Daniel 5:8 - Kashibo-Kakataibo Biblia

⁸ Usai kikëbë utankëx ka an ꞌapu ñu mëëxunkë an ñu ꞌunánkë unikamax anu ꞌapu ꞌikë xubu ꞌukëmëu atsínkankëxa, ꞌaínbi ka uinu ꞌikë atu achúshinanbi uisai kikë kara kënënu kuënëokë ax ꞌikë kixun ꞌapu ñuixuama ꞌikën.

Daniel 5:8 ပူးပေါင်းရင်းမြစ်များ

Génesis 41:8

ꞌAínbi ka a pë́karan anun masánuitukëishi ꞌixun kamabi Egipto menu ꞌikë an ñu tankë ꞌimainun an ñu ꞌunánkë unikama unun kixun kamiakëxa. Kamikëxa rikuatsinkë ka faraónën usakian namákëkama ñuixuankëxa, ñuixunkëxunbi ka uinu ꞌikë uni an ñu tankë ꞌimainun an ñu ꞌunánkë achúshinënbi ñuixuama ꞌikën, uisakin namákin kara usakin namáxa kixun.

Daniel 2:27

Ësakian kakëxun ka Danielnën kakëxa: —Uinubi ka sinánñuira ꞌimainun an ñu tankë, ꞌianan ñunshinan ꞌamikëxun ñu ꞌakë ꞌimainun uisa kara ñu ꞌinuxun ꞌaia kixun ꞌunánkë uni min ꞌunántisama ñubi an mi ñuixunti ꞌaíma ꞌikën.

Daniel 4:18

Ënëx ka ꞌapu Nabucodonosor ꞌixun ꞌën namákë ꞌikën. Usa ꞌain kamina mix Beltsasar ꞌixun bërí uisokin namákë kara ꞌën namákë ax ꞌikë kixun ꞌë ñuixunti ꞌain, uinu ꞌikë unínbi ka ꞌëx ꞌapu ꞌain, an ñu ꞌunánkëkama achúshinënbi ka ꞌën uisakin namákë kara ax ꞌikë kixun ꞌunánkëma ꞌikën, usa ꞌaínbi kamina Dios upíira ꞌain bëru ñunshinan ꞌakinkëxun min kuni ꞌë ñuixunti ꞌain kixun kaxa.

Daniel 4:4

ꞌËx ꞌApu Nabucodonosor ꞌaish kana, ꞌën xubunu upitax tsóti ñuñuira ꞌaish ꞌitsaira kuëëni Babilonia ëmanu tsoóakën.

Daniel 4:7

Usakin kamikëx ka an ñunshinan ꞌamikëxun ñu ꞌakë ꞌimainun, an ñu tankë ꞌianan, an ñu ꞌunánkë ꞌimainun, uisai kara ñu ꞌinuxun ꞌaia kixun an tankë, Babilonianu ꞌikëkama atux uaxa, aia kana ꞌën namákë a ñuixuan, ꞌaínbi ka atun uisakin namákë kara ax ꞌikë kixun ꞌë ñuixunkëma ꞌikën.

Daniel 5:15

An ñu ꞌunánkëira unikama ënë menu ꞌikë kana ax ka ënu ꞌiaxa an ka istankëxun uisai kikë kara ënë banakama ꞌë ñuixunti ꞌiaxa, ꞌaínbi ka uisa kara a bana kia kixunbi atun ꞌunanima.