Esdras 7:6 - Kashibo-Kakataibo Biblia

⁶ Esdras ënëx ka achúshi sacerdote an upíira okin ꞌunánkin Diosan ꞌamikëxun Moisésnën kuënëomia bana ꞌunánkë ꞌiakëxa, usa ꞌikëa Diosan ꞌakinia ka ꞌapu Artajerjesnën kuëënkin an ñukákësabi okin kamabi ñu ꞌaxuankëxa. Ësokin pain ñu ꞌaia ꞌunánxua ꞌapun xukëx ka Babilonia menuax Esdras kuankëxa,

Esdras 7:6 ပူးပေါင်းရင်းမြစ်များ

Génesis 32:28

Ësokian kakëxun ka unin kakëxa: —Bërí ka min anë Jacob kakë ꞌitima ꞌikën. Min anë ka Israel kakë bërí ꞌiti ꞌikën, mix kamina Nukën ꞌIbu Diosbë tananan, ꞌimainun kamina bërámabi bëtsi unikamaribi usaribi okin kanánkën.

Esdras 6:22

Usakin rabikin ka mapai achúshi ꞌimainun rabë́ nëtë fiesta ꞌai kuëënkin anun chamiti ñukëñunma ꞌakë pán pikankëxa, usakin ꞌai ka uinsaranbia ꞌikësamairai kuëënkin Diosanbia sinánmikëxua Persianu ꞌikë ꞌapun atu nuibakin ꞌakinkëxua anuxun Dios rabiti xubu ꞌatëkënxun sënë́on ka usai ꞌikankëxa.

Esdras 7:21

ꞌËx ꞌapu Artajerjes, ꞌixun kana kamabi an kuríki bërúankë Éufrates baka ꞌukëmanan ꞌikë a unikama ësokin kamin Esdras sacerdote asérabi an ñu ꞌunankëira uni ꞌimainun an Dios naínu ꞌikë ax kia bana ꞌunánkëira an ñukákëxun ka añu kara ñukatia a asérabi ꞌinánti ꞌikën,

Esdras 7:28

ꞌimainun ka ꞌëribia ꞌapun aín unikamabëtanbi nuibamainun uni aín kushibu ñu ꞌunánkë, an sipu bërúankë atúnribi nuibanun ꞌamiaxa, usakin ꞌakinkëx kuëënkin kana Israel unikaman kushibu Jerusalénnu ꞌëbë kuanuxa timë́kanun ꞌimia.

Esdras 7:5

Abisúa, Finees, Eleazar ꞌimainun ka ax pain sacerdote ꞌikë Aarón akama ꞌiakëxa.

Nehemías 2:12

tanti tankëx kana imë́ ꞌitsama unibëshi uisakin karana Jerusalén ꞌati ꞌai kixun Diosan ꞌë kakë a ñuikin uibi kaima kuankën. Kuankin kana ꞌëx anun nikë burro ashi uankin raíri anun kuanti burrokaman uánma ꞌain.

Nehemías 2:18

Usa ꞌain kana Diosan ꞌë upíokin ꞌakinkë a ñuixuanan usakian ꞌapun ꞌë kakë a banakamaribi ñuixuankën, ñuixunkëxun ka atúnribi ësokin ꞌë kakankëxa: —¡Asabi ka usa ꞌain kananuna kamaxunbi amiribishi ënë ëma kënëtëkënti ꞌain! Usai ki ka kamaxunbi kananuna ꞌati ꞌai kiax kuëëni bëtsibë bëtsibë kánani kikankëxa.

Nehemías 2:8

ꞌimainun kana ësokinribi kakën bëtsi kirikaribi kamina ꞌë an ni bërúanti ꞌapun nankë Asaf a ꞌëa i anun ëmanu atsínti xëpútikama anuxun Dios rabiti xubu ꞌikë ꞌurama ꞌikëkama a mëníonan, anun ëma kënëarakë kënë ꞌikëbia rurupakin masókan a mëniomianan anu ꞌëx ꞌiti xuburibi ꞌaminun ꞌinánun kirika kuënëoxunti ꞌain. Usakin kakëxun ka ꞌapun ꞌën ñukákësabi okin kamabi ꞌë ꞌaxuankëxa ꞌën Diosanbia ꞌë ꞌakinia.

Nehemías 4:15

Usai nu ꞌakatsikia kuati mëníokakë ꞌain ka axa numi nishkë unikamax asérabi ka nu Diosan atun ꞌakinia, usa ꞌain kananuna nun sinánkësokin ꞌatima ꞌai, atux kikëbëtan kananuna abi nun tëëti ënkinma ꞌakën.

Nehemías 8:1

Usa ꞌain ka kamabi ëmanu ꞌikë unikama plaza, anun ꞌumpaxnu atsínti xëpúti a puntëbi ꞌikë anu timë́akëxa, anuxun ka an ñu ꞌinánkë uni Esdras a usai Israel unibu ꞌitia Diosan Moisés kuënëomia banakama a bënun kakankëxa.

Nehemías 8:13

Usakin ꞌaxun ka anunbi a nëtë nuikin ónkë a pë́karakë ꞌain ka kamabi aín aintsi kushikama ꞌimainun sacerdotekama ꞌianan Levitas unikamaribi ꞌimainun an ñu ꞌunánkë Esdras abë timë́xun, uisai kara a tanti banakama anubi aín sënë́nkënua ꞌikë bana ax kara uisaira kia upiokin ꞌunánkatsi timë́kankëxa,

Nehemías 8:4

ꞌImainun ka an ñu ꞌunánmikë Esdras ax anuxun a kirika istia i tapuakin ꞌakë anu nikë ꞌiakëxa. ꞌImainun ka a rapasu Matatías, Sema, Anías, Urías, Hilquías ꞌimainun Maaseías akama ꞌiakëxa. ꞌImainun ka a mëkeuribi Pedaías Misael, Malquías, Hasum, Hasbadana, Zacarías ꞌimainun Mesulam akamaribi anu sëtë́kë ꞌiakëxa.

Nehemías 8:9

Usakin a banakama ñuixunkin këñuia kuatia ꞌitsaira masá nuituti inia ka kamabi unikama timë́kë a an bana mëníokë ꞌapukama ꞌimainun Nehemías, an ñu ꞌinánkë unikama sacerdote Esdras ꞌimainun Levitas an unikama timë́kë a uisai kikë kara a bana ꞌikë kixun ñuixunkë a kaman kamabi unikama kakëxa, mitsux kamina masá sinani nitë́xëti intima ꞌain, ënë nëtëx ka anun Dios rabiti nëtë ꞌikën.

Nehemías 9:13

Usokin ꞌatankëxun kamina aín bashi Sinaí kakë, anuax nun chaitiokëkamabë naínuaxëshi banakin min bana upíirabu a ꞌunámikin asérabi a tanti banakama ꞌimainun ax kikësabi oi ꞌiti akama upíokian ꞌunánun min banakama ꞌinánkën.

Salmos 80:18

usa ꞌain kananuna uínsaranbi nux mi ëni mimi manútënkëntima ꞌain. ¡Usokinmi anu tsóti nu ꞌinánkëxun kananuna mishi rabiti ꞌain!

Proverbios 3:6

Kamabi ñu ꞌakin kamina Nukën ꞌIbu Dios mia ꞌakinun a pain ñukáti ꞌain, usokinmi ꞌakëxun ka kamabi upíokin ꞌanun mi ꞌamiti ꞌikën.

Isaías 50:2

¿Uisa kupín karana ukin ꞌën uibi mërama ꞌain? ¿Uisa kupín kara kuënkëxunbi uínbi ꞌë káma ꞌik? ¿ꞌËx isana mitsu ꞌakinsama ꞌai kixun kaina sinánkankën? ¿ꞌËn isana mitsu chikintima ꞌai kixun kaina sinánkankën? ꞌËx usai ka ꞌiti ꞌikë kiax kikëbëshi ka parúmpapa ëskiti ꞌikën, ꞌimainun ka bakakamaxribi anu uni ꞌikëma mesa ꞌitánun aín ꞌumpax ꞌaíma ꞌiti ꞌikën; usai ꞌikëbë ka anu ꞌikë tsatsakama ꞌumpaxñuma ꞌain xanan bamai chë́kia.

Mateo 13:52

Quia ca Jesusan cacëxa: —An Nucën Papa Dios naínu ꞌicë aín bana únáncë uni, an ca ꞌën uni ñuixuncë bana unicama ñuixuanan bëráma ꞌë ñuiquin cuënëo bana aribi ñuixunia. Ax ca xubuñu unían a isi ucë uni aín ñu ió ꞌimainun aín ñu ióma ꞌaíshbi upí, aribi ismicësa ꞌicën.

Mateo 23:2

—An quirica cuënëocë unicama ꞌimainun fariseo unibunënribi ca sinania, atux isa, an Moisésnën cuënëo bana ꞌunánun mitsu ñuixunti, a ꞌicë quixun.

Mateo 28:20

Nashimianan camina ꞌën mitsu ñuixuncë banacama ꞌunánmiquin a banacama quicësabi oquin ꞌanun quixun atu ꞌunánmiti ꞌain. Usaquin ꞌaquin camina ꞌunánti ꞌain, ꞌëx cana camabi nëtën usaquin ꞌacë ꞌën unicamabë ꞌain, ꞌëx utëcënti nëtë sënë́ntamainun. Ashi.

1 Corintios 1:20

Sinánñu uni ꞌimainun an quirica ꞌunáncë uni ꞌimainun an ënë menu ꞌicë ñuishi ñuiti ꞌunáncë uni acaman, ñu ꞌunáncë cana ꞌai, quixun sináncë ꞌaínbi ca Nucën Papa Diosan sinan abë sënë́nmaira ꞌicën. Usa ꞌain ca usa unicaman aín sinánsamaira Nucën Papa Diosan sinan ꞌicë quixun isti ꞌicën.

1 Corintios 15:1

ꞌËn xucë́antu, ꞌën mitsu ñuixuncë Jesucristo ñui quicë bana, anúan unicama ainan ꞌinun Nucën Papa Diosan ië́miti, a bana cana mitsu sinánmitëcëinsa tanin. A bana upí oquin cuati camina Jesucristomi catamëtancëx ax quicësabi oi ꞌin.

Deuteronomio 4:5

ꞌËn kana mitsu usai ꞌiti ꞌimainun ax kikësai ꞌiti bana Diosan mitsu kanun ꞌë kakë banakama a ñuixuan, usa ꞌain kamina a menu tsóxun ax kikësokinbi ꞌakánti ꞌain.