2 Samuel 5:7 - Kashibo-Kakataibo Biblia

⁷ Usakin kakëxunbi ka aín suntárukamabëtan Davidtan Jerusalén ëmanu ꞌikë suntárukama ñatankin biakëxa, usakin ꞌaxun ka Davidtan ëma kakin anëakëxa, anëa ꞌikë ka usakin anëkankëxa.

2 Samuel 5:7 ပူးပေါင်းရင်းမြစ်များ

2 Samuel 5:8

Usa ꞌain ka Davidnën usakin kamina anuxun ꞌati ꞌai kixun aín unikama kakë ꞌiakëxa: “jebuseo unikama ꞌakin kamina anúan ꞌumpax kuanti ꞌakë kini anun, atsínkin kamina kamabi uni bëxuñu ꞌimainun, aín xo ꞌatima masari nikë uni, akamami kana ꞌëx nishin usa ꞌain a këñukin ꞌati ꞌain.” Usa ꞌain ka a ñui a ꞌunánti bana ësai kia: “Uni aín niti upíma ꞌimainun, aín xo bamakë masari nikë a unikamax ka anuxun Dios rabiti xubunu atsintima ꞌikën, kiax ka unikamax kiakëxa.”

2 Samuel 5:9

Usakin aín suntárukama ñatankin bianan unikama ꞌatankëx ka David, a ëmanu tsóti kuankëxa, usa ꞌikë ka Davidnën ëma kakin anëakëxa, ꞌimainun ka anu ꞌikin buinarakin aín ëman ꞌikë kinikama abi maxábëtan, me tëin bëtaskin anu ꞌapu ꞌikë xubu anubi sënëónkin kënëmiakëxa.

2 Samuel 6:10

Usai kitankëxun ka Davidnën amiribishi bunántisa okin ꞌakë anua Diosan banakama nankë a Jerusalénnu buántisama tankëbëtan ka, achúshi filisteo uni Obed-edom, axa Gat kakë ëmanu ꞌikë aín xubunu nankëxa.

2 Samuel 6:12

Usa ꞌain ka unikaman ꞌapu David ñuixunkë ꞌiakëxa, bunántisa okin ꞌakë aín xubunu nankë ꞌain ka Obed-edom aín aintsikama ꞌimainun aín ñukama këñunbi atun ñu upí ꞌinun Diosan ꞌakinia. Usokian kakëx ka David Obed-edom aín xubunu kuëënkiani kuanxun bunántisa okin ꞌakë a bibiankin Davidnën ëma kakë Jerusalénnu buánkëxa.

2 Samuel 6:16

Usakin bunántisa okin ꞌakë anua Diosan banakama kuënëokë nankë, a buani anua David ꞌikë ëma anu bëbakania ka Saúlnën ꞌini bëchikë Micalnën aín xubu xëkuë chukúma manámi ꞌikë anun isakëxa; iskëxbi ka aín bënë David ax kuëëni chirinkin ransakia Dios rabikë ax ainan ꞌaisama ꞌiakëxa, usa ꞌain ka ami ꞌatimakin sinánkëxa.

1 Reyes 2:10

Usai ñukë ka David anua aín aintsikama maínkan me anua tsóa ëma Jerusalén anubi David maínkankëxa.

1 Reyes 3:1

Aín ꞌini bëchikë xanubë birakatankëx ka Egipto menu ꞌikë ꞌapu faraónbë banai kananuna ꞌakananima nuibanani aintsi onantankëx upitax tsóti ꞌai kixun katankëxun, Salomónnën aín xanu anu pain aín papa David ꞌapu ꞌaish ꞌia ëma anu ꞌikinkin uankëxa, uanxun ka anu ꞌapu ꞌiti xubu ꞌimainun anuxun Dios rabiti xubu ꞌanan Jerusalén ëmaribi buinarakin kënëkin sënë́onun ꞌamiakëxa.

1 Reyes 8:1

Usa ꞌain ka Salomónnën anua ꞌikë Jerusalén ëmanua timë́kani unun kixun Israel unikaman kushibu kamiakëxa, kamianan ka kamabi ñakánu ꞌikë aín ꞌapukama ꞌimainun ain aintsikaman uisakinbi ax ka usa ꞌikë kixun kakëma Israelkama atúan bunántisa okin ꞌakë kurin ratakakakë anua Diosan bana kuënëo a Sión kakë ëma anua Davidtan ëma kakë anu takuti ꞌakini unun kamiakëxa.

Salmos 2:6

ꞌën kana axa ꞌapu ꞌiti uni anëan, usa ꞌain ka aín bashi upí Sión kakë anu ꞌapu ꞌiti ꞌikën.

Salmos 51:18

Min kamina upíokin Sión kakë me a ꞌati ꞌain ꞌanan kamina Jerusalén; ëma anun kënëara a birutëkënun ꞌamiti ꞌain.

Salmos 87:2

Diosan ka Jerusalénnu ꞌikë ëma xëkuëkama bëtsi ëmakama Israelnu ꞌikë ꞌakësamaira okin upíokin bërúaia, Israelnën anu ꞌinuxun xubukama ꞌasamaira okin.

Miqueas 4:2

ai ka ꞌaisamaira uni ëmakamanuaxa ukë ax bëbai ësai kikanti ꞌikën: Anua Nukën ꞌIbun bashi ꞌikë anu kuaruti kamina ukanti ꞌain, anu ka anuxun Dios rabiti xubu anuxuan Israel unikaman rabikë a ꞌikën, an ka anuxun uisai karanuna ꞌiti ꞌai a nu ꞌunánmiti ꞌikën, usakin ꞌakëx kananuna upiti niti ꞌain. Usa ꞌain ka Siónnuxun Nukën ꞌIbu kikë bana a unin ꞌunánmiti ꞌikën, ꞌimainun ka Jerusalénnuxun aín bana ꞌain unikaman ñuiti ꞌikën.

Romanos 9:33

Nucën Papa Diosan bana cuënëo ca maxax ñuicësa oquin Cristo ñui ësai quia: Camina ꞌunánti ꞌain, ꞌën cana Sión cacë ëmanua, maxax achúshi ꞌinun mëníoin. Ami ca uni raírinëx tatíquianan maxax cha ꞌain chacati nipacëti ꞌicën. Usa ꞌaínbi ca axa ami catamëcë unicaman ꞌunánti ꞌicën, an ca asérabi ax quicësabi oquin atu ꞌaquinia quixun.

Hebreos 12:22

Mitsux camina aín bashi Sinaí anuaxa Nucën Papa Dios baná anu cuanma ꞌain. Bëráma camina mitsux Nucën Papa Dios rabinux Sión cacë matá, anua Jerusalén ꞌicë, anu cuancën. Usai ꞌiá ꞌaíshbi camina Jesucristonan ꞌaish, uinu caramina ꞌai anuax, Nucën Papa Dios axa bamatimoi naínu ꞌicë Jerusalén aín nëtënu tsócë, abë banain. Anuxun ca ꞌitsaira ꞌixun aín ángelcama timë́xun a rabia.

Apocalipsis 14:1

Usaquin istancëxun istëcënquin cana Carnero ꞌicësaribitia unin ꞌucha cupí bama, a matá me Sión cacë, anua Jerusalén ꞌicë, anu nicë isan. ꞌËn iscëx ca abë ꞌaisamaira uni, ciento cuarenta y cuatro mil (144,000) unicama, axa aín bëmánanu Cristonën anë ꞌimainun Nucën Papa Diosan anënribi cuënëocë, a unicamax ꞌiaxa.