2 Corintios 4:4 - Kashibo-Kakataibo Biblia

⁴ Usaquin sináncë unicaman ca ñunshin ꞌatimanën ꞌapúan sinánmicëxun, uisairai cara aín ꞌucha tërë́ncë ꞌaish Nucën Papa Diossaribi, Cristo, ainan ꞌiti ꞌicë quixun ꞌunanima.

Nukën 'Ibu Diosan ain unikama 'inan ain bana

⁴ Usaquin sináncë unicaman ca ñunshin 'atimanën 'apúan sinánmicëxun, uisairai cara aín 'ucha tërë́ncë 'aish Nucën Papa Diossaribi, Cristo, ainan 'iti 'icë quixun 'unanima.

2 Corintios 4:4 ပူးပေါင်းရင်းမြစ်များ

1 Reyes 22:22

ñukákëxun ka ñunshin ꞌatimanën kakëxa, ꞌën kana an Dios kikë bana ñuikë unikama këmëkin ꞌapu Ahab paránun sinánmiti ꞌain kixun kaxa. Kakëxun ka Nukën ꞌIbun usakin sapi kamina paránti ꞌain, usakin ꞌai kamina kuanti ꞌain kixun kakëxa.

Isaías 6:10

Ënë unikama kamina upíokin sinánxuma ꞌanun ꞌimiti ꞌain; ꞌimianan kamina atun pabitan kuakinbia aín pabí xëpúkësa ꞌixuan kuakasmanun ꞌimiti ꞌain; ꞌimianan kamina iskinbia aín bëru bëpankësa ꞌixun iskasmanun ꞌimiti ꞌain. Usa ꞌixun ka kuatima ꞌianan istimabi ꞌikën, usai ꞌikin ka atun ꞌën bana kuatíbi ꞌëmi sinanatima ꞌikën, ꞌën atun ꞌakë ꞌuchakama mëníoxunun.”

Mateo 13:22

Muxañu menua nipacëcë ñu bëru usaribi ca raíri uni ꞌicën. A unicaman ca Nucën Papa Diosan bana cuaquin —a bana quicësabi oi cana ꞌiti ꞌai —quixun sinania. Usaquin sinanibi ca ënë menu ꞌicë ñuishi sinánan —ꞌitsa ñuñu ꞌaish cana cuëënti ꞌai —quixun sinani, ꞌitsa ñuñu ꞌiisa tanan bëtsi ñuribi cuëënia. Usa ꞌaish ca Nucën Papa Diosan sináncëxbi ñu bëru ꞌapácëa coiabi chucun mapurucësa usaribi ꞌaish bimiñumasa ꞌia.

Juan 1:14

Nucën Papa Diosan Bana a ca bëtsi tuásaribi ꞌinun xanun bacë́ancëxa, uni ꞌinun. Nucën Papa Diosan sinánsaribi ꞌixun ca ënë menu ꞌicë unicama abë ꞌixun nuibacëxa. Ax aín Bëchicë Achúshi ꞌaish aín Papa Diossaribi ꞌaish aín sinan upíira upí cananuna isacën.

Juan 1:18

Uinu ꞌicë unínbi ca Nucën Papa Dios isáma ꞌicën. Aín Bëchicë Achúshi, axa aín Papabë ꞌicë, an cuni ca uisa cara Nucën Papa Dios ꞌicë quixun nu ꞌunánmiacëxa.

Juan 12:31

Bërí ca ënë nëtënu ꞌicë unicama, cara ꞌëmi sinania, cara ꞌëmi sinanima quixun Nucën Papa Diosan isti ꞌicën. Isanan ca an ꞌëmi sináncëma unicaman ꞌapu, ñunshin ꞌatimanën ꞌapuribi ax cushi ꞌicëbi ꞌën unicama ꞌibuatimoquin ñusmoti ꞌicën.

Juan 12:35

Cacëxunbi ca Jesusan, ꞌëmi camina sinánti ꞌai quixun caquin ësaquin catëcëancëxa: —ꞌItsama nëtë́inshi ca an mitsu upí oquin sinánmiti, ax mitsubë ꞌiti ꞌicën. Usa ꞌain camina ax cuancëma pan ꞌain, an mitsu ꞌunánmicësabi oi ꞌiti ꞌain, ax cuancëbëmi usabi ꞌinun. A an ꞌunánmicëma uni, an ca uisai cara ꞌiti ꞌicë quixun ꞌunanima.

Juan 12:40

Nucën Papa Diosan ca acama atun nuitu mëu ꞌunántisama tanan atun pabitan cuaquinbi uisai quicë cara quixun ꞌunántisama tanun ꞌimiaxa. ꞌImianan ca atun bërun isquinbi, ꞌëx cana cushiira ꞌai quixun sinántisama tanía ꞌën ië́misama ꞌinun ꞌimiaxa.

Juan 12:45

An ꞌë iscë uni an ca Nucën Papa Dios, an ꞌë xuá, aribi isia.

Juan 14:30

Ënë banacamaishi cana mitsu cain. An ënë menu ꞌicë unicama ax cuëëncësa oquian ꞌanun ꞌamicë ꞌapu ca aia. Usa ꞌain cana bana itsiribi ñuiquin mitsu caiman. Uxunbi ca an ꞌë uisoima.

Juan 15:24

Atúan isnun ꞌën uni itsin ꞌacëma ñu ꞌacëma ꞌain ca atux usabi ꞌitsíanxa. Usa ꞌaínbi ca ꞌën ꞌacë ñucama isaxa. A cupí ca ꞌëmi nishanan ꞌën Papamiribi nishaxa.

Juan 16:11

An ënë nëtënu ꞌicë unicama ꞌibuacë ñunshin ꞌatimanën ꞌapu ca castícanuxun ꞌuchocë ꞌicën. Usa ꞌain ca axa ꞌëmi catamëcëma unicamanribi, usaribiti ca atux castícancë ꞌiti ꞌicë quixun ꞌunánti ꞌicën.

Juan 8:12

Usa ꞌain ca amiribishi Jesusan unicama cacëxa: —An aín sinan upíira ꞌixun uni upí ꞌimiti a cana ꞌëx ꞌain. Axa ꞌëmi catamëti ꞌëx cuëëncësabi oi ꞌicë uni ax ca ñu ꞌatima ꞌacëma ꞌianan aín sinan upí ꞌaish upiti tsotia.

Hechos 26:18

Minmi ꞌë ñuixuncëxa atux ñu ꞌatima ꞌatishi sinani bëánquibucënu nicësa ꞌaíshbi sinanaquin ñu upíshi ꞌati sinánun cana mi xutin, ñunshin ꞌatimanën ꞌapu Satanásnën ꞌibuacë ꞌaíshbi sinanatía Nucën Papa Diosnan ꞌinun. Usai ꞌëmi catamëcë ꞌaísha aín ꞌuchacama tërë́ncë ꞌinun cana atunu mi xutin. Usa ꞌain ca an mëníosabi oi atux aín unicamabë Nucën Papa Diosan nëtënu ꞌiti ꞌicën”.

Hechos 26:23

A banax ca ësai quia: Tëmëratancëx ca Cristo bamati ꞌicën. Bamatancëxa baísquia ꞌain ca usaribiti camabi uni bama ꞌaíshbi Cristo utëcëncëbë baísquiti ꞌicën. Usai baísquia ꞌixun ca Jesusan judíos unicamaishima judíosma unicamaribi sinanati ami catamëtía aín sinan upí ꞌinun ꞌimiti ꞌicën.

1 Corintios 10:20

Ësaquin cana mitsu cain, judíosma unibunëx Nucën Papa Diosmi sináncëma ꞌixun ñuina ꞌaxun unin ꞌacë ñu rabiquin ca Nucën Papa Dios rabiquinma ñunshin ꞌatima rabia. Usaribiquin ñunshin ꞌatima rabimi mitsux aín uni ꞌiti cana cuëëniman.

2 Corintios 2:11

Usoquin manucëma ꞌicë ca ñunshin ꞌatimanën ꞌapu, Satanás, an nu ꞌatimaquin sinánmiquin ꞌatimamiti ꞌicën. Usa ca ax ꞌicë quixun cananuna ꞌunan. An usoquin nu ꞌatimaquin sinánmiti rabanan cananuna aín ꞌucha manui a unibë upí ꞌiti ꞌain.

2 Corintios 2:12

Troas ëmanuxun Cristo ñuiquin bana ñuixunux bëbatancëxun, ax cuëëncësabi oquin ꞌën ñuixuncëxun cuati ca unicama cuëëanxa.

2 Corintios 3:11

Nucën Papa Diosan ꞌináncë bana uni ꞌináncëbë ichutibi ca Moisésnën bëmánan bënëtishi aín ichúcë nëtë́buacëxa. Usa ꞌainbi ca Cristo ñuicë bana axira bëtsi banasamaira upí ꞌain usai ami catamëtia uni upí ꞌiti ax nëtëtima.

2 Corintios 3:14

Israel unibunën ca uisashi oquin cara Nucën Papa Diosan atu upí ꞌimitisa tancëxunbi ꞌunánma ꞌicën. Usa ꞌaish ca bëmápucucësa ꞌiacëxa. Bërí nëtë́nribi ca a bana isquinbi cuatima. Cristomi catamëquin cuni ca unin, uisashi oquin cara Nucën Papa Diosan Moisés ꞌinan bana quicësabi oi ꞌinun aín unicama ꞌimiti ꞌicë quixun ꞌunánti ꞌicën.

2 Corintios 3:18

Usa ꞌain cananuna bëmápucucësama ꞌixun, Jesús ca asérabi Cristo ꞌicë quixun ꞌunani ami catamëti ainan ꞌain. Barían pëcaquin espejo ichucësaribi oquin ca Jesucristonënbi asaribi ꞌinun aín upí nu ꞌinania. Usaquian nu ꞌacëx cananuna bërámanu ꞌá ñucama ëuncubiani Jesucristo cuëëncësabi oi bëtsi sinánñu ꞌaish, asaribi ꞌin. Aín Bëru Ñunshin Upitanbia ꞌimicëx cananuna usai ꞌin.

2 Corintios 4:6

Nucën Papa Dios axa bëráma, “Bëánquibucë ca pëquiti ꞌicë” quiá, anbi ca Cristonëan nun nuitu mëúxun nu chuámashi tani cuëënquinu uisaira upí cara Nucën Papa Dios ꞌicë quixun ꞌunánun ꞌimiaxa.

Gálatas 1:4

Ënë menu ꞌicë ñuishi ꞌatia an sináncë unicaman ꞌacësaribi oquin ñu ꞌatima ꞌati rabanan nu ië́mi ca ax bamatsianxmabi nun ꞌucha cupí bamacëxa, Nucën Papa Dios cuëëncësabi oi.

Efesios 2:2

Ënë nëtënu ꞌicë ñuishia an sináncë unicaman sináncësa oquinshi sinánquin camina ñu ꞌaisama ꞌacën, ñunshin ꞌatimanën ꞌapu cuëëncësabi oquin. An ca an Nucën Papa Diosan bana cuaisama tancë unicama ax cuëëncësabi oquin ꞌanun sinánmia. Usaribiti camina mitsux an sinánmicë ꞌiacën.

Efesios 6:12

Nux cananuna suntárunëxa ꞌacanancësaribiti ꞌin. Usai ꞌibi cananuna unibë ꞌacananiman. Nun nuitu mëúishi cananuna ꞌacanáncësa ꞌain, ñunshin ꞌatimanën nu ꞌibuati rabanan. Aín ꞌapubë cushiquin ca ñunshin ꞌatimacaman nu ñu ꞌatima ꞌanun nu ꞌamitisa tania. Atun an ënë menuxun ñu atima ꞌacë unicama ꞌibuacë ꞌixun ca nuribi ñu ꞌatima ꞌamitisa tania.

Filipenses 2:6

Aribi ꞌaish Nucën Papa Diosbë ꞌixunbi ca —anu ꞌëx asaribi ꞌaish ꞌën Papa Diosbë ꞌicë ënë nëtë cana ëbiántima ꞌai —quixun sinánma ꞌicën.

Colosenses 1:15

Uinu ꞌicë unínbia Nucën Papa Dios istima ꞌaínbi ca unían uisa cara Nucën Papa Dios ꞌicë quixun ꞌunánun asaribi ꞌaish aín Bëchicë ënë menu uacëxa. Añu ñubi unitisama ꞌain ca axira pain aín Papabë ꞌiacëxa.

Colosenses 1:27

Uisaira upí cara a bana ꞌicë quixun ca Nucën Papa Diosan aín unicama ꞌunánmisa tancëxa. A banax ca judíosma unicamananribi ꞌicën. A banax ca ësai quia, Cristo ax ca mitsubë ꞌicën. Axa mitsubë ꞌain camina aín nëtënuribi abë ꞌiti ꞌain.

1 Timoteo 1:11

Axa usa ñu ꞌati ca ꞌaisama ꞌicë quicë bana, usaribiti ca Jesucristo ñui quicë bana, a uni ñuixunuan Nucën Papa Diosan ꞌë caíscë, ax quia.

Tito 2:13

Usaquin ꞌunánmianan ca nu ꞌunánmia, nux ainan ꞌixun cananuna ax quiásabi oía an nu ië́micë Jesucristo, ax Nucën Papa Diosribi ꞌaish, aín cushibëbi utëcënti nëtë caínti ꞌai quixun.

Hebreos 1:3

Nucën Papa Dios ax ca unin sinánsamaira ꞌaish upíira ꞌicën. Usa ꞌain ca aín Bëchicë Jesucristo axribi asaribi ꞌicën. Usa ꞌain ca uisa cara ax ꞌiacëxa quixun ꞌunánquin unin ꞌunánti ꞌicën, aín Papa Dios ax ca asaribi upí ꞌicë quixun. An unio ꞌixun ca an unio ñucama, aín banánbia usabi ꞌinun ꞌimia. Usa ꞌaish ca camabi unin ꞌucha tërë́ncë ꞌinun bamax baísquitancëx, aín Papan nëtënu cuan ꞌaish aín mëqueu abë ꞌApu ꞌicën.

Hebreos 6:4

Ui unicamax cara Jesucristomi catamëcë ꞌixun, ax ca abë ꞌicë quixun ꞌunáncë, ꞌianan Nucën Papa Diosan Bëru Ñunshin Upitan aín nuitu mëu sinánmicë ꞌianan,

2 Pedro 1:19

Usai banaia cuaquin cananuna ꞌunáncën, an Nucën Papa Dios quicë bana uni ñuixuncë unin cuënëo bana quiásabi oi ca Jesucristo ꞌiaxa quixun. Mitsúnmi upí oquin a bana sinánti ca asábi ꞌicën. Lamparinën bëánquibucënuxun pëcacëbëtan cananuna xubunu ꞌicë ñu upí oquin isquinmabi isin. Usaquin isquinbi cananuna barían pëcacëbëtainra upí oquin isin. Usaribi oquin camina a unicaman bëráma cuënëo bana ꞌunánquinbi asérabi mitsun nuitunubi Cristo ꞌicëbëtainra, uisai cara a bana quia quixun upí oquin ꞌunánti ꞌain.

1 Juan 2:11

Usa ꞌaínbi ca nuibatíma bëtsi unimi nishcë uni an Nucën Papa Diosbë upíma ꞌixun ñu ꞌatima ꞌatishi sináncë cupí sinánñumasa ꞌixun uisai cara ꞌiti ꞌicë quixun ꞌunanima.

1 Juan 2:8

ꞌËn mitsu ñuixuncë bana ióma ꞌaínbi camina a banabi mitsun ꞌásamaira oquin ꞌunáncë ꞌaish ax quicësabi oi ꞌin, Cristo ꞌiásaribiti. Usari ꞌi camina mitsun ñu ꞌatima ꞌacëcama ëni Nucën Papa Diosbë upí ꞌaish ax cuëëncësabi oi ꞌin.

1 Juan 5:19

Cananuna ꞌunanin, nuxnu Nucën Papa Diosnan ꞌaínbi ca camabi menu ꞌicë unicamax ainanma ꞌaish ñunshin ꞌatimanën ꞌapunan ꞌicë quixun.