmi aín nëtënu abë ꞌiti oquin.

Efesios 6:18

Usai ꞌiquin camina aín Bëru Ñunshin Upitan sinánmicësabi oquin añu caramina ꞌai a ñu ꞌai Nucën Papa Diosbë bananan an mitsu ꞌaquinun ñucáti ꞌain. Usai abë bananux camina atsanima ami manúaxma ꞌianan axa Jesucristomi catamëcë unicamaribi Nucën Papa Dios ñucáxunti ꞌain.

Filipenses 1:19

mitsúnmi Nucën Papa Dios ꞌë ñucáxuncëxuan Jesucristonën Bëru Ñunshin Upitan ꞌaquincëx cana chuámarua chiquíti ꞌai quixun sinani.

1 Tesalonicenses 4:8

Usa ꞌain ca, ui unin cara nun mitsu ꞌunánmicë banacama ënë cuaisama tania an, unin banama, Nucën Papa Dios, an aín Bëru Ñunshin Upí nu ꞌináncë, aín bana timaia.

1 Pedro 1:11

Cristo ënë menu ucëma ꞌaínbi ca aín Bëru Ñunshin Upitan sinánmicë ꞌixun, an Nucën Papa Dios quicë bana uni ñuixuncë unicaman ꞌunáncëxa, tëmërax bamatancëx baísquitancëx ca Cristo aín Papasaribi ꞌApu ꞌaish abë tsóti ꞌicë quixun. Usaquin ꞌunánquin ca uisa uni cara Cristo ꞌiti ꞌicë quixun ꞌunántisa tanan uínsaran cara uti ꞌicë quixun ꞌunántisa tancëxa.

Judas 1:20

ꞌËn nuibacë xucë́antu, ami catamëcë ꞌaish camina camabi nëtën asérabi Jesucristomi sinánti ꞌain. Ami sináncëxun ca an mitsu sinánmiti ꞌicën, an sináncësaribi oquinmi sinánun. Aín Bëru Ñunshin Upitan ꞌaquincëx camina Nucën Papa Diosbë banati ꞌain.

Apocalipsis 19:10

Quicëbë cana a rabinux a ángel tanáin rantin purúan. Usai ꞌiabi ca ꞌë caxa: —Usai ꞌiáxma ca ꞌit. Uicaman cara Nucën Papa Dios quicë bana unicama ñuixunia an ca Jesús ñuiquin an ꞌunánmicë banacama uni ñuixunia. Mibëtan ax Jesús quicë banacama quicësabi oi ꞌicë unicaman ꞌacësaribi oquin cana ꞌënribi ax quicësaribi oquin ꞌaquin Nucën Papa Dios rabin. Usa ꞌain ca ꞌë rabixunma Nucën Papa Diosëshi rabit.