Amós 2:7 - Kashibo-Kakataibo Biblia

⁷ ꞌAnan ka ñuñuma unikamaribi ꞌatima okin tëmëramikin, atun ñu ꞌakëkama mëníoxuntisama tania. ꞌIanan ka aín papan aín nami ꞌakë xanu aribi, aín bëchikënën aín nami ꞌaia, usakin ꞌakin ka ꞌën bana upí ꞌikëbi ꞌaisama bërumia.

Amós 2:7 ပူးပေါင်းရင်းမြစ်များ

2 Samuel 12:14

ꞌAínbi kamina minbi ꞌaisamaira oí ami kuaikin Diosan kakëxun kuaisama tankin aín bana parëkin an kuëënkëma ñu ꞌan, usa ꞌain ka min bakë bëchikë bërí náchikikë ax chamara ꞌaíshbi ñuti ꞌikën.

1 Reyes 21:4

Ësokia kakëx ka Ahab amo nishananbi masánuitu kiani aín xubunu kuankëxa, Nabotnëan ꞌën papa ꞌimainun ꞌën titan ñukin ꞌë ënxua me kana mi ꞌinanima kixuan kakë a bana sinani. Usai kuantankëx ka aín xubunu nukuti ain chikën ami bësui rakakëxa, rakaxun ka añubi piti sinánma ꞌikën masá nuitukin.

Ezequiel 36:20

ꞌAínbi ka uinu ꞌikë ëmanu kara bëbaia anuax anu ꞌikë unikama ꞌën anë ñui ꞌatimati banakankëxa: Usa ꞌain ka ënë unikamax ka Diosan unibu ꞌikë ꞌaíshbi ka atun menuax chikíaxa kiax atu isi kikankëxa.

Oseas 4:14

ꞌAínbi kana ꞌën mitsun ini bëchikë xanukama uni aín nami ꞌatima oíma ꞌianan mitsun bëchikënën, bëtsi uni aín nami ꞌamia tëmëramiti ꞌain, mitsúxbi kamina bëtsi bëtsi uni aín nami ꞌakë xanubë ꞌin; ꞌikin kamina a rabikësokin atubë timë́xun ñuina xarokanin. ¡Usokin ꞌai kamina achúshi ëmanu ꞌikë unikaman sinánkimaishi ñu ꞌakë usaribi ꞌikanin!

Amós 4:1

Samarianu ꞌikë xanukama ësokin mitsu kamainun kamina kuati ꞌain: Mitsux kamina Basán menu ꞌikë vaca ain xanu xuabu usaribi ꞌaish xubairabu ꞌain, usa ꞌixun kamina uni ñuñuma ꞌatima onan, an ñu kuëënkin bisatankë a ꞌianan, mitsun bënëkamaribi a xëati uvas baka paëokin ꞌakë bëxunun kixun kain.

Amós 5:11

Mitsun kamina kuríkiñu ꞌixun ñuñuma unikama a ꞌatima okin atun trigo kupísa mitsu kupíonun kixun ꞌamin, usa ꞌain kamina mitsun xubu maxá upíokin ꞌakë anubi ꞌima ꞌianan, mitsun ꞌapákë uvas baka abi xëakantima ꞌain.

Amós 5:12

ꞌËn kana bëtsi bëtsi ñu ꞌaia ꞌitsaira nëtë́tisamaira ꞌinun atux ꞌuchakëkama a ꞌunan: Usa ꞌixun ka uni upíbu a ꞌatima okin anuxun bana mëníokë anuxun ꞌapukaman kuríki bitsia uni ꞌatimakama anun rabanan në́kin, ka uni upíkama ꞌatima oia, usa ꞌain ka ñuñu unikaman bana mëníokin uni ñuñuma a ñuumasara ꞌikë kanania.

Amós 8:4

An ñu kuëënkin bisatankë ꞌimainun uni ñuñumakama an me masókë mitsun kamina ënë bana kuati ꞌain;

Miqueas 2:2

Bëtsi unin mekama kuëënkin ka atun bikuankania; usakin ꞌanan ka xubukama aribi biti kuëënkin mëkamakania. ꞌAnan ka uni ꞌimainun ꞌain ꞌaintsi ꞌibukamabi, an kasunankë ꞌain ñukama binuxun ꞌatima oia.

Miqueas 2:9

ꞌAnan kamina atun xubunuabi aín xanukama ëman chikinkan, chikíanan kamina atun bakë bëchikë ꞌimainun ꞌini bëchikëkamaribi, atu ꞌinanuxuma ꞌashikin bikan, ꞌanan kamina ꞌën ꞌinan ñukama aribi ëmian.

Romanos 2:24

Asérabi mitsu ñui ca Nucën Papa Diosan bana cuënëo ësai quia: “Mitsux judíos unibu ꞌixunbi ñu ꞌaisama ꞌaia isi ca judíosma unibunëx Nucën Papa Diosmi ꞌatimati banaia”.

1 Corintios 5:1

ꞌËn cana ësoquian chanioia cuan, micama achúshinëx ismina min papan xanubë ꞌin. Usai ꞌiti ca ꞌaisama ꞌicën. An Nucën Papa Diosan bana ꞌunáncëma uníxbi ca usai ꞌima.