Éxodo 34:14 - Kashibo-Kakataibo Biblia

¹⁴ Usa ꞌain kamina bëtsi dios rabitima ꞌain, ꞌëx kana mitsun ꞌIbu an ñu ꞌatima ꞌaisama okin mitsu bërúankë a ꞌain. ꞌËn anëx ka Dios an ñu ꞌatima ꞌaisama okin bërúankë a ꞌikën.

Éxodo 34:14 ပူးပေါင်းရင်းမြစ်များ

1 Reyes 19:10

Ësokia kakëxun kuankin ka Elíasnën kakëxa: ꞌËx kana minun rabanan ꞌitsaira bamatisa ꞌinun tëmërain mixmi Dios kamabi kushiñuira ꞌaínbi, Israel unikaman ka atumi manuxuma ꞌanun ka usakin ñu ꞌati ëanxa, ꞌimainun ka anuxun mi rabikin ñuina xaroti akamaribi masóxa, usakin ꞌanan ka an min bana ñuikë unikamaribi atun manë xëtokën ꞌakin këñúaxa. Usa ꞌain kana ꞌëratsushi bërúan, usakin atu ꞌaxunbi ka ꞌëribi ꞌakatsikixun barikania.

Éxodo 33:19

ꞌAínbi ka Nukën ꞌIbun ësokin kakëxa: —ꞌËx kana nuibanairakë ꞌain, usa ꞌain kana uikama karana ꞌakinsa tani akama ꞌakinti ꞌain. ꞌAkianan kana mi nuibakin ꞌën anëmi ñuinun mi ꞌimianan uikama karana nuibati akama nuibati ꞌain.

Isaías 9:6

Usa ꞌain ka nunu achúshi tuá bakënun ꞌimiaxa, Diosan ka nukama achúshi tuá ꞌinánxa, a tuá ka axa ꞌapu ꞌitiokin aín kushi ꞌinánkë ꞌiti ꞌikën. Usa ꞌikë ka ësokin kakë ꞌiti ꞌikën: “An bana ñuixunkin ꞌësëkëxun kuati upitani kuëënti,” “Dios uínbi kanantisama,” “Nukën papa Dios axa këñutima oi tsókë,” “Achúshi ꞌapun rëkuë́n bëchikë chuámarua ꞌinun uni ꞌakinux bakë́an.”

Mateo 4:10

Usaquian cacëxun ca Jesusan cacëxa: —Ñunshin ꞌatimanën ꞌapu, ënuax ca cuantan. Nucën Papa Diosan bana cuënëo ca ësai quia: “Min ꞌIbu Diosëshi camina rabiti ꞌain. Rabiquin camina ashi ax cuëëncësabi oquin ñu ꞌaxunti ꞌain”.

1 Corintios 10:22

Nucën ꞌIbu Jesús nishmiquin camina ñunshin ꞌatima rabitima ꞌain. Nuxnu cushima ꞌimainun ca axira nubë sënë́nmaira ꞌaish cushi ꞌicën.

Deuteronomio 32:16

Usai ꞌikin ka Dios ꞌaisamaira nishmikin bëtsi ñukama rabikin ax kuëënkëma ñuira ꞌakankëxa;

Deuteronomio 32:21

ꞌË kamina diosmabi bëtsi dios rabikin nishmian, usa ꞌain kana ꞌënribi mitsu nishmikin ꞌën uni ꞌikëmabi bëtsi uni ꞌën uni ꞌimiti ꞌain, ꞌimikëbë ka atux ꞌatima okin sinani nishti ꞌikën, ¡usa ꞌain kana ꞌën bana kuaisama tankë unikama ꞌën uni ꞌimiti ꞌain, ꞌimikëbë ka ꞌën unikama atumi nishti ꞌikën!

Deuteronomio 4:24

mitsun ꞌIbu Dios ax ka achúshi Dios an aín unikaman ñu ꞌatima ꞌati kuëënxunkëma a ꞌikën, ¡an ka mitsun ñu ꞌatima ꞌaia iskin tsi rëkirukënëan ñu nënkin këñukësa usaribi okin ꞌati ꞌikën!

Deuteronomio 6:15

Nukën ꞌIbu Dios an mitsu ꞌakinkë, ax ka ñu ꞌatima ꞌati kuëënima, usa ꞌixun ka mitsun ñu ꞌatima ꞌaia isi nishkin mitsúxmi ñankáishi ꞌi maë rakátanun mitsu ꞌimiti ꞌikën.

Josué 24:19

Usai kikania kuatankëxun ka Josuénënribi kakëxa: —Mitsun kuainxunshi rabitisama ka Nukën ꞌIbu ꞌikën, ax ka Dios upíira ꞌianan uisa ñu ꞌatimabi ꞌai ami mitsux ꞌuchati kuëënima.

Jueces 6:10

ꞌImainun kana ꞌëx mitsun ꞌIbu Dios ꞌai kixun kana mitsu kakën, usa ꞌain kamina amorreo unikaman rabikë aín dios ami rakuë́kantima ꞌain, kamina bërí atun menu tsótan; ꞌaínbi kamina ꞌën mitsu kakësabiokin ꞌakëma ꞌain.