Deuteronomio 6:3 - Kashibo-Kakataibo Biblia

³ Usa aín kamina, ꞌën aintsi Israelkama mitsun, a bana tankin ax kikësabiokin ꞌati ꞌain. Usakin ꞌakëbë a mitsun ꞌati ñukama upí kuankëbë kamina achúshi ëma ꞌai ënë menu ꞌuakamë ꞌëoti ꞌain, anua a xëati ñu buna rëpasa ꞌaisamaira ꞌianan a piti ñuribi ꞌaisamaira ꞌikë kixuan Diosan mitsun chaitiokëkama ká anu kuanti ꞌain.

Deuteronomio 6:3 ပူးပေါင်းရင်းမြစ်များ

Génesis 12:2

Min rëbúnki kamabëtan kana achúshi ëma chaiira ꞌanuxun ꞌain; ꞌanan kana upíokin sinánxunti ꞌain, usakin ꞌaia iskin ka bëtsi unikaman a unikamax ka sinánñuira ꞌianan kushiirabu ꞌikë kiax kiti ꞌikën, mi kupín kana kamabi menu ꞌikë unikama upitax bukunun upíokin sinánxunti ꞌain.

Génesis 13:16

ꞌËn kana min rëbúnkikama ꞌaisamaira menu ꞌikë masin bërusa ꞌinun ꞌimiti ꞌain. Usa ꞌaish ka masi bëru tupuntisama usaribi ꞌiti ꞌikën, ꞌianan ka tupuntisamaira min rëbúnkikama ꞌiti ꞌikën.

Génesis 15:5

Usokin katankëxun ka Nukën ꞌIbun Abram ëman, buánxun ësokin kakëxa: —Upiokin ka naí manámia ꞌispakama is, iskin kamina min tupuntisa ꞌikë tupunti ꞌain. Usaribi ka min rëbúnkinëx tupuntisamaira ꞌitsaira ꞌiti ꞌikë kixun kakëxa.

Génesis 22:17

usa ꞌain kana ꞌën upíokin sinánxunkin min rëbúnkinëxa. ꞌAisamaira ꞌispa imë́ naínu iskësa usaribi ꞌianan masi bëru parúmpapa kuëbínua iskësaribi ꞌinun ꞌimiti ꞌain. Usa ꞌain ka bëtsi ëmanu ꞌikë unikama ax ami nishkë akama ꞌën ꞌamikëxun abë ꞌakanankin atun abámikin ꞌati ꞌikën,

Génesis 26:4

ꞌAnan kana ꞌën min rëbúnkikamaribi naínua ꞌaisamaira ꞌispa iskësa usaribi ꞌitánun ꞌimiti ꞌain, ꞌimainun kana ënë me kamabi mi ꞌinánti ꞌain. ꞌInánan kana kamabi menu ꞌikë unikamaribi upíokin sinánxunti ꞌain, min rëbúnki kamasaribi ꞌinun,

Génesis 28:14

Usa ꞌain ka atux ꞌaisamaira ꞌuakamë ꞌëoi me putu iskësaira ꞌi aín tsipumiki ꞌimainun aín rëbumiki kuanan amiaxa bari urukë au ꞌimainun amia bari kuabúkë amiki amami amami kuankanti ꞌikën, usa ꞌain ka kamabi menu ꞌikë unikama upíokin sinánxunkë ꞌiti ꞌikën mi ꞌimainun min rëbúnkikama kupí.

Éxodo 1:7

ꞌaínbi ka Israel unikama atun ꞌaisamaira ꞌinun Egipto menuxunbi bëchipakëxa, usa ꞌaish ka atux ꞌaisamaira ꞌinun ꞌuakamë ꞌëoi kushiirabu ꞌiakëxa. Usa ꞌain ka atu xëshi a menu ꞌuakamë ꞌëokëxa.

Éxodo 3:17

ꞌImainun ka ësokinribi ꞌë kaxa, an isa Egipto me anuaxmi tëmërakankë ënua mitsu chikínbiankin anua cananeos, hititas, amorreos, ferezeos, heveos ꞌimainun jebuseos; unikama ꞌikë me anu mitsu buánti ꞌikën, ax ka me achúshi anua ñuinanën xumañukama a ꞌimainun a piti ñu ꞌitsaira ꞌianan ñu ꞌaisamaira ꞌikë a ꞌikën.

Éxodo 3:6

Kakin ka ësokinribi kakëxa: —ꞌËx kana min chaitiokë aín Dios ꞌain ꞌimainun kana Abraham, Isaac Jacob akaman rabia Dios a ꞌain. Usakian kakëxun kuati ka Moisés aín chupan Dios istisamatani rakuë́ti bëmápuakëxa,

Éxodo 3:8

Usa ꞌain kana ꞌënbi a isi ubuan, egipcio unikaman ꞌaisamaira okin tëmëramia kana chikinuxun ꞌain. Ënë menua chikínbiankin kana atu me chaiira ꞌimainun upíira anua ꞌaisamaira ñuina xuma ꞌianan a piti ꞌitsaira ꞌimainun buna rëpa ꞌumpax iskësaira ꞌikë anu buánti aín. A mex ka anua cananeobë, hititas, amorreos, ferezeos, heveos ꞌimainun jebuseos unikama ꞌikë anu kana buánti ꞌain.

Jeremías 7:23

ꞌAínbi kana ësaia ꞌën bana tani ꞌikanun kakën; ꞌëx atun Dios ꞌimainua atux ꞌën unikama ꞌinun kixun kana kakën. Usai ꞌia ꞌën kakësabi oi ꞌikëbë ka mitsun ꞌakë ñukama upí ꞌiti ꞌikën.

Hechos 7:17

Usaquin catancëxun ca ësaquinribi Estebanën cacëxa: —Jacob, aín anë itsi Israel, a ꞌimainun aín bëchicëcama Egiptonuax cëñúa ꞌaínbi ca aín rëbúnquicama anubi bucüacëxa. A nëtën Egiptonuax cuanti Nucën Papa Diosan Abraham ñuixuan, a nëtë ꞌurama ꞌain ca Jacobnën bëchicënën rëbúnquicama nucën rara ꞌiá, atux ꞌaisamaira ꞌinun uati bucüacëxa.

Deuteronomio 26:15

Min kamina naíkamë ꞌëo anuxunbi iskin xubu chaiorukin upíira okin ꞌakë aín manánxun iskësokin iskin, uisai kara ënë menuax ñu ꞌia a ꞌunánin, usa ꞌain kamina min unibu Israelkama upíokin sinánxunin, min nu ꞌinánkë me anua, usa ꞌaish ka ënë menu a xëati ñu ꞌimainun a piti ñu ꞌaisamaira ënu ꞌikën, minmi nun chaitiokëkama a ꞌinánuxun kásabiokin.

Deuteronomio 26:9

chikinbëtsinkin ka anua piti ñu ꞌaisamaira ꞌikë ënu bëakëxa, bëtankëxun ka anua a xëati ñu buna rëpasa ꞌaisamaira ꞌianan a piti ñuribi ꞌaisamaira ꞌikë ënë menu nu bëakëxa.

Deuteronomio 31:20

Uínsaran karana aín chaitiokama kásabiokin a menu atsini unun ꞌimi anun ka sinanatëkëntima okin a anua a piti ñu ꞌaisamaira ꞌimainun a xëati buna rëpa ꞌaisamaira ꞌikë, a menuxun puchákin pianan xëai xuakanti ꞌikën, usai ꞌikinbi ꞌë rabiti ënkin bëtsi dios kamaishi rabiti ꞌikën, usakin ꞌai ꞌëmi manukin ꞌëx usai ꞌiti kia banakama manuti ꞌiti ꞌikën.

Deuteronomio 4:40

Mitsun kamina a tanti bana ꞌimainun ax kikësabi oi ꞌiti ꞌën bërí mitsu ñuixunkë bana ënë tanti ꞌain, tani kamina min rëbúnki kamabëbi ꞌitsa baritia Diosan mitsu ꞌinánti me anu xënibua ꞌaínbi tsóti ꞌain, kixun ka Moisésnën atu kakëxa.

Deuteronomio 4:6

Usakin mitsun a banakama kikësokin ꞌai sinánñuirabu ꞌianan ñu ꞌati ꞌunáinrabu ꞌinun mitsu ꞌimikëbë ka bëtsi menu tsókë unikamax kiti ꞌikën: Israel unikamax ka ëma chaiira ꞌianan sinánñuira unibu ꞌikë kiax kiti ꞌikën

Deuteronomio 8:8

a mex ka anua trigo ꞌimainun cebada, uvas ꞌapákë ꞌitsaira ꞌianan olivos higuera i ꞌapákë, ꞌimainun i bimiñu ꞌaisamaira anu ꞌikë me upí a ꞌikën.