Éxodo 20:20 - Kashibo-Kakataibo Biblia

²⁰ Ësai kiabi ka Moisésnën kakëxa: —Rakuë́axma ka ꞌik. Dios ax ka asérabi karanuna ami rakuë́ti ax kikësabi oi ami ꞌuchaima isnuxun nu tani uaxa.

Éxodo 20:20 ပူးပေါင်းရင်းမြစ်များ

Génesis 20:11

ësokian kakëxun ka Abrahamnën kakëxa: —ꞌËn kana ënë menu ꞌikë unikaman Nukën ꞌIbu Dios kikësama oi ꞌikësa sinan, usa ꞌixun ka ꞌën xanu Sara bikin ꞌë ꞌakánti ꞌikë kixun.

Génesis 22:1

Usa ꞌain ka Nukën ꞌIbu Diosan ꞌitsa baritia ami panatankëxun, Abraham karaisa ënima ami manutima asérabi sinania kixun tankin. Aín anën kuëankëxa, usakin kuënkëxun ka Abrahamnën kakëxa: —Ënu kana ꞌain ꞌën ꞌIbu.

Génesis 22:12

Kakëxun ka Nukën ꞌIbu Diosan ángelnën amiribishi kakëxa: —Min bëchikë uisabi oxuma ka ꞌat, bërí ka Nukën ꞌIbu Diosan mixmi asérabi ami sinánkëxun, min nuitu ꞌunánxa min kamina min bëchikë ñuñakima achúshira ꞌikëbi nuibakinma a rabikin ꞌakatsi ꞌian.

Éxodo 14:13

Usai kikaniabi ka Moisésnën kakëxa: —Kamina rakuë́kantima ꞌain. Mitsun kamina ꞌatima okin sinánkima chuámashirua tankin bëría Nukën ꞌIbun mitsu ꞌiëminuxun ñu ꞌaia isti ꞌain, uínsaranbi kamina egipcio unikama amiribishi bërími iskankësa okin istëkënxuma ꞌain.

Proverbios 1:7

Uikamax kara ñu ꞌunánkëira ꞌisatania an ka Diosan bana kikësabiokin ꞌakin; uisai kara a banakama kia usabi okin ꞌati ꞌikën; ꞌaínbi ka an bana kuakëma unikama ax uisabi okin kati kuëënima ꞌianan, uisa bana upibi ꞌunámikin kaisama ꞌikën.

Proverbios 3:7

Min sinanën kamina ꞌëx kana ñu ꞌunainra ꞌai kiax kitima ꞌain; usai ꞌikima kamina Diosmishi katamëkin ñu ꞌatima ꞌatimi sinánkë a manuti ꞌain:

Isaías 41:10

ꞌËx kana mitsubë ꞌain usa ꞌain kamina rakuë́kantima ꞌain; ꞌëx kana mitsun Dios ꞌain usa ꞌain kamina rakuë́kantima ꞌain, ꞌën kana mitsu kushionan ꞌakinti ꞌain, ꞌën kana mitsu anun ꞌakánanti manë xëtokë ꞌën mëkënan tuínxun ꞌakësokin axa mimi nishkë unikamami kupitanuma ꞌanun ꞌamiti ꞌain.

Isaías 41:13

ꞌËx mitsun ꞌIbu Dios ꞌixun kana, ꞌën mëkënan tuinkësa ꞌinun mitsu ꞌakinti ꞌain usakin ꞌakinuxun kana mitsu kan; Usa ꞌain kamina rakuë́tima ꞌain, ꞌën kana mitsu ꞌakini usa ꞌain.”

Isaías 8:13

Dios kamabi kushiñuira a kananuna ax ka upíira ꞌikë kixun kati ꞌain; kai kananuna ami kuni rakuë́ti ꞌain; usa ꞌain kananuna an nu iskëx ami rakuë́ti ꞌain.

Deuteronomio 10:12

Usa ꞌain ka Moisésnën israel unikama kakëxa: ¿añumi mitsun ꞌati kara Diosan kuëënin? An ka kuëënia ax kikësabiokin aín bana kuakin, nun nuitu upí ꞌixun nuibakin ami sinánkin rabiti,

Deuteronomio 13:3

kixuan kakëxunbi kamina mitsun aín bana kuatima ꞌain. Nukën ꞌIbu Diosan ka asérabi karamina mitsun a nuibati ax kikësabiokin ꞌai ami sinani isnuxun mitsu tankin usakin ꞌati ꞌikën.

Deuteronomio 4:10

A nëtë kamami mitsux aín bashi Sinaí kakë anu ꞌain ka Nukën ꞌIbu Diosan ësokin ꞌë kakëxa: Kamabi unikama kamina ꞌën bana kuakin ꞌunánkian uisakinra kara kamabi nëtën ënë menu tsókin ꞌain bakë bëchikamanribi atun ꞌakësaribi okin ꞌanun ꞌunánmiti ꞌikën.

Deuteronomio 6:2

Usokin kamina mitsun Nukën ꞌIbu Dios ami rabikanti ax kikësabiokin ꞌakánti ꞌain, ꞌai tsókin kamina, a tanti bana ꞌimainun ax kikësabi oí ꞌiti bana, ꞌën ꞌunánmikë ënë mitsun bakë bëchikë ꞌimainun mitsun babakama ꞌunánmiti ꞌain; usakin ꞌai kamina ꞌitsa baritia a menu tsókanti ꞌain.

Deuteronomio 6:24

Usokin bëtankëxun ka Nukën ꞌIbu Diosan nukamanu ax kikësabi oi ꞌiti bana a ꞌunáni ami sinania iskin nu ꞌakinkëx kananuna upí ꞌiti ꞌain, ꞌimainun ka bërí ꞌakësaribi okin anbi nu bërúanuxun ꞌaia.

Deuteronomio 8:16

ꞌimianan ka anu uni ꞌikëma menuxun maná kakë piti nun chaitiokë kaman ꞌunánma piti a nu pimiakëxa, usakin ꞌakëx karanuna ami sinani ꞌisnuxun, ka nu tankin usakin ꞌakëxa.

Deuteronomio 8:2

Usa ꞌain kamina sinánkanti ꞌain, Diosan ka anu uni ꞌikëma menu cuarenta baritia ꞌimi tëmërai ninun nu ꞌimiakëxa akamina manukinma sinánkanti ꞌain, usakin ka mitsu tankin ꞌanan ami karamina asérabi sinanatëkëni isti ꞌanan ax kikësabiokin aín bana ꞌai ꞌisnuxun mitsu ꞌakëxa.

Josué 24:14

—Ësokian kamabi ñu an a kupín kamina mitsun Nukën ꞌIbu asérabira ami sinánkin rabiti ꞌain. Rabikin kamina mitsun chaitiokëkaman Éufrates kakë baka kuëbí tsókin rabianan Egipto menuxun rabia dios a ënkin Nukën ꞌIbuira ashi rabiti ꞌain.

1 Samuel 12:20

Kikania ka Samuelnën atu kakëxa: —Kamina rakuë́kantima ꞌain. Ax ka asérabi ꞌikën mitsúnbi kamina ꞌaisama ñuira ꞌan; usa ꞌain kamina bërí an kakësokin ꞌaisamatankinma asérabi ashi min nuitunënbi sinánkin Nukën ꞌIbu rabikanti ꞌain.