Éxodo 17:15 - Kashibo-Kakataibo Biblia

¹⁵ Anu ka Moisésnën achúshi ñu anuxun Nukën ꞌIbu rabikin ñuina xaroti ꞌakëxa, ꞌatankëxun Diosan aín kushin nu ꞌakinkëxun kananuna ax numi nishkë unikama këñukin ꞌa kixun kakin anëakëxa,

Éxodo 17:15 ပူးပေါင်းရင်းမြစ်များ

Génesis 12:7

A menuax ami mërakin ka Nukën ꞌIbun Abram kakëxa: Ënë me kana min rëbúnkikama ꞌinánti ꞌain. Usakian kakëxun ka Abramnën achúshi anuxun Nukën ꞌIbu asábi ka kixun kati maxax bukunrukin ꞌakëxa, anuaxa ami mërakë kupí.

Génesis 12:8

Usai ꞌitankëx ka anuax chikíkiani kuanxun amiaxa bari urukë Betel kakë ëma au ꞌikë niñu me anu xubusa okin aín chupa këxtú pëniankëxa. Betel kakë ëma ax ka amia bari kuabúkë au ꞌikë ꞌiakëxa, ꞌimainun ka achúshi ëma. Ai kakë axribi amiaxa bari urukë au ꞌikë ꞌiakëxa. A menuxunribi ka Abramnën anuxun Nukën ꞌIbu rabiti ꞌatankëxun rabiakëxa.

Génesis 22:14

Usokin ꞌatankëxun ka Abrahamnën anuxuan usakin ꞌakë matá me anëkin: Nukën ꞌIbun ka nun sinánkëma ñu nu ꞌinania kixun anëakëxa, usa ꞌain ka bërí uni kia: Nukën ꞌIbun ka a matánuxun ꞌasaribiokin ꞌakinia kiax kikania.

Génesis 33:20

Usa ꞌain ka anu ꞌixun basikëbëtan anuxun Dios rabiti achúshi ñu ꞌakëxa, ꞌatankëxun ka El-elohé-Israel kakin anëakëxa, (ax ka Israelnën a rabikë Dios ki kikë ꞌikën).

Éxodo 24:4

Usa ꞌain ka Moisésnën Nukën ꞌIbun kakësabiokin kamabi bana kuënëokëxa, kuënëoxun ka pëkarakëma ꞌaínshi nirutankëxun, anuxun a rabiti achúshi ñu aín bashi tanain ꞌamiakëxa, ꞌatankëxun ka a rapasu mapai rabë́ ꞌimainun rabë́ maxax nankëxa, a ka Jacobnën bakë bëchikëkama ꞌia ami sinánkin nankëxa.

Éxodo 32:5

Usai kia kuankin ka Aarónën vaca bakë tankin ꞌakë kuri a maxá bukunrukin ꞌatankëxun anu nitsíankëxa, nitsintankëx ka unikama kai munuma banai kuëníshkin atu kakëxa: —Imë́ishi kananuna Nukën ꞌIbu rabikin achúshi fiesta ꞌati ꞌain.

Jueces 6:24

Ësokin kakëxun ka Gedeónën anuxun ñuina xaroti achúshi anubi ꞌatankëxun anuxun Nukën ꞌIbu rabikin xarotankëxun; “Nukën ꞌIbuinshi ka nu chuámarua ꞌimia kixun kakin anëakëxa. Anuxun ñuina xaroti Gedeónën ꞌa ax ka bëríbi anua Abiézernën rëbúnkikama ꞌikë Ofrá kakë ëma anu ꞌikën.”