2 Samuel 5:12 - Kashibo-Kakataibo Biblia

¹² Usakin kamabi ñu ꞌakin ka Davidtan Diosanbi ka Israel unibunën ꞌapu ꞌinun ꞌë ꞌimiaxa kixun ꞌunánkëxa, ꞌimainun ka anbi ꞌapu ꞌixun ëma upí ꞌitanun mëníonan, Israel unikama upíokin ꞌakinun ꞌamiakëxa.

2 Samuel 5:12 ပူးပေါင်းရင်းမြစ်များ

2 Samuel 5:11

Usakian ꞌakëbëtan ka Tiro ëmanu ꞌikë ꞌapu Hiram kakë an, anu kuankian bëtsi menu ꞌikë ꞌapu añu kara ꞌaia kixun iskë aín unikama Davidnu kuantanun xuakëxa, xukin ka carpinterokama ꞌimainun an maxá ramëniokin mëníokë a ꞌianan, kunxan tëapakë akama tapan ꞌabiankin parúmpapan buánxun anu ꞌapu David ꞌiti xubu ꞌaxuntanun kixun xuakëxa.

2 Samuel 5:13

Hebrón kakë menuax kuanx Jerusalén ëmanu tsókin Davidnën, anuxun aín xubu anua ꞌikë xanukama bianan, an ñu ꞌaxunkë xanukama aribi bixun atumiribi bëbu ꞌimainun xanu okinribi bëchipakëxa.

2 Samuel 7:16

Min rëbunki ꞌimainun mix ꞌapu ꞌikë ax ka ꞌën bëruankëx uisaibi ꞌikëma ꞌiti ꞌikën, ꞌimainun ka mix anu tsóti ax anubi ꞌitiokin nankë ꞌiti ꞌikën.”

1 Reyes 10:9

¡Min ꞌIbu Diosan ka min Dios ꞌixun, upíokin ñu ꞌaia iskin nuibakin Israelkaman ꞌapu ꞌinun mi ꞌimiaxa! ¡Xënibua ꞌaínbi Israelkama ꞌikë mikama nuibakin Diosan, ꞌapu ꞌixunmi ꞌaisama okinma ñu atu ꞌaxúnti mi anëxuanxa usa ꞌain kamina bërí ꞌapu ꞌain!

Daniel 2:30

Usaribi okin ka ꞌunántisama ꞌikëbi ꞌëribi a ñu ꞌunánmiaxa, ꞌaínbi ka ꞌëx an bana sinánkë bëtsi unikamasaira ꞌikëmabi, uisakin namákë kara min namákë ax ꞌikë mix ꞌapu ꞌikë, ꞌën mi ñuixunun ꞌë ꞌunánmiaxa, usa ꞌain kamina mix ꞌapu ꞌixun min sinánkëkama uisai kikë kara ax ꞌikë kixun ꞌunánti ꞌain.

Números 24:7

Israel unibunëx ka a xëati ꞌumpax ꞌitsairañu ꞌianan anun atun ñu ꞌapákë chabótiñu ꞌiti ꞌikën. ꞌImainun ka ain ꞌapu ax ka Agagbëtan sënë́maira ꞌiti ꞌikën; a ꞌapu aín kushi ka chaiira ꞌiti ꞌikën.