Éxodo 14:29 - Kashibo-Kakataibo Biblia

²⁹ Usai ꞌikëbëbi ka israel unikama anun kuanun parúmpapa tëarabëti me ꞌinun ëskikë anun sikarakëakëxa usai ꞌi ka ꞌumpax kuëtú ꞌikësai amorabë́ chairui bëtsi mëmiu ꞌimainun bëtsi mëkëu ꞌiakëxa.

Éxodo 14:29 ပူးပေါင်းရင်းမြစ်များ

2 Reyes 2:8

Usai anu bëbaxun ka Elíasnën aín tari bikin tarankin anun baka rishkiakëxa, rishkikëxa baka panárabëti ë́ski me rakakëbë ka anun a rabëtax ꞌukëmanan sikákëxa.

Nehemías 9:11

ꞌImainun kamina atun ismainunbi parúmpapa panarabëtanun ꞌimiakën, usakin ꞌimikëbëa me rakati ëskikëbë ka a nëbë́tsinën atux sikarakëakëxa ꞌaínbi kamina axa atu nuibëtsini ukë unikama bakan këñunun ꞌimiakën, ꞌimikëx ka maxáx ꞌikësaishi nanëti bakami kikankëxa.

Éxodo 14:22

usai baka panárabëti amo rabë́ chairui mëmiu ꞌianan mëkeu ꞌi me ëskikëbë ka anun israel unikama sikarakëkankëxa.

Éxodo 15:19

Faraónën suntárukama anúan ꞌakanankë caballonën nikinkë akama ꞌimainun anuaxa ꞌakanankë atun caballo akamabëbi kuani parúmpapa nëbëtsin ꞌikianiabi ka israel unikaman ꞌIbun baka atu mapumiakëxa, usai ꞌimainun ka Israel unibunëx parúmpapa tëarabëti me ëskikë anun kuankësa kiani shitákëxa.

Éxodo 15:8

Suñumi kushiira bëkimikëbë ka parúmpapa panárabëti amo rabë́ chairuaxa; chairui ka baka ain nëbë́tsin bëchunkë shaíkima anubi ꞌiaxa.

Isaías 43:2

Mitsux ꞌumpaxan ꞌinúkëbëbi kana ꞌëxribi anu ꞌiti ꞌain, usa ꞌain kamina bakaribi sikatibi bakami kitima ꞌain, ꞌianan ka tsi rëkirukënën anun inutiabi mi chuxtima ꞌikën, ꞌianan ka ꞌain rëkirukë anbi mi xanotima ꞌikën.

1 Corintios 10:1

ꞌËn xucë́antu, ënëmi mitsun ꞌunánun cana mitsu cain: —Nucën raracamaxa Egiptonuax cuania ca Egiptonu ꞌicë suntárucaman ꞌatin rabanan Nucën Papa Diosan nëtë cuin bëararamiacëxa. Usaquiani ca Nucën Papa Diosan parúnpapa tëárabëoquin aín nëbë́tsi ësquimiquin me racáncëbë anun ꞌucë manan sicaracëacëxa.

Josué 3:16

Ënëx ka anua israel unibu ꞌikë a ꞌurakëoxa ꞌiá ꞌikën, ax ka anua Adam kakë ëma ꞌurama, Saretán ꞌikë a ꞌuramabi ꞌiakëxa, usa ꞌain ka ꞌumpax ax kuabuti parúmpapa bamakë kakë anubi timë́kë ꞌiakëxa. Usakin ka Diosan anúan Israelkama Jericó kakë ëmanu kuani sikarakënun bakanu ꞌikë ꞌumpax tëa rabëti ëskinun ꞌimiakëxa.