Efesios 5:8 - Kashibo-Kakataibo Biblia

⁸ Bëráma Nucën Papa Diosan bana ꞌunáncëma ꞌaish unían bëánquibucënuxun ñu ꞌatima ꞌacësa ꞌiá ꞌixúnbi camina bërí Nucën ꞌIbu Jesucristonan ꞌixun ax cuëëncësabi oquin ñu upíshi ꞌain. Usa ꞌaish camina bërí xabánu nicësa ꞌiti ꞌain.

Nukën 'Ibu Diosan ain unikama 'inan ain bana

⁸ Bëráma Nucën Papa Diosan bana 'unáncëma 'aish unían bëánquibucënuxun ñu 'atima 'acësa 'iá 'ixúnbi camina bërí Nucën 'Ibu Jesucristonan 'ixun ax cuëëncësabi oquin ñu upíshi 'ain. Usa 'aish camina bërí xabánu nicësa 'iti 'ain.

Efesios 5:8 ပူးပေါင်းရင်းမြစ်များ

Isaías 2:5

¡Usa ꞌain kamina ꞌën aintsi Israel unikama mitsun kuati ꞌain, Diosan nu ꞌunánmikësabi oi kananuna ami sinánishi tsóti achúshi tirítan nu pëkakësa ꞌinun añu karanuna ꞌati ꞌai kixun ꞌunánti ꞌain!

Isaías 42:16

Usakin ꞌanan kana bëxuñu unikama aribi atun ꞌunánkëma bain, buánkin anua niama bain buánti ꞌain. Uankin kana bëánbëankibukë aribi atun ismainubia xabá ꞌinun ꞌimiti ꞌain, ꞌimianan kana me nankë́kë axribia mëníokati upiti rakanun ꞌimiti ꞌain. Ënë ñukama kana, kana ꞌaíma kikínma asérabi ꞌati ꞌain.

Isaías 49:6

ax ka ësai kia: ꞌËn uni ꞌixunmi min Jacobnën rëbúnki, Israel unikama axa ñuima ꞌiakama a aín ñakánubi utëkënun ꞌakinkë ax ka ꞌën iskëx sënë́nmara ꞌikën, ꞌën kana ꞌën tirísa ꞌixunmi bëtsi menu ꞌikë unikama bana ñuixuanan, uinu kara me kuainakëakëxa anubi kuankin bana ñuinun mi ꞌimiti ꞌain.

Isaías 49:9

anuxun kamina mitsun sipunu ꞌikë unikama kati ꞌain: ‘Bërí kamina sipuakë ꞌikantima ꞌain.’ ꞌImainun ka axa bëánkibukënu ꞌikëkama: Atuxribi nëtë xabá isnun ënkë ꞌiti ꞌikën. Kamabi baikama ꞌipitinua kamina pasto mëranan, anu uni ꞌikëma bashi akamanuabi mitsun vacakaman piti mërati ꞌain.

Isaías 9:2

Axa ami nishkë unikaman ꞌatimokëxa bëánkibukënu ꞌikësa ꞌia unikama an ka achúshi tirí chaiira isakëxa, iskin ka ñu upí ꞌati ꞌunánkëxa; achúshi tirí pëkikësa ꞌaish upiti tsókë uni an ka axa ꞌatimati tsókë unikama ñu upí ꞌai upiti tsóti ꞌunánmiakëxa.

Mateo 3:8

Unían mitsux camina asérabi sinanacë ꞌai quixun ꞌunánun camina ñu ꞌaisama ꞌati ënquin upí ñuishi ꞌati ꞌain.

Mateo 4:16

Anu ꞌicë unicamax ainanma ꞌixun Nucën Papa Dios cuëëncësabi oquin ꞌati ꞌunáncëma ꞌaíshbi ca Cristo ucëbë an ꞌunánmicë ꞌiaxa. Ainanma ꞌaish bamati ꞌaíshbi ca Cristo ucëbë an ꞌunánmicëx xabánu ꞌicësa ꞌiaxa.

Lucas 1:79

Xucëxun uquin ca axa aín ꞌucha cupí Nucën Papa Diosbë upíma ꞌianan —ꞌën bamati ca ꞌurama ꞌicë —quixun sinani racuëti masá nuituti bëánquibucënu ꞌicësa unicama atun ꞌuchacama tërë́nquin Nucën Papa Diosnan ꞌinun ꞌimianan nuxnu Nucën Papa Diosbë upí ꞌaish ax cuëëncësabi oi ꞌinun nu ꞌimiti ꞌicën. Usai ca Zacarías Nucën Papa Diosan Bëru Ñunshin Upitan sinánmicëx quiacëxa.

Lucas 16:8

Usaquin ca an a ñu mëëxuncë unin ꞌaxa quixun ꞌunánquin ca an a uni ñu mëëmicë unin sinánxa: An ꞌë ñu mëëxuncë unin ca uisai cara curíquiñuma ꞌaíshbi ꞌiti ꞌicë quixun sinánxun ñu ꞌaquin ꞌë paránti sinánxa quixun. Ësaquin catancëxun ca Jesusan cacëxa: —An ënë menushi upitax bucuti sináncë unin ca aín cuëëncësari ꞌiti upí oquin ꞌunania, Nucën Papa Diosmi sináncë unían ꞌacësamaira oquin.

Juan 1:9

An aín sinan upíira ꞌixun uni upí ꞌimiti axa uti ñuiquin ca Juanën unicama ñuixuancëxa.

Juan 12:35

Cacëxunbi ca Jesusan, ꞌëmi camina sinánti ꞌai quixun caquin ësaquin catëcëancëxa: —ꞌItsama nëtë́inshi ca an mitsu upí oquin sinánmiti, ax mitsubë ꞌiti ꞌicën. Usa ꞌain camina ax cuancëma pan ꞌain, an mitsu ꞌunánmicësabi oi ꞌiti ꞌain, ax cuancëbëmi usabi ꞌinun. A an ꞌunánmicëma uni, an ca uisai cara ꞌiti ꞌicë quixun ꞌunanima.

Juan 12:36

Usa ꞌain camina an mitsu upí oquin ꞌunánmiti, axa mitsubë ꞌaínshi, an ꞌacësaribi oquinmi mitsúnribi sinánun, aín bana ca asérabi ꞌicë quixun sinani ami catamëti ꞌain. Usaquin catancëx ca Jesús atun isnunma cuani nëtë́acëxa.

Juan 12:46

An aín sinan upíira ꞌixun uni upí ꞌimiti ꞌëx cana unicama ñu ꞌatima ꞌacë ꞌaíshbi sinanati ꞌëmi catamëti upí ꞌinun ꞌiminux uacën.

Juan 8:12

Usa ꞌain ca amiribishi Jesusan unicama cacëxa: —An aín sinan upíira ꞌixun uni upí ꞌimiti a cana ꞌëx ꞌain. Axa ꞌëmi catamëti ꞌëx cuëëncësabi oi ꞌicë uni ax ca ñu ꞌatima ꞌacëma ꞌianan aín sinan upí ꞌaish upiti tsotia.

Hechos 17:30

Nucën Papa Dios ꞌunáncëma ꞌixun ca unin anbia uniocë ñu rabiacëxa. Rabia isquinbi ca Nucën Papa Diosan isëshiacëxa. Isëshia ꞌixunbi ca bërí camabi menu ꞌicë uni ꞌatimaquin sináncë ꞌixunbia sinananun quixun aín unicaman canun camia.

Hechos 26:18

Minmi ꞌë ñuixuncëxa atux ñu ꞌatima ꞌatishi sinani bëánquibucënu nicësa ꞌaíshbi sinanaquin ñu upíshi ꞌati sinánun cana mi xutin, ñunshin ꞌatimanën ꞌapu Satanásnën ꞌibuacë ꞌaíshbi sinanatía Nucën Papa Diosnan ꞌinun. Usai ꞌëmi catamëcë ꞌaísha aín ꞌuchacama tërë́ncë ꞌinun cana atunu mi xutin. Usa ꞌain ca an mëníosabi oi atux aín unicamabë Nucën Papa Diosan nëtënu ꞌiti ꞌicën”.

Romanos 1:21

A unicaman, ui cara Nucën Papa Dios ꞌicë quixun ꞌunánquinbi ca a sinánquin, —mix camina Nucën Papa Dios ꞌai —quixun caiman. Nucën Papa Diosan ñu ꞌaxuncëxunbi ca a unicaman —camina nu ñu ꞌaxuan, ca asábi ꞌicë —quixun rabiquin cacëma ꞌicën. Caquinma atun sináncësa oquinshi ꞌacë ñuishi ꞌacë ꞌixun ca ꞌatima ñuishi ꞌai sinánñuma unisa ꞌicanxa.

Romanos 13:12

Jesucristo utëcëncëma pan ꞌain cananuna imë́ upí oquin isíma nicësa ꞌain. Usa ꞌaíshbi cananuna ax utëcëncëbë abë ꞌaish xabánu nicësa ꞌiti ꞌain. Usaquin sinani cananuna ñu ꞌatima ꞌati ëni ami cushicë ꞌaish xabánu nicësa ꞌiti ꞌain.

Romanos 2:19

Usa ꞌaish camina, ꞌën cana an Nucën Papa Diosan bana ꞌunáncëma unicama bëxuñusa ꞌaísha bëanquibucënu nicësa ꞌicëbi a bana ꞌunánmiti ꞌai quin.

1 Corintios 1:30

Nucën Papa Diosan ꞌimicëx camina ami catamëti Cristo Jesúsbë ꞌianan an sinánmicë ꞌain. Usa ꞌaish camina Cristo Jesús cupía, ax cuëëncësabi oquinshimi ꞌanun Nucën Papa Diosan ië́micë ꞌain.

2 Corintios 3:18

Usa ꞌain cananuna bëmápucucësama ꞌixun, Jesús ca asérabi Cristo ꞌicë quixun ꞌunani ami catamëti ainan ꞌain. Barían pëcaquin espejo ichucësaribi oquin ca Jesucristonënbi asaribi ꞌinun aín upí nu ꞌinania. Usaquian nu ꞌacëx cananuna bërámanu ꞌá ñucama ëuncubiani Jesucristo cuëëncësabi oi bëtsi sinánñu ꞌaish, asaribi ꞌin. Aín Bëru Ñunshin Upitanbia ꞌimicëx cananuna usai ꞌin.

2 Corintios 4:6

Nucën Papa Dios axa bëráma, “Bëánquibucë ca pëquiti ꞌicë” quiá, anbi ca Cristonëan nun nuitu mëúxun nu chuámashi tani cuëënquinu uisaira upí cara Nucën Papa Dios ꞌicë quixun ꞌunánun ꞌimiaxa.

2 Corintios 6:14

An ñu upíshi ꞌacë unin sináncësaribi oquin ca an ñu ꞌaisama ꞌacë unicaman sinaníma. Usa ꞌain camina mitsux Jesucristomi catamëcë ꞌixun axa Jesucristomi catamëcëma unicamabëtan atun cuëëncësa oquin ñu ꞌatima ꞌain. Nëtëx ca imë́bë mëscutíma. Usaribiti ca Cristonën unicamax Cristonanma unicamabë nuianantima ꞌicën.

Gálatas 5:25

Usa ꞌain cananuna nux aín Bëru Ñunshin Upitan ꞌimicëx Nucën Papa Diosan uni ꞌixun, aín Bëru Ñunshin Upitan an nu sinánmicësabi oquin ꞌati ꞌain.

Efesios 2:2

Ënë nëtënu ꞌicë ñuishia an sináncë unicaman sináncësa oquinshi sinánquin camina ñu ꞌaisama ꞌacën, ñunshin ꞌatimanën ꞌapu cuëëncësabi oquin. An ca an Nucën Papa Diosan bana cuaisama tancë unicama ax cuëëncësabi oquin ꞌanun sinánmia. Usaribiti camina mitsux an sinánmicë ꞌiacën.

Efesios 4:18

Usa ꞌaish ca bëánquibucë ꞌain mancasmatia uni bënë́cësaribi oi ꞌia. Cristo ñui quicë bana cuaisama tancë ꞌixun ca ainan ꞌiti ꞌunáncëma ꞌaish Nucën Papa Diosnan ꞌitsianxbi ainanma ꞌicën.

Efesios 5:2

Nucën Papa Dios cuëëncësabi oquin judíos unin aín ꞌucha cupí rëcë́xa carnero ꞌiásaribiti ca bamatsianxmabi Cristo nu nuibati nun ꞌucha cupí bamacëxa, ami catamëtíshinu ië́nun. Cristonëan nu usoquin nuibacë ꞌain camina mitsúxribi usaribiti bëtsibë bëtsibë nuibananti ꞌain.

Efesios 6:12

Nux cananuna suntárunëxa ꞌacanancësaribiti ꞌin. Usai ꞌibi cananuna unibë ꞌacananiman. Nun nuitu mëúishi cananuna ꞌacanáncësa ꞌain, ñunshin ꞌatimanën nu ꞌibuati rabanan. Aín ꞌapubë cushiquin ca ñunshin ꞌatimacaman nu ñu ꞌatima ꞌanun nu ꞌamitisa tania. Atun an ënë menuxun ñu atima ꞌacë unicama ꞌibuacë ꞌixun ca nuribi ñu ꞌatima ꞌamitisa tania.

Colosenses 1:12

Usoquin cananuna uisaira oquin cara aín unicama cuëënmiti ꞌicë quixun ꞌunánquinmi mitsun a —asábi ca —canun, Nucën Papa Dios mitsu ñucáxunin.

Colosenses 1:13

Ñu ꞌatima ꞌatishi sinánan nux cuëëncësabi oíshi ꞌiisa taniabi ca Nucën Papa Diosan aín nuibacë Bacë Bëchicënan ꞌinun nu ꞌimiaxa.

Tito 3:3

Nuxribi cananuna sinánñuma ꞌaish Nucën Papa Diosan bana quicësabi oi ꞌiáma ꞌain. Usa ꞌaish cananuna ñu ꞌatimaishi ꞌanúan bëtsi unin sinánmicëxun ꞌanan nunbi sinani nux cuëëncësabi oi ñunshini ꞌiacën. ꞌAisama ñuishi ꞌanan cananuna bëtsi unimi nutsianan numia uni nishcëx abë nishanancën.

1 Juan 1:7

Usa ꞌaínbi cananuna axa ꞌicësaribiti ñu ꞌatima ꞌati sináncëma ꞌianan Nucën Papa Diosbë upí ꞌaish, axa ami catamëcë unicamabëribi upiti nuibananin. Usaínu ꞌia ca an, aín Bëchicë Jesucristo aín imi ꞌapati bama cupí, uisa ñu ꞌai caranuna ꞌuchai, abi nu tërë́nxunia.