Filipenses 3:9 - Kashibo-Kakataibo Biblia

⁹ Usa ꞌaish cana usai judíos unicama ꞌiti Moisésnën cuënëo bana quicësabi oquin ꞌacë cupíma axa ꞌëbë ꞌinun Cristomi catamëcë cupíshi Nucën Papa Diosan iscëx upí ꞌain. Usa ꞌicë ca an axa Cristomi catamëcë aín unicama ꞌacësaribi oquin Nucën Papa Diosan ꞌë upí isia.

Nukën 'Ibu Diosan ain unikama 'inan ain bana

⁹ Usa 'aish cana usai judíos unicama 'iti Moisésnën cuënëo bana quicësabi oquin 'acë cupíma axa 'ëbë 'inun Cristomi catamëcë cupíshi Nucën Papa Diosan iscëx upí 'ain. Usa 'icë ca an axa Cristomi catamëcë aín unicama 'acësaribi oquin Nucën Papa Diosan 'ë upí isia.

Filipenses 3:9 ပူးပေါင်းရင်းမြစ်များ

Génesis 7:23

Usaia këñúkëbëbi ka Noé ꞌimainun axa nunti chaiira anu ꞌikëkama ax kuni këñuama ꞌikën; Nukën ꞌIbu Diosmi sinánkë ꞌaish usaía ꞌimainun ka uni, ñuina ninu ꞌikë ꞌimainun ñuina pëchiñu manan nuánkë, ꞌimainun men niríkë ñuina akamaxbi këñuakëxa;

1 Reyes 8:46

ꞌImainun kamina kamabi menu ꞌikë unix ꞌikësaribitia mimi ꞌuchaia atumi xuamati nishkin axa atubë nishanankë unikaman ñusma oxun ꞌatankëxua raíri bitankëxun atux anu ꞌikë ëma ꞌura buananbi urairama ëmanu buánkëxuan,

Salmos 14:3

ꞌAínbi ka kamaxunbi ꞌatima okinshi sinania; usa ꞌixun ka bëtsin ꞌakësaribi okin ꞌatima ñuira ꞌakania. ¡An ñu upí ꞌakë uni ka achúshirabi ꞌaíma ꞌikën! ¡Achúshira unixi ka an ñu upí ꞌakë ꞌaimaira ꞌikën!

Salmos 19:12

¿Uin kara abi ñu ꞌatima ꞌatankëxun ꞌënbi kana usakin ꞌa kixun sinánti ꞌik? ¡Usa ꞌain kamina mix Dios ꞌixun ꞌën ꞌakë ꞌuchakama ꞌë mëníoxunti ꞌain!

Isaías 46:13

ꞌËn kana ꞌën ꞌati ñukama axa ꞌurama ꞌinun ꞌimiti ꞌain; usa ꞌain ka ꞌëx ië́mianankë ax ꞌuramara ꞌikën. ꞌËn kana Sión kakë ëmanu ꞌikë unikama ië́miti ꞌain, ꞌën kana Israel unikama ꞌë ꞌakësaribi okin uisakinbi kanunma ꞌimiti ꞌain.

Isaías 53:11

Usai pain ꞌitsaira tëmëratankëxun ka asérabi kana Diosan kakësabiokin ꞌan kixun ꞌunani kuëënti ꞌikën; usa ꞌain ka Nukën ꞌIbun ka upí ꞌixun ꞌitsaira uni ië́miti ꞌikën, ꞌianan ka unikama ꞌatima ñu ꞌai ꞌuchakë kupín ainansa ꞌain, anun tëmërati ꞌikën.

Isaías 53:6

Kamabi nukamax kananuna ovejakama nëtë́kësa ꞌinun, nukamax achúshi achúshinëx nun kuëënkësoishi niakën, ꞌaínbi ka Nukën ꞌIbun ainansa ꞌikë nun ñu ꞌatima ꞌakëkama kamabi nukamanua mëníokëxa.

Isaías 6:5

Usakin ꞌaia iskin sinani kana ësai kian: “¡Uisai karana ꞌiti ꞌain, bërí sapi kana bamati ꞌain! ꞌËnbi kana ꞌapu ꞌaish kamabi kushiñu Dios a isan; ꞌëx kana achúshi uni ꞌën kuëbitan ꞌatimati banakë ꞌimainun, kana achúshi ëma ꞌatimati banakë unikama nëbëtsi tsotin.”

Jeremías 23:6

A nëtëkama ax ꞌapu ꞌain ka, Judá menu ꞌikë unikama ꞌië́mainun, Israel unikamaribi uínbi ubíokëma upitax tsóti ꞌikën. Ësokin anëkë ka ꞌiti ꞌikën: Nukën ꞌIbu ax ka an nu ië́mikë ꞌikën.”

Daniel 9:24

Setenta semana ax ka (cuatrocientos noventa baritia inuti ñui kikë ꞌikën) min unikama ꞌimainun min ëma upí a inuti ꞌikën, inutankëxun ka ax bana kuaisama tani ꞌikëkama ꞌimainun aín ꞌuchakë kamaribi ënti ꞌikën. Usai ꞌia ka Diosan aín ꞌuchakëkama unikama tërënxunti ꞌikën, usakin ꞌakin ka uníxa bëtsibë bëtsibë xënibua ꞌaínbi nuibananti a nanti ꞌikën. Usai ka min namákësokin iskë ꞌimainun an bana ñuikë Jeremías ax kiásabi oi ꞌiti ꞌikën, ꞌianan ka upíira kakë anu ꞌikë ax upíira ꞌitánun mëníokë ꞌiti ꞌikën.

Mateo 9:13

Usaribiti cana ꞌën an —ꞌëx cana asábi ꞌai —quixun sináncë unicama a ꞌëmia catamënun cai uáma ꞌain. Ama, an —ꞌën nuitu ꞌaisama ꞌaish cana ꞌëxbi upí ꞌitima ꞌai —quixun sináncë unicama a cuni upí ꞌinúxa ꞌëmi catamënun cai cana ꞌëx uacën. Usa cana ꞌëx ꞌai quixun sinánquin camina ꞌunánti ꞌain, uisai quicë cara Nucën Papa Diosan bana ënëx ꞌicë quixun: “Unían ꞌë rabianan aín ꞌucha tërë́ncë ꞌinuxun ꞌaracacë ñuina rëxun xaroia isi cuëëncësamaira oi cana atun uni itsi nuibaquin ꞌaquinsa ꞌicë ꞌaquinia isi cuëënin”.

Romanos 1:17

A bana ꞌunáncë ꞌixúinshi cananuna ꞌunanin, uisaira oquin cara Nucën Papa Diosan ainan ꞌinun nu ië́mia quixun. Nun ꞌucha tërë́nun Jesucristomi catamëtiashi ca ainan ꞌinun nu ië́mia. Usai ami catamëcë cupíshi cananuna Nucën Papa Diosnan ꞌiti ꞌain. Usai ca ꞌiti ꞌicë quiax ca aín bana cuënëo ësai quia: “Ui unicama cara Nucën Papa Diosan upí isia, ax ca asérabi ami catamëti tsóti ꞌicën”.

Romanos 10:10

Nun nuitu mëu, asérabi ca nun ꞌucha tërë́nti ꞌicë quixun sinani Jesucristomi catamëtia, ca Nucën Papa Diosan nun ꞌucha tërë́nquin nu upí isia. Usoquin an iscë́xnu —Jesucristo ax ca asérabi ꞌën ꞌIbu ꞌicë —quia ca Nucën Papa Diosan ainan ꞌinun nu ië́mia.

Romanos 16:7

Adrónico ꞌimainun Junias, ꞌën aintsi rabë́, axa ꞌëcëñun sipuacë ꞌicë, a camina bërúanxa ꞌinun ꞌë caxunti ꞌain. —Atux ca asérabi upí uni rabë́ ꞌicë —quixun ca a Jesucristonën bana ñuixunun caíscë unicaman ñuia. ꞌËx Cristomi sináncëma pain ꞌain ca atux pain Cristomi sináncëxa.

Romanos 5:21

Usoquin mëníocëx ca camabi uni aín ꞌucha cupí Nucën Papa Diosbë ꞌitimoi bamati ꞌaíshbi Nucën ꞌIbu Jesucristo cupí aín ꞌucha tërë́ncë ꞌianan bëtsi sinánñu ꞌixun upí ñu ꞌatancëx Nucën Papa Diosan nëtënu abë xënibua ꞌaínbi ꞌiti ꞌicën.

Romanos 8:1

Usa ꞌain ca uicamax cara Cristo Jesús abë ꞌicë, acama Nucën Papa Diosan ꞌuchoima. Usa unicamax ca Cristonanma uni ꞌicësai ax cuëëncësarishi ꞌima, Nucën Papa Diosan Bëru Ñunshin Upitan sinánmicësabi oi ꞌia.

Romanos 8:3

Uisa ñux cara ꞌati ꞌicë, uisa ñux cara ꞌatima ꞌicë quicë bana a ꞌunánquinbi ca aín sinan upíma ꞌixun unin a bana quicësabi oquin ꞌatima ꞌicën. Usa ꞌaínbi ca unían a bana quicësabi oquin ꞌanun quixun Nucën Papa Diosan aín Bëchicë, nusaribi uni ꞌinun, xuacëxa. Xutancëxun ca aín Bëchicë, ꞌuchañuma ꞌaíshbia camabi unin ꞌucha cupí bamanun ꞌimiquin uni, aín ꞌuchacama tërë́anan ꞌuchatëcëanxma ꞌinun mëníocëxa.

1 Corintios 1:30

Nucën Papa Diosan ꞌimicëx camina ami catamëti Cristo Jesúsbë ꞌianan an sinánmicë ꞌain. Usa ꞌaish camina Cristo Jesús cupía, ax cuëëncësabi oquinshimi ꞌanun Nucën Papa Diosan ië́micë ꞌain.

2 Corintios 5:17

Usa ꞌain ca uinu ꞌicë unix cara Cristomi catamëtia ax Cristobë ꞌaish bëtsi uni ꞌicën. Usa ꞌixun ca bëráma ꞌacësa oquin sinántëcënima. Bëtsi oquin ca sinania.

2 Corintios 5:21

Cristo axa añu ꞌuchañumabi ꞌicëbi ca nun ꞌuchacama tërë́ncë ꞌinúan, nun ꞌucha bitsi ꞌuchañuirasa ꞌinun Nucën Papa Diosan ꞌimiacëxa, nux an iscëx ꞌuchañuma ꞌinun. Nuxnu abë ꞌimainuan Cristo axribi nubë ꞌicëbëtanu ax cuëëncësabi oquin ꞌanun ca Nucën Papa Diosan nun ꞌuchacama a ꞌináncëxa.

Gálatas 2:16

Usa ꞌixunbi cananuna ꞌunanin, Moisésnën usai ca judíos unicama ꞌiti ꞌicë quixun cuënëo bana quiásabi oquian ñu ꞌacë cupíma Jesucristomi catamëcë cupíshi ca uni Nucën Papa Diosan aín ꞌuchacama tërë́nquin ainan isia. Usaquin ꞌunani cananuna nuxribi Nucën Papa Diosan iscëx upí ꞌinux Jesucristomi catamëacën. Usai ca unicama ꞌiti ꞌicë quicë bana ꞌacë cupíma ca Nucën Papa Diosan uni ainan ꞌicë upí isia.

Filipenses 3:6

Judíos unicaman cuati Moisésnën cuënëo bana axëshi ca asábi ꞌicë quixun ñunshínquin sinánquin cana —axa Jesucristomi catamëcë unicamax ca ꞌaisama ꞌicë —quixun sinánquin atu bëtsi bëtsi ocën. Axa quicësabi oquin ꞌati Moisésnën cuënëo banacama quicësabi oquin cana ꞌën ꞌacën. Usa ꞌain ca a ñuiquian ꞌë ꞌuchoti ñubi ꞌaíma ꞌiacëxa.

2 Timoteo 1:9

Nucën Papa Diosan ca nu ië́miquin ainan ꞌimiacëxa, nuxnu ax cuëëncësabi oíshi upí ꞌinun. Nun ñu upí ꞌacë cupíma, axbi nuxnu ainan ꞌiti cuëënquinshi, ca nu nuibaquin Jesucristo cupí nu ainan ꞌimiacëxa. Camabi ñu uniocëma pain ꞌixun ca Nucën Papa Diosan nuibaquin, Cristo Jesusan nu ië́minun mëníocëxa.

Tito 3:5

Usoquin ca nun ñu upí ꞌacë cupíma, nuibaquinshi nu ainan ꞌinun ië́miacëxa. Ië́miquin ca bacë́ntëcëncësa ꞌinun nun ꞌuchacama tërë́nquin aín Bëru Ñunshin Upitan nu bëtsi ocëxa.

Hebreos 6:18

Usa ꞌain cananuna an ca ax quicësabi oquin ꞌaia quixun ꞌunánan, axa —sinanatëcëntimoquin cana mitsu cai —quicë cupí ca an asérabi usoquin ꞌati ꞌicë quixun ꞌunanin. Usaquin ꞌunánquin cananuna ꞌunanin, nun nu an nu ꞌaquinun ñucácë ꞌixun ca nu asérabi ꞌaquinti ꞌicë quixun. ꞌUnánan cananuna ami catamëquin —aín bana quicësabi oi cana asérabi ainan ꞌaish aín nëtënu abë ꞌiti ꞌai —quixun ꞌunanin.

Santiago 3:2

Camaxunbi cananuna ñu ꞌaisama ꞌain. Axa uisaíbi ꞌatimati banacëma uni ax ca asérabi upí uni ꞌicën. A unin ca ꞌatimati banatisa tanquinbi tënëti ꞌunáncë ꞌixun uisa ñu ꞌatima ꞌati cara sinania, abi tënëti ꞌicën.

2 Pedro 1:1

ꞌËx cana Simón Pedro, ax cuëëncësabi oquin ꞌanan aín bana uni ñuixunuan Jesucristonën caísa ꞌain. An nu ië́micë Jesucristo, axbi Nucën Papa Diosribi ꞌaish upí ꞌixuan nu ꞌacësaribi oquin ainan ꞌinun ië́micë, mitsu cana ënë quirica buánmin.

1 Juan 3:4

Usa ꞌaínbi ca an ñu ꞌatima ꞌacë unicama, ax Nucën Papa Diosan bana quicësabi oi ꞌima ꞌuchaia. Nucën Papa Diosan bana quicësabi oquinu ꞌacëma, ax ca ꞌucha ꞌicën.