Efesios 4:14 - Kashibo-Kakataibo Biblia

¹⁴ Usai ꞌi cananuna bërámanu ꞌiásaribiti bërí ꞌitima ꞌain. Bërí cananuna tuáxunratsunën unín paráncëxun sinánbëquincësa ꞌaish unín bëtsi bëtsi bana ñuixunquin paráncëxun amanua amanua sinani usaribi ꞌitima ꞌain. An uni paráncë unicaman cëmëquin nu paránquin ñu ꞌatima ꞌanun quixun ꞌimicëx usai ꞌiá ꞌaíshbi cananuna bërí usai ꞌitëcëntima ꞌain.

Nukën 'Ibu Diosan ain unikama 'inan ain bana

¹⁴ Usai 'i cananuna bërámanu 'iásaribiti bërí 'itima 'ain. Bërí cananuna tuáxunratsunën unín paráncëxun sinánbëquincësa 'aish unín bëtsi bëtsi bana ñuixunquin paráncëxun amanua amanua sinani usaribi 'itima 'ain. An uni paráncë unicaman cëmëquin nu paránquin ñu 'atima 'anun quixun 'imicëx usai 'iá 'aíshbi cananuna bërí usai 'itëcëntima 'ain.

Efesios 4:14 ပူးပေါင်းရင်းမြစ်များ

Isaías 28:9

ꞌIanan ka ꞌëmi kuai ësai kikania: “¡Nukama bana ꞌunami ka uti ꞌikën, ꞌimainun ka uisakin kara Diosan ismiaxa aribi nukama ꞌunamiti ꞌikën! ¡Nuxnu tuá xu bërí kanikënën,

Mateo 11:7

Juan, an unicama nashimicë, aín unicama cuancëbëtan ca Jesusan anu ꞌicë unicama ꞌaisamaira ꞌicë Juan ñuiquin ësaquin cacëxa: —¿Uisa uni isi caramina mitsux anu uni ꞌicëma menu cuancën? Bëtsi bëtsi oquin sináncë uni ax ca tutísha suñun bëcacësa ꞌicën. ¿Usa uni isi caramina cuancën?

Mateo 24:11

Usai ꞌicëbëtan ca —ꞌën cana Nucën Papa Dios quicë bana unicama ñuixuni —quiquinbi anbi sináncë banaishi uni ñuixunuxun ꞌaia. Usaquin ñuixunquin ca ꞌitsaira uni paránquin Nucën Papa Diosmi sinánxma ꞌinun quixun ꞌimiti ꞌicën.

Mateo 24:24

Anúan usoquin unicaman tëmërati nëtë ucëbëtan ca unin ax asérabi ama ꞌixunbi —ꞌëx cana Cristo ꞌai —quixun paránti sinánquin unicama canuxun ꞌaia. Usaribiquin ca uni raírinën cëmëquin —ꞌën cana Nucën Papa Dios quicë bana unicama ñuixunin —quixun unicama canuxun ꞌaia. Cana ca unicama paránti sinánquin, uni itsían ꞌacëma ñu ꞌanuxun ꞌaia. ꞌAquin ca Nucën Papa Diosan ainan ꞌinun caíscë unicamaribi paránti sinánuxun ꞌaia.

Hechos 23:21

Usaquian cacëxunbi camina an mi cacësabi oquin ꞌatima ꞌain. Axa Pablomi ꞌësë́nancë uni ax ca cuarenta unibëtan sënë́nma ꞌicën. Acaman ca ꞌanuxun unë́xun Pablo cainia. Ësai ca quiaxa: Pablo ꞌaxunma cananuna añu ñubi pima ꞌianan añu ñubi xëatima ꞌain. Nun nux quicësabi oquin ꞌacëma ꞌicëa ca Nucën Papa Diosan nu uisa cara oti ꞌicë usoquin nu ꞌati ꞌicën. Usaquin Pablo ꞌacatsi quixun ca minmi cacëxuan min suntárucaman Pablo buántishi unë́xun cainia.

1 Corintios 12:2

Camina ꞌunanin, mitsux Jesucristomi catamëcëma pan ꞌaish camina unían ꞌacë ñu banañumabia, ax isa dios ꞌicë quixun unin cacë ñu rabi axa Jesúsmi sináncëma unibubë niacën.

1 Corintios 14:20

ꞌËn xucë́antu, tuáratsunën sináncësa oquin camina sinántima ꞌain. Ñu ꞌatima ꞌati ꞌunáncëma ꞌaísha tuáratsu ꞌicësaribiti camina ꞌiti ꞌain. ꞌIananbi camina bëtsi ñucama sinánquin uni apanën upí oquin sináncësabi oquin sinánti ꞌain.

1 Corintios 3:19

Abia unin sináncë bana ax ca Nucën Papa Diosan iscëx ñancáishi ꞌicën. Nucën Papa Diosan bana aín unin cuënëo, ax ca ësai quia: “Ui unin cara bëtsi uni parania, a uni ca Nucën Papa Diosan ꞌamicëxun bëtsi unínribi usaribi oquin cupiti ꞌicën”.

2 Corintios 2:17

ꞌItsa unin ca curíqui biti cupíshi Nucën Papa Diosan bana ñuixunquinbi a bana quicësa oquin ñuiquinma bëtsi oquin ñuixunia. Usa ꞌaíshbi cananuna nux a unicamasama ꞌain. Usa ꞌixun cananuna Cristonan ꞌianan Nucën Papa Diosan nu aín bana ñuixunun caíscë ꞌixun, axa cuëëncësabi oquin aín bana unicama ñuixunin.

2 Corintios 4:2

Uni itsimi unë́xunu ꞌacë ñucama ënquin cananuna a ꞌaínu rabínti ñu ꞌatimaribi ꞌaiman. Uni paránti sinánquinma cananuna Nucën Papa Diosan banaribi bëtsi oquinma ax asérabi quicë banaishi uni ñuixunin. Usaquin ñuixunia cuaquin ca camabi unin ꞌunánti ꞌicën, Nucën Papa Diosan iscëxun cananuna ax quicësabi oquin aín bana ñuixuni quixun.

Gálatas 3:1

Gálatas unicama, mitsux camina sinánñumasa ꞌain. Unin ꞌucha cupía ax i curúsocënu bama Jesucristo ñuiquin cananuna mitsu upí oquin bana ñuixuancën. Ñuixuncëbi ca uni raírinën bëtsi bana ñuixunquin, Jesucristo ñui quicë bana cuaxunma ꞌanun quixun mitsu paránxa.

Efesios 6:11

Ñunshin ꞌatimanëan paránquin mitsu ñu ꞌatima ꞌamitisa tancëxbi camina an mitsu ꞌibuati rabanan uisoquinra cara an mitsu cushioti ꞌicë, usaquin Nucën Papa Diosan cushiocë ꞌinux upí oquin sinani ami catamëti ꞌain.

1 Timoteo 3:6

Bëríratsu ami catamëcë uni ax ca axa Jesucristomi catamëcë unicaman cushi ꞌitima ꞌicën. Usa ꞌixunbi ca —ꞌëx cana bëtsi unisamaira ꞌai —quixun sinánti ꞌicën. Usaribiquin rabíquin —ꞌëx cana Nucën Papa Diossaribi ꞌai —quixun sináncë cupí ca Nucën Papa Diosan ñunshin ꞌatimanën ꞌapu, Satanás, aín nëtënua chiquíancëxa. Usaribitía rabíti rabanan camina axa bëríratsu ami catamëcë uni axa Jesucristomi catamëcë unicaman cushi ꞌimitima ꞌain.

2 Timoteo 1:15

Camina ꞌunan, Asia menuax ucë unicamabëtan ca Figelo ꞌimainun Hermógenes, axribi anuax ucë ꞌixun, anribi ꞌë ëbianxa.

2 Timoteo 3:13

Usaía ꞌimainun ca ꞌaisama unicama ꞌimainun an uni paráncë unicama, ax bëtsi unían paráncë ꞌixun atúnribi usaribi oquin uni paráncë ꞌaish axa ꞌiásamaira ꞌiti ꞌicën.

2 Timoteo 4:3

Jesucristo utëcënti nëtë ꞌurama ꞌain ca unin Nucën Papa Diosan bana anúan atux upí ꞌiti a cuaisama tanti ꞌicën. A bana cuaisama tanquin ca unin, ainsa atúan cuaisa tancë bana ñuixunun quixun bëtsi unicama bariti ꞌicën.

Hebreos 13:9

Usa ꞌain camina uni itsían mitsu bëtsi bëtsi bana ñuixunquin Jesucristomi sinánti ënun quixun cacëxunbi ëntima ꞌain. A unicamax ca —bëtsi bëtsi ñu piquinbi camina bëtsi bëtsi ñu pitima ꞌai —quia. Atúxa usai quia a bana cuatibi ca uni aín nuitu upí ꞌima. Usa ꞌain camina —Cristo cupíshi ca Nucën Papa Diosan nu nuibaquin nun ꞌucha tërë́anan nux ainan ꞌinun ꞌimia —quixun ꞌunani amishi cushicanti ꞌain.

Santiago 1:6

ꞌIxunbi camina —Nucën Papa Diosan sapi ca ꞌën cacëxun cuatima ꞌicë —quixun sinánquinma, —an ca asérabi ꞌën cacëxun cuati ꞌicë —quixun sinánquin ñucáti ꞌain. An cara ꞌë ꞌaquinti ꞌicë, cara ꞌë ꞌaquintima ꞌicë quixun sináncë uni ax ca suñun bëcacë́xa parúnpapa amami amamiqui tucánquicësa ꞌicën.

Santiago 3:4

Usaribi ca manë nunti ꞌicën. Chaira ꞌicëbi ca suñun bëcaquin buania. Usa ꞌicëbi ca an niquincë unin, uinu cara cuainsa tania ami oquin anun chibíti axa chairama ꞌaínbi anúinshi puntëbianquin buania.

2 Pedro 2:18

Usa unicaman ca axbi cërúanan rabiacati sinánñumasa ꞌixun, an ꞌacësaribi oquian ñunshínquin ñu ꞌatima ꞌanun quixun, an ñu ꞌatima ꞌati ëinsa tancë uni raíri sinanamitëcënia.

1 Juan 2:19

An Cristo ꞌatimaquin ñuicë unicama nubë ꞌixunbi ca nu ëanxa, asérabi nun ꞌacësaribi oquin Jesucristo sináncëma ꞌixun. Nux ꞌicësaribiti asérabi Jesucristomi sináncë ꞌaish ca nubë bërúcë ꞌitsíanxa. Usa ꞌain ca atúan nu ëncë cupí camaxunbi ꞌunánti ꞌicën, nubëa ax timë́cë unicamax ca camáxira asérabi nux ꞌicësaribiti Jesucristomi sináncëma ꞌiaxa quixun.

1 Juan 2:26

An mitsu parántisa tancë unicama ñuiquin cana ënë banacama mitsu cuënëoxuan.

1 Juan 4:1

ꞌËn nuibacë xucë́antu, ënë nëtënuxun ca ꞌitsa unin —Nucën Papa Diosan sinánmicëxun cana uni bana ñuixuni —quiquinbi an sinánmicëxunmabi anbia sináncë bana uni ñuixunia. Usa ꞌain camina —Nucën Papa Diosan ca ꞌë sinánmia —quiquian unin ñuicë bana acamaira cuatima ꞌain. Upí oquin pain camina asérabi cara Nucën Papa Diosan sinánmicëxun uni ñuixunia quixun cuati ꞌain.

Judas 1:12

Mitsúxmi Jesucristomi sinánquin pi timë́cë ꞌain atúxribi mitsubë timë́cë ꞌaíshbi ca asérabi mitsúxmi ꞌicësaribiti ꞌima. Usa ꞌaish ca atun cuëëncësabi oquinshi pi rabinima sharati, uni raírimi sinanima. Uni raíri ꞌaquincëma ꞌaish ca ꞌuí ꞌibúnux nëtë bënamëtiabi suñun bëcacëx nëtë́cësa usaribi ꞌicën. ꞌIanan ca anun bimiti nëtëa ucëbëbia i bimicëma usaribi ꞌicën. Bëucutia i aín tapun ëchiquicë, usaribi ca atux ꞌicën.

Apocalipsis 19:20

ꞌAcanánia ca ñuinacanꞌëo acëñun a rabiquian Nucën Papa Dios rabixunma ꞌanun quixun an unicama paráncë ñuinacanꞌëo aribi bicanxa. An usoquin unicama paráncë ñuinacanꞌëo ax ca an bëtsi ñuinacanꞌëo ꞌitsa maxcáñu an ismainun unin ꞌacëma ñu ꞌaquin uni paran a ꞌiaxa. Ax ca an ꞌitsa maxcáñu ñuinacanꞌëonan ꞌicë ꞌunántioquin cuënëocë unicama, ꞌimainun an a tanquin ꞌacë ñu rabicë, acama paran a ꞌiaxa. ꞌAcananquin bitancëxun ca a ñuinacanꞌëo rabë́ ꞌianëmëꞌëosa manë tsi anuaxa azufre ꞌimainun manë tsi rëquirucë anu ꞌinun niaxa.