Eclesiastés 3:4 - Kashibo-Kakataibo Biblia

⁴ Anu ka anun inti nëtë ꞌikën, ꞌimainun ka anun kuaiti nëtëribi anu ꞌikën. Anu ka anun uni ñukëbë masá nuituti nëtë ꞌikën, ꞌimainun ka anun ransai kuëënti nëtëribi anu ꞌikën.

Eclesiastés 3:4 ပူးပေါင်းရင်းမြစ်များ

Génesis 21:6

Usai ꞌitankëxun ka Saran sinánkëxa: Nukën ꞌIbu Diosan ka ꞌë kuëënmikin kuaimiaxa, usa ꞌain ka kamabi unin ꞌunánti ꞌikën, ꞌëx kana achúshi tuáñu ꞌai kixun ꞌunáni ka kuëëni ꞌëbë kuaiti ꞌikën.

2 Samuel 6:16

Usakin bunántisa okin ꞌakë anua Diosan banakama kuënëokë nankë, a buani anua David ꞌikë ëma anu bëbakania ka Saúlnën ꞌini bëchikë Micalnën aín xubu xëkuë chukúma manámi ꞌikë anun isakëxa; iskëxbi ka aín bënë David ax kuëëni chirinkin ransakia Dios rabikë ax ainan ꞌaisama ꞌiakëxa, usa ꞌain ka ami ꞌatimakin sinánkëxa.

Éxodo 15:20

Usai ꞌikëbëtan ka an bana ñuikë María, Aarónën chirabakën, aín manë sharíkati bitsi sharíkai ransakëxa, ransakëbë a kamabi xanukamaxribi atun manë sharíkati bitsi a nuibiani abë ransakëxa,

Eclesiastés 3:5

Anu ka anun maxax abístanun puti nëtë ꞌikën, ꞌimainun ka anun timëkin biti nëtëribi anu ꞌikën. Anu ka anun ꞌikúkananti nëtë ꞌikën, ꞌimainun ka anun ꞌikúkanantima nëtëribi anu ꞌikën.

Isaías 40:1

Mitsun Dios ax ka ësai kiaxa: “ꞌËn unikama kamina kuëëntanun nuibakin ꞌakinti ꞌain;

Isaías 40:2

ꞌakianan kamina kuëëntanun nuibakin Jerusalénnu tsóa unikama a atúan tëmërakin bëtsi uni ñu mëëxuan a ka këñúaxa kixun kati ꞌain, kanan kamina atúxa usai ꞌikë anunbi ka ꞌën kakëxuan atun kuaisamatan a kupíoxa kixun kati ꞌain, ꞌënbi kana ꞌëmi ꞌitsaira ꞌuchaia rabë́ okin atu ꞌatima okën.”

Mateo 11:17

“Cuai chirini cuëënun nun paca bana ocëbëbi camina masá sinani cuaitisama tan. Cuaitisama tancëbë nux —anpan caniacëcë unicama ꞌicësaribiti cananuna ini rarumati ꞌai —quicëbëbi camina masá sinani usairibi ꞌiisama tan”.

Mateo 9:15

Cacëxun ca Jesusan cacëxa: —¿An biti xanua unin bicëma pan ꞌain cara axa abë nuibanancë unicama ax a unibë ꞌaish masá nuituti ꞌic? Ca masá nuitutima ꞌicën. Ca ësa ꞌicën: An xanu biti unin xanu biquin abëtan pi unun camicëx ca axa abë nuibanancë unicama masá nuitutima abë cuëënia. Xanu bibiani cuanquian a unin ëbiancëxun cuni ca axa abë nuibanancë unicaman masá nuituquin pima. Usaribiquin ca ꞌën ꞌunánmicë unicama ꞌëbë ꞌixun masá nuituti samáquinma piia. Unían ꞌë bicëxun ꞌën ëbiancëxun cuni ca masá nuituquin pitima ꞌicën.

Lucas 1:58

Bacë́ncë —a ca Nucën ꞌIbu Diosan nuibaquin tuáñu ꞌinun ꞌimiaxa —quixun ꞌunánbiani a ꞌurama ꞌicëcama ꞌimainun aín aintsi ꞌibucamaxribi Elisabet isi cuanx ca abë banai cuëëancëxa.

Romanos 12:15

Axa chuámarua ꞌaish cuëëncë uni abë camina cuëënti ꞌain. Axa masá nuituti incë uni a camina abë masá nuituquin nuibati ꞌain.

2 Corintios 7:10

Aín ꞌuchacama cupí masá nuitutancëxa uni sinanati ca Nucën Papa Dios cuëënia. Sinanatancëx ca aín ꞌucha tërë́ncë ꞌaish Nucën Papa Diosnan ꞌinux ië́cë ꞌia. Usai ꞌitancëx cuëënquin ca —ꞌëx ꞌën ꞌuchacama sinani pan masá nuituti ca asábi ꞌiaxa —quixun sinánti ꞌicën. Usa ꞌaínbi ca uni raíri aín ñu ꞌatima ꞌacë cupí masá nuituquinbi acama ëni ami sinanacëma ꞌaish Nucën Papa Diosnan ꞌima.

Santiago 4:9

—Nucën Papa Dios cuëëncësabi oi cana ꞌima —quixun sinani ca masá nuituti ꞌin. Cuëëni cuaicë ꞌaíshbi ca a ëni masá nuituti bëunan mëscut. Chuámarua taními cuëëncë a ëni ca masá nuitut.