Daniel 4:32 - Kashibo-Kakataibo Biblia

³² ꞌën kana unikamabë ꞌimami ñuinakamabë ꞌinun mi ꞌimiti ꞌain; anuxun kamina pasto vaca bënëkaman ꞌakësaribi okin mapai achúshi ꞌimainun rabë́ baritia anúnmi, Dios ax ka ënë menu ꞌikë ëmakama aín kushi ꞌianan ui kara aín kushi ꞌimitisatania a aín kushi ꞌimia kixun min ꞌunánti nëtë sënë́ntamainun ꞌiti ꞌain.

Daniel 4:32 ပူးပေါင်းရင်းမြစ်များ

Salmos 115:3

Nun ꞌIbu Dios ax ka naínu ꞌikën; usa ꞌixun ka añu kara ꞌaisa tania akamabi ꞌakëxa.

Éxodo 8:10

—Imë́ishibi kamina nëtë́miti ꞌain —kixun ka faraónën kakëxa. Kakëxun ka Moisésnën kakëxa: —Usakian ꞌakëbëtan kamina ꞌunánti ꞌain, an nun Diosan ꞌakësaribi okían an ñu ꞌakë bëtsi Dios ka ꞌaíma ꞌikë kixun ka Moisésnën kakëxa.

Éxodo 9:14

mi xukëbëtama kana ënu ꞌatëkënkin ñu ꞌaisama, mi ꞌatima onun xukin bëtsin ꞌakësamaira okin ꞌën an mi ñu ꞌaxunkë unikama ꞌimainun min unikamanu xuti ꞌain, ësokin ꞌaia kamina bëtsi Dios ꞌësaribi ka ënë menu ꞌaíma ꞌikë kixun ꞌunánti ꞌain.

Éxodo 9:29

Ësai kia ka Moisésnën kakëxa: —ꞌËx ënë ëmanuax chikíkian kinshi kana, ꞌën mëkën manámi okin Nukën ꞌIbu mi ñukáxunti ꞌain. Usakin mi ñukáxunkëxun ka matsi bëruñu pakëkë a ꞌimainun kanákamë ꞌëo sharakiru sharakirukë a nëtë́miti ꞌikën, usakian ꞌaia kamina min ꞌunánti ꞌain ënë mex ka Nukën ꞌIbun unio ꞌikë kixun.

Isaías 40:15

An iskëx ka bëtsi bëtsi menu ꞌikë ëmakamanu ꞌikë unikamax ꞌumpax tuskia iskë usaratsushi ꞌikën, ꞌianan ñu bëru ꞌitsama anun ñu tupunkë anu ꞌarukë usaribi ꞌikën; bëtsi bëtsi unikama parúmpapa nasínua ꞌikë ax ka masi bëru ꞌitsaira ꞌiskësa usaribi ꞌikën.

Isaías 40:17

Kamabi menu ꞌikë ëmakamax ka an iskëx ñuumara ꞌikën; usa ꞌaish ka an iskëx anu ꞌikë unikamax kushima ꞌikën.

Isaías 45:3

ꞌËn kana mi ꞌinánti ꞌain ñu kupíkë unin unëkin nankë akama ꞌianan, unëkian unin ꞌunántisama okin anu nantinu nankë aribi mi ꞌinánti ꞌain. Usakin ꞌinánkëxun kamina min ꞌunánti ꞌain ꞌax ka Nukën ꞌIbu ꞌianan, Israel unikama Dios a ꞌikë kixun, usa ꞌain kana min anën mi kuëan.

Daniel 2:21

An ka nëtëkama bëtsionan, usai ꞌiti ñukama aribi usai ꞌitiokin nania, usaribiokin ka ꞌapukamaribi ꞌapu ꞌimiananbi ꞌapu ꞌimima, ꞌianan sinánñu unikama a sinánñuira ꞌinun ꞌimianan, uisakin ka ñu ꞌati ꞌikë kixun ꞌunánun uni ꞌimikë a ꞌain.

Daniel 4:31

Usai banai sënë́nxumabi ka ꞌapun naínuaxa ësai achúshi bana kia kuakëxa: Ënë bana kamina kuati ꞌain ꞌapu Nabucodonosor anumi ꞌapu ꞌikë ëma ax ka minama ꞌikën;

Daniel 5:21

Usakin ꞌatankëxun ka uni ꞌikëbi unikamanua chikinkin achúshi ñuinasa ꞌinun ꞌimiakëxa; usokëx ka ñuina raëkëma ꞌimainun vaca bënëkamabëtan pasto pi nitsia ka, nibítan ꞌibúkin aín nami chabókëxa, usa ꞌain ka Dios manámi ꞌikë an kushiira ꞌixun kamabi menu ꞌikë unikama ꞌakianan, ui kara ꞌapu ꞌimitisa tania a ꞌapu ꞌimia kixuan anun ꞌunánti nëtë ꞌitámainun ꞌakëxa.

Josué 4:24

An ka usakin ñu ꞌakëxa kixun ka kamabi menu ꞌikë unin Nukën ꞌIbu ax ka kushiira ꞌikë kixun ꞌunánti ꞌikën, usa ꞌikë kamina ashi mitsun Nukën ꞌIbu ikë rabiti ꞌain.