Eclesiastés 3:11 - Kashibo-Kakataibo Biblia

¹¹ Usa ꞌain ka Diosan ënë nëtë uniotankëxun; kamabi ñu upí ꞌitánun uniokëxa; ꞌanan ka uniribi sinánñu ꞌixúan uisai kara ñukama ꞌiakëxa kixun ꞌunánan, uisai kara bërí ñu ꞌia ꞌunánkin uisai kara ꞌinuxun ꞌaia kixun akama ꞌunántiokin ꞌakëxa, usa ꞌaínbi ka unin uisaira ꞌinun kara Diosan ñu ꞌakëxa kixun ꞌunanima ꞌianan uisokin kara ꞌanuxun ꞌaia kixun kamaira ꞌunanima.

Eclesiastés 3:11 ပူးပေါင်းရင်းမြစ်များ

Génesis 1:31

usokin ꞌaxun ka Nukën ꞌIbu Diosan an uniokë ñukama upíira upí ꞌikë isakëxa. Usaxa bë́ankionx pë́karatëkënkë ax ka mapai ꞌimainun achúshi nëtë ꞌiakëxa.

Job 5:9

¡An ka ꞌitsaira ñu ꞌakin unin iskëma chaiirabu ñu ꞌaia, usakin ꞌaia ka uínbi a ñukama uisakin kara ꞌaia kixun ꞌunántima ꞌikën!

Salmos 104:24

¡Uiti ñukamaira kaina mix Dios ꞌixun ꞌakën! A ñukama kamina mix sinánñuira ꞌixun ꞌakën; ¡usa ꞌain ka kamabi menu min ꞌa ñukama ꞌikën!

Eclesiastés 11:5

ꞌIanan ka uínbi uimiu kara suñu bëkia kixun ꞌunanima, ꞌimainun ka uisari kara tuá aín titan puku ꞌukëmëu ꞌiruia kixun ꞌunanima, usaribi okin ka unin Dios kamabi ñu an unio an kara uisokin ñu ꞌaia kixun ꞌunanima.

Mateo 11:27

Usaquin aín Papa Dios catancëxun ca Jesusan anu ꞌicë unicama amiribishi cacëxa: —ꞌËn Papa Diosan ca camabi aín sinan ꞌë ꞌunánmiaxa. Uinu ꞌicë unínbi ca uisa uni ꞌianan añu ꞌai carana ꞌëx uacën quixun ꞌunanima. ꞌËn Papa Diosan cuni ca ꞌunania. Usaribi oquin ca uinu ꞌicë unínbi, uisa cara Nucën Papa Dios ꞌicë quixun ꞌunanima. Aín Bëchicë, ꞌën cuni cana ꞌunanin, ꞌimainun ca a ꞌën uisaira cara ax ꞌicë quixun ꞌunánmisa tancë unicama anribi ꞌunania.

Mateo 13:22

Muxañu menua nipacëcë ñu bëru usaribi ca raíri uni ꞌicën. A unicaman ca Nucën Papa Diosan bana cuaquin —a bana quicësabi oi cana ꞌiti ꞌai —quixun sinania. Usaquin sinanibi ca ënë menu ꞌicë ñuishi sinánan —ꞌitsa ñuñu ꞌaish cana cuëënti ꞌai —quixun sinani, ꞌitsa ñuñu ꞌiisa tanan bëtsi ñuribi cuëënia. Usa ꞌaish ca Nucën Papa Diosan sináncëxbi ñu bëru ꞌapácëa coiabi chucun mapurucësa usaribi ꞌaish bimiñumasa ꞌia.

Marcos 7:37

Ñuiquian chanioia cuati ca unicamax ratuti quiacëxa: —Camabi ñu ca an upí oquin ꞌaia, pabë unínbi ca an pëxcucëxun cuatia, banañuma uníxbi ca an pëxcucëx banaia.

Romanos 1:28

Usa unicama ca ami sinántisama tania Nucën Papa Diosan aín sinan upíma ꞌixun ꞌatima ñuira ꞌanun quixun ëanxa.

Romanos 11:33

Uiti cushiira cara aín sinan ꞌicë quixun cananuna ꞌunántima ꞌain. An ca camabi ñu ꞌunania. An ꞌunáncëma ñu ca ꞌaíma ꞌicën. Uisaira ꞌixun cara usoquin ñu ꞌaia quixun cananuna ꞌunaniman.

Deuteronomio 32:4

Ax ka an nu bërúankë ꞌikën; an ꞌakë ñux ka upíira upí ꞌikën, an ꞌakë ñux ka asérabi upí ꞌikën. Ax ka Dios ꞌaish këmëima asérabi banaia, ¡an ka uínsaranbi an ñu ꞌatima ꞌakë uni abi ꞌatima oima ꞌaínbi ka ënkinma a unikama ꞌatima onuxun ꞌaia!