Daniel 2:28 - Kashibo-Kakataibo Biblia

²⁸ Usa ꞌaínbi ka naínu achúshi Dios an ꞌunántisama ꞌikëbi ñu ꞌunánkëira anu ꞌikën, an ka mi ꞌapu ꞌikë uisai karamina ꞌinuxun ꞌain mi ꞌunánmiaxa. Usa ꞌain kana ꞌën ꞌapu ꞌixunmi ꞌuxun namákë akama mi ñuixunti ꞌain:

Daniel 2:28 ပူးပေါင်းရင်းမြစ်များ

Génesis 40:8

—Nu rabë́xun kananuna ënë imë́ ësokin namán, ꞌaínbi ka uisakin namákë kara ax ꞌikë kixun an nu ñuixunti ꞌaíma ꞌikën kakëxun ka Josénën. —¿Diosan kara uisakin namákë kara min namákë ax ꞌikë kixun mi ñuixuntima ꞌik? —Kixun atu kakëxa katankëxun ka Josénën—. ꞌË kamina min namákëkama ñuixunti ꞌai kixun kakëxa.

Génesis 41:16

Kakëxunbi ka Josénën —ax ka ꞌënbi ꞌakëma ꞌiti ꞌikë —kixun kakëxa—; ꞌaínbi ka Nukën ꞌIbu Diosan kuni mix ꞌapu ꞌaish upí ꞌinun mi ñuixunti ꞌikën.

Génesis 41:25

Usakian kakëxun ka faraón Josénën kakëxa: —Minmi ꞌapu ꞌixun rabë́okin namákë ax ka achúshi ñu ishi ñui kikë ꞌikën. Diosan ka mi ꞌunánmisa tania añu kaina ꞌati ꞌai kixun.

Génesis 49:1

Usa ꞌain ka Jacobnën kamabi aín bëchikëkama anua unun kixun kamiakëxa: “Kamikëxa anu rikuatsinkë ka ꞌë ꞌurama kamina ukanti ꞌain kixun kakëxa, bërí kana usaími ꞌëx ñukëbë ꞌikanti bana mitsu ñuixunti ꞌain:

Salmos 115:3

Nun ꞌIbu Dios ax ka naínu ꞌikën; usa ꞌixun ka añu kara ꞌaisa tania akamabi ꞌakëxa.

Isaías 2:2

Nëtë xënibukëbë ka anúan ꞌiti nëtë ꞌikëbë anua Diosan xubu ꞌikë bashi ax bëtsi bashikamasamaira ꞌinuxun ꞌaia. Usa ꞌain ka a bashixa bëtsi bashikamasama ꞌain bëtsi menu ꞌikë kamabi unikamax anu uti ꞌikën;

Daniel 1:20

Anuxun ka kamabi ñu ꞌunánkëira ꞌiti bana ꞌimainun, sinánñuira ꞌiti banakama a ꞌapun ñukákëxa, ñukákinbi ka an ñu ꞌunánkëira mërakëxa, usa ꞌaish, a menu ꞌikë an ñu tankë ꞌimainun an ñu ꞌunánkë unikamabëtan sënë́nmaira ꞌikë mërakëxa.

Daniel 2:18

ñuixuntankëxun ka Dios naínu ꞌikë a kamina uisakin kara ꞌapun namáxa a ñuixunua nu ꞌakinun ñukati ꞌai kixun kakëxa, usakin ñukákëxuan nu ꞌakinia ka an ñu ꞌunánkë unikama Babilonianu ꞌikë akama këñun nuribi ꞌatima ꞌikën.

Daniel 2:22

Min kamina unían ain sinan ꞌukëmëu unántisama okin sinánkë abi ꞌunánan; bëánkibukënu ꞌikë ñu abi ꞌunánan, kamina mix an ñu pëkakë tirí usaribi ꞌain.

Daniel 2:44

Usa ꞌain ka ënë ꞌapukaman, tsókëpan aín unikama ꞌapu ꞌixun ꞌakinkëbëtan Dios naínu ꞌikë an achúshi me anu ꞌapu ꞌikë uinsaranbia bëtsi menu ꞌikë ꞌapukaman masókin atun sinánkësa okin ꞌanun ꞌimitima ꞌikën, usa ꞌixun ka ainra kamabi këñukin bëtsi menu ꞌikë ꞌapukama ꞌatankëx axira uínsarabi këñútimoi ꞌapu ꞌiti ꞌikën.

Daniel 2:45

Usa ka minmi namákin aín bashinuaxa uínbi tarankëmaxi ukian me putusa ꞌitánun manë tunan, ꞌianan manë uxua, manë panshian, me tëi, ꞌimainun kuri, akama chakabëtsini aín bashinuax ꞌia iskë ax ꞌikën. Dios chaiira ꞌaish kushiira an ka usaía ꞌiti ñukama mi ismiaxa. Usa ꞌain ka minmi namákë ax asérabi ꞌimainun ꞌën mi ñuixunkë axribi asérabi ꞌikën.

Daniel 2:47

Usokin ꞌamitankëxun ka Daniel kakëxa: —Asérabi ka mitsun Dios ax chaiira ꞌaish bëtsi dios kamasamaira ꞌikën; ax ka ꞌapukaman ꞌIbuira ꞌimainun, an ꞌunántisama ñukama abi ꞌunania, usa ꞌain kamina ꞌunántisama ënë ñu uisai ꞌiti kara ax ꞌikë kixun min ꞌunanin.

Daniel 4:5

ꞌAínbi kana achúshi imë́ ꞌuxi ꞌibúxunbi ꞌatimakin namán, namáxun ꞌën bëtsiokin sinánkëkama anunbi ꞌitsaira rakuëan.

Oseas 3:5

Usai pain ënë ñukama ꞌikë ꞌain ka Israelkaman ami sinanatëkënkin, Nukën ꞌIbu Dios rabiti sinántëkënti ꞌikën, ꞌimainun ka atun ꞌapu ꞌia David aín rëbúnki achúshi atun ꞌapu ꞌiti ꞌikën. Anuan ënë nëtëkama këñuti a nëtë ꞌikëbëtan ka ami rakuë́kin Dios upíokin a ꞌakinun kixun ñukáti ꞌikën.

Amós 4:13

Nukën ꞌIbu Dios an bashikama unionan suñu bëkinun ꞌimikë, ꞌimainun uisa ñukama kara ꞌakatsia akama uni ꞌunánmikë, ꞌianan an bë́anbëankikë anubi nëtë xabá ꞌimianan, kamabi menu ꞌikë bashi manankama a manami anubi ꞌikë ax ka kamabi kushiñuira Dios a ꞌikën, ax ka ain anë ꞌikën.

Números 24:14

Asabi ka usa ꞌain kana ꞌën menubi kuanti ꞌain; ꞌaínbi kana kuanuxun pain ësokin mi kain, uisai kara a unikamabë min rëbúnkikama ꞌinuxun ꞌaia.

Mateo 6:9

Usa ꞌain camina ësaquin cai Nucën Papa Diosbë banati ꞌain: Nucën Papa Dios, naínu ꞌicë, mix camina asérabi min sinan upíira ꞌain. Usa camina mix ꞌai quixun ca camabi uni mi ñui upí banáinshi banati ꞌicën.

Deuteronomio 31:19

Bërí kamina anun kantati bana ënë ꞌën mi kamainun kuënëoti ꞌain, kuënëotankëxun kamina minbi Israel unibu anun ꞌëmi kantanun ꞌunamiti ꞌain, usa ꞌain ka a kanta kantakin uisai kara kia kuankin ꞌën atu kuainsama tania tëmëramikëxun a sinánti ꞌikën.

Deuteronomio 4:30

Uínsaran kaina mitsux bëtsi ñu rabi tëmëratankëxbi amiribishi a ëni Nukën ꞌIbumi sinanatëkënkani anun ka

2 Timoteo 3:1

Ësaquinribi camina ꞌunánti ꞌain, anúan Jesucristo utëcënti nëtëa ꞌurama ꞌain ca aín unicamax ꞌaisamaira tëmëranuxun ꞌaia.

Hebreos 1:1

Bëráma ca Nucën Papa Diosan nucën raracaman aín cushi ꞌunánan uisai cara aín uni ꞌiti ꞌicë quixun ꞌunánun, Nucën Papa Dios, an sinánmicë bana uni ñuixuncë unicamabë bananan namámiquin canan, bëtsi bëtsi ñu ismiquin canan, bëtsi bëtsi ñu ꞌaquinribi atu ismiacëxa.

2 Pedro 3:3

Ësoquin camina ꞌunánti ꞌain, anúan Jesucristo utëcënti nëtëa ꞌurama ꞌain ca ꞌitsa uni aín cuëëncë ñuishi ꞌai, anun Jesucristonan ꞌiti bana ꞌatimaquin ñui, ami cuaiti ꞌicën.

Apocalipsis 1:1

Nucën Papa Diosan ca ënë quiricanu cuënëocë ñucama Jesucristo ismiaxa, xënibuiracëma ꞌaínshi ca ësai ꞌiti ꞌicë quixuan aín unicama isminun. Nucën Papa Diosan a ismicë ñucama aín unicaman ꞌunánun ca Jesucristonën aín ángel achúshi Juan isminun xuaxa.