Colosenses 3:4 - Kashibo-Kakataibo Biblia

⁴ Cristo, anun nux tsóti, axa upíira ꞌianan cushiira ꞌaish utëcëncëbë camina nëtë́timoi abë ꞌianan asaribi upíshi ꞌiti ꞌain.

Nukën 'Ibu Diosan ain unikama 'inan ain bana

⁴ Cristo, anun nux tsóti, axa upíira 'ianan cushiira 'aish utëcëncëbë camina nëtë́timoi abë 'ianan asaribi upíshi 'iti 'ain.

Colosenses 3:4 ပူးပေါင်းရင်းမြစ်များ

Salmos 73:24

ꞌanan kamina min bana kikësabiokin ꞌanun ꞌë ꞌunánmiakën, usa ꞌain kamina anun ñuti nëtë ꞌikëbëtan minan ꞌikë, upiokin kamina ꞌë ñu ꞌaxuan kakin biti ꞌain.

Mateo 13:43

Usai ꞌicëbë ca barin uruquian pëcacëxa upí ꞌicësaribiti an Nucën Papa Diosan bana ꞌacë unicamax abë ꞌaish upíira upí ꞌiti ꞌicën. An aín pabitan ënë bana cuacë unin ca aín nuitunënbi sinánquin cuati ꞌicën.

Lucas 17:30

Lot ꞌaían ꞌiá usaribiti ca uni ꞌinux Nucën Papa Diosnuax uá ꞌaish, ꞌëx anun utëcënti nëtë, anúan camabi unin ꞌë isti, ax ꞌiti ꞌicën.

Juan 11:25

Cacëxun ca Jesusan cacëxa: —ꞌËx cana an uni baísquimiti a ꞌain, ꞌianan cana anúan uni ainan ꞌaish Nucën Papa Diosbë ꞌiti a ꞌain. Axa ꞌëmi catamëcë uni, ax ca bama ꞌaíshbi tsónux baísquiti ꞌicën.

Juan 14:3

Mëníoxunbëtsini cana anumi ꞌëbë ꞌinun mitsu bitsi utëcënuxun ꞌain, ꞌëx anu ꞌicë anumi mitsux ꞌëbë ꞌinun.

Juan 14:6

Cacëxun ca Jesusan cacëxa: —ꞌËx cana anun cuanti bai, a ꞌain. ꞌIanan cana an Nucën Papa Diosan sináncë ñucama ꞌunánquin ax cuëëncësabi oquin ꞌacë, a ꞌain. ꞌIanan cana an uni anun tsóti nëtë ꞌináncë, a ꞌain. Uix cara Nucën Papa Diosnu cuainsa tania ax ca ꞌëmi pain catamëti ꞌicën.

Juan 17:24

Papan, ënë nëtë unitisama pan ꞌain camina ꞌë nuibaquin misaribi ꞌinun min cushi ꞌë ꞌináncën. Usa cana ꞌëx ꞌai quixun isnúxa minmi ꞌë ꞌináncë unicamax anu ꞌëx ꞌicë anuribi ꞌëbë ꞌiti cana cuëënin.

Juan 20:31

Jesús ax ca asérabi Cristo, Nucën Papa Diosan Bëchicë ꞌicë quixun ꞌunanimi ami catamëti mitsux xënibua ꞌaínbi Nucën Papa Diosnan ꞌinun cana ënë banacama cuënëon.

Hechos 3:15

Usoquin camina mitsun an unicama Nucën Papa Diosnan ꞌinúxa abë ꞌinun ꞌimiti, Jesus, a uni ꞌamian. Usoquinmi ꞌamicë́xa bamacëbi ca Nucën Papa Diosan a baísquimiaxa. Bamacëa baísquimicë cananuna nun asérabi isan.

Romanos 8:18

ꞌËn cana —asérabi ca usai ꞌiti ꞌicë —quixun ꞌunanin. Ënë nëtënuax Cristonan cupí tëmëracë ꞌixunbi cananuna Cristobë aín nëtënu ꞌaish cuëënquin —ꞌën tëmërati ca asábi ꞌiaxa —quixun sinánti ꞌain.

Romanos 8:19

Cristo utëcëntamainun ca axbi ꞌiti ꞌaíshmabi, usai ꞌitioquian Nucën Papa Diosan mëníosabi oi camabi ñu tëmëranan cëñutia. Unin ꞌucha cupí usai tëmëranan chëquiti ꞌixunbi ca camabi ñu ꞌimainun camabi unínribi anúinra ꞌaímai tëmëranan chëquiti nëtë cainia.

1 Corintios 1:7

Usa ꞌixunmi Nucën ꞌIbu Jesucristo utëcënti nëtë cainia ca Nucën Papa Diosan aín unicama ꞌaquincësaribi oquin ami ꞌunánun mitsu ꞌaquinia.

1 Corintios 15:43

Bamacë maíncëx ꞌaisama ꞌitancëxbi ca baísqui upíira upí ꞌiti ꞌicën. Bamacë maíncëx aín cushi ꞌaíma ꞌitancëxbi ca baísqui cushi ꞌiti ꞌicën.

2 Corintios 4:17

Cananuna ꞌunanin, ënë nëtënuaxnu tëmëracë ꞌaínbi ca a ñucamax bënëtishi cëñutia. Tëmëracëbi ca nun sináncësamaira oquin Nucën Papa Diosan nux tëmëracë cupínu abë́ ꞌaish chuámarua tani cuëëinra cuëënun nu ꞌimiti ꞌicën.

Gálatas 2:20

ꞌUchatëcënuxunma ashiquin ꞌën ꞌuchacama ëni cana Cristobë bamacësa ꞌain. Usa ꞌaish cana ꞌëshima, Cristo ax ꞌëbë ꞌain, aín cushínbi ax cuëëncësa oíshi ꞌin. Nucën Papa Diosan Bëchicë, axa ꞌë nuibati bamatsianxmabi ꞌën ꞌucha cupí bama, ami catamëti cana ax ꞌëbë ꞌain, ax cuëëncësabi oi ꞌin.

Filipenses 3:21

Nux bamai chëquiti ꞌicëbi ca ax uquin nu axa bamax baísquiasaribi oquin, asaribi ꞌinun, nu bëtsi oti ꞌicën. Usonan ca aín cushi anun ax camabi ñun ꞌibu ꞌiti anúnribi nu bëtsi oti ꞌicën.

1 Tesalonicenses 4:17

Usacëbë cananuna Nucën Papa Diosan ꞌimicëx, bamacëmacama nuxribi atubëbi biranani manámiquiquianx, nëtë cuin mëúcüax, Nucën ꞌIbu Jesúsbë birananuxun ꞌain. Usaquiani cuanx cananuna Nucën ꞌIbu Jesucristobë xënibua ꞌaínbi ënánantimoi ꞌinuxun ꞌain.

1 Timoteo 6:14

Nucën ꞌIbu Jesucristo utëcënti nëtë ꞌitámainuan xënibua ꞌaínbi uínbi min camina ñu ꞌatima ꞌacë quixun sinánti rabanan camina ñu ꞌaisama ꞌaquinma, ꞌën mi cacë bana bëtsi oquinma ax quicësabi oquinshi ꞌati ꞌain.

2 Timoteo 1:1

ꞌËx cana Pablo, aín bana ñuixunuan Jesucristonën caísa ꞌain, Nucën Papa Dios cuëëncësabi oquin. —Jesucristomi catamëtíshi ca uni Nucën Papa Diosnan ꞌiti ꞌicë —quixun unicama canun ca Jesucristonën ꞌë ꞌimiacëxa.

2 Timoteo 4:8

Usa ꞌixun cana Nucën ꞌIbu Jesucristonën utancëxun, upí oquin ax cuëëncësabi oquin ꞌën ꞌacë cupí cara uisaira ꞌë ꞌimiti ꞌicë quixun isti ꞌain. An ca asérabi aín quicësabi oquin ꞌati ꞌicën. Usa ꞌixun ca ꞌëishima, an axa uti cuëënquin caíncë unicamaribi, utancëxun uisaira oquin cara aturibi ꞌimiti ꞌicë usoquin ꞌimiti ꞌicën.

Tito 2:13

Usaquin ꞌunánmianan ca nu ꞌunánmia, nux ainan ꞌixun cananuna ax quiásabi oía an nu ië́micë Jesucristo, ax Nucën Papa Diosribi ꞌaish, aín cushibëbi utëcënti nëtë caínti ꞌai quixun.

Hebreos 9:28

Usaribiti ca Cristo ënë menuax achúshitishi bamacëxa. Ax ꞌuchañuma ꞌaíshbi ca camabi unin ꞌucha ainansa ꞌaish tërë́ncë ꞌinun bamacëxa. Bamatancëx baísquitancëx ca aín Papa Diosnu cuan ꞌaish amiribishi ënë nëtënu utëcënti ꞌicën. Camabi unin ꞌucha cupí bamatëcëni aima ca an aín uti caíncë unicama abëa ꞌinun bitsi utëcënuxun ꞌaia.

1 Pedro 1:13

Usa ꞌain camina Jesucristonan ꞌixun upí oquin sinani ax quicësabi oi ꞌiti ꞌain. ꞌIquin camina Nucën Papa Diosan ca abëmi aín nëtënu ꞌiti mëníocëxa quixun sinani cuëënquin Jesucristo anun uti nëtë caínti ꞌain.

1 Pedro 5:4

Usoquin ꞌaia ca Jesucristo, unin ꞌacësamaira oquian an aín unicama bërúancë, an utëcënquin mitsu —asábi ca —quixun catancëxun aín nëtënuaxmi xënibua ꞌaínbi abë cuëënun mitsu ꞌimiti ꞌicën. Ënë nëtënuax cuaiquin canania uisa ñu cara ꞌináncëxun bitsia uni cuëëncëbëbi ca an bicë ñu chëquia. Usaía uni ꞌicë ꞌaínbi camina mitsux xënibua ꞌaínbi Nucën Papa Diosbë ꞌaish cuëënti ꞌain.

1 Juan 2:28

ꞌËn bëchicësa ꞌicë, cana mitsu cain, utëcënquian Jesucristonën nu upí isti cupí camina camabi nëtën an sinánmicësabi oquin sinánti ꞌain, axa ucëbë rabíntima cupí.

1 Juan 3:2

ꞌËn nuibacë xucë́antu, bërí cananuna Nucën Papa Diosan bëchicë ꞌain. Usa ꞌicëbi ca uisaira caranuna ꞌinuxun ꞌai quixun an nu ꞌunánmicëma pan ꞌicën. Usa ꞌaínbi cananuna ꞌunanin, Jesucristo utëcëncëbëtan cananuna upí oquin uisa cara ax ꞌicë quixun isti ꞌain. A isi cananuna asaribi ꞌiti ꞌain.

1 Juan 5:12

Uinu ꞌicë unix cara Nucën Papa Diosan Bëchicënan ꞌicë, a unix ca usaribiti nëtë́timoi Nucën Papa Diosbë ꞌia. Usa ꞌaínbi ca uinu ꞌicë unix cara aín Bëchicënanma ꞌicë, a unix xënibua ꞌaínbi Nucën Papa Diosbë ꞌima.

Judas 1:24

An ñu ꞌatima ꞌaxúnmami ꞌanun mitsu bërúanan an iscëxmi upí ꞌaish cuëëni aín nëtënu abë ꞌinun mitsu ꞌimiti, ax ca Nucën Papa Dios ꞌicën.

Apocalipsis 2:7

An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën. An ꞌëmi catamëquin ꞌëx cuëëncësabi oi ꞌiti ëncëma uni, a cana Nucën Papa Diosan nëtënu ꞌicë i, aín bimi a cüax bamatima, a cunun ꞌinánti ꞌain.

Apocalipsis 22:1

Usaquin ꞌë ismitancëxun ca angelnën anua Nucën Papa Dios ꞌimainun Carnero ꞌicësaribitia unin ꞌucha cupí bama, ax ꞌicë, anuaxa baca aín ꞌunpax bëxnan bëxnánquicë chiquitia ꞌë ismiaxa.

Apocalipsis 22:14

Ui unicamax cara a ëmanu atsínxun, anu ꞌicë anun uni bamatimoi tsóti i bimi biti sinani, chupa uxuira chuañumasa ꞌinun aín nuitua upí ꞌiminun Jesucristomi catamëtia, acamax ca anu ꞌaish cuëëinra cuëënti ꞌicën.