Efesios 4:24 - Kashibo-Kakataibo Biblia

²⁴ Bëtsi sinánñu ꞌimicëx camina an iscëx asérabi upí ꞌianan unínribia iscëx upí nuituñu ꞌiti ꞌain, Nucën Papa Dios cuëëncësabi oi.

Nukën 'Ibu Diosan ain unikama 'inan ain bana

²⁴ Bëtsi sinánñu 'imicëx camina an iscëx asérabi upí 'ianan unínribia iscëx upí nuituñu 'iti 'ain, Nucën Papa Dios cuëëncësabi oi.

Efesios 4:24 ပူးပေါင်းရင်းမြစ်များ

Génesis 5:1

Ënëx ka Adánnën rëbúnkinën anëkama kuënëokë ꞌikën. Uni uniokin ka Nukën ꞌIbu Diosan, asaribi ꞌitánun ꞌakëxa;

Isaías 52:1

Axa Jerusalénnu tsókë unikama mitsux kamina upíokin sinani kushikanti ꞌain, mitsux kamina Jerusalén upí kakë ëma anu tsotin, usa ꞌain kamina mitsun chupa upíirabu a pañukanti ꞌain, bëtsi menu ꞌikë unikama an Dios rabikëmakama ax ka amiribishi mitsunu atsíntëkëntima ꞌikën.

Lucas 1:75

Usaquian ië́micëxun cananuna an iscë nun nuitu upí ꞌixun, ax cuëëncësabi oquin ꞌaquin, camabi nëtë nun bamati nëtë utámainun a rabiti ꞌain.

Juan 17:17

Usa ꞌain camina min sináncësaribi oquin sinánan min bana quicësabiira oíshi ꞌinun atu ꞌimiti ꞌain.

Romanos 12:2

An ënë nëtënu ꞌicë ñuishi sináncë unicaman sináncësa oquin camina sinántima ꞌain. Usaquin sinánquinma camina sinanaquin uisairaimi upí ꞌiti cara Nucën Papa Dios cuëënia, usai ꞌiti ꞌunánan an ꞌaquincëx usai ꞌiti ꞌain.

Romanos 13:12

Jesucristo utëcëncëma pan ꞌain cananuna imë́ upí oquin isíma nicësa ꞌain. Usa ꞌaíshbi cananuna ax utëcëncëbë abë ꞌaish xabánu nicësa ꞌiti ꞌain. Usaquin sinani cananuna ñu ꞌatima ꞌati ëni ami cushicë ꞌaish xabánu nicësa ꞌiti ꞌain.

Romanos 13:14

Usa ñucama ëni camina Nucën ꞌIbu Jesucristonën mitsu usai ꞌinun quixun sinánmicësabi oi ꞌiti ꞌain. Ënë nëtënu ꞌicë ñuishi sináncë uni an ñu ꞌatima ꞌacësaribi oquin ꞌati camina sinántima ꞌain.

Romanos 6:4

Nux nashimicë ꞌaish cananuna Jesucristo, nun ꞌucha cupí bama ꞌain ꞌuchatëcëntimoi abë bamacësa ꞌian. Usa ꞌaish cananuna bamacëbia Nucën Papa Diosan Jesucristo, aín cushínbi baísquimia cupí, usaribi ꞌaish bëtsi sinánñu ꞌianan bëráma ꞌicësai ꞌitëcëntima oquin Nucën Papa Diosan ꞌimicë ꞌain.

Romanos 7:6

Usai ꞌiá ꞌaíshbi cananuna nun, ax quicësabi oquin ꞌati bana axa quicësabi oquin ꞌacë cupíma, Cristomi catamëtishi ainan ꞌixun aín Bëru Ñunshin Upitan sinánmicëxun bëtsi oquin sinánquin Nucën Papa Dios cuëëncësabi oquinshi ꞌain.

Romanos 8:29

Ui unicama cara ainan ꞌiti ꞌicë quixun ꞌunánquin ca Nucën Papa Diosan aín Bëchicënëxa aín unicaman cushi ꞌinun atux aín Bëchicë ꞌicësaribiti ꞌinun mëníocëxa.

1 Corintios 15:53

Nun nami, nun xo, acama chëquiti ꞌaíshbi cananuna bëtsi ꞌaish nun nami, nun xo acama chëquitima ꞌain. Usari ca nun nami, nun xo acamax bamati ꞌaíshbi amiribishi bamatëcëntimoi ꞌiti ꞌicën.

2 Corintios 3:18

Usa ꞌain cananuna bëmápucucësama ꞌixun, Jesús ca asérabi Cristo ꞌicë quixun ꞌunani ami catamëti ainan ꞌain. Barían pëcaquin espejo ichucësaribi oquin ca Jesucristonënbi asaribi ꞌinun aín upí nu ꞌinania. Usaquian nu ꞌacëx cananuna bërámanu ꞌá ñucama ëuncubiani Jesucristo cuëëncësabi oi bëtsi sinánñu ꞌaish, asaribi ꞌin. Aín Bëru Ñunshin Upitanbia ꞌimicëx cananuna usai ꞌin.

2 Corintios 4:16

Usa ꞌain cananuna masá nuituquinma aín bana ñuitiribi ëniman. Nucën nami axa abiira abi xënibucëbëtanbi ca Nucën Papa Diosan camabi nëtën ami catamëti cuëënun nu cushioia.

2 Corintios 5:17

Usa ꞌain ca uinu ꞌicë unix cara Cristomi catamëtia ax Cristobë ꞌaish bëtsi uni ꞌicën. Usa ꞌixun ca bëráma ꞌacësa oquin sinántëcënima. Bëtsi oquin ca sinania.

Gálatas 3:27

Ami catamëtia ainan ꞌicë nashimicë ꞌaish camina unían aín chupa xëni ꞌaisama pëquin chupa ió pañucë usaribi ꞌaish mibëa Cristo ꞌain min nuitu upíira ꞌain.

Gálatas 6:15

Nux asérabi Cristonan ꞌaish cananuna, axa usabi ꞌunántioracacë unicamaxa ꞌicësaribiti ꞌunántioracacëma ꞌaíshbi Nucën Papa Diosan iscëx upí ꞌain. Ainan ꞌicëa Cristonën nu ꞌimicëxun bërámanu ꞌása oquin sinántëcënquinma bëtsi oquin sináncë cupíshi cananuna Nucën Papa Diosan iscëx upí ꞌain.

Efesios 2:10

Cristo Jesús nubë ꞌinúan an ꞌimicëxun ñu upíshi ꞌanan nun sinan bëtsi ꞌinun ca an mëníosabi oquin nu ꞌimiaxa.

Efesios 2:15

Ax camabi unin ꞌucha cupí bamaquin ca Cristonën nux judíos uni ꞌixun Moisésnën cuënëo bana quicësabi oquin ꞌacë cupíma ami catamëcë cupíshi Nucën Papa Diosnan ꞌiti mëníocëxa. Usouni ꞌicësaribitia judíosma uniquin ca nux judíos uni ꞌaish ꞌicësaribitimi mitsúxribi ami catamëcë cupí ainan ꞌinun ꞌimiaxa. Usa ꞌain cananuna camáxbi ainan ꞌaish sënën ꞌain.

Efesios 6:11

Ñunshin ꞌatimanëan paránquin mitsu ñu ꞌatima ꞌamitisa tancëxbi camina an mitsu ꞌibuati rabanan uisoquinra cara an mitsu cushioti ꞌicë, usaquin Nucën Papa Diosan cushiocë ꞌinux upí oquin sinani ami catamëti ꞌain.

Tito 2:14

Jesucristo ca ꞌitsianxmabi nu cupí bamacëxa, nun ꞌuchacama tërë́nxunquin Nucën Papa Diosbë upí ꞌinun ië́mianan nun sinan upí ꞌixúnu bëtsi ñu sinántëcënquinma ax cuëëncësabi oquinshi ꞌanun.

Hebreos 1:8

Usai quiquinbi ca aín Bëchicë aira ësaquin caia: Mixribi Dios ꞌaish camina usabi ꞌitioi ꞌën nëtënu ꞌApu ꞌain. Mix ꞌApu upíira ꞌaían min banaribi upí ꞌain ca min ꞌati ñucamaribi upí ꞌicën.

Hebreos 12:14

Nishananima camina upitaxëshi bucuti ꞌain. Aín ꞌucha ëncëma unix ca Nucën Papa Diosbë ꞌitima ꞌicën. Usa ꞌain camina nishananima upitax bucuquin uisa ꞌuchabi ꞌati sinántima ꞌain.

1 Pedro 2:2

Bërí bacë́ncë tuacën ca anun caninuxun aín titan xuma ꞌati cuëënia. Usaribi oquin camina Nucën Papa Diosan bana upí oquin ꞌunánti cuëënti ꞌain, ainan ꞌaish aín cuëëcësabi oquin ꞌai ami cushicë ꞌinuxun.

2 Pedro 1:4

Ainan ꞌimiquin ca aín bana ꞌinánquin Nucën Papa Diosan uisaira oquin cara nu ꞌaquinti ꞌicë quixun nu ꞌunánmia. Usaquian ꞌunánmicëx, a banami catamëti camina an sinánmicësabi oquin sinánan uni itsían ñunshínquin ñu ꞌatima ꞌaia isquinbi, usaribi oquin ꞌaquinma upí ñuishi sinánti ꞌain.