2 Pedro 1:11 - Kashibo-Kakataibo Biblia

¹¹ Usai ꞌitancëx camina Nucën ꞌIbu Jesucristo, an nun ꞌucha tërë́nquin Nucën Papa Diosnan ꞌinun nu ië́micë, an mëníosabi oi asérabi aín nëtënu abë cëñútimoi ꞌiti ꞌain.

Nukën 'Ibu Diosan ain unikama 'inan ain bana

¹¹ Usai 'itancëx camina Nucën 'Ibu Jesucristo, an nun 'ucha tërë́nquin Nucën Papa Diosnan 'inun nu ië́micë, an mëníosabi oi asérabi aín nëtënu abë cëñútimoi 'iti 'ain.

2 Pedro 1:11 ပူးပေါင်းရင်းမြစ်များ

Salmos 145:13

Mix ꞌapu ꞌia ax ka xënibua ꞌainbi mix ꞌapu ꞌiti ꞌikën, usa ꞌain ka kamabi unin rëbúnki ax mix kuëënkësabi oi ꞌiti ꞌikën.

Isaías 35:2

ꞌianan ka ro ua ax ꞌapákësa ꞌinun uábuti ꞌikën, usaía ꞌikëbë ka unikama ꞌitsaira kuëënti ꞌikën. Diosan ka a menu ni upíira ꞌimiti ꞌikë, Líbano menu ꞌikësa ꞌinun, ꞌimianan ka Carmelo kakë me upíira a ꞌimainun me sapan Sarón kakë usaribi ꞌimiti ꞌikën. Kamabi unikaman Nukën ꞌIbu ax ka kushiira ꞌianan, ꞌapuira ꞌikë kixun ꞌunánti ꞌikën.

Isaías 9:7

Ax ka anua David tsóa anubi tsóti ꞌikën; usa ꞌikë ka ax kushiira ꞌixuan ñu ꞌaia kamabi menuxun kuati ꞌikën ꞌimainun ka chuámarua uni tsóti ax këñutima ꞌikën; usa ꞌixun ka uínsaranbi axa ꞌapu ꞌia ax ënkëma anubi ꞌiti ꞌikën, usa ꞌain ka an ꞌakë ñukama ax upíokin ꞌakë ꞌianan, an bërí pëukin ñu ꞌakë ax uínsaranbi nëtë́tima usabi ꞌiti ꞌikën. Ësokin ka Dios kamabi kushiñuira an ꞌitsaira unikama nuibakin ꞌati ꞌikën.

Daniel 7:14

ꞌAmitankëxun ka uni apan an aín kushi ꞌinánkin axa ꞌapu chaiira ꞌi kushiira ꞌinun ꞌimianan, kamabi menu ꞌikë ꞌimainun bëtsi banan banakë unikaman ñu mëëxunkin rabinun ꞌimiaxa. Usa ꞌaish ka aín kushi ax ꞌiásabi kushiira ꞌiti ꞌikën, ꞌimainun ka uínbi ax ꞌapu ꞌikë uínsaranbi masókë ꞌitima ꞌikën.

Daniel 7:27

Usa ꞌain ka Dios manámi ꞌikë an a rabikë unikama atux kushiira ꞌixúan, xënibua ꞌaínbi bëtsi bëtsi menu ꞌikë ꞌapukama ꞌakinun ꞌimiti ꞌikën. Usokin ꞌakinkëxun ka kamabi menu ꞌikë unikaman ain bana tankin ax kikësabiokin ꞌakánti ꞌikën.

Mateo 25:34

Usai ꞌitancëxun cana ꞌëx ꞌApuira ꞌixun axa ꞌën mëqueu ꞌicë unicama cati ꞌain: ꞌËn Papa Diosan ca mitsu upí oquin sinánxunia. Mecama ꞌimainun anu ꞌicë ñucama unioquin ca an mitsu sinánxunquin anu mitsux abë ꞌiti mëníocëxa. Ax quiásabi oi camina bërí anu ꞌiti ꞌain.

Juan 10:10

Axa mëcamacë unicama, ax ca mëcamanan ꞌaracacë ñuina rëquin ꞌatimoi aia. Usa ꞌaínbi cana ꞌëx a unicaman ꞌacësa oquin ꞌaquinma ꞌëmi catamëtia upitax bucunun unicama ꞌimi uacën, bamatancëxribia xënibua ꞌaínbi Nucën Papa Diosbë ꞌinun.

Romanos 2:4

Camina ꞌunánti ꞌain, Nucën Papa Diosan ca mi nuibaíranan, mi ꞌatima ñu ꞌacë ꞌicëbi ꞌatimoquinma mix sinanati ami sinánun cainia. ¿Axa usa ꞌaínbi caramina min ꞌatima ñu ꞌacë ëni ami sinántisama tanin?

1 Corintios 15:24

Nucën Papa Dios axëshia ꞌApuira ꞌinun, ca Cristonën utëcënquin ñunshin ꞌatima ꞌimainun an Nucën Papa Dios quicësama oquin ënë nëtënuxun uni sinánmicë cushicama cëñuti ꞌicën.

2 Corintios 5:1

Cananuna ꞌunanin, bëráma unin ꞌá ꞌaísha xubu chëquicësaribiti ca nun nami anu nun bëru ñunshin ꞌicë ax ꞌia. Usaía nun nami ꞌiti ꞌaínbi ca Nucën Papa Diosan chëquitimoínu anu abë ꞌiti a aín nëtënu nu mëníoxuanxa. Ax ca unían ꞌacëma ꞌicën.

Efesios 3:20

Ax cushiira ꞌaish nubë ꞌixun ca Nucën Papa Diosan nun ñucácësamaira oquin nu ꞌaxúanan nun sináncësamaira oquinribi sinánxunquin nu ꞌaquinti ꞌicën.

1 Timoteo 6:17

Axa Jesucristomi catamëcë uni, ꞌitsa curíquiñu ꞌimainun ꞌitsa ñuñu ꞌicë camina ësaquin cati ꞌain: Curíquiñu ꞌixun camina —ꞌëx cana ñuñuira ꞌaish bëtsi unisama ꞌai —quixun sinántima ꞌain. Curíqui ꞌimainun ñucamaxribi ca nëtë́ti ꞌicën. Usa ꞌain camina min curíquimi catamëquin —uínbi ca ꞌë uisoima, añu ñu carana ꞌaisa tani a cana ꞌati ꞌai —quixun sinántima ꞌain. Usaquin sinánquinma camina Nucën Papa Dios an bamatimoi tsócë ꞌixun, anun nux chuámarua bucunun camabi ñu nu ꞌináncë, amishi catamëti ꞌain.

2 Timoteo 4:18

Usaquin ca Nucën ꞌIbu Jesucristonën ꞌë ꞌaquianxa. Usaribi oquin ca ꞌë ꞌaquintëcënquin uisa cara ocaniabi ꞌë ꞌaquinti ꞌicën. ꞌAquintancëxun ca ꞌëx aín nëtënu abë tsónun ꞌë ꞌimiti ꞌicën. Upíira ꞌicë ca cëñútimoquin unin Nucën Papa Dios rabiti ꞌicën. Usai ca ꞌiti ꞌicën.

2 Timoteo 4:8

Usa ꞌixun cana Nucën ꞌIbu Jesucristonën utancëxun, upí oquin ax cuëëncësabi oquin ꞌën ꞌacë cupí cara uisaira ꞌë ꞌimiti ꞌicë quixun isti ꞌain. An ca asérabi aín quicësabi oquin ꞌati ꞌicën. Usa ꞌixun ca ꞌëishima, an axa uti cuëënquin caíncë unicamaribi, utancëxun uisaira oquin cara aturibi ꞌimiti ꞌicë usoquin ꞌimiti ꞌicën.

Hebreos 6:17

Usaribiti ca Nucën Papa Dios axribi, axa ami catamëti ainan ꞌiti unicaman —aín quicësabi oi ca asérabi ꞌiti ꞌicë —quixun ꞌunánun, —xënibua ꞌaínbia sinanatëcëntimoi usabi ꞌiti ca ënë bana ꞌicë —quiax quiacëxa.

2 Pedro 1:1

ꞌËx cana Simón Pedro, ax cuëëncësabi oquin ꞌanan aín bana uni ñuixunuan Jesucristonën caísa ꞌain. An nu ië́micë Jesucristo, axbi Nucën Papa Diosribi ꞌaish upí ꞌixuan nu ꞌacësaribi oquin ainan ꞌinun ië́micë, mitsu cana ënë quirica buánmin.

2 Pedro 1:5

Usai mitsux Nucën Papa Diosmi catamëcë ꞌixun camina upí ꞌixun ënquinma ñu upíshi ꞌati sinánquin ꞌati ꞌain. Upí ñu ꞌacë ꞌixun camina Nucën Papa Dios cuëëncësabi oi caramina uisai ꞌiti ꞌai quixun ꞌunánti ꞌain.

2 Pedro 2:20

Ënëx ca ësa ꞌicën: Ui unicaman cara Nucën ꞌIbu Jesucristomi catamëquin ñu ꞌatima ꞌati ëncë ꞌixunbi amiribishi ñunshínquin ñu ꞌatima ꞌatëcënia, a unicamax ca bëráma ꞌiásamaira ꞌinun ꞌuchaia.

2 Pedro 3:18

Nucën ꞌIbu Jesucristo an Nucën Papa Diosnan ꞌinun mitsu ië́micë, ax quicësabi oi ꞌiti ꞌunánquinbi camina bëríbi ꞌunáncësamaira oquin ꞌunánti ꞌain. ꞌUnánan camina an ca mitsu nuibatia quixun ꞌunani ainainra ꞌiti ꞌain. Bërí ꞌacësaribi oquin ca usabi oquin nëtë xënibua ꞌaínbi camabi aín unicaman a rabiti ꞌicën. Ashi, Pedro.

Apocalipsis 3:21

ꞌAnan cana axa ꞌëmi catamëquin ꞌëx cuëëncësabi oi ꞌiti ëncëma unicamax ꞌëbë ꞌapu ꞌinun ꞌimiti ꞌain, ꞌëx tëmëraibi ax cuëëncësabi oi ꞌiti ëncëma ꞌicëa ꞌën Papan ꞌë abë ꞌapu ꞌinun ꞌimicësaribi oquin.

Apocalipsis 5:10

Ië́mianan camina atu Nucën Papa Diosbë ꞌapu ꞌinun ꞌimianan judíos sacerdotesa ꞌimiquin an Nucën Papa Diosbë banaquin a rabicë ꞌimian. Usaquinmi ꞌimicëx ca mibë ënë menu ꞌicë unicaman ꞌapusa ꞌiti ꞌain.