2 Pedro 1:12 - Kashibo-Kakataibo Biblia

¹² Uisai caramina Nucën Papa Dios cuëëncësabi oi ꞌiti ꞌai quixun ꞌunani camina usai ꞌin. Usaími ꞌiabi cana ënímami mitsux ꞌicësabi oi ꞌinun sinánmitëcënti ꞌain, manúti rabanan.

Nukën 'Ibu Diosan ain unikama 'inan ain bana

¹² Uisai caramina Nucën Papa Dios cuëëncësabi oi 'iti 'ai quixun 'unani camina usai 'in. Usaími 'iabi cana ënímami mitsux 'icësabi oi 'inun sinánmitëcënti 'ain, manúti rabanan.

2 Pedro 1:12 ပူးပေါင်းရင်းမြစ်များ

Hechos 16:5

Usaquian Pablobëtan Timoteonën bëtsi bëtsi ëmanu cuanquin bana ñuixuncëx ca axa ami catamëcë unicamax upiti Jesúsmi sináncëxa. Usai ꞌicëbëa camabi nëtën uni raírinëxribi ami sináncëbë ca axa Jesucristomi catamëcë unicama ꞌaisamaira ꞌiacëxa.

Filipenses 3:1

ꞌËn xucë́antu, ësaquinribi cana mitsu cain, mitsux Nucën ꞌIbu Jesucristonan ꞌaish camina chuámashirua tani cuëënti ꞌain. ꞌËn cacësabi oquin mitsu catëcëni cana atsaniman, mitsúxmi upí ꞌiti cupí.

Colosenses 1:5

Nucën Papa Diosan mëníosabi oi aín nëtënu abë ꞌiti sinani camina usai ꞌicanin. Jesucristomi catamëti aín ꞌuchacama tërë́ncë ꞌaish ca uni ainan ꞌaish xënibua ꞌaínbi Nucën Papa Diosbë ꞌiti ꞌicë quixuan aín unin mitsu ñuixuncëxun camina a bana cuaquin upí oquin ꞌunáncan.

Colosenses 2:7

A upí oquin ꞌunánan uisa cara ax ꞌicë quixun ꞌunani camina aín unían mitsu cacësabi oi, ami upiti catamëcanti ꞌain. Usai ꞌiquin camina camabi nëtën Nucën Papa Dios —asábi ca —quixun cati ꞌain.

1 Timoteo 4:6

ꞌËn mi cacë bana ënë axa Jesucristomi catamëcë unicama ñuixuncë ꞌaish camina an Jesucristo cuëëncësabi oquin bana ñuixuncë ꞌiti ꞌain. ꞌIanan camina ami ñuixuncë bana upí oquin ꞌunánquin a banaxa quicësabi oquin ꞌati ꞌain.

2 Timoteo 1:6

Usa ꞌain cana manúaxmami ꞌinun mi cain, ꞌën mëcën minu nancëbëtan ca Nucën Papa Diosan aín bana ñuixunun aín cushi mi ꞌináncëxa. A cushia minuax nëtë́nunma camina bënamëbutibia tsi rëquirutëcëncësa ꞌinuxun, ami catamëquin aín bana ñuixunti ꞌain.

Hebreos 10:32

Jesucristomi catamëtabatia, unin mitsu bëtsi bëtsi oquin tëmëramicëxunbi camina bënë́quinma tanshiacën. Usaími mitsux ꞌia a camina sinánti ꞌain.

Hebreos 13:9

Usa ꞌain camina uni itsían mitsu bëtsi bëtsi bana ñuixunquin Jesucristomi sinánti ënun quixun cacëxunbi ëntima ꞌain. A unicamax ca —bëtsi bëtsi ñu piquinbi camina bëtsi bëtsi ñu pitima ꞌai —quia. Atúxa usai quia a bana cuatibi ca uni aín nuitu upí ꞌima. Usa ꞌain camina —Cristo cupíshi ca Nucën Papa Diosan nu nuibaquin nun ꞌucha tërë́anan nux ainan ꞌinun ꞌimia —quixun ꞌunani amishi cushicanti ꞌain.

1 Pedro 5:10

Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.

1 Pedro 5:12

Nucën xucën Silvano, ax ca ꞌën iscëx upiti Jesucristomi sináncë ꞌicën. Usa ꞌain cana an mitsu buánxunun ënë quirica mitsu ꞌaxuan. Ënë quiricanu ꞌësë́anan cana mitsu cain, an mitsu upí oquin cushionan ꞌaquincë cupí camina asérabi ꞌunánti ꞌain, uisaira oquin cara Nucën Papa Diosan mitsu nuibatia quixun. A ënima camina mixmi ꞌicësabi oi ami upiti catamëti ꞌain.

2 Pedro 1:13

Nucën ꞌIbu Jesucristonën ꞌunánmicëxun cana ꞌunanin, ꞌën bamati nëtë ca ꞌurama ꞌicë quixun. Usa ꞌain ca ꞌën sináncëx bamaquin ënë nëtë ëncëma pan ꞌixuinshi ënë ñucama ꞌën mitsu sinánmitëcënti asábi ꞌicën.

2 Pedro 1:15

ꞌËx bamacëbëtanmi ënquinma usabi oquin ꞌanun quixun cana ënë banacama mitsu cuënëoxunin.

2 Pedro 3:1

ꞌËn nuibacë xucë́antu, bëtsi quirica pan buánmixunbi cana ënë quiricaribi mitsu buánmin. Quirica buánmiquin cana asérabi Jesucristomi sináncë ꞌixunmi aín banacama manuquinma upí oquin sinánun mitsu ꞌësëan.

2 Pedro 3:17

ꞌËn nuibacë xucë́antu, ꞌën mitsu ñuixuncë ñu ꞌicëma pain ꞌain, ca usai ꞌiti ꞌicë quixun ꞌunani camina an ñu ꞌatima ꞌacë unicaman paráncëxmi Nucën Papa Diosan bana quicësabi oi ꞌiti ëntin rabanan bërúanracati ꞌain.

1 Juan 2:21

Mitsúnmi Cristonan ꞌixun ax cuëëncësabi oi ꞌiti ꞌunáncëma cupí cana mitsu caiman. Mitsúnmi a ñucama ꞌunáncë cupí cana mitsu ënë quirica cuënëoxunin. Camina ꞌunanin, Cristonan ꞌixun ax cuëëncësabi oi ꞌiti ꞌunáncë uni ax ca cëmëtima ꞌicën.

2 Juan 1:2

Ainan ꞌaíshnu xënibua ꞌaínbi abë ꞌiti Jesucristo, a cupí cananuna mitsu nuibatin.

Judas 1:17

ꞌËn nuibacë xucë́antu, a unicamaxa usa ꞌaínbi camina mitsun, Nucën ꞌIbu Jesucristonëan aín bana ñuixunun caíscë unicaman mitsu ñuixuan banacama, a manuquinma sinánti ꞌain,

Judas 1:3

ꞌËn nuibacë xucë́antu, Jesucristomi catamëtia ca mitsun ꞌuchacama tërë́nquin ainan ꞌinun Nucën Papa Diosan mitsu ië́miaxa, ꞌë ꞌacësaribi oquin. Usami ꞌicë cana anun nux ië́ti banacama ñuiquin mitsu cuënëoxunti sinan. Usaquin sinánxunbi cana bëtsi bana pain mitsu buánmin, uni raírinëan Nucën Papa Diosan banamabi ñuicë bana a cuaxunma ꞌanun cananmi, Jesucristo ñui quicë bana, a Nucën Papa Diosan unicaman cuacë, ax ca asérabi ꞌicë quixuan camabi unin ꞌunánun, atu canun cana mitsu ënë quirica buánmin.

Judas 1:5

Upí oquinmi ꞌunáncëbi cana ënë ñucama mitsu sinánmitëcënin, Nucën ꞌIbu Diosan ca Israel unicama Egipto menua buánxunbi ami catamëtiama oquin raíri cëñuacëxa.