2 Corintios 13:11 - Kashibo-Kakataibo Biblia

¹¹ ꞌËn xucë́antu, chuámashi camina ꞌicanti ꞌain. Añu ñucama cara ꞌaisama ꞌicë camina mëníoquin sinántëcëntima ꞌain, ꞌën mitsu cacë banacama cuati camina bëtsin sináncësabi oquin sinani nishananíma nuibananishi ꞌicanti ꞌain. Usai ꞌia ca Nucën Papa Dios, an aín unicama nuibaquin bënëtima chuámarua ꞌinun ꞌimicë, ax mitsubë ꞌiti ꞌicën.

Nukën 'Ibu Diosan ain unikama 'inan ain bana

¹¹ 'Ën xucë́antu, chuámashi camina 'icanti 'ain. Añu ñucama cara 'aisama 'icë camina mëníoquin sinántëcëntima 'ain, 'ën mitsu cacë banacama cuati camina bëtsin sináncësabi oquin sinani nishananíma nuibananishi 'icanti 'ain. Usai 'ia ca Nucën Papa Dios, an aín unicama nuibaquin bënëtima chuámarua 'inun 'imicë, ax mitsubë 'iti 'icën.

2 Corintios 13:11 ပူးပေါင်းရင်းမြစ်များ

Génesis 37:4

Aín papan atu ꞌakësamaira okin kuëënia ꞌunani ka aín xukë́n apankamax Josémi xuamati nishi nutsi a istisama tani abëbi banatisama tankëxa.

Génesis 45:24

Usakin ñukama ꞌinántankëxun ka Josénën kuantanun xukin aín xukë́nkama kakëxa: —Bainuax atumina kuani mëëanankanin. Kaxúan xukëx ka aín xukë́nkama rikiankëxa.

Mateo 1:23

Xanu achúshi unibë ꞌicëma pain ꞌaish ca tuñu ꞌitancëx bacë́nti ꞌicën. Aín tuá ax ca Emanuel caquin anëcë ꞌiti ꞌicën. Emanuel quicë ax ca “Nucën Papa Dios ca nubë ꞌicë” qui quicë ꞌicen.

Mateo 5:48

Usa ꞌain camina mitsun Papa Dios, axa naínu ꞌicë, an sináncësaribi oquin sinánti ꞌain.

Marcos 10:49

Usaía quia cuati niracëquin ca Jesusan —ꞌënu unun ca cat —quixun cacëxa. Cacëxun ca unicaman bëxuñu uni cacëxa: —Masá nuituáxma ca ꞌit. Mi ca cuënia, niruquiani ca anu cuantan.

Marcos 9:50

Ësa ca. Tashix ca asábi ꞌicën. Asábi ꞌaíshbia aín muca nëtëtia camina uisaxunbi amiribishi mucotëcëntima ꞌain. Mitsúxbi ca tashisa ꞌit. Bëtsibë nishananima ca nuibanani bucucan.

Lucas 9:61

Cacëbëtan ca uni itsínribi cacëxa: —ꞌËx cana mibë cuanti ꞌain, ꞌaínbi cana axa ꞌën xubunu ꞌicëcama pain bërúanxa ꞌinun cai cuanti ꞌain.

Juan 17:23

Mix ꞌëbë ꞌicësaribiti cana ꞌëx atubë ꞌain, atúxa asérabi nuibanani bëtsin ꞌacësaribi oquin sinani achúshisa ꞌinun. Atúxa usa ꞌain ca an min bana cuacëma unicaman ꞌunánti ꞌicën, asérabi camina min ꞌë xuacë quixun. ꞌUnánan ca, ꞌëmi ꞌacësaribi oquin camina an ꞌën bana cuacë unicama nuibati quixun ꞌunánti ꞌicën.

Hechos 15:29

Unínbia uniocë ñu a rabiquian ꞌacë ñuina a camina pitima ꞌain ꞌimainun camina ñuina imi pitima ꞌain ꞌimainun camina tëtsë́cacë ñuina pitima ꞌain ꞌimainun ca aín xanuma ꞌain uni xanubë ꞌitima ꞌicën. Ënë banacama cuati camina mitsux asábi ꞌiti ꞌain. Bërúanx camina ꞌicanti ꞌain”.

Hechos 18:21

Abë ꞌiquinma ëbianquin ca atu cacëxa: —Judíos unicama anun timë́ti nëtë sënë́ncëbë atubë Jerusalénu ꞌitancëx cana Nucën Papa Dios cuëëncëbë mitsu isi utëcënti ꞌain. Quixun cabiani ca Efesonuax cuancëxa.

Hechos 23:30

Judíos unicamaxa a ꞌacatsi quiax ami ꞌësë́nania ñuia cuaquin cana bënë́nquinshi minua cuanun Pablo xutin. Xuanan cana axa ami manáncë unicamaribi añu cupí cara ami ꞌësë́nania quixuan mi canun quixun minu xutin. Ënëishi cana mi cain”.

Romanos 12:16

Camina bëtsibë bëtsibë nishananíma nuibananishi upiti banati ꞌain. Usai ꞌi camina cërúananima, axa uni itsibëtan sënë́nmara unibë upí ꞌaish abë upiti banati ꞌain. Rabíquin camina —ꞌën cana uni itsin ꞌacësamaira oquin ñu ꞌunanin —quixun sinántima ꞌain.

Romanos 12:18

Mitsux camina ax paían mimi nishcëxma uni raírimi nishtima ꞌain. Usa ꞌaish camina atúxa mitsumi nishcëxbi mitsux abë nishanantima ꞌain.

Romanos 14:19

Usa uni ꞌixun cananuna camáxbia bëtsibë nuibananun uni raíri nuibaquin ꞌaquinti ꞌain. ꞌAquianan cananuna Cristomia upiti sinánun bëtsibë bëtsibë sinánmiananti ꞌain.

Romanos 15:13

Nucën Papa Diosan ca nu ꞌunánmia, an ca nu ꞌaquianan nux xënibua ꞌaínbi abë ꞌitioquin nu ꞌimia quixun. An mitsu ami catamëti cuëëni chuámarua ꞌaish bucunun ꞌimiti cana cuëënin. Mitsux usai ꞌiquin camina aín Bëru Ñunshin Upitan sinánmicëxun Nucën Papa Diosan ca asérabi ax quicësabi oquin ꞌaia quixun upí oquin ꞌunánti ꞌain.

Romanos 15:33

Nucën Papa Dios, an aín unicama bënëtíma chuámarua ꞌinun ꞌimicë, ax mitsubë ꞌixun mitsuribi usaquin ꞌimiti cana cuëënin. Usai ca ꞌiti ꞌicën.

Romanos 16:20

Usoquin mitsun ꞌacëbëtan ca Nucën Papa Dios, an aín unicama chuámarua ꞌimiti, an ñunshin ꞌatimanën ꞌapu mitsu ubíotëcënxunma ꞌanun bënë́nquinshi ñusmamiti ꞌicën. Nucën ꞌIbu Jesucristonën mitsu nuibaquin ꞌaquincëx mitsux upí ꞌiti cana cuëënin.

1 Corintios 1:10

Mitsux Jesucristomi sináncë ꞌaish camina ꞌën xucë́antu ꞌain. Usa ꞌicë cana Nucën ꞌIbu Jesucristo cuëëncësabi oquin mitsu ësoquin cain: Bëtsin sináncësaribi oquin sinani camina bucucanti ꞌain. Masáquin sinani camina bëtsibë nishanancantima ꞌain. Nishananíma nuibananshiti camina camaxunbi bëtsin sináncësa oquinshi sinani upitax bucucanti ꞌain.

2 Corintios 1:4

Uisa ñu cara ꞌia ꞌicëbënu a cupí tëmërai masá nuitutiabi ca Nucën Papa Diosan upí oquinu sinánun nu ꞌimia. An nu usaquin ꞌimicë cupí cananuna bëtsi uni nux ꞌicësaribitia tëmërai masá nuitutiabi, ꞌë ꞌaquincësaribi oquin ca Nucën Papa Diosan mi ꞌaquinti ꞌicë quixun caquin ꞌaquinti ꞌain. Usaquinu uni itsi ꞌaquinun ca Nucën Papa Diosan nuxnu masá nuitutiabi upí oquinu sinánun nu ꞌimia.

2 Corintios 13:14

Mitsux ꞌuchacëbi Nucën ꞌIbu Jesucristonën nuibaquin ië́micë ꞌicëa Nucën Papa Diosanribi nuibamainuan aín Bëru Ñunshin Upí axribi mitsubë ꞌicëbëmi chuámarua bucucanti cana cuëënin. Ashi, Pablo.

2 Corintios 13:9

Nux cushimasa ꞌixunbi ꞌaquincëxmi mitsux upí ꞌain cananuna cuëënin. Mitsun ñu ꞌatima ꞌacëcama mëníocë ꞌaish upíshi ꞌinun cananuna ënquinma Nucën Papa Dios mitsu ñucáxunin.

Efesios 4:12

Axa ami catamëcë unicaman upí oquin sinánan ax cuëëncësabi oquin ñu upíshi ꞌati ꞌaquinun ca Cristonën aín unicama bëtsi bëtsi ñu ꞌanun ꞌimia.

Efesios 4:3

Nucën Papa Diosan Bëru Ñunshin Upitan ꞌaquincëx camina bëtsin sináncësaribi oquin sinani achúshi sinánsa ꞌaish, ëníma bëtsibë bëtsibë nuibananti ꞌain. Usai ꞌiti sinani camina usaíbi ꞌiti ꞌain.

Efesios 6:23

Nucën Papa Diosbëtan Nucën ꞌIbu Jesucristonën ꞌimicë́xmi mitsux ꞌëx ꞌicësaribiti ami catamëcë ꞌaish ami sinánan bëtsibë bëtsibë nuibanani chuámarua ꞌaish upitax bucuti cana cuëënin.

Filipenses 1:27

Ësaíshi ꞌiti camina sinánti ꞌain, ainan ꞌaish camina Cristo quiásabi oi ꞌiti ꞌain. ꞌËx mitsu isi cuananbi, cuanquinmabi cana, mitsux camina bëtsibë nuibanani Jesucristomi catamënun ꞌaquianani quixuan unin ñuia cuaisa tanin.

Filipenses 3:16

Usa ꞌain cananuna uisai ꞌinun cara Nucën Papa Diosan nu ꞌunánmiaxa, usai ꞌiti ꞌain.

Filipenses 4:2

Evodiacëñun cana Síntiqueribi cain, mitsux cuamianancë ꞌaíshbi camina Nucën ꞌIbu Jesucristonan ꞌaish cuamiananima bëtsin sináncësabi oquin sinani nuibananti ꞌain.

Filipenses 4:4

Mitsux camina Nucën ꞌIbu Jesucristonan ꞌai quixun sinani camina camabi nëtën uisa ñu cara ꞌicëbëbi chuámarua tani cuëënti ꞌain. Usai ꞌinun caxunbi cana mitsu catëcënin, chuámarua ca ꞌican.

Filipenses 4:9

ꞌËn mitsu ꞌunánmicë banacama quicësabi oquin ꞌanan camina, ꞌën ꞌunánmicëxunmi ꞌacësabi oquin ꞌanan ꞌën mitsu ñuixuncëxunmi cuacë banacama quicësabi oquinribi ꞌanan ꞌën ꞌaiami iscësabi oquin ꞌati ꞌain. Usoquinmi ꞌacëbë ca Nucën Papa Dios, an aín unicama bënëtima chuámarua ꞌinun ꞌimicë, ax mitsubë ꞌiti ꞌicën.

1 Tesalonicenses 3:10

Jesucristomi catamëquin aín cuëëncësabi oi ꞌianan upí oquinra a ꞌunánun mitsu ꞌaquini cuanúan nu ꞌiminun quixun cananuna nëtën ꞌanan imë́ribi abë banaquin Nucën Papa Dios ñucatin.

1 Tesalonicenses 4:1

Nucën xucë́antu, Nucën ꞌIbu Jesús cuëëncësabi oquin ꞌësëquin cananuna ësaquinribi mitsu cain, uisai ꞌianan caramina uisaira oquinribi Nucën Papa Dios cuëëntanun ꞌati ꞌai quixunu mitsu ꞌunánmicësabi oquin ꞌaquinbi camina mitsun ꞌacësamaira oquin camabi nëtën ꞌati ꞌain.

1 Tesalonicenses 4:18

Usa ꞌain camina ënë bana, abëmi ꞌicë unicamabë masá nuituaxma ꞌinun quixun ñuixuni, sinánmiananti ꞌain.

1 Tesalonicenses 5:13

Atúan upí oquin mitsu ꞌaquincë cupí camina acama nuibaquin, asérabi ca upí uni ꞌicë quixun sinánquin, atun bana cuati ꞌain. Camina bëtsibë bëtsibë nishánanima upí onani chuámashi bucucanti ꞌain.

1 Tesalonicenses 5:16

Masá nuitutíma camina camabi nëtën cuëëni chuámashi ꞌicanti ꞌain.

1 Tesalonicenses 5:23

Nucën Papa Dios, an nu bënëtima chuámarua ꞌimiti, an mitsu upíshi ꞌinun ꞌimianan mitsun sinan, mitsun nuitu ꞌimainun mitsun namíxbia uisa ꞌuchañumabi ꞌinun mitsu ꞌimiti cana cuëënin, utëcënquian Nucën ꞌIbu Jesucristonën usa ꞌicë mitsu isti cupí.

2 Tesalonicenses 2:16

Usa ꞌain cana Nucën ꞌIbu Jesucristo ꞌimainun Nucën Papa Dios an nuibaquin nux chuámashi tani cuëënun ꞌimianan xënibua ꞌaínbi abë ꞌinun nu ꞌimicë,

2 Tesalonicenses 3:1

Nucën xucë́antu, ësaquinribishi cananuna mitsu cain, camabi menu ꞌicë unicaman nun Jesucristo ñuiquin bana ñuixunia cuanun camina Nucën Papa Dios nu ñucáxunti ꞌain, nun mitsu bana ñuixuncëxun cuaquinmi —a banax ca upíira ꞌicë —quixun caquin mitsun ꞌacësaribi oquian atunribi sinánun.

2 Tesalonicenses 3:16

Nucën ꞌIbu Jesucristo, an aín unicama bënëtima chuámarua ꞌinun ꞌimicë, anbia mitsúxribimi uisa ñu cara ꞌicëbëbi camabi nëtë chuámarua ꞌinun mitsu ꞌimiti cana cuëënin, axbi mitsubë ꞌiquin mitsu bërúanti cana cuëënin.

2 Timoteo 2:22

Bëná unicaman ñunshínquin ñu ꞌacë, usaribi oquin ꞌati sinántima cupí camina atumi ꞌunánti ꞌain. Usai ꞌi camina axa aín nuitu upí ꞌaish Nucën ꞌIbu Diosbë banacë unicamabëtan upí ñuishi ꞌanan Jesucristomi catamëti, abë nuibanani pëcananíma chuámashi ꞌiti ꞌain.

Hebreos 12:14

Nishananima camina upitaxëshi bucuti ꞌain. Aín ꞌucha ëncëma unix ca Nucën Papa Diosbë ꞌitima ꞌicën. Usa ꞌain camina nishananima upitax bucuquin uisa ꞌuchabi ꞌati sinántima ꞌain.

Hebreos 13:20

Nucën Papa Dios, an aín unicama abë upí ꞌinun ꞌimicë, an ca Nucën ꞌIbu Jesucristo, an aín unicama bërúainracë, a bamacëbi baísquimiacëxa. An Jesús aín imi ꞌapati bamacë cupí nun ꞌuchacama tërë́nquin nux xënibua ꞌaínbi ainan ꞌinun ꞌimicë,

Santiago 1:4

Mitsux usai ꞌinux camina ëníma Jesucristomi sinani uisa ñu cara ꞌicëbëbi masá nuitutima ami catamëcanti ꞌain.

1 Pedro 3:11

Ñu ꞌaisama ꞌati ënquin ca ñu upíshi ꞌati ꞌicën. Nishananíma ca unibë upíshi ꞌiti ꞌicën.

1 Pedro 3:8

Ënë banaribi cana mitsu cain, axa Jesucristomi catamëcë uni raírinën sináncësaribi oquin sinani camina atubë nuibananti ꞌain, atúxa mitsun xucë́nsaribi ꞌain. Camina bëtsibë camáxbi nuibanani ꞌaquianani rabítima ꞌain.

1 Pedro 5:10

Usabi ꞌinúxmabimi tëmëracë ca Nucën Papa Diosan mitsu cushioquin Jesucristosaribi upí ꞌinun mitsu ꞌimianan —aín bana quicësabi oi cana asérabi ꞌiti ꞌai —quixun ꞌunani ami cushinun mitsu ꞌimiti ꞌicën. Ax ca an mitsu nuibaquin ꞌaquincë ꞌianan Jesucristonan cupí abë́mi xënibua ꞌaínbi upitax ꞌinun caíscë a ꞌicën.

Apocalipsis 22:21

Nucën ꞌIbu Jesucristonën aín uni ꞌicë mitsu nuibaquin ꞌaquincëxmi upí ꞌiti cana cuëënin. Usai ꞌiti cana cuëënin. Ashi.