Deuteronomio 4:26 - Kashibo-Kakataibo Biblia

²⁶ ꞌën kana bërí mitsu naíkamë ꞌëo ꞌimainun men unin kuakësa ꞌitanua kuamainun kain, ꞌaínbi kamina mitsux ꞌën kakë bana kikësabiokin ꞌaíma anumi tsókankë me Jordán kakë baka ꞌukëmanan ꞌitsama baritia tsókanti ꞌain. Anuax ka ꞌitsama baritiashi tsótankëx raírinëx ñuti ꞌikën.

Deuteronomio 4:26 ပူးပေါင်းရင်းမြစ်များ

Génesis 19:13

kixun katankëxun ka ángel rabëtan Lot ësokinribi kakëxa. Nun kananuna ënë ëma añu kara anu axa akama këñunbi këñui uan, usakin ꞌanun ka nu Nukën ꞌIbun xuaxa ꞌaisamaira unix ka uisa kupín kara ënë ëma Nukën ꞌIbun ñu ꞌatima ꞌaia iskinbi këñuima kiax kia, usa ꞌain kananuna nun bërí ënë ëma këñuin.

1 Reyes 9:7

ꞌën atu ꞌinan me anua Israelkama chikínti ꞌain, chikíanan anuxun ꞌë rabiti xubu ꞌamikë a ënun ëmikëbë ka Israel kamami bëtsi menu ꞌikë unikama kuaiti ꞌikën.

Isaías 1:2

Kamabi ñu axa naínu ꞌikë ꞌimainun menu ꞌikë an ka Nukën ꞌIbu Dios ax ka ësai kiaxa kuati ꞌikën: “ꞌËn kana ꞌën bakë bëchikë bëbukama ꞌimainun xanukama chatanun kanioruakën, ꞌaínbi ka atux ꞌën bana kuaisama tani ꞌëmi nishakëxa.

Isaías 6:11

Ësokin kakëxun kana ꞌën ñukákën: “¿ꞌËn ꞌIbu uiti bari ꞌimi kara ënë ñukama min bana kikësai ꞌinux basiti ꞌik?” Kixun kakëxun ka Diosan ꞌë kakëxa: “Ënëx ka ëmakama masókin ꞌatima okëbëa anu ꞌikë unikamax uniñuma ꞌianan; atun xubukamaxribi uniñuma ꞌimainun, anu ñu ꞌapákë me kamaxribi anu uni ꞌikëma mesa bërutamainun anu sënën ꞌiti ꞌikën,

Jeremías 2:12

¡Naíkamë ꞌëo ka unix ꞌikësai ënë ñukama ꞌikëbë, rakuë́ti ꞌikën! ¡Usai ꞌika ñu ꞌaisama ꞌikëbë bërëti ꞌikën! ꞌËx Min ꞌIbu ꞌaish kana usai kin.

Jeremías 6:19

Men ka unin ꞌakësokin kuati ꞌikën: Ënë unikama kana ꞌaisama ñu inúnun ꞌimiti ꞌain, atun ka ñu ꞌaisama ꞌatishi sinánkanxa usa kupín; ꞌimainun ka ꞌën bana kuaisama tankëxa usa ꞌain, ꞌianan ka ꞌën bana kikësokinshi ꞌaisama tankëxa, usai ꞌikin ka a tanti ꞌën bana timakankëxa.

Ezequiel 33:28

Usakin ꞌakin kana a mekama anu uni ꞌikëmasa ꞌitánun ꞌimiti ꞌain, ꞌimianan kana usokin ꞌakëxa nux kananuna kushiira ꞌai kiax rabiakakë a nëtë́nun ꞌimiti ꞌain. Usokin ꞌakëx ka Israel menu ꞌikë bashikama ax anu uni ꞌikëma mesa ꞌiti ꞌikën; usakin ꞌakë ꞌain ka uinu ꞌikë uníxbi anun inútima ꞌikën.

Miqueas 1:2

Kamabi unikama mitsun kamina ënë banakama upíokin kuakanti ꞌain; ꞌimainun ka kamabi menu ꞌikë ëmakamanu ꞌikë unikamanribi bëmë́kin kuati ꞌikën: Diosan ka anua ꞌikë naíkamë ꞌëo anuxunbi, mitsun ꞌatima ñu ꞌakë kupí uisa kara oti ꞌikë usokin mitsu ꞌati ꞌikën.

Miqueas 6:2

Bashikama ꞌimainun an me tuinkë akaman ka kuati ꞌikën: Nukën ꞌIbu ka aín unikama ꞌatima oti sinania, usa ꞌaish ka Israel unikamami nishia.

Lucas 21:24

Uni raíri ca unin abë ꞌacananquin ꞌanuxun ꞌaia, raírinëx ca bëtsi bëtsi menu buáncë ꞌiti ꞌicën. Usaquin ꞌaquin ca judíosma unicaman Jerusalén ꞌatimonan anu ꞌixun aín cuëëncësa oquin ꞌati ꞌicën, atúan usoquin ꞌati nëtëa sënë́ncëbëtan.

Deuteronomio 31:28

Usa ꞌain kamina uni an bana ꞌunánkë unikama ꞌimainun kamabi ñaká achúshi achúshi unikama ain ꞌapu ꞌën ësokin mitsu kanun timë́ti ꞌain, naí ꞌimainun men ka unin kuakësa ꞌitánun kuati ꞌikën, usa ꞌain kana ꞌën mitsu ësokin kain.

Deuteronomio 32:1

Ësai ka Moisés kantai kiakëxa, naíkamë ꞌëo ꞌëx kia kamina unin kuakësokin kuati ꞌain, ꞌimainun ka ꞌëx banamainun menribi unin kuakësokin kuati ꞌikën.

Deuteronomio 7:4

bikëxunbi ka atun mitsun bakë bëchikëkama Nukën ꞌIbu rabiti ëmikin atun rabikë dioskama rabiti ꞌunánmiti ꞌikën; usokin ꞌunánmikëbë atumi nishkin ka Nukën ꞌIbu unix munuma bëkuishi bëpëkikë usokin bënë́kinshi maëkanun atu ꞌimiti ꞌikën.

Deuteronomio 8:19

Aínbi ka Nukën ꞌIbu Diosmi manukuainxun mitsun, bëtsi dioskama rabia ꞌën sinánkëxun mitsu ꞌatima okin këñuti ꞌikën.

Deuteronomio 8:20

Usaribi okin ka Nukën ꞌIbu Diosan anumi mitsux kuanti menu tsókë unikama ꞌaíma ꞌitánun maëmiti ꞌikën, usakinribi ka Diosan kakësoi ꞌiama mitsu maënun ꞌimiti ꞌikën, kixun ka Moisésnën kakëxa.

Josué 24:20

An ka mitsunmi a ënkin bëtsi dioskama rabia, ka Nukën ꞌIbu upíokian mitsu ꞌakinkë a ënkin ꞌaisamaira okin tëmëramiti ꞌikën.