Colosenses 2:8 - Kashibo-Kakataibo Biblia

⁸ An uni bëtsi bëtsi bana ñuixunquin paráncë unicaman mitsu, Cristomi catamëcë ꞌicëbi, ami manúnun quixun paránti rabanan camina bërúancati ꞌicanin. A unicaman ca Cristo ñuiquinma atúnbi sinánxuan unin ñuicë bana ꞌimainun ënë nëtënu ꞌicë ñu sinánti, a banacamaishi uni ꞌunánmia.

Nukën 'Ibu Diosan ain unikama 'inan ain bana

⁸ An uni bëtsi bëtsi bana ñuixunquin paráncë unicaman mitsu, Cristomi catamëcë 'icëbi, ami manúnun quixun paránti rabanan camina bërúancati 'icanin. A unicaman ca Cristo ñuiquinma atúnbi sinánxuan unin ñuicë bana 'imainun ënë nëtënu 'icë ñu sinánti, a banacamaishi uni 'unánmia.

Colosenses 2:8 ပူးပေါင်းရင်းမြစ်များ

Mateo 10:17

Axa mitsumi nishcë unicaman ca judíos unibunën ꞌapucamanu mitsua ꞌatimonun buánti ꞌicën. Usonan ca anua judíos unicama timë́ti xubucamanuxun mitsu rishquiti ꞌicën. Usa ca uni ꞌicë quixun ꞌunani camina ami catamëtima bërúancati ꞌain.

Mateo 16:6

Manubiancëbë ca Jesusan cacëxa: —Fariseo unibu ꞌimainun saduceo unibunëxa anua pán chamiti ñusa ꞌicë ax ꞌicësa usaribi ꞌitin rabanan camina bërúancati ꞌain.

Mateo 7:15

Bëtsi bëtsi unin ca mitsu parántisa tanquin —Nucën Papa Diosan sinánmicëxun cana mitsu bana ñuixunin —quiquinbi anbi sináncë bana ñuixunia. Usa unin ñuicë bana camina cuatima ꞌain. A unicamax ca ꞌunánmaratsu ñuinasa ꞌaíshbi aín nuitu mëu ꞌatima sinánñu ꞌaish pianancë ñuinasa ꞌicën.

Hechos 17:18

Cananmainun ca raíri unicama usa isa uni ꞌiti icë quixun epicúreo cacë unicaman bana ñuia cuacë, ꞌimainun estoico cacë unicamanribia bëtsi bana ñuia cuacë, a unicamaxribi uax Pablobë banacëxa. Abë banatancëx ca raírinëx quiacëxa: —¿Añu cara banañuira ꞌixun ënë unin nu ñuixuinsa tanin? Quicëbë ca raírinëx Pablonëan Jesús ñuianan —bama ꞌaish ca uni baísquiti ꞌicë —quixun cacëxun cuax quiacëxa: —Nun rabicë diosma, bëtsi dios ñui sapi ca quia.

Hechos 17:32

Usaquian bamatancëx ca Jesús baísquiacëxa quixun ñuia cuati ca uni raírinëx Pablomi cuaiacëxa. Cuaimainun ca raírinën Pablo cacëxa: —Minmi ñuicë bana ënëmi ñuitëcënia cananuna bëtsi nëtën cuatëcënti ꞌain.

Romanos 16:17

ꞌËn xucë́antu, cana mitsu cain, bëtsi bëtsi unix Jesucristomi catamëcë ꞌaish mitsubë timë́cë ꞌixunbi ca an mitsu bana ñuixuncë unin ꞌunánmicësabi oquin ꞌaima. Usa unin ca uni raíri bëtsibë bëtsibë cuëbicanánmiquin ꞌatimaquin sinánun ꞌimia. Usai ꞌicë uni abë camina nitima ꞌain. Abë camina ënánanti ꞌain.

1 Corintios 10:12

Nux cananuna usai ꞌitima ꞌai quixun sinanibi camina bërúinraoracati ꞌain, usai atu mina ꞌin.

1 Corintios 8:9

ꞌAisa tanquin camina uni itsin usa ñu rabiquin ñuina ꞌacë aín nami piti ꞌain. Usa ꞌaínbi camina an upí oquin —a ñux ca unin ꞌacë ꞌaish ñuishi ꞌicë —quixun ꞌunáncëma uni a ꞌuchamiti rabanan sinánti ꞌain, —cana pitima ꞌai —quixun.

2 Corintios 10:5

Usaribi oquin cananuna unían ꞌatimaquin nu ñuicë bana, ꞌimainun unin anbi sinánquin, Nucën Papa Diosan bana cuaxunma ꞌanun caquin ꞌatimaquin sinánmicë banacamaribi, Nucën Papa Diosan cushínshi ñancáishi ꞌitánun nëtë́nti ꞌain. Usa ꞌain cananuna aín cushínbia ꞌimicëxun Cristo cuëëncësabi oquinshi ꞌati sinanin.

Gálatas 1:14

Usoquin ꞌanan cana judíos unin sináncësa oquinshi sináncën. ꞌËn aintsi ꞌëbë sënë́nburibi an ꞌacësamaira oquin cana uni apáncaman ꞌë ꞌunánmicësa oquinshi ꞌën chaitinën ñuiasabi oquin ꞌaisa tancën, ꞌëx asérabi judío uniira ꞌixun.

Gálatas 4:3

A tuásaribi ca Jesucristo ucëma pan ꞌain judíos unicama ꞌiacëxa. Usa ꞌixun ca Moisésnën cuënëo bana quicësabi oquin ꞌanan aín nuitu upí ꞌinúan unin sináncë ñuishi ꞌati sináncëxa.

Gálatas 4:9

Usaquin bëtsi ñu rabiá ꞌixunbi camina an sinánmicëxun —Nucën Papa Dios ax ca asérabi Dios ꞌicë —quixun ꞌunanin. ¿An mitsu ainan ꞌimicëxunbi caramina uisa cupí mitsúnmi bëráma rabia ñucama rabitëcënti sinan?

Gálatas 5:15

Usa ꞌaínbi bëtsibë nishanani cuamianani camina mitsux Jesucristonën unimasa ꞌiti ꞌain. Usai ꞌitin rabanan camina bërúinraocati ꞌain.

Efesios 2:2

Ënë nëtënu ꞌicë ñuishia an sináncë unicaman sináncësa oquinshi sinánquin camina ñu ꞌaisama ꞌacën, ñunshin ꞌatimanën ꞌapu cuëëncësabi oquin. An ca an Nucën Papa Diosan bana cuaisama tancë unicama ax cuëëncësabi oquin ꞌanun sinánmia. Usaribiti camina mitsux an sinánmicë ꞌiacën.

Efesios 4:20

Usaía atux ꞌicëbëtanbi ca Cristonën usaími ꞌinun mitsu sinánmicëma ꞌicën.

Efesios 5:6

Uni raírinëan —ñu ꞌatima ꞌacë ꞌaíshbi camina Nucën Papa Diosan nëtënu ꞌiti ꞌai —quixun cacëxunbi camina mitsun, —cëmëi ca quia —quixun sinánti ꞌain. An aín bana cuaisama tanquin usa ñu ꞌacë unicama a ca ami nishquin Nucën Papa Diosan castícanti ꞌicën.

Deuteronomio 6:12

Usakin ꞌaínbi kamina mitsun ꞌIbu ami manútima ꞌain, an ka Egipto menuxun, ñu mëëi ꞌaisamaira tëmëraiabi mitsu chikíankëxa.

Filipenses 3:2

An ñu ꞌaisamaishi ꞌati sináncë uni ꞌimainun axa ꞌatimati banacë unicama ꞌimainun an —Nucën Papa Diosan uni ꞌinux cananuna ꞌunántioracacë ꞌiti ꞌai —quixun sináncë uni, acaman mitsu cacësa oi ꞌitin rabanan camina bërúancati ꞌain.

Colosenses 2:18

Atúnbi ca —ꞌëx asama ꞌixun cana Nucën Papa Diosma ángelcamaishi rabiti ꞌai —quixun sinánquin atúnbi sináncë ñu ñui rabíquin unicana bana ñuixunia. Usa ꞌain camina Cristonan ꞌiti ëntin rabanan atúan mitsu ñuixuncë bana a tantima ꞌain.

Colosenses 2:20

¿Mitsux ꞌuchatëcënuxma Cristobë bamacësa ꞌaíshbi caramina uisa ꞌaish bërámami unin ñuicë ënë nëtënu ꞌicë ñuishi sinánquin rabicësa ꞌitëcënin?

Colosenses 2:22

Usoquian ñuicëxbi ca a ñucama cëñutia, a banacamax ca unían sinánxun ñuicëshi ꞌicën.

Colosenses 2:23

—Usaquin ꞌën ñu ꞌacë ax ca asérabi ꞌicë —quixun sinánquin an usashi oquin ñu ꞌacë uni a isquin ca uni itsin sinánti ꞌicën, ax isa asérabi sinánñuira ꞌicë quixun. Usa ꞌaínbi ca usaquin ñu ꞌaíbi aín nuitu usabi upíma ꞌia.

1 Timoteo 6:20

Timoteo, cana mi cain, bana itsi ñuixunquinma camina Jesucristo ñuicë banaishi bëtsi oquinma unicama ñuixunti ꞌain. Jesucristo ñui quicë bana isa quixunbi ca bëtsi bëtsi unin asérabi a bana quicësa oquin ñuixunquinma bëtsi bana ñuia. A banax ca an ñu ꞌunáncë unicaman asérabi isa quixun ñuicë ꞌaíshbi ñancáishi ꞌicën. A bana camina cuatima ꞌain.

2 Timoteo 3:13

Usaía ꞌimainun ca ꞌaisama unicama ꞌimainun an uni paráncë unicama, ax bëtsi unían paráncë ꞌixun atúnribi usaribi oquin uni paráncë ꞌaish axa ꞌiásamaira ꞌiti ꞌicën.

Hebreos 13:9

Usa ꞌain camina uni itsían mitsu bëtsi bëtsi bana ñuixunquin Jesucristomi sinánti ënun quixun cacëxunbi ëntima ꞌain. A unicamax ca —bëtsi bëtsi ñu piquinbi camina bëtsi bëtsi ñu pitima ꞌai —quia. Atúxa usai quia a bana cuatibi ca uni aín nuitu upí ꞌima. Usa ꞌain camina —Cristo cupíshi ca Nucën Papa Diosan nu nuibaquin nun ꞌucha tërë́anan nux ainan ꞌinun ꞌimia —quixun ꞌunani amishi cushicanti ꞌain.

Hebreos 3:12

ꞌËn xucë́antu, mitsúxribimi usai ꞌitima cupí camina bërúancati ꞌain, ꞌatimaquin sinánquin Nucën Papa Dios, axa bamatimoi tsócë, a ami catamëquinma ëntin rabanan.

1 Pedro 1:18

Mitsun raran Jesucristomi sinánti ꞌunánma ꞌaínmi usaribi oquin sinaniabi ca Nucën Papa Diosan ainan ꞌinun ië́miquin mitsu Jesucristomi sinánmiaxa. Camina ꞌunanin, curi ꞌimainun curíqui ꞌimainun bëtsi ñucama axa cëñúti a cupíbi ca Nucën Papa Diosan mitsu ië́micëma ꞌicën.

2 Pedro 3:17

ꞌËn nuibacë xucë́antu, ꞌën mitsu ñuixuncë ñu ꞌicëma pain ꞌain, ca usai ꞌiti ꞌicë quixun ꞌunani camina an ñu ꞌatima ꞌacë unicaman paráncëxmi Nucën Papa Diosan bana quicësabi oi ꞌiti ëntin rabanan bërúanracati ꞌain.

2 Juan 1:8

Usa ꞌaínbi ca an mitsun a ꞌati ꞌináncë ñucamami ax quicësabi oquin sënë́onquin ꞌaia a cupí aín nëtënuxun Nucën Papa Diosan an mëníosabi oquin mitsu ꞌimiti ꞌicën. Uisaira oquin cara ꞌimiti ꞌicë usoquian mitsu ꞌiminun camina an ꞌatimaquin Cristo ñuicë unían mitsu paránunma bërúanracati ꞌain.