2 Timoteo 4:8 - Kashibo-Kakataibo Biblia

⁸ Usa ꞌixun cana Nucën ꞌIbu Jesucristonën utancëxun, upí oquin ax cuëëncësabi oquin ꞌën ꞌacë cupí cara uisaira ꞌë ꞌimiti ꞌicë quixun isti ꞌain. An ca asérabi aín quicësabi oquin ꞌati ꞌicën. Usa ꞌixun ca ꞌëishima, an axa uti cuëënquin caíncë unicamaribi, utancëxun uisaira oquin cara aturibi ꞌimiti ꞌicë usoquin ꞌimiti ꞌicën.

Nukën 'Ibu Diosan ain unikama 'inan ain bana

⁸ Usa 'ixun cana Nucën 'Ibu Jesucristonën utancëxun, upí oquin ax cuëëncësabi oquin 'ën 'acë cupí cara uisaira 'ë 'imiti 'icë quixun isti 'ain. An ca asérabi aín quicësabi oquin 'ati 'icën. Usa 'ixun ca 'ëishima, an axa uti cuëënquin caíncë unicamaribi, utancëxun uisaira oquin cara aturibi 'imiti 'icë usoquin 'imiti 'icën.

2 Timoteo 4:8 ပူးပေါင်းရင်းမြစ်များ

Génesis 18:25

¡Min usokin uni ꞌuchañuma këñun uni ꞌuchañukama, ꞌakin kamina a rabëtaxbi ꞌuchakësa ꞌikë ꞌati ꞌain! ¡Usakin ꞌaxuma ka at! Mix kamina ꞌapu ꞌaish kamabi kushiñu ꞌain kamabi menu, ¿usa ꞌixunmi usakin ñu ꞌakë ax kara minan asabi ꞌiti ꞌit?

Malaquías 3:17

Kamabi kushiñuira Dios ax ka ësai kia: ꞌËn kana anua a unikama ꞌënan ꞌitëkënti achúshi nëtë mënion. Usakin ꞌakin kana achúshi unían an ñu mëëkinkë aín bëchikë nuibakë usaribi okin atu ꞌën nuibati ꞌain.

Mateo 24:36

Añu nëtë́inra carana ꞌëx utëcënti ꞌain, uínsarainra cara usai ꞌiti ꞌicë quixun ca uínbi ꞌunanima. Naínu ꞌicë ángelcamanbi ca ꞌunanima, ꞌëx Nucën Papa Diosan Bëchicë ꞌixunbi cana ꞌënribi ꞌunanima. Nucën Papa Diosan cuni ca ꞌunania.

Mateo 7:22

Anun ënë nëtëcama cëñúcë nëtën ca ꞌitsa unin ꞌë cati ꞌicën: Mix nun ꞌIbu ꞌain cananuna min cushínbi bana ñuixuan, min cushin ñunshin ꞌatima uninua chiquíanan cananuna min cushin uni itsin ꞌacëma ñu ꞌan.

Lucas 10:12

ꞌËn cana mitsu cain, Sodoma ëmanu ꞌicë unicama ca aín bana cuaisama tancë cupí Nucën Papa Diosan castícancëxa. Usamaira oquin castícancë ca a ëmanu ꞌicë unicama an mitsu bicëma cupí ꞌiti ꞌicën.

Romanos 2:5

Usa ꞌaínbi camina min sinan ꞌaisama ꞌaish sinanaisama tan. Usai ꞌiquin camina ënquinma camabi nëtën ꞌatima ñuishi sinánquin usaquin ꞌain. A cupí camina anúan Nucën Papa Diosan ꞌuchañu unicama aín ꞌucha cupí castícanti, a nëtën ꞌaisamaira oquin castícancë ꞌinuxun ꞌain.

Romanos 8:23

Camabi ñun a Nucën Papa Diosan ióotëcënun caínmainun cananuna nunribi Nucën Papa Diosan nu ióotëcënun bënë́quin cainin. Nucën Papa Diosan nu aín Bëru Ñunshin Upí nubë ꞌinun ꞌináncë ꞌain cananuna ꞌunanin, an ca asérabi camabi aín bana quicësabi oquin nu ꞌimiti ꞌicë quixun. Usaquin ꞌunánquin cananuna nun aín bëchicë ꞌaish aín nëtënu bëtsi namiñu ꞌiti cainin.

1 Corintios 2:9

Nun nu ñuicë banax ca Nucën Papa Diosan bana cuënëosaribi ꞌicën. A banax ca ësai quia: Uinu ꞌicë unínbi ca iscëma ꞌicën, uinu ꞌicë unínbi ca a ñui quia cuacëma ꞌicën, uinu ꞌicë unínbi ca aín sinanën sináncëma ꞌicën, uisairai cara an a nuibacë uni abë ꞌaish ꞌiti ꞌicë quixun, Nucën Papa Diosan mëníosabi oi.

1 Corintios 9:25

Uni axa cuaiticama ax ca aín nami cushi ꞌinux bachuaquin tania. Aín namia cushi ꞌiti cupí ca ñu ꞌatima ꞌaima. Usai ꞌitancëx abati ax pain bëbaquin ca ñu bitsia. Usai ꞌiquian bicëxbi ca a ñu chëqui ꞌatimatia. Usa ꞌaínbi cananuna nux Jesús cuëëncësabi oi ꞌinux camabi nëtën upí ꞌiti ꞌain. Usai ꞌitancëx cananuna an ꞌimicëx asaribi upí ꞌaish uinsaranbi nëtë́timoi abë tsóti ꞌain.

2 Corintios 5:2

Usai cananuna Nucën Papa Diosan nëtënu ꞌiti ꞌai quixun ꞌunani cananuna asérabi ënë nëtënuax anu cuainsa tani bënëtin.

Filipenses 3:11

Usai ꞌitancëx axa bamaxbi baísquiasaribi oi ꞌëx bama ꞌaíshbi asaribi ꞌinux ax utëcëncëbë baísquiti cana sinanin.

Colosenses 1:5

Nucën Papa Diosan mëníosabi oi aín nëtënu abë ꞌiti sinani camina usai ꞌicanin. Jesucristomi catamëti aín ꞌuchacama tërë́ncë ꞌaish ca uni ainan ꞌaish xënibua ꞌaínbi Nucën Papa Diosbë ꞌiti ꞌicë quixuan aín unin mitsu ñuixuncëxun camina a bana cuaquin upí oquin ꞌunáncan.

1 Tesalonicenses 1:10

Acama ñuianan ca mitsun camina Nucën Papa Diosan Bëchicë Jesús bamacëbia anbi baísquimia, axa naínuax uti caini quixunribi ñuia. Ax ca an Nucën Papa Diosan, uni aín ꞌucha cupí castícancëbëtanbi, ainan ꞌicë nu ië́miti a ꞌicën.

1 Tesalonicenses 5:4

Usa ꞌaínbi camina mitsux axa Jesucristomi sináncëma unicama ꞌicësai ꞌima. Usa ꞌaish camina mitsux aín nëtë sënë́ncëbëa Nucën ꞌIbu Jesucristo ucëbë ratútima ꞌain, an mëcamacë unían aín ñu mëcamaquin ratucëxa uni ꞌicësai camina ꞌicantima ꞌain.

2 Tesalonicenses 2:8

Usoquin ëncëx pain aia cëmën tapun ꞌatima uni a camabi unin isiabi ca Nucën ꞌIbu Jesusan axira uquin aín cuëbitan uíncënëinshi ꞌaquin aín cushían pëcabëtsincë anúinshi cëñuti ꞌicën.

1 Timoteo 6:19

Usoquin ꞌacë ꞌaish ca ñuñu uni ax Jesucristonën ꞌacësaribi oquin sináncë ꞌaish ënë menuxun pain Nucën Papa Dios cuëënmitancëx, bamatancëxribi xënibua ꞌaínbi chuámarua abë ꞌiti ꞌicën.

2 Timoteo 1:10

Mënío ꞌixun ca camabi unían —an ca nu nuibatia —quixun ꞌunánuan nu ië́miti Jesucristo xuacëxa. Xuá ꞌaish ca axa ami catamëcë unicamaxa ax utëcëncëbë usaribiti ꞌiti oi bamatancëxbi baísquiacëxa. Usa ꞌain cananuna ꞌunanin, ainan ꞌaish ca uni aín nëtënu cëñútimoi abë ꞌiti ꞌicë quixun.

2 Timoteo 1:12

An ꞌimicëxun usoquin ꞌacë cupía bëtsi bëtsi ocancëxbi cana rabiniman. Ami catamëquin cana ꞌunanin, ax cushiira ꞌixun ca Nucën Papa Diosan, ꞌëx a ꞌinamëcë ꞌicë bërúanquin aín bana bëtsi oquin ñuiquinma upí oquinshi unicama ꞌunánminun ꞌë ꞌaquinti ꞌicën. ꞌAquianan ca anúan ax utëcënti nëtën uquin an ꞌën ꞌacë ñucama upí isti ꞌicën.

2 Timoteo 1:18

ꞌImainun camina ꞌunanin, Efeso ëmanuxunribi ca Onesíforonën ñu nu ꞌitsa oquin ꞌaxuanxa. Usa ꞌaían Nucën ꞌIbu Jesucristo utëcëncëbëtan Nucën ꞌIbu Diosan a upí isti cana cuëënin.

2 Timoteo 2:5

Ënëx ca ësaribi ꞌicën. An pelota ꞌacë unicamax ca usaquin pelota ꞌati ꞌunáncëma ꞌaish ñancábi cuaia. Usai ꞌiquin ca aín cupí bitsima.

2 Timoteo 4:1

Nucën Papa Dios ꞌimainun Nucën ꞌIbu Jesucristo, ax ꞌApuira ꞌaish uxuan uni bamacëmacama ꞌimainun uni bamacëcamaribi, uisa cara oti ꞌicë quixun isti, an cuamainun cana mi cain,

Tito 2:13

Usaquin ꞌunánmianan ca nu ꞌunánmia, nux ainan ꞌixun cananuna ax quiásabi oía an nu ië́micë Jesucristo, ax Nucën Papa Diosribi ꞌaish, aín cushibëbi utëcënti nëtë caínti ꞌai quixun.

Hebreos 12:11

Cananuna ꞌunanin, Nucën Papa Diosan usoquin nu ꞌacëxun taní cananuna masá nuitupanin. Usai ꞌitancëxbi cananuna usaquian nu ꞌacë a inúcëbë Nucën Papa Diosbë upí ꞌiquin upí oquin sinani cuëënti ꞌain.

Hebreos 9:28

Usaribiti ca Cristo ënë menuax achúshitishi bamacëxa. Ax ꞌuchañuma ꞌaíshbi ca camabi unin ꞌucha ainansa ꞌaish tërë́ncë ꞌinun bamacëxa. Bamatancëx baísquitancëx ca aín Papa Diosnu cuan ꞌaish amiribishi ënë nëtënu utëcënti ꞌicën. Camabi unin ꞌucha cupí bamatëcëni aima ca an aín uti caíncë unicama abëa ꞌinun bitsi utëcënuxun ꞌaia.

Santiago 1:12

An uisa ñu cara ꞌicëbëbi bënë́quinma tanshiquin Jesucristomi catamëti ëncëma unicama a ca usaía ax ami sináncë unicama ꞌiti ñuia quiásabi oquin Nucën Papa Diosan aín nëtënu abë ꞌaish chuámarua ꞌaish cuëënun ꞌimiti ꞌicën.

1 Pedro 1:4

Nucën Papa Diosan ca mitsúxmi aín nëtënu abë ꞌitioquin mëníocëxa. A nëtënuax ca uisa ñubi, ënë nëtënuax ꞌicësari chëquianan cëñútima ꞌicën, anu ca uisa ꞌuchabi ꞌaíma ꞌicën. Usabi ca xënibua ꞌaínbi ꞌiti ꞌicën.

1 Pedro 5:4

Usoquin ꞌaia ca Jesucristo, unin ꞌacësamaira oquian an aín unicama bërúancë, an utëcënquin mitsu —asábi ca —quixun catancëxun aín nëtënuaxmi xënibua ꞌaínbi abë cuëënun mitsu ꞌimiti ꞌicën. Ënë nëtënuax cuaiquin canania uisa ñu cara ꞌináncëxun bitsia uni cuëëncëbëbi ca an bicë ñu chëquia. Usaía uni ꞌicë ꞌaínbi camina mitsux xënibua ꞌaínbi Nucën Papa Diosbë ꞌaish cuëënti ꞌain.

Apocalipsis 1:7

Ca is, Cristo, ax ca naí cuin mëu bëbacuatsini unuxun ꞌaia. Aia ca camabi unicaman isti ꞌicën, an manë xëtocën taro, acamánbi ca aia isti ꞌicën. Ax ucëbë ca camabi menu ꞌicë unicama ami sináncëma ꞌaish masá nuituti inti ꞌicën. Asérabi ca usai ꞌiti ꞌicën.

Apocalipsis 19:11

Usaquin ángelnën cacëxun cana naí panárabëcë isan. Anuaxa caballo uxua chiquitia cana isan. Ax a caballonu tsócë, ax ca Aín Quicësabi Oquin ꞌAcë caquin anëcë ꞌianan ca An Uni Paráncëma caquin anëcë ꞌiaxa. Usa ax ꞌixun ca ꞌatima unicama a uisoquin cara ꞌaisa tania usoquin castícanan axa upí sinánñucama a upí oia.

Apocalipsis 2:10

Unían bëtsi bëtsi oquin ꞌatimocëxbi camina racuë́tima ꞌain. Ñunshin ꞌatimanën ꞌamicëxun ca raíri unin mitsu sipuati ꞌicën, caramina ꞌëmi sinánti ënti ꞌai quixun isnuxun. Mëcën rabë́ nëtën camina paë tani tëmërati ꞌain. Uisai cara ñu ꞌicëbëtanbi camina anúnmi mitsux bamati nëtë utámainun ꞌëmi sinánti ëntima ꞌain. Usaími ꞌia cana mitsu ꞌën nëtënuaxmi nëtë́timoi ꞌëbë cuëënun ꞌimiti ꞌain.

Apocalipsis 22:20

An ënë ñucama ꞌë ismicë, an ca ꞌë caia: —Cana bënëtishi utëcënti ꞌain. Cacëxun cana cuëëinra cuëënquin —asábi ca, usai ca ꞌiti ꞌicën, ca ut —quixun, Nucën ꞌIbu Jesús cain.

Apocalipsis 4:10

ca mëcën rabë́ ꞌimainun taë rabë́ ꞌimainun rabë́ ꞌimainun rabë́ a caniacëcë unicama an axa xënibua ꞌaínbi bamatimoi tsócë Nucën Papa Dios ami bësui, rantin puruni tsóbuquin a rabiia. Rabiquin ca curi ꞌacë mañuti atúan mañucë Nucën Papa Dios ꞌinánquin anua ax ꞌicë aín bëmánon nanquin rabiquin ësaquin caia:

Apocalipsis 4:4

Anu ax tsócë aribi nëbë́tsioracë ca mëcën rabë́ ꞌimainun taë rabë́ ꞌimainun rabë́ ꞌimainun rabë́ anu tsóti itsi ꞌiaxa. Axa a anu tsótinu tsócëcamax ca mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicama ꞌiaxa. Acamax ca aín chupa uxua ꞌianan curi ꞌacë mañuti mañucë ꞌiaxa.