2 Tesalonicenses 3:2 - Kashibo-Kakataibo Biblia

² ꞌImainun camina an ꞌatima ñu ꞌacë ꞌaisama unicaman nu ubíoxunma ꞌanun Nucën Papa Dios nu ñucáxunti ꞌain. Camabi uníxira ca Jesucristomi catamëcëma ꞌicën,

Nukën 'Ibu Diosan ain unikama 'inan ain bana

² 'Imainun camina an 'atima ñu 'acë 'aisama unicaman nu ubíoxunma 'anun Nucën Papa Dios nu ñucáxunti 'ain. Camabi uníxira ca Jesucristomi catamëcëma 'icën,

2 Tesalonicenses 3:2 ပူးပေါင်းရင်းမြစ်များ

Mateo 17:17

Quia cuaquin ca Jesusan anu ꞌicë unicama cacëxa: —Mitsun camina Nucën Papa Dios ax ca asérabi cushi ꞌicë quixun sinaniman. Camina ami catamëisama tanin. ¿Mitsúxmi ami catamënun carana uiti nëtën mitsu ꞌunánmiti ꞌain? ¿Uitishi nëtën carana ꞌëx mitsu cupí masá nuituti ꞌain? ꞌË ca a tuá bëxun.

Mateo 23:23

An Moisésnën cuënëo bana ꞌunáncë unicama ꞌimainun fariseo unicama, mitsux camina an unicama paráncë a ꞌain. Mitsu ca Nucën Papa Diosan uisa cara oti ꞌicë usoquin ꞌati ꞌicën. Mitsun camina an Nucën Papa Dios anuxun rabiti xubunuxun ñu ꞌacë unicama ñu ꞌinanin, Moisés quiásabi oquin. Usa ꞌixunbi camina a bana itsi, axa quicësabi oíira ꞌiti, a quicësa oquin ꞌaiman, Nucën Papa Diosmi upiti catamëanan ax cuëëncësabi oquin upí sinánñu ꞌixun unicama nuibaquin, ꞌaquinsa ꞌicë, ꞌaquinti, acama. Usaquinmi mitsun ꞌacëx ca asábiira ꞌitsíanxa. Usoquin ꞌaquinmi mitsun ñu mësúribi ꞌinánti ca asábi ꞌitsíanxa.

Lucas 18:8

ꞌËn cana mitsu cain, ca asérabi bënë́nquinshi acama ꞌaquinti ꞌicën. ¿Usa ꞌaínbi carana uni ꞌinux Nucën Papa Diosnuax uá ꞌaish anu cuantancëx, ꞌëx utëcënquin, unicama asérabi ꞌëmi sinani ꞌëmi catamëtia isti ꞌain? Uisai cara ꞌiti ꞌicë quixun cana isti ꞌain.

Hechos 13:45

Usaía ꞌitsaira uni timë́cë isi ca judíos unicamax pishui Pablomi nishacëxa. Ami nishi ca —cëmëi ca quia —quiax ꞌatimati Pablomi banacëxa.

Hechos 13:50

Usa ꞌaínbi ca judíos unicaman Pablocëñun Bernabé ñui ami ꞌatimati banaquin bëtsi bëtsi xanu Nucën Papa Diosmi sináncë ꞌianan —atux ca aín nuitu upí ꞌicë —quixun unin cacë acama ꞌimainun a ëmanu ꞌicë cushi unicamaribi Bërnabé ꞌimainun Pablomia nishnun quixun tsuáquirumiacëxa. Usocëxun ca Pablocëñun Bernabé bëtsi bëtsi oquin aín nëtënuaxa cuanun quixun xuacëxa.

Hechos 14:2

Catamëcëbëtanbi ca Jesucristomi sinántisama tancë judíos unicaman, judíosma unicama ꞌatimaquin sinánmiquin axa Jesucristomi catamëcë unicamami nishnun quixun tsuáquirumiacëxa.

Hechos 17:5

Usa ꞌaínbi ca judíos unicama, an Jesús sináncëma, ax ami nutsi Silas ꞌimainun Pablomi nishquin uni ꞌatima chiquíshcama timëtancëxun a ëmanu ꞌicë unicama tsuáquirumiacëxa. Tsuáquirumi, Jasón cacë uni aín xubunu banaruquin barii ca, camabi unían isnun ëma nëbë́tsi buánti ca Pablocëñun Silas chiquínti ꞌicë quiax quicancëxa.

Hechos 25:27

Añu ñu ꞌaisama cara ꞌaxa quixun ñuixunxunmashi cana Césarnu sipuacë uni xutima ꞌain. Xuáxbi cana nuituñuma ꞌixun añu ñu ꞌacëma ꞌicëbi a uni xucësa ꞌiti ꞌain.

Hechos 28:24

Pablo quia cuaquian raíri unicaman —a banax ca asérabi ꞌicë —quixun cuamainun ca raírinën —a banax ca asérabima ꞌicë —quixun cuaisama tancëxa.

Romanos 10:16

A bana cuënëo ꞌaínbi ca camabi uníinra a bana sináncëma ꞌicën. Ësai ca Isaíasnën cuënëo bana quia: “Camabi uniínrama, ꞌitsama unínshi ca nun ñuixuncë bana cuaquin —ca asérabi ꞌicë —quixun sinania”.

Romanos 15:31

Uisabi ꞌë oxunma ꞌanuan Judea nëtënu ꞌicë axa Jesucristomi catamëcëma unicama sinánminun camina Nucën Papa Dios ñucáti ꞌain. Ñucánan camina ꞌën Jerusalénu ꞌicë axa Jesucristomi catamëcë unicama ꞌinánti buáncë curíquia atun cuëënquin binuan sinánminun Nucën Papa Dios ñucáti ꞌain.

1 Corintios 15:32

Efeso ëmanu ꞌicë unicamax pianancë ñuinasa ꞌaish, ꞌëmi nishcëxunbi Cristo ñuiquin a unicama bana ñuixunia ca acaman ꞌë bëtsi bëtsi oxa. Usa ꞌaínbi ca bamatancëxa Cristo baísquiama ꞌaínbi ꞌëx unin bëtsi bëtsi ocë ꞌinuxun bana ñuixuncë ax ñancáishi ꞌitsíanxa. Unia bama ꞌaish Cristo utëcëncëbë baísquitima ꞌain cananuna uni raírinëxa quicësaribiti ësai quitsían: “Bëtsi nëtë́nbi cananuna ashiti bamati ꞌain. Usa ꞌain cananuna bamacëma pain ꞌixun pucháquin pianan xëai nux cuëëncësa oíshi ꞌiti ꞌain”.

Deuteronomio 32:20

ëni ka ësai kiakëxa: Bërí kana ami kasuakëkin ꞌën atu, ¡uisai kara ꞌia isnuxun ënin! Asérabi ka a unikamax ꞌaisama unibu ꞌaish, ami ꞌunánmakin ꞌakinsama ꞌikën.

1 Tesalonicenses 2:18

Cuanti cananuna sinan. Raírinëxa cuancëbëmabi, cana ꞌëxëshi ꞌitsai mitsu isi cuainsa tan. Usa ꞌaínbi ca ñunshin ꞌatimanën ꞌapun nux cuanti bëaraxa.

2 Timoteo 4:17

Acaman ëniabia Nucën ꞌIbu Jesucristonën ꞌaquinia ca a ꞌapun ꞌë uisabi ocëma ꞌicën. Usoquin ca ꞌinúan nëëcënëan piisa tancëxbia ñuina abácësaribi oquin, unin ꞌaisa taniabi Nucën ꞌIbu Jesucristonën ꞌë ië́miaxa. Usoquian ië́mitancëxun cushiocëxun cana aín bana ñuitëcëan, judíosma unicamánbia cuanun.