Daniel 2:48 - Kashibo-Kakataibo Biblia

⁴⁸ Usa ꞌain ka ꞌapun Daniel axira ꞌapu ꞌinun ꞌimikin ꞌitsaira ñu kupíkëkama ꞌinaínshianan; Babilonia ëmanu ꞌapu ꞌinun anëakëxa, anëanan ka a menu ꞌikë ëmakanu ikë an ñu ꞌunánkë unikaman kushi ꞌimiakëxa.

Daniel 2:48 ပူးပေါင်းရင်းမြစ်များ

2 Samuel 19:32

Ax ka kaniakëkë ꞌaish, ochenta baritia ñu ꞌiakëxa, an ka ꞌapu David Mahanaim, kakë ëma anu tsotia kamabi aín piti ꞌakinkin ꞌinánkëxa, usa ꞌaish ka ax ñu ñuira uni ꞌiakëxa.

2 Reyes 5:1

Anu ka achúshi uni Naamán kakë Sirianu ꞌikë ꞌapun suntárukaman kushi ꞌiakëxa a ka upíokin aín ꞌapun nuibakëxa, a unin ka Diosan ꞌakinkëxun Sirianu ꞌikë unikama axa ami nishkë unikaman ꞌaiabi an ira abámikin aín suntárukamabëtan ꞌakë uni ꞌiakëxa. Usa ꞌaínbi ka a unix an nami chëkimikë ꞌinsínñu ꞌiakëxa.

Job 1:3

ꞌimainun ka ax siete mil ovejakama ꞌianan tres mil camello, ꞌimainun a ñu mëëmikë vaca bënë rabë́, rabë́ ax quinientas ꞌiakëxa, ꞌimainun ka burro aín xanu kamañuribi ꞌiakëxa. ꞌIanan ka an ñu mëëxunkë unikama ꞌimainun xanukama an ñu ꞌaxunkë kamañuribi ꞌiakëxa. Usa ꞌaish ka ax ñuñuira uni a menu ꞌiakëxa.

Daniel 2:6

Usa ꞌain kana mitsunmi ꞌën namákë uisakin namákë kara ax ꞌikë kixun a pain ñuixunti kuëënin, usokëxun kana ꞌën mitsu ꞌinaínshianan, ꞌitsaira ñu chabu ꞌinánti ꞌain. Usa ꞌain kamina, ꞌën namákë a ñuixunkin uisakin namákë kara ax ꞌikë kixun ꞌë kati ꞌain.

Daniel 3:1

ꞌApu Nabucodonosornën ka achúshi ñu tankian kuri ꞌanun ꞌamiakëxa. Aín chaxkë́ ka treinta metro manan ꞌinun ꞌakë ꞌiakëxa ꞌimainun ka rabë́ ꞌimainun achúshi metro aín naxba ꞌinun ꞌamiakëxa, ꞌamitankëxun ka Dura kakë me sapan anua achúshi ëma cha Babilonianu ꞌikë anu nitsínun aín unikama kakëxa.

Daniel 3:12

Usaími kikë ax ka asábi ꞌikën, usa ꞌaínbi ka uiti judíos karamina mix ꞌapu ꞌixun Babilonia ëmanu ꞌikë ñukama an bërúanti anëa akaman mix kikë banakama tainsama tania, usa ꞌixun ka a rabiti ñukama rabianan mix ꞌapu ꞌixun kuri amixun nitsinmikë aribi rabitisama tania. Akamax ka Sadrac, Mesac ꞌimainun Abed-negó akama ꞌikën.

Daniel 3:30

Usakin ꞌatankëxun ka ꞌapun rabë́ ꞌimainun achúshi uni bënákama a Babilonia menu ꞌikë ëmanua atux raíri ꞌapu kamasamaira ꞌinun anëakëxa.

Daniel 4:6

Usai ꞌikin kana ꞌë isia ukanun kamabi an ñu ꞌunánkë unikama Babilonia ënu ikë unikama kamian, atua uisakin namákë kara ꞌën namákë ax ꞌikë kixun ꞌë ñuixuni unun kamian.

Daniel 4:9

Beltsasar an ñu tankë unikaman kushi ꞌën kana ꞌunanin Dios upíira aín bëru ñunshin an ka mi ꞌakinia, usa ꞌixun kamina min kamabi ꞌunántisama ñu abi ꞌunanin kixun kan. Usa ꞌain kamina ꞌën namákin iskë a mi ñuixunkin kamainun kuati ꞌain, kuakin kamina uisakin namákë kara ꞌën namákin iskë ax ꞌikë ꞌë ñuixunti ꞌain.

Daniel 5:11

mix ꞌapu ꞌain ka achúshi uni dioskaman bëru ñunshinan ꞌakinkë anu ꞌikën. Min papa ꞌapu ꞌain ka a unin upíokin sinánkë ꞌiakëxa, usa ꞌaish ka ax ñu ꞌunáinra ꞌianan an ñu tankë ꞌaish dios kamasaribi ꞌikën, usa ꞌikë ka min papa Nabucodonosornën a uni Daniel kakë an ñu tankë unin ꞌapu ꞌimainun an ñu ñunshinan kushin ñu ꞌakë ꞌianan an ñu ꞌunánkë ꞌimainun uisai kara ñu ꞌia an tankë ënë menu ꞌikë atun kushi ꞌinun anëakëxa,

Daniel 5:16

Usa ꞌaínbi kana, ꞌën min ismina bëtsi ñukama ꞌimainun mënioisama tëira ñu mënion kixun ñuia kuan. Usa ꞌain kana minmi a bana istankëxun uisai kara a bana kia ꞌë ñuixunkëxun, mi chupa upíira upí ꞌitánun kuënëokë a mi pañumiti ꞌain, ꞌamianan kana kuri, manë risi, ꞌakë a mi tëñumianan ꞌëx ꞌikësaribitimi ꞌëx ꞌapu ꞌain ꞌapu ꞌinun mi ꞌimiti ꞌain.

Daniel 5:29

Usakin kakëxun ka ꞌapu Beltsasarnën, aín unikama Daniel chupa upíokin kuënëokin ꞌakë pañumianan kuri manë risi tëñuti tëñuminun kakëxa, kanan ka kamabi unikama bënë́kinshi, Danielnëx ka ꞌësaribi ꞌinun ꞌapu ꞌiti ꞌikë kixun kamabi unin kuanun kuakokëxa.

Daniel 5:7

Usai ꞌi munuma kuënkëni ka an ñu tankë uni ꞌimainun an ñu ꞌunánkë unikama ꞌimainun an uisai kara ñu ꞌiti ꞌikë an ꞌunánkë unikama Babilonia anu ꞌikëkama ka uti ꞌikë kiax kiakëxa: —Uin kara kuënëokë a isti ꞌikën, istankëxun uisai kikë, kara a ꞌë ñuixunia a unix ka chupa upíira okin kuënëokë a pañumikë ꞌiti ꞌikën, ꞌianan ka manë risi kuri ꞌakë tëñumikë ꞌaish ꞌësaribi ꞌaish ꞌë kaxú ꞌapu ꞌiti ꞌikën.

Números 24:11

¡Usa ꞌain kamina min xubunubi kuanti ꞌain! ꞌËn kana uisa ñu kaina kuëëni akamabi mi ꞌinánti sinánkë ꞌian, ꞌaínbi ka Nukën ꞌIbun usakinmi ꞌati mi sinánxunkëma ꞌikën.

1 Samuel 17:25

abati ka kikankëxa: ¿Uni ax ka amiribishi chikirakëtia ka iskan? ¡Ax ka nu amiribishi ꞌakatsikixun katëkëni uaxa! Uin kara a uni ꞌaia aka, nun ꞌapun ꞌitsaira ñu kupíkë ꞌinánan, aín bëchikë xanuribi aín xanu ꞌinun ꞌinánti ꞌikën, ꞌimainun ka aín aintsikaman ꞌapu kupíokë aribi kupíoxunma ꞌanun ꞌamitima ꞌikën.

1 Samuel 2:8

Nukën ꞌIbun ka ñuñuma uni ñuñu ꞌinun ꞌimia ꞌimianan ka kuaínbëkini nitsi ñu ñukákanankë uni, atúxribi ñuñu unikamabë ñuñu ꞌi ꞌapu ꞌinun ꞌimiti ꞌikën ꞌimikin ka, atux tsókë anuribi tsónun ꞌimiti ꞌikën; Dios ax ka kamabi ñun ꞌibu ꞌianan kamabi men ꞌIbu ꞌikën, usa ꞌixun ka an me uniokin anubia ꞌitinu nankëxa.