Amós 4:9 - Kashibo-Kakataibo Biblia

⁹ “Usa ꞌain kana amiaxa bari urukë amiax suñu kushiira ukian, mitsun ñu ꞌapákëkama masómainun, ñu ꞌatimakama aribi ꞌanun ꞌamiakën, ꞌamianan kana mitsun ꞌapákë ñukama ꞌimainun uvas ꞌapákë akama chushitanun ꞌimiakën, usai ꞌimainun ka champun mitsun higuera ꞌimainun olivos akama ain pëi pinun ꞌamiakën, ¡ꞌaínbi kamina mitsux ꞌëmi sinanatëkëinsama tankankën!” Usai ka Dios kiaxa.

Amós 4:9 ပူးပေါင်းရင်းမြစ်များ

1 Reyes 8:37

Uínsaran kara min uni Israelkamax mimi ꞌuchaia a ꞌunánkin atu ꞌatimokin a piti ñu ꞌaíma ꞌaia panáni ꞌianan barin xarokëx nikama chushimainun, ꞌaisama ꞌinsín ꞌimainun an ñu ꞌapákë këñuti champu unimianan ꞌaisamaira ꞌixuan xënan ñu ꞌapákëkama xarokin chushiminun ꞌimianan; uínsaran kara axa numi nishkë unikaman nun ëmakama bëarabuinxun nu ꞌaisatania, ꞌianan kara bëtsi ñu kamanribi nu ꞌamainun ꞌinsin kushinribi nukama këñuti ꞌikën,

Isaías 1:5

Mitsux kamina uisaxun ñu ꞌatima ꞌati kara kixun sinani kushi kananin, usa ꞌain ka mitsun nami anu ꞌatima oti ꞌaíma ꞌikën. Usa ꞌain ka aín maxkánuribi ankëti chankukë ꞌaish, an ꞌimikëx kushiñuma ꞌikën.

Oseas 11:5

ꞌaínbi ka atux ꞌëmi katamëisama tankankëxa. Usai ꞌi ka Egipto menu kuantëkënti ꞌikën, anuxun ka Asiria menu ꞌikë unikama atu tëmëramikin ñu mëëmiti ꞌikën.

Joel 1:4

Kamabi ñu ka champun piakëxa, usakin ꞌakëbë ukin ka bëtsían pikin ënkë akama këñukin bëtsi champu kamanribi piakëxa. Pikë ꞌaínbi ka amiribishi utëkënkin raírinënribi piakëxa, pianbi ka axa utëkënkë ainra kamabi ñu këñukin piakëxa.

Joel 1:7

Usai ꞌikin ka unin uvas ꞌapákëkama ꞌanan, nun higuera ꞌapákëkama këñukin piaxa, usakin ꞌakin ka ꞌain xo këñukin ꞌain xaká pianan, ꞌain pëñankamaribi uxubu kuaintanun ꞌain xaká piaxa.

Joel 2:25

“Ësai ka Dios kiaxa ꞌën kana a baritiakaman mitsun ñu ꞌapákë utabakin champun pía a pain amiribishi ꞌinántankëxun, kana amiribishi utëkëkin champun pitëkëan akamaribi inánti ꞌain, ꞌinanxunbi kana utëkënkia champun pía a ꞌinanxunbi kana anuishi sënë́nkian champun pía aribi ꞌinántëkënti ꞌain. ꞌËn kana suntárukaman ñu masókë usaribi okin ꞌanun mitsunu xuakën.

Amós 4:6

ꞌËn kana mitsun ëmakanuaxmi panani tsónun mitsu ꞌimiakën; ꞌimianan kana kamabi uníxa pitiñuma ꞌinun ꞌimiakën, ¡usa ꞌaínbi kamina mitsux ꞌëmi sinanatëkëinsama tankën!” Usai ka Dios kiaxa.

Amós 4:8

usai ꞌikëbë ka unikama ëmaitsi ëmaitsinu ꞌumpax bari kuankëxa; usai nikinbi ka ꞌumpax cha shimaxun xëatisabi mërakama ꞌikën, ¡usa ꞌaínbi kamina mitsux ꞌëmi sinanatëkëinsama tankankën!” Usai ka Dios kiaxa.

Habacuc 3:17

Usa ꞌain kana ꞌitsaira kuëënti ꞌain, Diosan ꞌë ië́mikin ꞌakinkëx. ꞌËn kana higuera kakë i uabutima ꞌimainua uvas ꞌapákëkama ꞌianan olivos kakë akama bimima ꞌimainun; naënu ꞌapákëxunbi ñun tuaima ꞌimainunbia; ñuina ꞌarakakëkama ꞌianan ovejakama ꞌimainun vacakama ꞌaíma ꞌinun këñúkë ꞌaia aín kënëishi ꞌaínbi kana ꞌën mishi rabiti ꞌain.

Malaquías 3:11

ꞌImianan kana atun ñu ꞌapákëkama ꞌimainun uvas ꞌapákëkama aribi an ñu këñukëkama an masókin pikin këñunun ꞌamitima ꞌain.